སྨུག་ཀློང་ཁྲོད་ཀྱི་སྲིད་སྤྱིའི་འོས་མི།

———ནམ་མཁའ།

ཁ་སང་དེ་རིང་བཙན་བྱོལ་སྤྱི་ཚོགས་ཀྱི་ལྟེ་གནས་རྡ་རམ་ས་ལའི་རི་སྒང་ནས་བཟུང་། ནུབ་ཕྱོགས་ཡུལ་གྲུ་སོགས་གང་སར་བོད་མི་ཡོད་ཚད་ཀྱི་གླེང་གཞི་ནི་སྲིད་སྐྱོང་དང་སྤྱི་འཐུས་ལ་བཞེངས་མཁན་ཚོ་རེད། སྤྱིར་བཏང་ནས་འདི་ནི་དགའ་འོས་པ་ཞིག་རེད་ཅེས་སྐད་གསེང་མཐོན་པོས་ཞུ་འདོད་ཡོད། རྒྱུ་མཚན་ནི། མི་རིགས་ཤིག་གི་བདེ་སྡུག་གི་ཆེད་དུ་ང་ཚོས་འཐབ་རྩོད་རྒྱུན་མཐུད་ནས་བྱེད་བཞིན་ཡོད་པའི་རྟགས་མཚན་ཞིག་རེད།

ཡིན་ཡང་སྲིད་སྐྱོང་དང་སྤྱི་འཐུས་ལ་བཞེངས་མཁན་སུ་ཡིན་ཡང་སོ་སོའི་ལོ་རྒྱུས་མདོར་བསྡུས་རེ་དང་ངོ་སྤྲོད་ཐུང་ངུ་རེ་བྱེད་པ་ལས། ང་ཚོས་འཐབ་རྩོད་ཅི་ཞིག་ཆེད་དུ་བྱེད་བཞིན་ཡོད་མེད་དང་། ལམ་ཁ་གང་ཞིག་བརྒྱུད་ནས་མི་རིགས་ཤིག་གི་དཀའ་ངལ་སེལ་དགོས་མིན་གྱི་སྐོར་ལ་བསམ་གཞིགས་མ་བྱས་པ་མིན་མོད། འོན་ཀྱང་དམིགས་ཡུལ་གང་ཞིག་བཟུང་སྟེ་སྲིད་སྤྱིའི་འོས་མིར་བཞེངས་ཀྱི་ཡོད་པའི་འགྲེལ་བཤད་མི་འདུག་པས་ཅུང་ཡ་མཚན་བྱུང་།

སྤྱིར་བཏང་རྒྱལ་ཁབ་ཡོད་པའི་མི་རིགས་ཞིག་ལ་མཚོན་ནས་བཤད་ན། སྲིད་འཛིན་གྱི་འོས་མི་དང་སྤྱི་འཐུས་ཀྱི་འོས་མི་ཚོས་ཁོ་རང་ཚོའི་ལུང་པ་དེའི་ནང་ཆད་སྐྱོན་གང་ཞིག་ཡོད་མེད་ངོས་འཛིན་བྱས་ཏེ། འོས་མི་ཚོས་ཆད་སྐྱོན་དེ་སེལ་ཐབས་དང་། དེའི་ཐབས་ལམ་གང་ཡིན་སོགས་མི་དམངས་ལ་གཏམ་བཤད་དང་འགྲེལ་བཤད་བྱེད་ཀྱི་ཡོད། འདི་ནི་རང་དབང་གི་རྒྱལ་ཁབ་ཡོད་པའི་སྲིད་སྤྱི་ལ་བཞེངས་མཁན་ཚོའི་ཆ་རྐྱེན་དང་པོ་དེ་རེད།

ཡིན་ཡང་ང་ཚོའི་བཙན་བྱོལ་སྤྱི་ཚོགས་ཀྱི་སྲིད་སྐྱོང་ལ་བཞེངས་མཁན་ཚོར་མཚོན་ནས་སྐད་ཆ་ཕྲན་བུ་ཞིག་བཤད་ན། ཁོ་རང་ཚོ་ཆ་ཚང་གིས་བཙན་བྱོལ་བོད་མིའི་སྒྲིག་འཛུགས་སྲ་བརྟན་དུ་གཏོང་གི་ཡིན་ཟེར་བ་དེ་རེད། དེ་ནི་ཧ་ཅང་གལ་ཆེན་ཞིག་རེད། གལ་ཏེ་སྒྲིག་འཛུགས་བརྟན་པོ་ཞིག་མེད་ཚེ། ང་ཚོའི་འཐབ་གྲོགས་ཡུ་གུར་དང་ནང་སོག་ལྟ་བུ་བཞིན་རྒྱལ་སྤྱིའི་ཐོག་ནུས་པ་ཆེན་པོ་ཐོན་དཀའ་བ་རེད།
ཡིན་ཡང་བོད་མིའི་སྒྲིག་འཛུགས་དེ་ཅི་ལྟར་སྲ་བརྟན་ཏུ་གཏོང་གི་ཡིན། འདི་ནི་དྲི་བ་ཞིག་རེད། དེས་རྐྱེན་ཀྱིས་ཁོང་ཚོས་ཐབས་ལམ་འདི་བརྒྱུད་ནས་སྲ་བརྟན་ཏུ་འདི་ལྟར་གཏོང་གི་ཡིན་ཟེར་བའི་དམིགས་ཡུལ་དང་འབྲེལ་བའི་འཆར་གཞིའི་ཐབས་ལམ་ཞིག་གསུངས་ཀྱི་མི་འདུག

གཉིས་པ། བོད་རྒྱ་གྲོས་མོལ།

ང་ཚོས་འཐབ་རྩོད་འདི་བཙན་བྱོལ་བོད་མིའི་རང་དབང་ཆེད་དུ་མ་ཡིན་པར། རྒྱ་ཆེ་གཞིས་ལུས་མི་དམངས་ཀྱི་རང་དབང་ཆེད་དུ་འཐབ་རྩོད་ཅིག་ཡིན་པ་ཀུན་གྱིས་མཁྱེན་གསལ་ལྟར། གཞིས་ལུས་མི་དམངས་ཀྱི་རང་དབང་གི་དཀའ་ངལ་འདི་བོད་རྒྱ་གྲོས་མོལ་གྱི་ལམ་ནས་སེལ་དགོས་པ་ཞིག་རེད། དེ་རིང་གི་བཀའ་ཤག་སྐབས་༡༥ བའི་བོད་རྒྱ་གྲོས་མོལ་གྱི་སྐུ་ཚབ་བསྐོ་བཞག་བྱས་མོད།

༼འོན་ཀྱང་བོད་རྒྱ་གྲོས་མོལ་གྱི་སྐུ་ཚབ་དེ་བཙན་བྱོལ་བོད་མིའི་སྐུ་ཚབ་ཡིན་ནམ། ༧གོང་ས་མཆོག་སྐུ་སྒེར་གྱི་སྐུ་ཚབ་ཡིན། གལ་སྲིད་དང་པོ་དེ་ཡིན་ཚེ་རྒྱ་ནག་སྲིད་གཞུང་གིས་ངོས་ལེན་བྱེད་ཀྱི་རེད་དམ།
ཡང་ན་གཉིས་པ་༧གོང་ས་མཆོག་སྐུ་སྒེར་གྱི་སྐུ་ཚབ་ཡིན་ན། ༧གོང་ས་མཆོག་གིས་ཆབ་སྲིད་ཀྱི་སྐུ་དབང་ཆ་ཚང་མི་དམངས་ལ་གནང་ཟིན་པས་འགྲེལ་བཤད་ཅིག་ཅི་ལྟར་རྒྱག་གི་ཡིན་ནམ།༽

དྲི་བ་འདི་གཉིས་དང་འབྲེལ་བོད་རྒྱ་གྲོས་མོལ་གྱི་ཐབས་ལམ་འདི་འདྲ་ཞིག་ལ་བརྟེན་ནས་བསྐྱར་གསོ་བྱེད་ཀྱི་ཡིན་ཞེས་འཆར་གཞི་ཆ་ཚང་ཞིག་དེ་རིང་གསལ་བཤད་བྱེད་མི་ཐུབ་ཀྱང་། རགས་བསྡུས་ཙམ་ཞིག་དགོས་ངེས་རེད། ཡིན་ཡང་དེ་ཙམ་ཡང་མེད་པར་བཙན་བྱོལ་སྒྲིག་འཛུགས་སྲ་བརྟན་གཏོང་གི་ཡིན། བོད་རྒྱ་གྲོས་མོལ་བསྐྱར་གསོ་བྱེད་ཀྱི་ཡིན་ཟེར་བ་ཙམ་གྱིས་ཕན་ཐོགས་ཨེ་ཡོད་སྙམ།

གསུམ་པ། སྤྱི་འཐུས་འོས་མི།

 
སྤྱི་འཐུས་འོས་མིར་བཞེངས་མཁན་ཚོའི་ངོ་སྤྲོད་མདོར་བསྡུས་རེར་བལྟས་པ་ཡིན། ཡིན་ཡང་གོང་དུ་བཤད་པ་བཞིན་དམིགས་ཡུལ་དང་འཆར་གཞི་གང་ཡང་མེད་པར་སྤྱི་འཐུས་ཀྱི་འོས་མིར་བཞེངས་ཀྱི་ཡོད་པའི་ཚོར་སྣང་ཞིག་བྱུང་། ཁ་གསལ་ཞིག་ཞུས་ན། བཀའ་ཤག་དང་སྤྱི་འཐུས་སྐབས་༡༥ སྐབས་ཀྱི་ཆད་སྐྱོན་འདི་དང་དེ་རེད། ངས་ཆད་སྐྱོན་དེ་སེལ་ཐབས་བྱེད་ཀྱི་ཡིན། དེ་ཡང་ཐབས་ལམ་འདི་འདྲ་ཞིག་ལ་བརྟེན་ནས་ཞེས་ཚིག་གཅིག་ཀྱང་མི་འདུག་པར། རྡ་སའི་རི་སྒང་གི་ཆར་དུས་སྐབས་ཀྱི་སྨུག་པ་མཐུག་པོ་དེའི་ཀློང་ནས། རང་གི་རྐང་རྗེས་བཙལ་བ་བཞིན་དམིགས་ཡུལ་དང་འཆར་གཞིའི་ཁ་ཕྱོགས་ཞིག་ཅི་ཡང་མེད་པར། ཟེར་སྒྲོས་ཀྱི་རྗེས་འདེད་བྱས་ཏེ་སྲིད་སྤྱི་འོས་མིར་བཞེངས་ཀྱི་ཡོད་པའི་ཚོར་སྣང་བྱུང་།

དེས་རྐྱེན་གྱིས་གསར་འགོད་པ་ཚོས་སྲིད་སྤྱི་འོས་མི་ཚོར་དྲི་བ་ཚ་བོ་རེ་གཏོང་རྒྱུ་གལ་ཆེན་རེད། གང་ལྟར་སྲིད་སྤྱིའི་འོས་མི་ཚོས་རྡ་སའི་ཆར་ཞོད་ཀྱི་སྨུག་ཀློང་ཁྲོད། རང་གི་རྐང་ལམ་བཙལ་བ་བཞིན་མ་ཡིན་པར་དམིགས་ཡུལ་དང་འཆར་གཞི་ངེས་གཏན་ཡོད་པ་ཞིག་དགོས་པར་སྙམ། ཕྲན་གྱི་སྐད་ཆ་འདིར་ཐལ་ཆ་ཤོར་སྲིད་པས་སྲིད་སྤྱི་འོས་མི་ཡོངས་ཀྱིས་ཐུགས་གཡེང་རེ་གནང་རོགས་ཞེས་ཞུ་གི་ཡོད།