སྲིད་སྐྱོང་གི་གསུང་བཤད།

འོས་སྦྱོར་བ། རྒྱང་མིག

དབུ་མའི་ལམ་ལ་གོ་ནོར་ཐེབས་མཁན་ཚོར་འགྲེལ་བཤད་བརྒྱབ་ཡོད།

དྷ་སྟེང་བོད་ཁྱིམ་དུ་༧གོང་ས་མཆོག་གིས་སློབ་ཕྲུག་ཚོར་ནང་ཆོས་ངོ་སྤྲོད་སྐབས་སྲིད་སྐྱོང་མཆོག་གིས་དབུ་མའི་ལམ་གྱི་དྲ་རྒྱ་དབུ་འབྱེད་དང་འབྲེལ་ནས་རྒྱལ་སྤྱིའི་ཐོག་རྒྱ་ནག་གི་འཁྱོག་བཤད་འོག་དབུ་མའི་ལམ་ལ་གོ་ནོར་ཐེབས་ཉེན་ཡོད་ཐེངས་འདིར་ཡིག་ཆ་ཁག་ཕྱོགས་སྒྲིག་གིས་བདེན་པ་ར་སྤྲོད་བྱས་ཡོད་གསུངས་སོང་།

དྷ་སྟེང་བོད་ཁྱིམ་སློབ་གྲྭར་༧གོང་ས་མཆོག་གིས་བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་གནང་བའི་ཉིན་གཉིས་པ་སྟེ་ཚེས་༥ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་དབུ་མའི་ལམ་གྱི་དྲ་རྒྱ་དབུ་འབྱེད་སོགས་སྔ་དྲོའི་ལས་རིམ་གྲུབ་རྗེས། ཕྱི་དྲོའི་ཆུ་ཚོད་ ༣ པའི་སྟེང་། སྲིད་སྐྱོང་བློ་བཟང་སེང་གེ་མཆོག་གིས་སློབ་ཕྲུག་ཚོར་དབུ་མའི་ལམ་གྱི་སྐོར་དང་། ཤེས་ཡོན་སློབ་སྦྱོང་སྐོར། དོལ་རྒྱལ་སྐོར་བཅས་ཀྱི་ཐོག་གཏམ་བཤད་གནང་བ་འོག་ཏུ་བསྡུ་སྒྲིག་གིས་འཁོད་ཡོད།

གཏམ་བཤད་ཀྱི་ཐོག་མར་ནང་ཆོས་གོ་སྒྲིག་ཚོགས་ཆུང་གི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་ཀྱིས་<ང་ཚོའི་སྤྱི་ཚོགས་ནང་ཤེས་ཡོན་ཡོད་མེད་མང་པོ་ཞིག་གིས་དོལ་རྒྱལ་གནད་དོན་འདི་༧རྒྱལ་བ་རིན་པོ་ཆེའི་བཀའ་རེད་ཟེར་བ་ཙམ་ལས། དོན་དངོས་ཐོག་ནས་ཆབ་སྲིད་ཀྱི་དཀའ་ངལ་ག་ཚོད་ཅིག་ཆགས་ཀྱི་ཡོད་མེད་ཞེ་དྲག་གནད་འགག་ཏུ་རྩི་ཡི་མེད་པ་དང་། ཁག་ཅིག་གིས་དོལ་རྒྱལ་གྱི་གནད་དོན་འདི་ཆོས་ཀྱི་གནད་དོན་རེད་བསམ་ནས་དོ་སྣང་མི་བྱེད་པ་སོགས་ཡོང་གི་འདུག འདི་མ་འོངས་པར་དཀའ་ངལ་ཆེན་པོ་ཞིག་ཏུ་འགྱུར་མི་སྲིད་པ་མིན་སྟབས་དེ་རིང་ཆེད་དུ་གོ་སྒྲིག་བྱས་པ་ཡིན་ཞེས་སོགས་བརྗོད་སོང་།

སྲིད་སྐྱོང་མཆོག་གིས་དབུ་མའི་ལམ་གྱི་སྐོར་གསུངས་དོན། གཞི་རྩའི་དོལ་རྒྱལ་དང་འབྲེལ་བའི་ཐོག་ནས་དོན་ཚན་འགའ་ཤས་ཞུས་ན་བསམ་སོང་། དེ་རིང་ཞོགས་པར་༧གོང་ས་མཆོག་གིས་བཀའ་གནང་བ་ནང་བཞིན་རེད། ད་རེབ་ང་ཚོས་དབུ་མའི་ལམ་གྱི་གོ་རྟོགས་ལས་འགུལ་ཞིག་སྤེལ་བ་རེད། དེ་གང་ཡིན་ཟེར་ན། ང་རྒྱལ་ཁབ་མང་པོ་ཞིག་ལ་སྐོར་བ་བརྒྱབ་པ་ཡིན་ན་རེད། དེ་བཞིན་བཀའ་བློན་རྣམ་པ་དང་སྤྱི་འཐུས་རྣམ་པ་གང་དུ་ཕེབས་པ་ཡིན་ན་རེད། ད་ལྟའི་ཆར་དབུ་མའི་ལམ་གྱི་སྐོར་མཁྱེན་མཁན་མང་པོ་ཡོད་པ་གང་ཞིག་ལ། དབུ་མའི་ལམ་མ་མཁྱེན་མཁན་ཚོར་ཉེན་ཁ་ཟེར་ན་འདྲ། སེམས་འཚབ་བྱེད་དགོས་པ་དེ་དབུ་མའི་ལམ་ལ་གོ་ནོར་ཐེབས་པ་མང་པོ་ཞེ་དྲག་ཡོད་པ་རེད། དེར་བརྟེན། ད་ལམ་ང་ཚོས་དབུ་མའི་ལམ་གྱི་ཡིག་ཆ་ག་རེ་ཡོད་པ་བརྙན་འཕྲིན་ཕྱོགས་སྒྲིག་བྱས་ཏེ་དྲ་རྒྱ་གཅིག་ནང་སྐད་ཡིག་བདུན་ནང་བསྒྱུར་ཡོད་སྟབས། རྒྱལ་སྤྱིའི་སྡིངས་ཆའི་ཐོག་ནས་གོ་རྟོགས་སྤེལ་བར་ཕན་གྱི་རེད་བསམ་ནས་ལས་འགུལ་སྤེལ་བ་རེད། དེ་བཞིན། རྒྱ་ནག་གཞུང་དང་གཞུང་ཚབ་ཚོ་གང་དུ་ཕྱིན་ཡང་དབུ་མའི་ལམ་ལ་འགྲེལ་བཤད་ལོག་པ་བརྒྱབ་ནས་མི་མང་དང་རྒྱལ་སྤྱིའི་སྡིངས་ཆར་གོ་ནོར་ཐེབས་པ་ཡོང་གི་འདུག འདི་དག་ལ་གདོང་ལེན་བྱེད་ཆེད་ང་ཚོས་ལས་འགུལ་འདི་སྤེལ་བ་ཡིན། ད་ནིང་ཞོགས་པ་ནས་བཟུང་རྒྱལ་སྤྱིའི་ནང་གྲགས་ཅན་གསར་ཁང་ནེའུ་ཡོག་དུས་བབ་དང་གྷར་ཌིན་ (The Guardian)། དངུལ་རྩིས་དུས་བབ་( Financial Times)། རོའུ་ཊར་(Reuters)བཅས་ཀྱི་གསར་འགོད་པ་མང་པོ་ཕེབས་ཏེ་དོ་སྣང་ཆེན་པོ་བྱེད་ཀྱི་འདུག ཁྱེད་ཚོའི་དབུ་མའི་ལམ་ཞེས་བའི་དབུ་དེ་དཀྱིལ་ཟེར་གྱི་ཡོད་ན། དཀྱིལ་མ་དེ་གང་ཞིག་རེད་ཟེར་ན། རྒྱ་ནག་གིས་ད་ལྟ་བོད་ནང་དྲག་གནོན་སྲིད་བྱུས་དང་རྒྱ་ནག་ནས་ཁ་བྲལ་རྒྱུ་གཉིས་ཀྱི་དབར་ལ་དབུ་ཟེར་གྱི་ཡོད། དྲག་གནོན་སྲིད་བྱུས་ག་རེ་ཡོད་པ་རེད་ཟེར་ན། ཆབ་སྲིད་དམ་དྲག་དང་སྤྱི་ཚོགས་དབྱེ་འབྱེད། དཔལ་འབྱོར་དབྱེ་འབྱེད། ཁོར་ཡུག་གཏོར་བཤིག རིག་གཞུང་རྩ་མེད་སོགས་བྱེད་ཀྱི་ཡོད། དེ་བཞིན་ཉེ་བའི་ཆར་བོད་<ནང་རང་ལུས་མེར་བསྲེགས་གནང་མཁན་ ༡༣༠ བྱུང་བ་དང་། རྒྱ་ནག་གི་བཙོན་ཁང་ནས་བོད་མི་མང་པོ་ཞིག་ལ་ཉེས་རྡུང་བཏང་ནས་དཀའ་སྡུག་མྱངས་དང་མྱོང་བཞིན་ཡོད་སྟབས། དཀའ་ངལ་དེ་དག་མཚམས་འཇོག་དང་། བོད་མི་ཚོར་གཞི་རྩའི་རང་དབང་སྒྲུབ་ཐུབ་པར་བྱེད་རྒྱུ་ང་ཚོར་འགན་ཡོད། དེར་བརྟེན། དབུ་མའི་ལམ་གྱི་ཐོག་ནས་སྲིད་བྱུས་ལག་ལེན་བསྟར་པ་ཡིན་ན། ཁ་ཡོད་ལག་ཡོད་ཐོག་ནས་རེ་བ་ཆེན་པོ་ཡོད་པ་འདི་གཙོ་བོ་རེད། དབུ་མའི་ལམ་ཟེར་ནས་སྲིད་བྱུས་དེ་བདུན་ཅུ་དོན་གྲངས་ནས་༧གོང་ས་མཆོག་གིས་དབུས་པའི་བཙན་བྱོལ་ནང་གི་གནད་ཡོད་མི་སྣ་མང་པོ་ཞིག་གིས་བཀའ་བསྡུར་གནང་བ་དེར་བོད་ནང་གི་བོད་མི་མང་པོ་ཞིག་གིས་རྒྱབ་སྐྱོར་གྱི་རྣམ་པ་གསལ་བོ་ཞེ་དྲག་བྱུང་པ་རེད། དེ་བཞིན། ཉེ་ཆར་རྒྱ་རིགས་རྩོམ་པ་པོ་ནོ་བྷེལ་ཞི་བདེ་གཟེངས་རྟགས་བཞེས་མཁན་ལེའུ་ཞོ་པོ་གཙོས་ཤེས་ཡོན་ཅན་མང་པོ་ཞིག་གིས་ཀྱང་རྒྱབ་སྐྱོར་ཡོད་ཅེས་ཤོད་ཀྱི་ཡོད་པ་རེད། ཉེ་ཆར་ཨ་རིའི་སྲིད་འཛིན་ཨོ་བྷ་མ་༧གོང་ས་མཆོག་ལ་མཇལ་འཕྲད་གནང་སྟེ། ཨོ་བྷ་མ་རང་གིས་ཕོ་བྲང་དཀར་པོའི་གསར་འགོད་གསལ་བསྒྲགས་ནང་དབུ་མའི་ལམ་ལ་རྒྱབ་སྐྱོར་ཡོད་ཅེས་འཁོད་པ་རེད། ཡུ་རོབ་མཐུན་ཚོགས་ཀྱི་གྲོས་ཚོགས་ནང་ཡང་དབུ་མའི་ལམ་དང་འབྲེལ་མོལ་ཐོག་ནས་བོད་དོན་སེལ་བར་རྒྱབ་སྐྱོར་ཡོད་ཅེས་ཡུ་རོབ་རྒྱལ་ཁབ་ཁག་མང་པོས་གསལ་བོ་ཞེ་དྲག་བཟོས་ཡོད་རེད། རྒྱལ་སྤྱིའི་ཐོག་ནས་དབུ་མའི་ལམ་ལ་རྒྱབ་སྐྱོར་ཡོད་པ་གསལ་བོ་རེད། ཅེས་གསུངས་སོང་།

ཡང་སྲིད་སྐྱོང་མཆོག་གིས་དབུ་མའི་ལམ་དང་རང་བཙན་གཉིས་གཤིབ་བསྡུར་གྱི་ཚུལ་དུ་གསུངས་དོན། རང་བཙན་རྩོད་ཀྱི་ཡིན་ལབ་པ་ཡིན་ན་གང་ལ་གང་འཚམ་བསྒུག་དགོས་རེད། ཨ་རིས་ང་ཚོར་རྒྱབ་སྐྱོར་བྱེད་རྒྱུ་ཡིན་ཟེར་གྱི་འདུག་གམ། དེར་བརྟེན། རང་བཙན་རྩོད་ཆོག་གི་མེད་ཅེས་སུ་གང་གིས་ཀྱང་གསུང་གི་ཡོད་པ་མ་རེད་ལ། ལོ་རྒྱུས་ཐོག་ནས་བོད་ལུང་པ་རང་བཙན་ཡིན་པ་གསལ་བོ་ཞེ་དྲག་རེད། རང་བཙན་རྩོད་པའི་ཐོབ་ཐང་ཡོད་པ་༧གོང་ས་མཆོག་གིས་དུས་རྟག་ཏུ་གསུང་གི་ཡོད་པ་རེད། ད་ལྟའི་ཆར་དབུ་མའི་ལམ་ཟེར་བ་དེ་རྒྱལ་སྤྱི་དང་རྒྱ་ནག བོད་པའི་སྤྱི་ཚོགས་ཁྱོན་ཡོངས་ནས་རྒྱབ་སྐྱོར་བྱེད་དགོས་པ་དེ་༧གོང་ས་མཆོག་ལ་དད་གུས་དང་བརྩི་བཀུར་གཅིག་པུའི་ཐོག་ནས་མ་རེད། དེའི་ནང་དོན་ཧ་གོ་བའི་ཐོག་ནས་བོད་ནང་གི་བོད་མི་ཚོའི་དཀའ་ངལ་མགྱོགས་མྱུར་ངང་སེལ་བའི་ཐབས་ལམ་ཡག་ཤོས་སུ་ངོས་འཛིན་གནང་གི་ཡོད་པ་རེད། དཔེར་ན། ༡༩༥༤ ལོར་རྒྱ་གར་དང་རྒྱ་ནག་གཉིས་བར་ཞི་བའི་གྲོས་འཆར་དོན་ཚན་ལྔ་( Panchsheel Treaty)བཞག་པ་རེད། དེའི་ནང་རྒྱ་གར་དང་རྒྱ་ནག་ཕན་ཚུན་གྱི་བདག་དབང་ལ་གནོད་སྐྱོན་བྱེད་ཀྱི་མེད་ཅེས་འཁོད་པ་རེད། དེ་<བཞིན་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དོན་ཚན་གཉིས་པའི་ནང་གསེས་བཞི་པར་མཉམ་འབྲེལ་རྒྱལ་ཚོགས་ཀྱི་འཐུས་མི་གང་ཡིན་གྱི་བདག་དབང་ལ་གནོད་སྐྱོན་བྱེད་མེད་ཅེས་འཁོད་ཡོད་པ་རེད། དེར་བརྟེན། རྒྱལ་ཁབ་གཅིག་གི་བདག་དབང་ལ་གནོད་སྐྱོན་བྱེད་མེད་ཟེར་དུས་ང་ཚོས་རང་བཙན་རྩོད་རྒྱུ་ཡིན་ལབ་ན། མཉམ་འབྲེལ་རྒྱལ་ཚོགས་ཀྱི་ཁྲིམས་ཡིག་ཡོངས་རྫོགས་དང་རྒྱ་གར་ལྟ་བུ་ཡིན་ནའང་ང་ཚོར་རྒྱབ་སྐྱོར་བྱ་རྒྱུ་དཀའ་ལས་ཁག་པོ་ཆགས་ཀྱི་ཡོད་པ་རེད། ཅེས་གསུངས་སོང་།

སྲིད་སྐྱོང་མཆོག་གིས་སློབ་ཕྲུག་ཚོའི་སློབ་སྦྱོང་ལ་ཆེད་དམིགས་ཀྱིས་གསུངས་དོན། ད་ལོ་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་ཕྱོགས་གཅིག་ནས་ཡག་པོ་བྱུང་འདུག ད་ལོར་བརྒྱ་ཆ་ ༩༠ ཡན་ལེན་མཁན་སློབ་ཕྲུག་བཅུ་ཡོད། ན་ནིང་བཅུ་གཅིག་ཡོད་པ་ལས་གཅིག་ཉུང་དུ་ཕྱིན་འདུག ཡིན་ནའང་ཡག་པོ་ག་རེ་འདུག་ཟེར་ན། ན་ནིང་བརྒྱ་ཆ་ ༩༠ ལེན་མཁན་སློབ་ཕྲུག་མང་ཆེ་བ་ཚན་རིག་སྡེ་ཚན་རེད། ད་ལོ་ཚན་རིག་དང་སྒྱུ་རྩལ། ཚོང་རིག་སྡེ་ཚན་བཅས་རེ་རེའི་ནང་བརྒྱ་ཆ་ ༩༠ ལེན་མཁན་སློབ་མ་གསུམ་གསུམ་བྱུང་སྟེ། དགའ་ལྡན་ཕོ་བྲང་གི་བྱ་དགའ་རག་མཁན་སློབ་མ་དགུ་བྱུང་ཡོད། ཡིན་ནའང་། བརྒྱ་ཆ་ ༩༥ ལོན་མཁན་གཅིག་ཀྱང་མེད་མ་ཟད་ཁ་སང་གསར་འགོད་གསལ་བསྒྲགས་ནང་ཡོད་པའི་སློབ་ཕྲུག་ཅིག་ལ་བརྒྱ་ཆ་ ༩༤.༦ ལོན་འདུག ཁོ་མོན་གྷོ་གཏན་སློབ་ནས་ཡིན་པའི་བལ་ཡུལ་སློབ་མ་ཅད་ཏི་རེ་རེད། རྗེས་མ་ལོར་ཁྱེད་རང་ཚོ་འཛིན་རིམ་བཅུ་གཉིས་ཡིན་མཁན་ཚོས་ཡིག་རྒྱུགས་ཡག་པོ་གཏོང་མ་གཏོགས་ཅད་ཏི་རེ་དང་ཤཱར་མ་(Sharma)། ཀའུ་མཱར་ (Kumar)བཅས་ཀྱིས་བརྒྱ་ཆ་ ༩༥ ལོན་ཡོང་། ད་ལོ་བརྒྱ་ཆ་ ༩༥ ལོན་མཁན་བྱུང་བ་སུ་རེད་ཟེར་ན། ཀའུ་མཱར་རེད། ཤཱར་མ་རེད། རྟ་མང་རེད་ལབ་དུས་བསྟན་འཛིན་དང་ལྷ་མོ། སྒྲོལ་མ་མེད་ན་ངོ་ཚ་བོ་རེད། དེ་འདྲ་ཡིན་དུས་རྗེས་མ་ལོར་ཚང་མས་ཤུགས་རྒྱག་རོགས། གཞན། ༢༠༡༠ ལོར་བརྒྱ་ཆ་ ༧༥ ལེན་མཁན་སློབ་ཕྲུག་ ༡༢༧ བྱུང་འདུག ད་ལོར་བརྒྱ་ཆ་ ༧༥ ལེན་མཁན་སློབ་ཕྲུག་ ༣༢༡ བྱུང་ཡོད། སྦྱི་ཡོངས་ནས་ལོ་རེར་བརྒྱ་ཆ་ ༧༥ ལེན་མཁན་སློབ་ཕྲུག་མང་དུ་འགྲོ་བཞིན་ཡོད་སྟབས། སློབ་ཕྲུག་ཚོས་སློབ་སྦྱོང་ལ་དོ་སྣང་དང་དཀའ་ལས་རྒྱག་གི་ཡོད་པ་གསལ་བོ་ཞེ་དྲག་རེད་ལ། སློབ་གྲྭའི་འགན་འཁུར་མཁན་དང་དགེ་རྒན། ཁྱིམ་ཚང་མ་མ་སྤྱི་ཡོངས་ནས་དཀའ་ངལ་བརྒྱབ་ནས་གྲུབ་འབྲས་སྨིན་གྱི་ཡོད་པར་བསྔགས་བརྗོད་བྱེད་ཀྱི་ཡོད། ཅེས་སོགས་གསུངས་སོང་།

མཇུག་ཏུ་སྲིད་སྐྱོང་མཆོག་གིས་དོལ་རྒྱལ་སྐོར་ལ་གསུངས་དོན། ཉེ་བའི་ཆར་དོལ་རྒྱལ་རྗེས་འབྲང་པ་ཚོས་༧གོང་ས་མཆོག་ཆིབས་བསྒྱུར་གང་དུ་གནང་བར་ངོ་རྒོལ་གྱི་རྣམ་པའི་སྐད་འབོད་བྱས་ཡོད་སྟབས། ཁ་སྔོན་བཀའ་ཤག་གིས་གསར་འགོད་གསལ་བསྒྲགས་ཤིག་སྤེལ་ཏེ་གསལ་བཤད་བྱས་པ་ཡིན། ཉེ་ཆར་ནོར་ཝེའི་ནང་༧གོང་ས་མཆོག་ཆིབས་བསྒྱུར་གནང་སྐབས་ཐབས་སྐྱོ་བའི་གནས་ཚུལ་ག་རེ་བྱུང་བ་རེད་ཟེར་ན། ནོར་ཝེའི་མི་མང་གིས་དགའ་བོས་ངང་ཕེབས་བསུ་ཞུས་པ་ རེད། གསར་འགྱུར་བརྒྱུད་ལམ་ཁག་གིས་ཀྱང་བསྔགས་བརྗོད་བྱས་པ་མ་ཟད་ནོར་ཝེའི་གཞུང་གི་མགོ་ཁྲིད་ཚོས་༧གོང་ས་མཆོག་ལ་མཇལ་འཕྲད་གནང་དགོས་ཞེས་ཤུགས་ཆེན་པོ་ཐོན་པ་རེད། འོན་ཀྱང་། དོལ་རྒྱལ་པ་ཚོས་གསར་འགོད་པར་ནོར་ཝེའི་གཞུང་གི་གནད་ཡོད་མི་སྣས་༧གོང་ས་མཆོག་ལ་མཇའ་འཕྲད་གནང་གི་མེད་ཟེར་བར་རྒྱབ་སྐྱོར་ཡོད་ཅེས་བཤད་པ་རེད། དེས་ག་རེ་སྟོན་གྱི་ཡོད་པ་ཟེར་ན། དོལ་རྒྱལ་རྗེས་འབྲང་ཚོས་ཁ་ནས་ཆོས་དད་རང་དབང་མི་འདུག་ཅེས་བཤད་ཀྱི་ཡོད་ཀྱང་དོན་དངོས་ཐོག་རྒྱ་ནག་གཞུང་གིས་ཆབ་སྲིད་ཀྱི་བེད་སྤྱོད་འོག་ཚུད་དེ། ཆབ་སྲིད་རང་གི་ལས་འགུལ་སྤེལ་གྱི་ཡོད། དོལ་རྒྱལ་ཆོས་ཀྱི་འབྲེལ་བ་གཅིག་པོ་མིན་པར་ཆབ་སྲིད་དང་འབྲེལ་བ་ཆགས་ཡོད། དེ་ནི་བློ་ཕམ་པའི་གནས་ཚུལ་ཞིག་རེད། འདི་ཆོས་དང་འབྲེལ་བ་མེད་པར་ཆབ་སྲིད་རང་རེད། དེ་འདྲ་སོང་ཙང་། གཞོན་སྐྱེས་དང་མི་མང་གིས་མཁྱེན་དགོས་པ་ཤིན་ཏུ་གལ་ཆེན་པོ་རེད། ཅེས་གསུངས་སོང་།

ཁོང་གིས་མུ་མཐུད་དུ། དོལ་རྒྱལ་སྟེན་མཁན་ཚོས་ག་རེ་བཤད་ཀྱི་ཡོད་ཟེར་ན། ཁོ་ཚོར་ཆོས་དད་རང་དབང་མི་འདུག ཆོས་བྱེད་ཆོག་གི་མེད་པ་དང། གཞིས་ཆགས་ལ་སྡོད་ཆོག་གི་མེད། སློབ་གྲྭའི་ནང་འགྲོ་ཆོག་མེད་པར་སློབ་གྲྭ་ནས་འཕུད་ཀྱི་ཡོད་པ་རེད་བཅས་ཁུངས་མེད་ཀྱི་སྐྱོན་འཛུགས་བྱེད་བསྡད་ཡོད། ཁོ་ཚོར་ཆོས་དད་རང་དབང་ཡོད་མ་རེད་ཅེས་བཤད་ཀྱི་ཡོད་པར་ཁ་སྔོན་བཀའ་ཤག་གི་གསལ་བཤད་ནང་ལ་གསལ་བོ་ཞེ་དྲག་ཞུས་ཡིན། བོད་མི་སུ་ཞིག་ཡིན་རུང་གཞིས་ཆགས་གནས་དགོས་པ་དང་སློབ་གྲྭར་འགྲོ་དགོས་ཀྱི་ཡོད་ན་དཔྱ་ཁྲལ་ལག་དེབ་དགོས་ཀྱི་ཡོད། དཔྱ་ཁྲལ་ལག་དེབ་དེ་གཞི་རྩའི་ས་གནས་ཀྱི་ས་གནས་མགོ་འཛིན་གྱིས་རྒྱབ་སྐྱོར་བྱེད་ཀྱི་ཡོད་པ་རེད་ལ་དཔལ་འབྱོར་ལས་ཁུངས་ནས་གནང་གི་ཡོད་པ་རེད། དཔྱ་ཁྲལ་ལག་དེབ་གནང་སྐབས་དོལ་རྒྱལ་སྟེན་མཁན་ཡིན་མིན་གྱི་ཐོག་ནས་དཔལ་འབྱོར་ ལས་ཁུངས་ཀྱིས་དབྱེ་བ་བྱེད་ཀྱི་ཡོད་པ་མ་རེད། དེ་བཞིན་བོད་མིར་རྒྱ་གར་ལུང་པར་སྡོད་པར་སྐྱབས་བཅོལ་ལག་དེབ་དགོས་ཀྱི་ཡོད། སྐྱབས་བཅོལ་ལག་ཁྱེར་དེ་རྒྱ་གར་གཞུང་གིས་གནང་གི་ཡོད་ཀྱང་རྒྱབ་གཉེར་ས་གནས་མགོ་འཛིན་དང་བདེ་སྲུང་ལས་ཁུངས་ནས་གནང་གི་ཡོད་སྟབས། དོལ་རྒྱལ་སྟེན་མཁན་ཡིན་མིན་གྱི་ཐོག་ནས་དབྱེ་བ་བྱེད་ཀྱི་ཡོད་མ་རེད། དེ་བཞིན་ཕྱི་རྒྱལ་དུ་འགྲོ་བར་དེབ་སེར་བོ་(I.C)དགོས་ཀྱི་ཡོད། དེབ་སེར་པོ་ཞུ་བར་ལྡི་ལི་དོན་གཅོད་ཁང་གིས་རྒྱབ་གཉེར་འོག་རྒྱ་གར་གཞུང་གིས་གནང་གི་ཡོད་པ་རེད། དེ་ལའང་དབྱེ་བ་བྱེད་ཀྱི་མེད། ང་ཚོས་དངོས་གནས་དམ་དྲག་བྱས་ནས་འགོག་དགོས་ཀྱི་ཡོད་ན་བཀག་ཆོག་གི་རེད་དེ། འོན་ཀྱང་ང་ཚོས་དུས་ནམ་ཡང་བཀག་འགོག་དབྱེ་འབྱེད་བྱས་མྱོང་ཡོད་པ་མ་རེད། ཁ་ཡོད་ལག་ཡོད་གནད་འགག་ཆེ་བའི་ཡིག་ཆ་དཔྱ་ཁྲལ་ལག་དེབ་དང་སྐྱབས་བཅོལ་ལག་དེབ། དེབ་སེར་པོ་སོགས་ཁོ་ཚོས་འཁྱེར་ནས་འགྲོ་བསྡད་ཡོད་པ་རེད། ཅེས་གསུངས་སོང་།
དེ་རྗེས་སློབ་ཕྲུག་ཚོས་བརྗོད་གཞི་འདྲ་མིན་གྱི་ཐོག་ནས་སྲིད་སྐྱོང་མཆོག་ལ་དྲི་བ་དྲི་ལན་གནང་སོང་།
གསར་འགོད་པ། ལྷ་སྐྱབས་རྒྱལ།

༼བོད་ཀྱི་དུས་བབ་ནས་དྲངས།༽