སྦྲ་ནག

སོག་མདའ།

སྔོན་བྱོན་མེས་པོས་བླ་མཁར་སྨུག་པོ་ཐོག་མར་ཕུབ་པ་སྦྲ་ནག་ཡིན།།
བཙན་པོའི་དམག་དཔུང་གཡུལ་ལ་ཆས་དུས་དཔའ་བོ་བཞུགས་གནས་སྦྲ་ནག་ཡིན།།
རྟིང་མའི་རྒྱལ་ཁ་གླིང་ལ་གྲགས་ནས་དཔའ་དར་འཐེན་ས་སྦྲ་ནག་ཡིན།།
བཙན་པོའི་གདུང་རྒྱུད་བོད་པ་ཚང་གི་ཕ་མཁར་སྨུག་པོ་སྦྲ་ནག་ཡིན།།
རྒས་མེད་འགྱུར་མེད་བྲག་བཞིན་འགྱིང་བའི་གངས་རིའི་ཕ་ཁྱིམ་སྦྲ་ནག་ཡིན།།
འཁྱགས་རླུང་ཁ་བ་བུ་ཡུག་རྒོད་ཀྱང་འཇིགས་མེད་ཞུམ་མེད་སྦྲ་ནག་ཡིན།།

ཕྱུགས་རིགས་རྐང་བཞིའི་ཕ་ཁྱིམ་དྲོན་མོ་གཡང་གི་ལྡེ་མིག་སྦྲ་ནག་ཡིན།།
འབྲུ་དྲུག་སྣ་ལྔའི་ཟས་ཀྱི་མཆོད་པའི་དོལ་པོ་བརྩིགས་ས་སྦྲ་ནག་ཡིན།།
ཇ་ཆང་འོ་མའི་བཅུད་བཟང་འཁྱིལ་བའི་མཚོ་ཆུང་ནོར་བུ་སྦྲ་ནག་ཡིན།།
ཕ་རྒན་རྒད་པོས་གནའ་གཏམ་བཤད་པའི་ལོ་རྒྱུས་བརྗོད་ས་སྦྲ་ནག་ཡིན།།
ཨ་མ་རྒན་མོའི་རྩི་སྐུད་ཁེལ་བཞིན་འཕང་ལོ་བསྐོར་ས་སྦྲ་ནག་ཡིན།།
པྲ་ཚག་བྱིས་པའི་རྩེད་མོ་རྩེ་ད་སའི་ལྷས་ར་གྲུ་བཞི་སྦྲ་ནག་ཡིན།།
ན་ཆུང་བུ་མོའི་སྙིང་གཏམ་དྲོན་མོ་རོགས་ལོར་བཤད་ས་སྦྲ་ནག་ཡིན།།
དབྱངས་གསལ་སོ་བཞི་དབྱངས་ལ་འགུགས་ནས་སློབ་ལ་བརྩོན་ས་སྦྲ་ནག་ཡིན།།
སློབ་དཔོན་མཁས་པའི་གསུང་རྒྱུན་ཟབ་མོ་ཡིད་ལ་འཇགས་ས་སྦྲ་ནག་ཡིན།།
ཕ་མ་བཟང་པོའི་བྱམས་དང་བརྩེ་བ་བུ་ལོར་གནང་ས་སྦྲ་ནག་ཡིན།།
གེ་སར་རྒྱལ་བོས་གླིང་བཞི་འདུལ་བའི་ཁྲ་མཁར་སྨུག་པོ་སྦྲ་ནག་ཡིན།།
སེང་ལྕམ་འབྲུག་མོ་གནས་ལ་ཡོང་དུས་བསུ་ཆང་འདྲེན་ས་སྦྲ་ནག་ཡིན།།
སྦྲ་ནག་གྲུ་བཞི་ཕ་མཁར་སྨུག་པོ་གདོང་དམར་བོད་པའི་བླ་མཁར་ཡིན།།

བཙན་པོའི་གདུང་རྒྱུད་གླིང་ལ་གྲགས་པའི་དཔའ་བོ་དཔའ་མོ་སྦྲ་ནང་ཡོད།།
ཡུན་རིང་ཆབ་རྒྱུན་རྗོགས་མཐའ་བྲལ་བའི་ལོ་རྒྱུས་རིང་མོ་སྦྲ་ནང་ཡོད།།
བཙན་རྒོད་རྒྱལ་སྐྱོབ་དཔའ་བོའི་རྟོགས་བརྗོད་སྙན་རྩོམ་རིང་མོ་སྦྲ་ནང་ཡོད།།
ཕྱོགས་བཞིའི་དགྲ་བཞི་ཐབས་ཀྱིས་འདུལ་བའི་དཔའ་རྒོད་ངར་མ་སྦྲ་ནང་ཡོད།།
སྲིད་གསུམ་རིག་པའི་གནས་ལུགས་རྟོགས་པའི་མཁས་ཆེན་དམ་པ་སྦྲ་ནང་ཡོད།།
ཞི་བདེའི་འོད་སྣང་གླིང་རུ་སྒྲོན་པའི་འཛམ་གླིང་ཉི་མ་སྦྲ་ནང་ཡོད།།
གནས་ལུགས་རིག་པའི་བརྡར་ཤ་བཅད་པའི་ཚད་མའི་སྐྱེས་བུ་སྦྲ་ནང་ཡོད།།
སྙན་རྩོམ་མཛེས་པའི་པི་ཝང་བཀྲོལ་བའི་དབྱངས་ཅན་ལྷ་མོ་སྦྲ་ནང་ཡོད།།
ཨ་ཅེ་ལྷ་མོའི་དབྱངས་རྟ་རིང་མོ་ཡར་ཀླུང་གཙང་བཞིན་སྦྲ་ནང་ཡོད།།
སྲོལ་རྒྱུན་ཉམས་མེད་རྒྱུན་འཛིན་བྱེད་པའི་ལུགས་བཟང་གསེར་འོད་སྦྲ་ནང་ཡོད།།
དེང་རབས་གསར་བའི་རིག་གནས་ནང་འདྲེན་དངུལ་གྱི་ཀོང་བུ་སྦྲ་ནང་ཡོད།།
མཐུན་སྒྲིལ་གོང་བུ་གཅིག་ལ་སྒྲིལ་བའི་རིགས་མཐུན་ལ་རྒྱ་སྦྲ་ནང་ཡོད།།
སྐྱིད་ན་སྐྱིད་ལ་མཉམ་ཏུ་རོལ་བའི་སེམས་ཀྱི་དགོད་སྒྲ་སྦྲ་ནང་ཡོད།།
སྡུག་ན་སྡུག་གི་ཁུར་བོ་མཉམ་འཁུར་མིག་གི་མཆི་མ་སྦྲ་ནང་ཡོད།།
དགྲ་ལ་སྡང་ཞིང་གཉེན་ལ་བྱམས་པའི་མི་གཤིས་རྣལ་མ་སྦྲ་ནང་ཡོད།།

ལོ་རྒྱུས་རིག་པའི་གནས་ལུགས་མ་རྟོགས་གཞན་གྱིས་བསླུས་པ་སྦྲ་ནང་ཡོད།།
རྒྱུ་ནོར་ཟས་ཀྱི་གཡོ་སྒྱུའི་འོག་ནས་དུག་ཆུ་དྲངས་པ་སྦྲ་ནང་ཡོད།།
ཕ་ལ་སྡང་ཞིང་མ་ལ་འཚེ་བའི་གཅན་གཟན་གཏུམ་པོ་སྦྲ་ནང་ཡོད།།
མངོན་ལྐོག་རྒྱབ་མདུན་གང་ཡིན་མེད་པར་གཞན་འོག་རྒྱུགས་ཁྱི་སྦྲ་ནང་ཡོད།།
རང་སྐད་གཙང་མ་ཕར་ལ་གཡུགས་ནས་གཞན་སྐད་མཁས་པ་སྦྲ་ནང་ཡོད།།
རང་གོས་ལུས་ལ་གྱོན་འདོད་མི་སྐྱེ་གཞན་གོས་གཡམ་རྒྱུགས་སྦྲ་ནང་ཡོད།།
སྲོལ་རྒྱུན་རིག་པའི་འདབ་བཟང་ལྗོན་པ་རྩ་ནས་འབྲེག་འདོད་སྦྲ་ནང་ཡོད།
ཡོད་ཚད་དེང་རབས་གསར་བར་བརྗེ་བའི་ཆོ་འཕྲུལ་སྟོན་མཁན་སྦྲ་ནང་ཡོད།།
རྒྱུ་དང་འབྱོར་བ་རང་ལ་ཐོབ་ན་མི་རིགས་བརྗེད་པ་སྦྲ་ནང་ཡོད།།
རིག་པའི་གནས་ལུགས་མངོན་སུམ་མ་རྟོགས་ཆོས་ལ་འཚེ་མཁན་སྦྲ་ནང་ཡོད།།
སྐྱ་མིན་སེར་མིན་གོས་གྱིས་གཡོགས་ནས་གང་སར་འཁྲབ་མཁན་སྦྲ་ནང་ཡོད།།
རང་ལུས་གཞན་ལ་སྒོར་ཆེད་བཙོང་པའི་སྨན་ཤར་བུ་མོ་སྦྲ་ནང་ཡོད།།
དུ་ཆང་བག་མེད་དུས་ཀུན་སྤྱོད་པའི་ཐ་ཤལ་བུ་ཚ་སྦྲ་ནང་ཡོད།།
ཕྱུགས་རིགས་རྗེས་སུ་མི་ཚེ་ཟད་པའི་ཤེས་བྱར་བླུན་པ་སྦྲ་ནང་ཡོད།།
ཆོ་གའི་ཕྱག་ལེན་ཙམ་ལས་མེད་པའི་དགེ་འདུན་འདུས་པ་སྦྲ་ནང་ཡོད།།
བཟང་ངན་གཉིས་ཀྱི་ཡོལ་བ་འཁྲུགས་པའི་སྦྲ་ནག་གྲུ་བཞིའི་ནང་རོལ་ནས།།
ཁྱོད་དང་ང་ཞེས་དབྱེ་འབྱེད་མེད་པར་ང་ཚོ་ཚང་མ་རིགས་རྒྱུད་གཅིག །
བཟང་པོའི་ཕྱོགས་ལ་བསམ་བློ་ཐོངས་དང་ཕན་རེ་བསམ་པའི་རྣམ་དག་སེམས།།
ཁ་བ་བོད་པའི་ལས་དབང་བསམ་བཞིན་འབྲི་ཁུལ་བྱས་པའི་ཚིག་ཉོག་ཡིན།།