སྦྲགས་སྐད་རྒྱུན་སྐྱོང་བྱེད་པའི་ཕྱི་སྡོད་བོད།

སྐར་ཁྲི་བཙན།

བཀའ་བློན་སྐུ་ངོའི་ལྗགས་ལས་སྦྲགས་སྐད་འཕྲོ།།
གཞུང་ཞབས་ལས་སྣེའི་ངག་ན་བསྲེས་སྐད་ལྷང་།།
མང་ཚོགས་ཕལ་བའི་ཁ་ན་ར་ལུག་སྐད།།
སྦྲགས་སྐད་གོང་དུ་སྤེལ་བའི་བཙན་བྱོལ་བ།།

བླ་མ་སྤྲུལ་སྐུའི་གསུང་ན་ལྷད་མའི་སྐད།།
དགེ་བསྐོས་ཕྱག་མཛོད་ཚེམས་ལ་བསྲེས་སྐད་ཆགས།།
གྲྭ་མང་ཡོངས་ལ་བྱང་བ་ར་ལུག་སྐད།།
སྦྲགས་སྐད་ཡར་རྒྱས་ཅན་གྱི་སྐྱབས་བཅོལ་བ།།

གཞོན་ནུ་ཚོགས་པར་ལོབས་པ་སྦྲགས་མའི་སྐད།།
བུད་མེད་ཚོགས་པར་གོམས་པ་བསྲེས་པའི་སྐད།།
དགུ་བཅུ་གསུམ་གྱིས་འཇོན་པ་ར་ལུག་སྐད།།
སྦྲགས་སྐད་མཐོ་རུ་བཏེགས་པའི་ཕྱི་སྡོད་བོད།།
 
སློབ་ཕྲུག་ཚོགས་པས་སྦྱངས་པ་ལྷད་པའི་སྐད།།
དམངས་གཙོ་ཚོགས་པར་ཡོད་པ་འདྲེས་པའི་སྐད།།
ཚོགས་པ་སྐྱིད་སྡུག་ཁག་གི་ཐུན་མོང་སྟེ།།
སྦྲགས་སྐད་གསར་དུ་བཏོད་པའི་བྱས་་རྗེས་འདི།།
 
ཕྱུག་པོའི་ཁང་བརྩེགས་ནང་ན་ཐན་སྐད་བསགས།།
མེད་པོས་ཁྲོམ་དང་སྲང་ནས་ལྟས་ངན་སྐད།།
དབུལ་ཕྱུག་མཐོ་དམན་བར་ལ་འགོང་བོའི་སྐད།།
སྦྲགས་སྐད་གཅིག་པོ་འཇོན་པའི་བྲོས་བྱོལ་བ།།
 
མགྲོན་འཁོར་ཆེ་ཆུང་ནང་ལ་སྦྲགས་སྐད་མཁོ།།
མགྲོན་ཁང་ཟ་ཁང་ནང་ལ་བསྲེས་སྐད་དགོས།།
རྒྱལ་བལ་འབྲུག་གསུམ་ཡུལ་གྲུ་གང་དུ་ཡང།།
ར་ལུག་འགྲོག་སྐད་ཤོད་ན་སྤྱི་སྐད་ཉིད།།
 
རང་བཙན་གཙང་མ་ནམ་མཁའི་སྐར་མ་ཡང་།།
རང་གི་ཕ་སྐད་གཙང་མ་མི་བདག་པར།།
རང་སྐད་གཞན་སྐད་བསྲེས་པའི་བྱས་རྗེས་དེ།།
རང་གི་རིགས་ལ་ཕུལ་བའི་ཕྱག་རྟགས་ཉིད།།
 
རང་སྐྱོང་མཐོ་བ་ཐོབ་པ་དཀའ་ན་ཡང་།།
རང་གི་སྲོག་རྩ་ངོ་མ་མི་སྲུང་པར།།
རང་རིགས་རྩ་བ་སྟོང་བའི་ཐན་སྐད་དེ།།
རང་རེའི་ཕྱི་རབས་པ་ལ་ལེགས་སྐྱེས་སུ།།