ཡོང་ཁུངས། བོད་མིའི་སྒྲིག་འཛུགས་ཀྱི་དྲ་རྒྱ
སྲིད་སྐྱོང་བློ་བཟང་སེངྒེ་མཆོག་སླར་ཡང་སྲིད་སྐྱོང་དུ་བདམས་ཐོན་བྱུང་བར་སྤྱི་འཐུས་ཚོགས་གཙོ་མཚོག་གིས་དགའ་བསུའི་འཚམས་འདྲི་གནང་བ།
༄༅། །ཕྱི་ལོ་༢༠༡༦ ཟླ་༤ ཚེས་༢༨ ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྲིད་སྐྱོང་ལས་ཐོག་བློ་བཟང་སེངྒེ་མཆོག་སླར་ཡང་སྲིད་སྐྱོང་དུ་བདམས་ཐོན་བྱུང་བར་དགའ་བསུའི་འཚམས་འདྲི་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༡ ཐོག་ཚོགས་གཙོ་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་ལས་ཁུངས་སུ་ཆེད་ཕེབས་ཀྱིས་ཕྱི་ལོ་ ༢༠༡༦ ལོའི་སྲིད་སྐྱོང་འོས་བསྡུའི་སྐབས་ད་ལྟའི་སྲིད་སྐྱོང་ལས་ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་སླར་ཡང་སྲིད་སྐྱོང་དུ་བདམས་ཐོན་བྱུང་བར་དགའ་བསུའི་མཇལ་དར་ཕུལ་ནས་འཚམས་འདྲི་ཞུས་པ་དང་ལྷན་གསུང་དོན།
ཕྱི་ལོ་ ༢༠༡༦ ཟླ་ ༤ ཚེས་ ༢༧ ཉིན་བོད་མིའི་སྒྲིག་འཛུགས་དབུས་འོས་བསྡུ་ལས་ཁང་ནས་གཞུང་འབྲེལ་སྐབས་ ༡༥ པའི་སྲིད་སྐྱོང་དང་། སྐབས་ ༡༦ པའི་བོད་མི་མང་སྤྱི་འཐུས་ཀྱི་འོས་བསྡུའི་གྲུབ་འབྲས་གསལ་བསྒྲགས་གནང་བ་རེད། ནམ་རྒྱུན་ང་ཚོའི་འགྲོ་ལུགས་ནང་བཞིན་རྒྱལ་ཁ་ཐོབ་མཁན་ཚོར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུའི་ཆེད་དང་། ལྷག་པར་ང་རང་སྲིད་སྐྱོང་འོས་མི་ཞིག་ཡིན་པའི་ཆ་ནས་ཐེངས་འདིའི་སྲིད་སྐྱོང་འོས་བསྡུའི་སྐབས་རྒྱལ་ཁ་ཐོབ་མཁན་སྲིད་སྐྱོང་ལས་ཐོག་བློ་བཟང་སེངྒེ་མཆོག་ལ་འཚམས་འདྲིའི་བཀྲ་ཤིས་བདེ་ལེགས་མཚོན་བྱེད་དུ་མཇལ་དར་འབུལ་ཆེད་བཅར་བ་ཡིན། དེ་བཞིན་སྤྱི་འཐུས་གསར་པ་ཐོབ་མཁན་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ང་ཚོའི་འོས་བསྡུ་ལས་རིམ་ཁྲོད་ནས་སྤྱི་ཚོགས་ནང་གནས་ཚུལ་ལབ་གླེང་མང་པོ་ཞིག་བྱུང་ཡོད། ང་རང་ངོས་ནས་ཀྱང་ཐོག་མར་འོས་བསྡུའི་ནང་ལངས་པའི་སྐབས་ནས་འོས་བསྡུའི་ནང་བཞེངས་མཁན་གཞན་པ་ཚོར་མཚན་སྨད་མ་ཞུ་རྒྱུ་དང་། གཞི་མེད་ཀྱི་སྐྱོན་བརྗོད་མི་བྱེད་རྒྱུའི་དམ་བཅའ་བརྟན་པོ་བཞག་པ་ཡིན།
འོས་བསྡུའི་བརྒྱུད་རིམ་འདིའི་ཐོག་ནས་བྱང་ཨ་རིའི་ས་ཁུལ་ཁག་བརྒྱད་ལ་འགྲོ་རྒྱུའི་གོ་སྐབས་བྱུང་། དེ་བཞིན་ཡུ་རོབ་ས་ཁུལ་ཁག་བཞི། རྒྱ་གར་ནང་ཆ་བཞག་པ་ཡིན་ན། སྔོན་འགྲོའི་སྐབས་སུ་ས་ཁུལ་ཁག་ཉི་ཤུ་རྩ་བཞི་ཙམ་དང་། དངོས་གཞིའི་སྐབས་ས་ཁུལ་ཁག་སུམ་ཅུ་མན་ཙམ་གྱི་ནང་ཕྱིན་ཏེ། གང་ལྟར་ཆུ་ཚོད་གསུམ་ནས་ལྔ་བར་བཏང་ནས་སོ་སོའི་བྱེད་འཆར་སོགས་གང་ཅིའི་ཐོག་མི་མང་ལ་ཁ་གསལ་པོ་ཞུ་རྒྱུའི་གོ་སྐབས་དང་ཐུག་འཕྲད་བྱེད་རྒྱུའི་གོ་སྐབས་བྱུང་།
སྤྱིར་བཏང་གི་འོས་བསྡུའི་བརྒྱུད་རིམ་འདིའི་ཐོག་ནས་ལབ་གླེང་མང་པོ་ཞིག་བྱུང་བ་རེད། ཞན་པའི་ཆ་མང་པོ་ཞིག་བྱུང་བ་རེད་ལ་ལེགས་པའི་ཆ་གང་ཙམ་བྱུང་སོང་། མི་མང་ལ་གོ་རྟོགས་སྤེལ་རྒྱུ་སོགས་གང་ཅིའི་ཐད་ནས་ཡག་པོ་བྱུང་སོང་། ཞན་པའི་ཆ་ནི། འོས་མི་ལང་མཁན་དང་རྒྱབ་སྐྱོར་བྱེད་མཁན་ནང་ཡིན་ནའང་རེད། སྤྱི་ཚོགས་དྲ་རྒྱའི་ནང་སྐད་ཆ་མང་པོ་བྱུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་སྐུ་ལས་སྐྱོན་ནས་བོད་ཆོལ་ཁ་གསུམ་གྱི་བོད་མི་ཡོངས་རྫོགས་ཆིག་སྒྲིལ་གྱི་ནུས་པ་གོང་བུ་བསྒྲིལ་རྒྱུའི་སླད་སྐུ་ལས་སྐྱོན་པ་འདིའི་ད་ལྟའི་འོས་བསྡུའི་ལས་རིམ་འདིའི་ནང་ཆོལ་ཁ་དང་། ལུང་ཚན་དེ་འདྲའི་འཐེན་འཁྱེར་གྱི་རྣམ་པ་ཤུགས་ཆེན་པོ་བྱུང་བར་བརྟེན། ༸རྒྱལ་བ་རིན་པོ་ཆེ་མཆོག་ཐུགས་བློ་མ་བབ་པ་དང་། ད་བར་སྐུ་ལས་སྐྱོན་པ་དེ་དག་མ་འོངས་པར་གང་འདྲ་ཆགས་ཡོང་བསམས་པའི་ཐུགས་འཚབ་བྱུང་བ་འདི་ང་ཚོས་བཅོས་ཐབས་བྱེད་དགོས།
དེར་བརྟེན་ང་རང་སྲིད་སྐྱོང་འོས་མི་ཞིག་ཡིན་པའི་ཆ་ནས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ལ་མ་བབ་པ་དང་། ཐུགས་འཚབ་མཛད་པ། ང་ཚོས་ལས་དོན་བྱེད་ཕྱོགས་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་འཚབ་བྱུང་བ་འདི་སྙིང་ཁོངས་རུས་པའི་གཏིང་ནས་དགོངས་གསོལ་ཞུ་རྒྱུ་དང་། མ་འོངས་སླད་ཕྱིན་འདི་རིགས་རྩ་བ་ཉིད་ནས་མི་ཡོང་རྒྱུ། ལྷག་པར་སོ་སོ་རང་ཉིད་ངོས་ནས་ཀྱང་དམ་བཅའ་བཞག་རྒྱུ་དང་། སོ་སོར་རྒྱབ་སྐྱོར་བྱེད་མཁན་ཚོ་ཡིན་ནའང་། སོ་སོས་ལྟ་སྟངས་ལྟར་ན། དངོས་གནས་ལྷག་བསམ་རྣམ་དག་གིས་ང་རང་གིས་བསམ་ཡུལ་ལས་འདས་པའི་རྒྱབ་སྐྱོར་བྱས་པ་དང་། གཞི་མེད་སྐྱོན་བརྗོད་ལ་སོགས་པའི་སྒྲོ་འདོགས་བྱེད་རྒྱུ་དེ་འདྲ་བྱུང་མ་སོང་བསམས་པ་དེ་འདྲ་བྱུང་། འོན་ཀྱང་ང་ཚོ་མ་ཤེས་རྨོངས་པའི་འོག་ནས་གནས་ཚུལ་དེ་འདྲ་བྱུང་བ་ཡོད་ན། དེ་དག་ལ་ལྷག་བསམ་རྣམ་དག་ཐོག་ནས་བཟོད་གསོལ་ཞུ་གི་ཡོད། དེ་རིང་ནས་གོང་དུ་ངས་དཔལ་ལྡན་སྲིད་སྐྱོང་ལས་ཐོག་མཆོག་ཡང་བསྐྱར་འོས་ཐོབ་པའི་འཚམས་འདྲི་ཞུས་པའི་སྐབས་སུའང་ཞུས་པ་ཡིན། དེ་རིང་ནས་བཟུང་སྟེ་ང་ཚོས་དེ་སྔའི་གནས་ཚུལ་གང་ཡིན་པ་ཡིན་ནའང་དེ་དག་ཕར་བཞག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་གཞིར་བཟུང་བྱས་ནས་ལེའུ་གསར་པ་ཞིག་འཛུགས་དགོས་པའི་གནས་སྟངས་ཆགས་ཡོད།
དེ་བཞིན་ལས་ཀྱི་སྣེ་མོ་བ་ཚོ་ཡིན་ནའང་ཕྱག་ལས་གནང་ཕྱོགས་ཐོག་ནས་༸སྐུ་མདུན་གྱིས་དགོངས་པ་སྔ་རྗེས་ཚང་མ་བསྒྲུབ་རྒྱུ་དང་། ང་རང་ཚོའི་གནས་བབས་དང་མཐུན་པའི་ཐོག་ནས་ལས་ཀ་བྱེད་རྒྱུ། ༸རྒྱལ་བ་རིན་པོ་ཆེ་མཆོག་གི་ཐུགས་བསུན་པོ་དང་། ཐུགས་འཚབ་མཛད་དགོས་པ་དེ་འདྲ་མི་ཡོང་རྒྱུ། མི་མང་ཚོའི་ངོས་ནས་ཡིན་ནའང། སྲིད་སྐྱོང་དང་བཀའ་ཤག སྤྱི་འཐུས། ལས་ཀྱི་སྣེ་མོ་བ་ཚོ་ཡིན་ནའང་ལས་དོན་ཧྲ་ཐག་ཐག་ཅིག་ཡོད་བསམས་པའི་ཡིད་ཆེས་རྙེད་པ་ཞིག་བསྐྲུན་དགོས་པ་དེ་ཧ་ཅང་གལ་ཆེན་པོ་རེད། འདི་བོད་ཕྱི་ནང་གཉིས་ཀྱི་བོད་མི་རྣམས་དང་། ལྷག་པར་བོད་དོན་ཐོག་རྒྱབ་སྐྱོར་དང་དོ་སྣང་གནང་མཁན་རྒྱལ་སྤྱིའི་སྤྱི་ཚོགས་བཅས་ལ་ང་ཚོས་གོ་བརྡ་གསལ་པོ་དང་ཡག་པོ་ཞིག་སྤྲོད་དགོས་པ་དེ་གནད་འགག་ཆེན་པོ་ཆགས་ཡོད།
དེར་བརྟེན་ང་རང་ངོས་ནས་ཡིན་ནའང་དེ་སྔོན་ནས་ཞུས་པ་གཞིར་བཟུང་རྒྱལ་ཁ་ཐོབ་མིན་ལ་མ་ལྟོས་པར་མི་ཚེ་ལྷག་མ་བོད་སྤྱི་པའི་རྩ་དོན་ཆེད་གོ་གནས་ཡོད་མིན་ལ་མ་ལྟོས་པར་ལས་ཀ་བྱ་རྒྱུའི་དམ་བཅའ་བརྟན་པོ་ཡིན། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་བསྒྲུབ་རྒྱུར་དབུ་འོག་དཔུང་འདེགས་གང་འདྲ་ཞིག་ཞུ་དགོས་ཡོད་ནའང་འདྲ། འཛིན་སྐྱོང་བཀའ་ཤག་གི་ལས་དོན་གང་འདྲ་ཞིག་གི་ཐོག་ལ་མཐུན་འགྱུར་གང་འདྲ་ཞིག་ཞུ་དགོས་ཡོད་ནའང་དེ་ལྟར་ཞུ་བརྩིས་ཡོད། ཅེས་ཞུ་རྒྱུ་ཡིན། མང་ཚོགས་ཡིན་ནའང། འདས་པའི་གནས་ཚུལ་གང་བྱུང་བ་རྣམས་ད་ཆ་འདས་ཟིན་པ་ཡིན་སྟབས། བསྐྱར་ལོག་བྱས་ནས་བཅོས་རྒྱུ་མེད། མ་འོངས་པར་དེ་རིགས་མི་ཡོང་ཆེད་དུ་ང་རང་ཚོ་ཚང་མས་དམ་ཚིག་བརྟན་པོའི་ཐོག་ནས་ལས་ཀ་བྱེད་དགོས་རྒྱུ་དང་དགོངས་པ་བཞེས་དགོས་པ་དེ་གལ་ཆེན་པོ་རེད། ངས་དེ་སྔོན་ནས་འབོད་སྐུལ་ཞུས་པ་བཞིན་ཚང་མས་ནུས་པ་མཉམ་སྤུངས་གནང་རོགས་གནང་ཞེས་སླར་ཡང་འབོད་སྐུལ་ཞུ་རྒྱུ་ཡིན། ད་ལྟའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་དྭངས་པའི་ཆེད་དུ་འཛིན་སྐྱོང་བཀའ་ཤག་ངོས་ནས་འབད་བརྩོན་གནང་རྒྱུ་དེ་དག་ཏན་ཏན་གནང་གི་རེད་ལ། ཡིད་ཆེས་བྱེད་ཀྱི་ཡོད། དེ་རིང་གནས་ཚུལ་འདི་བྱུང་ནས་སྤྱི་འཐུས་ཟུར་པ་རྣམ་པ་ཚོ་ཡིན་ནའང་རེད། དེ་བཞིན་ལས་བྱེད་བགྲེས་ཡོལ་ལ་ཕེབས་མཁན་གྱི་ལས་བྱེད་རྒན་པ་ཚོའི་ནང་ལ་ཧ་ཅང་གི་བློ་ཕམ་གནང་གི་འདུག དེའི་ཐོག་ལ་གོ་བསྡུར་སྦྱངས་བཤད་གནང་ནས་ཚང་མས་ནུས་པ་མཉམ་སྤུངས་གནང་རོགས་གནང་། ཞེས་ཞུ་རྒྱུ་ཡིན། ཞེས་གསུངས་།།
སྲིད་སྐྱོང་མཆོག་དང་སྤྱི་འཐུས་ཚོགས་གཙོ་རྣམ་གཉིས་ནས་གོང་ས་མཆོག་ཐུགས་དགོང་གསེལ་བའི་གསོལ་འདེབས་འདེབས་ཞུ་དགོས་པ་ནི་བོད་མི་མང་གི་བསོད་ནམས་དང་འབྲེལ་བ་གཏིང་ཟབ་ཡོད་པར་ངོས་འཛིན་ཞུ་གི་ཡོད་ན་གྲོས་ཆོད་བཞག་པ་ཙམ་གྱི་གོང་ས་མཆོག་དགོང་པ་གསེལ་བར་ངོས་འཛིན་གནང་ན་འགྲིག་གི་ཨ་ཡོད་ན་།
གཏེར་སྟོན་གླིང་པ་པདྨ་རྣམ་གྲོལ་གྱིསཿ
སྲིད་ཀྱི་རྐུབ་སྟེགས་བགྲང་བྱ་ལྔ་ལ་བཟུང་།།
ལོ་ངོ་ལྔ་བཅུའི་གཟི་བརྗིད་ས་ལ་བརྡབ།།
འཐུས་ཤོར་ཨི་ཁུང་འགོག་པའི་ལྷན་པ་ཡང་།།
གཙབས་རལ་སོང་བར་འགྱོད་པ་ཨེ་འདུག་གམ།།
རྒན་གཞོན་ལས་བྱེད་མང་པོའི་ལྷག་བསམ་ལ།།
ཁྱད་གསོད་རྡོག་རྫིས་གཏོང་རྒྱུ་མང་དྲགས་ནས།།
བློ་ཕམ་ངང་ལ་རྩ་དགོངས་འགྲོ་བའི་གྲངས།།
འཕར་བཞིན་ཡོད་པར་སེམས་པ་འཚབ་ལགས་སམ།།
གཞུང་དོན་ཟུར་དུ་བཞག་ནས་འོས་ཤོག་ལ།།
འབད་པ་བརྒྱ་འགྱུར་བྱས་པའི་ལོ་ངོ་ལྔས།།
སྒེར་གྱི་མཚན་སྙན་སྲུང་སྐྱོབ་ཐུབ་ཙམ་འདིས།།
སྐུ་ངོའི་སེམས་ཀྱི་འདོད་པ་ཁེངས་ལགས་སམ།།
ཁྱབ་བསྒྲགས་ཁོ་ནའི་རྗེས་སུ་རྒྱུག་རྒྱུག་ནས།།
ལས་དོན་བྱས་རྗེས་སྟོན་རྒྱུ་མ་རྙེད་པས།།
བརྒྱ་ཆ་ལྔ་བཅུ་གསང་བ་ཡིན་ནོ་ཞེས།།
དམངས་ལ་མགོ་སྐོར་བཏང་བར་འགྱོད་ལགས་སམ།།
སྐྱོབ་གསོར་སྤྲད་པའི་ཨ་སྒོར་ས་ཡ་དྲུག།
བླ་མེད་བྱས་རྗེས་ཡིན་ཞེས་བགྲངས་བགྲངས་ནས།།
འཐུས་ཤོར་རྫབ་དོང་བཀབས་པའི་གནང་སྟངས་དེས།།
འོས་ཤོག་ཐོབ་ཙམ་བྱུང་བར་སྤྲོ་ལགས་སམ།།
རྫུན་དང་ཧམ་པས་དམངས་ཀྱི་མགོ་སྐོར་ནས།།
བདེན་པའི་ངོ་རིས་འཁྱོག་བཤད་བྱས་བྱས་ནས།།
བོད་མིའི་སྤྱི་ཚོགས་ཡར་མར་དཀྲུགས་དཀྲུགས་ནས།།
མཐུན་སྒྲིལ་གཏོར་བཤིག་བཏང་བར་འགྱོད་ལགས་སམ།།
ཕྱི་ཡི་ལྕགས་རི་ཕྱི་དྲིལ་བཀའ་བློན་གྱིས།།
མ་འོངས་སྲིད་སྐྱོང་ཆ་རྐྱེན་དགུ་བགྲངས་ནས།།
ཁྱོད་ལ་སྡོམ་ཚིག་རི་མོའི་རྒྱས་བཏབས་པར།།
རང་ཉིད་རང་ལ་ངོ་ཚ་ཨེ་བྱུང་ངམ།།
ནང་གི་ནོར་བུ་བདེ་སྲུང་བཀའ་བློན་གྱིས།།
བཟང་སྤྱོད་ལག་བསྟར་གནང་ནས་ཕེབས་པ་དེས།།
ལོ་ལྔའི་གཟི་བརྗིད་ཁོག་པ་སྟོང་པ་དེ།།
དམངས་ལ་བསྟན་པར་འགྱོད་པ་སྐྱེས་ལགས་སམ།།
རྒྱལ་གཅེས་དཔའ་བོ་གཉིས་ཀྱི་རོ་ཐོག་ནས།།
གཞས་བཏང་ཞབས་བྲོ་བརྒྱབ་པའི་བྱེད་སྟངས་དེར།།
གཞིས་ལུས་མི་མང་ཡིད་ཐང་ཆད་འདུག་པས།།
རང་མདོག་བསྟན་པར་འགྱོད་པ་ཨེ་བྱུང་ངམ།།
ལོ་ལྔའི་འཐུས་ཤོར་ཨི་ཁུང་ནག་པོ་དེས།།
ལྷ་མི་གཉིས་ཀ་ཡིད་ཐང་ཆད་དུ་བཅུག།
ལྔ་བཅུ་ལོ་ངོའི་རྗེས་ཀྱི་འཐུས་ཤོར་འདིར།།
ངོ་ཚའི་འགྱོད་གདུང་སྙིང་ལ་གཟན་བྱུང་ངམ།།
གཞན་གྱི་བྱས་པའང་རང་གི་ཡིན་ནོ་ཞེས།།
ཧམ་རྫུན་ཉི་ཚེའི་གཏམ་གྱིས་མགོ་སྐོར་བཏང་།།
ཕྱིར་ལྟས་ཨེན་ཙམ་མེད་པའི་ཕེབས་སྟངས་དེར།།
ད་ལྟ་ཕྱིར་ལྟས་སློག་ན་འགྱོད་ལགས་སམ།།
སྔོན་ཚེ་ལྷ་ལྡན་རྒྱལ་སའི་བཀའ་བློན་ཚོས།།
ལས་དོན་འཐུས་ཤོར་བཏང་བའི་མཇུག་འབྲས་ལ།།
ཆོས་སྐྱོང་ཁྲོས་ནས་རྡོ་རྗེའི་མནའ་ཆུ་བླུད།།
ད་ལོར་ཁྱེད་ལ་བླུད་པར་འགྱོད་ལགས་སམ།།
སྤྱི་བའི་སྒྲིག་འཛུགས་སྲ་བརྟན་བཟོ་བ་ལས།།
སྒེར་གྱི་མཚན་སྙན་གལ་ཆེར་བཟུང་བཟུང་ནས།།
གངས་ཅན་བོད་ཀྱི་ལོ་རྒྱུས་གླེགས་བམ་ནང་།།
རང་ཉིད་ནག་པོ་ཆགས་པར་འགྱོད་ལགས་སམ།།
ཤེས་ཡོན་འཕྲོད་བསྟེན་གཞིས་ཆགས་ཡར་རྒྱས་སོགས།།
ག་ས་གང་ནས་འཐུས་ཤོར་བཏང་བཏང་ནས།།
བླ་མ་ལྷ་སྲུང་ཐུགས་ཕམ་བཟོས་པ་དང་།།
ཆོས་སྐྱོང་ཁྲོས་པའི་བཀའ་དེར་འཇིགས་ལགས་སམ།།
བཀའ་ཟུར་སྤྱི་ཟུར་རྣམ་པ་ལྷན་འཛོམས་ཀྱིས།།
ལོ་ལྔའི་གཟི་བརྗིད་ཁོག་པ་སྟོང་པའི་ནང་།།
དོན་ལྡན་གྲུབ་འབྲས་ལེན་ཐབས་དོན་ཚན་ལྔ།།
མ་སྐུལ་དང་བས་གནངས་པར་དགྱེས་ལགས་སམ།
ད་ནི་མ་འོངས་ལོ་ངོ་ལྔ་ཡི་ནང་།།
གྲུབ་འབྲས་ཐོན་པའི་བགྲོད་པ་དཀའ་ན་ཡང་།།
ད་ལྟའི་འཐུས་ཤོར་འདི་ལས་མི་ཟགས་པའི།།
ཞུ་བ་འཐེན་པའི་མཐེ་བོང་བསྒྲེངས་བཞིན་ཡོད།།
འདས་སོང་གནས་སྟངས་ངོ་མའི་ཟུ་ཟུར་ཙམ།།
ཡི་གེའི་རི་མོར་བཏབས་པ་འདི་ཙམ་ལ།།
སྐུ་ངོ་སྲིད་སྐྱོང་དགོངས་པ་མ་ཚོམས་ཨ།།
བདེན་པའི་ཐག་ཉེ་གླེང་ན་འདི་འདྲར་འདུག།