གཞུང་པ་ཚེ་དབང་བསོད་ནམས།
དུས་རབས་ཉི་ཤུ་རྩ་གཅིག་འདི་དྲ་རྒྱའི་དུས་རབས་ ༼ Cyber Century ༽ ལ་མི་ཚོའི་ངོས་འཛིན་གྱིས་སྤྱི་ཚོགས་ཀྱི་འཚོ་བ་དང་འབྲེལ་བའི་ཆོས་སྲིད་ཀྱི་ལས་དོན་ཡོངས་རྫོགས་དྲ་རྒྱ་བརྒྱུད་ནས་བྱེད་བཞིན་པ་ནི་ཚན་རྩལ་རིག་པས་ང་ཚོ་འགྲོ་བ་མི་ལ་ལེགས་སྐྱེས་སུ་སྦྱིན་པ་ནས་ང་ཚོ་འགྲོ་བ་མི་ཚང་མ་དགའ་བ་དང་སྤྲོ་བ་ཚད་མེད་པའི་གནས་སུ་རྒྱུར་པ་ནི། ཤེས་བྱ་མཐའ་མེད་ནམ་མཁའ་སྟོང་པ་འདྲ། རིག་པ་མཐའ་མེད་རྒྱ་མཚོའི་གཏིང་མཐའ་འདྲ། ཟེར་བ་ལྟར། དྲ་རྒྱའི་དུས་རབས་ལ་རང་གི་འཚོ་བའི་མདུན་ལམ་བསྟེན་མ་ཐུ་པའི་མི་སྣ་ཁག་ནས་དྲ་རྒྱའི་དུས་རབས་དེ་བེད་སྤྱོད་ལོག་པར་བཏང་ནས་སྤྱི་ཚོགས་དཀྲུགས་ཐབས་ལ་འབད་བརྩོན་དང་འགན་འཁུར་ནས་སྒྲིག་འཛུགས་དང་མི་མང་བར་དཀྲུགས་ཐབས་དང་། ཆོལ་ཁ་དང་ལུང་ཚན་བར་དཀྲུགས་ཐབས་དང་། མཐུན་པ་དང་མ་མཐུན་བར་དཀྲུགས་ཐབས་དང་། རང་གི་འདོད་ཕྱོགས་དང་མ་མཐུན་ན་ཕ་ཕྱོགས་ཀྱི་མི་དེ་སྤྱི་ཚོགས་ནང་ནག་པོ་བཟོ་གང་ཐུབ་བྱས་ནས་དོན་དངོས་ཚན་རྩལ་རིག་པས་ང་ཚོར་ལེགས་སྐྱེས་སུ་སྦྱིན་པའི་དྲ་རྒྱའི་དུས་རབས་རྩ་ཆེན་དེ་བེད་སྤྱོད་ལོག་པར་བཏང་ནས་སྤྱི་ཚོགས་ཀྱི་བདེ་འཇགས་ལའང་ཉེན་ཁ་མི་བཟོ་བའི་ངེས་པ་མེད་པ་ནས་ང་ཚོ་ཚང་མས་ཟབ་ཟབ་གནང་དགོས་པ་ནི་ཤིན་ཏུ་ནས་གལ་ཆེན་དོན་ཆེན་ཞིག་ཡིན་པ་དང་། དེང་སྐབས་སྤྱི་ཚོགས་ཀྱི་དྲ་ལམ་བརྒྱུད་ནས་འཛམ་གླིང་འདི་ཆུང་ཆུང་ཆགས་ནས་སྐར་ཆ་གཅིག་གི་ནང་ཕྱོགས་ཡོངས་ཀྱི་གནས་ཚུལ་ཤེས་ཐུབ་པ་དང་མཐོང་ཐུབ་པའི་ནུས་པ་ཡོད་པ་ནས་ང་ཚོ་བཙན་བྱོལ་བོད་པའི་སྤྱི་ཚོགས་ནང་གནས་ཚུལ་བཟང་ངན་ཚང་མ་དྲ་ལམ་བརྒྱུད་ནས་ཡོང་བཞིན་པ་ནས་གནས་ཚུལ་ག་འདྲ་ཞིག་རང་ཉིད་ལ་འབྱོར་ཡང་ཞིབ་འཇུག་མཐའ་ནན་གནང་ནས་བདེན་རྫུན་གྱི་ངོས་འཛིན་གསལ་པོ་ཐུབ་དགོས་པ་ལས་རི་བོང་ཅལ་འདྲོགས་ནམ་ཡང་བྱེད་མི་ཉན་པ་ནི་དེང་སྐབས་རང་རེ་བཙན་བྱོལ་སྤྱི་ཚོགས་ཆུང་ཆུང་འདིའི་ནང་མང་གཙོ་དང་རང་དབང་ཁ་ལ་ཁྱེར་ནས་ཆོལ་ཁ་དང་ལུང་ཚན་གྱི་མིང་གི་འོག་ནས་ནང་ཁུལ་དཀྲུགས་ཐབས་བྱེད་མཁན་དགྲ་བོའི་སོ་མྱུལ་ཡང་ཡོང་མི་སྲིད་པ་མིན་པ་ནས་བློ་ལྡན་བོད་མི་ཚང་མས་དྲ་ལམ་གྱི་གནས་ཚུལ་ལ་ཞིབ་འཇུག་མ་གནང་བར་ཆ་འཇོག་དང་ཡིད་ཆེས་ནམ་ཡང་གནང་མི་ཉན་པ་དང་། དུས་རབས་ཉི་ཤུ་རྩ་གཅིག་འདི་དྲ་རྒྱའི་དུས་རབས་ལ་སོང་སྤྱི་ཚོགས་ནང་གནས་ཚུལ་བཟང་ངན་དང་མཐོ་ཙམ་དམའ་ཙམ་གང་ཡང་ཡོང་སྲིད་པ་ནས་སོ་སོ་རང་ཉིད་ནས་བརྟན་ལྷིང་བབ་གསུམ་བརྒྱུད་ནས་དྲ་རྒྱའི་དུས་རབས་ལ་འགན་འཁུར་ནས་སྤྱི་ཚོགས་འཚོ་བའི་ལས་གཞི་དང་འབྲེལ་བའི་ཆབ་དཔལ་རིག་གསུམ་ལ་འཆད་རྩོད་རྩོམ་གསུམ་གྱིས་ལེགས་སྐྱེས་འབུལ་དགོས་པ་ནི་དུས་རབས་ཉི་ཤུ་རྩ་གཅིག་ནང་སྐྱེས་པའི་སྐྱེས་གོ་ཆོད་པ་མ་ཟད་མང་གཙོའི་ལས་འགན་དང་ཐོབ་ཐང་ཞིག་ཀྱང་ཡིན་ཆོག་པ་བཅས་རེ་ཞིག་འདིར་འཇུག་བསྡུས་པའོ།