ཆང་སྐྱེས།
རེ་བའི་འདུན་པ་སྙིང་ལ་བཅངས་ཤིང་སེམས་པ་རྨས་པའི་མྱི་རྐྱང་ཞིག།
ས་སྲོད་ཞིག་གི་ཁ་བའི་ཀློང་ནས་ཚ་མ་འཚུབ་ཀྱིས་ལམ་ལ་ཆས།།
གོམ་པའི་འདེགས་འཇོག་ཕྲ་མོ་རེ་རེ་མདུན་ལ་སྤོས་པའི་ཤུལ་ལམ་དུ།།
མ་འོངས་རྨི་ལམ་ལྗང་ཁུ་ཞིག་གི་ས་བོན་སྤོབས་པས་འདེབས་བཞིན་སོང་།།
གྱེས་བྲལ་དུས་ཀྱི་སེམས་འགྱུ་དམར་བོ་ས་སྲོད་རླུང་གིས་རྒྱང་ལ་འཁྱེར།།
ཕྱི་མིག་ཀློང་གི་ཕ་ཡུལ་སྨུག་པོ་མཐོང་བའི་ལམ་ནས་རིང་དུ་་ཡལ།།
ཞེན་ཆགས་ཟབ་མོའི་ན་ཟུག་ལྕི་མོ་ཨུ་ཚུགས་སྟོང་གིས་འཁུར་བཞིན་དུ།།
ཐག་རིང་ས་མཐའི་གྲོང་ལ་བསྲིངས་པའི་སྐྱ་མོ་ལམ་དེ་རྡོག་པས་མནན།།
རི་ལུང་ཐང་གསུམ་རྐང་པས་བརྫིས་ཏེ་ཉག་ཆེན་ཞིག་ལ་བརྒྱུད་དུས་སུ།།
དར་ལྕེ་ཟད་པའི་དར་ཤིང་ཞིག་ལ་མགོ་བོ་སྒུར་ཏེ་ཕྱག་གསུམ་འཚལ།།
འཁྲེང་ཞེན་ཕྱི་མིག་ཡང་བསྐྱར་ཐེངས་གཅིག་ཕ་ཡུལ་ཕྱོགས་ཀྱི་ས་ལ་འཕངས།།
སྨུག་ལོང་ཁྲོད་ཀྱི་ཕ་ས་ཕ་ཡུལ་ད་དུང་མུན་པས་བསྒྲིབས་ནས་འདུག།
བཀྲེས་སྐོམ་ཚ་བའི་མནར་གཅོད་ལྕི་ཡང་སྤོབས་པའི་དཔའ་དེ་ཞུམ་མྱོང་མེད།།
སྐྱོ་གདུང་སེམས་པ་ཁ་བས་གཡོག་དུས་སྙིང་གིས་འཕུར་ལྡིང་འཇག་ལ་ཁུལ།།
ཆུ་བོ་ཆེན་པོ་ཞིག་གི་འགྲན་ནས་མར་ལ་བསྡད་དེ་འདང་ཞིག་བརྒྱབ།།
རྨི་ལམ་ཞིང་གི་གྲོང་ཁྱེར་དེ་ལ་ད་ནི་རྒྱང་ཐག་མེད་པར་འདོད།།
གངས་རི་ར་བས་ཡོངས་སུ་བསྐོར་བའི་རང་ཡུལ་འབྲོག་པའི་རྩྭ་ཐང་ན།།
སྣ་ཚོགས་མེ་ཏོག་ལྷམ་མེར་བཞད་ལ་མྱི་རྐྱང་སེམས་པ་མ་ཆགས་པར།།
རི་ཆུ་སྟོང་གིས་བར་ཐག་བཅད་པའི་ཞི་བདེ་རྒྱ་མཚོའི་འགྲམ་ངོགས་ན།།
དམར་ལ་སེར་བའི་མེ་ཏོག་གཅིག་གིས་མྱི་རྐྱང་སེམས་པ་ཐོལ་གྱིས་བརྐུས།།
ལོ་དང་ཟླ་བ་ཐོད་ལ་བརྩེགས་ཏེ་མི་ཚེའི་རིན་ཐང་རི་ན་རྫོགས།།
སྐྱིད་སྡུག་འདྲེས་མའི་འཚོ་བའི་ཀློང་ན་སེམས་ཀྱི་བུ་ཆུང་རྒས་ནས་འདུག།
འདི་ནི་ངེས་མེད་ལ་ལུང་མྱུག་པའི་མྱི་རྐྱང་ཞིག་གི་གཏམ་རྒྱུད་དེ །།
དོ་ནུབ་ཨ་རག་ཕོར་གང་འཐུང་ཞོར་རང་གི་བྲང་ཁོག་སྲོ་བཞིན་ཡོད །།