སྡུག་གི་ལོ་རྒྱུས་དང་མུན་ནག་གི་ལམ་དུ་ཁྲག་གི་རྐང་རྗེས་ལ་ཕྱིར་དྲན།

སེང་བུ་འབྲུག་ཞོན།

དེ་རིང་། སྡུག་གི་ལོ་རྒྱུས་དང་མུན་ནག་གི་ལམ་དུ་ཁྲག་གི་རྐང་རྗེས་ལ་ཕྱིར་དྲན་གྱིས་མིག་ཆུ་དབང་མེད་དུ་བཞུར་བའི་གངས་ཅན་པ་དག་དང་མྱ་ངན་གྱི་ཉིན་མོར་གློ་བུར་དུ་མཉམ་ཞུགས་བྱེད་དགོས་པའི་ཉིན་ཞིག་རེད། བོད་མུན་པའི་གྲོང་དུ་སྡུག་གི་སྤྲིན་ནག་ལྷོག་ལྷོག་ཁོལ་བའི་བར་གསེང་ནས་གཟི་འོད་འཕྲོ་བའི་བླ་མ་ཨ་དཀོན་གྱི་བཀའ་དྲིན་ཐུགས་རྗེའི་ཉི་ཟེར། མ་རུང་གཟའ་ཡིས་གློ་བུར་དུ་རྩ་་མེད་བཏང་སོང་བ་ཐོས་དུས། འོ་སྐོལ་གྱི་འདས་མ་འོངས་ད་ལྟ་གསུམ་གྱི་གནས་ཚུལ་རབ་རིབ་འགའ། དྲན་པའི་ཡིད་དུ་སམ་སིམ་དུ་བཙན་གྱིས་རྒྱུ་བཞིན་པས། འགོག་མེད་དུ་བསམ་གཞིག་གི་ཀློང་ནས་འདི་ལྟར་ཆིག་ལབ་ཤོར།
རླབས་ཆེན་མའོ་ཞེས་འབོད་པས་བོད་ས་ཡོངས་རྫོགས་དབང་བསྒྱུར་བྱས་ནས། བོད་ཡུལ་གནམ་ས་བླ་འོག་བརྗེས་བ་ལྟ་བུ་བྱུང་ཡོད་ཟེར་བ་དེ། དྲང་བདེན་གཞི་རྩར་བཞག་ཐོག སུ་ལའང་མ་ལྟོས་པའི་སྨྲ་བརྗོད་རང་དབང་ཆ་ཚང་ཞིག་སྤྱོད་ནས་འགྲེལ་ན། སྣོད་བཅུད་གཉིས་ལ་བཟང་ངན་གང་གིས་འཕོ་འགྱུར་ཤུགས་ཆེར་ཐེབས་ཡོད་པར་བསམས་ན། ཐོག་མར་སྣོད་ཀྱི་སྐོར། གུང་ཁྲན་ཏང་གིས་ཁོར་ཡུག་ལ་ཕན་པའི་བྱ་བ་ཅི་བྱས་ནི། དཔེར་ན། ཟས་ཟོས་མིན་མཁུར་ཚོས་ཤ་ལ་ལྟོས། ལས་བྱས་མིན་ལག་པའི་རི་མོར་གཟིགས། ཟེར་སྲོལ་ལྟར། ཚ་དྲོད་ལོ་རེར་ཇེ་འཕར་སོང་བ་དང་། གདོད་མའི་གངས་རྒན་དང་། འཁྱགས་རོམ་སོགས་ཇེ་ཆུང་དུ་འགྲོ་བཞིན་པ་དང་། གཙང་ཆུ་ཆེན་པོ་ཡུར་ཆུར་འགྱུར། ཡུར་ཆུ་དང་། མཚོ་དང་མཚེའུ་གྲམ་ལ་ཐུག་གིན་པའི་རང་བྱུང་ཁམས་ཀྱིས། གུང་ཁྲན་ཚང་གིས་བོད་ཀྱི་ཁོར་ཡུག་ལ་ལེགས་ཉེས་ཅི་བྱས་ཀྱི་བདེན་དཔང་བྱས་ཡོད།

ད་རུང་གཏེར་རིགས་ལ། གསེར། དངུལ། ཟངས། ལྕགས། དངུལ། ཞ་ཉེ་སོགས་གཙོས་པའི་ལྕགས་རིགས་སྣ་ཚོགས་དང་། སྣུམ་རིགས་འདྲ་མིན། སྨན་སྣ་བརྗོད་ཀྱི་མི་ལང་བ། ཤིང་རིགས་ཡོད་དགུ་དང་། འཛད་མཐའ་མེད་པའི་ནགས་ཚལ་གཅོད་འབྲེག་བྱས་དང་བྱེད་བཞིན་པ་དང་། བྱང་མཐའ་ན་བྱང་ཚ་དཀར་མོ་དང་། ཚ་དམར་སོགས། རྫོགས་མེད་ཀྱི་རྡོ་སོལ། ཕུན་སུམ་ཚོགས་པའི་རྣམ་གྲངས་སྣ་ཚོགས་ཀྱི་གཏེར་སྔོག་པའི་ཡོང་འབབ་ཀྱིས་རྒྱ་ནག་གི་དཔལ་འབྱོར་འཛམ་གླིང་ཐོག་ཏུ་ཨང་གཉིས་པར་སླེབ་སྟེ། མི་རིང་བར་རྩེ་གྲལ་དུ་ཟིན་པའི་ཡིད་ཆེས་ཕེར་བའི་གདེང་ཚོད་རྙེད་ཡོད། འོན་ཀྱང་རྒྱ་ནག་གིས་བོད་བཙན་བཟུང་བྱས་ནས། གཏེར་ཁ་དེ་དག་གི་ཆ་ཤས་ཙམ་ཡང་ཕར་ཞོག རིག་གནས་གསར་བརྗེ་སྐབས་སུ། རིན་ཐང་གཞལ་མེད་ཀྱི་སྐུ་གསུང་ཐུགས་རྟེན། གནའ་རབས་རིག་རྫས་སོགས་རྒྱ་ནག་ཏུ་འོར་འདྲེན་བྱེད་པའི་ཡོང་འབབ་གཅིག་པུ་ཙམ་གྱིས། བོད་ཡར་རྒྱས་བཏང་མེད་ཁར། ད་རུང་ཧམ་སེམས་ཆེན་པོས་ཁྲལ་རིགས་ཚད་ལས་བརྒལ་བ་བསྡུ་བཞིན་ཡོད། འབབ་ཐང་དང་། ཁང་བརྩེགས། འཁོར་ལམ་སོགས་ཕྲན་བུ་ཡར་རྒྱས་བཏང་པ་ནི། ཁོ་ཚོར་དགོས་མཁོའི་ཆེད་ལས། མི་དམངས་ལ་བསམ་ནས་ཡར་རྒྱས་ཅི་ཡང་བཏང་མེད།

ད་རུང་བདག་མེད་རི་གནས་སྲོག་ཆགས་ཕལ་ཆེར་རྩ་སྟོང་དུ་འགྲོ་ལ་ཉེ་མཚམས་སུ་སླེབ་པ་འདི་དག་གཅིག་པུར་རྒྱ་ནག་གིས་གྱོང་གུད་གསབ་དུ་མེད་པ་གྱུར་ཟིན། བོད་ནང་མཚོན་ཆ་དང་། རྫས་སྦྱོར་གྱི་བཟོ་གྲྭ་འདྲ་མིན་དང་། རྡུལ་ཕྲན་མཚོན་ཆའི་སྙིགས་རོ་བོད་དུ་སྦས་པ་སོགས་ཀྱིས་ལྷོ་ཤར་ཨེ་ཤེ་ཡི་ཕྱོགས་ལ་རྒྱུ་བཞིན་པའི་མཁའ་རླུང་དང་། ཆུ་བོ་སོགས་ལ་སྦག་བཙོག་ཐེབས་པས། སྲོག་ཆགས་གྲངས་ལས་འདས་པར་གནོད་སྐྱོན་ཕོག་བཞིན་ཡོད། དེའི་རྐྱེན་པས། འཛམ་གླིང་ཁྱོན་ཡོངས་སུ་གནོད་ཤུགས་ཇེ་ཆེར་འགྲོ་ཡི་ཡོད་དོ།།

གཉིས་པ། བཅུད་སེམས་ཅན་ལ་གུང་ཁྲན་གྱིས་ཕན་གནོད་བྱུང་རིམ་ནི། ཐོག་མར་གུང་ཁྲན་དམག་གིས་རྒྱལ་མཚམས་ནས་བཙན་འཛུལ་བྱེད་དུས། གྲོང་སྡེ་མང་པོ་དམིགས་མེད་དུ་བཅོམ་ནས་ཡོང་བ་མ་ཟད། སྐྱེས་ཕོ་མོ་དབྱེར་མེད། མཐའ་ན་བྱིས་པ་དམར་འབྱར་དང་། སྒོ་ཁྱི། སྒོ་ཕྱུགས་སོགས། སྲོག་ཆགས་མིག་གིས་མཐོང་ཚད་བསད་ནས་ཡོང་བ་རེད། བོད་ས་ཧྲིལ་པོ་དབང་འོག་ཏུ་བསྡུས་ཟིན་དུས། དམངས་གཙོ་བཅོས་བསྒྱུར་དང་། རིགས་གནས་གསར་བརྗེ་སོགས། ལས་འགུལ་གཅིག་འཕྲོར་རིམ་མཐུད་དུ་སྤེལ་ཏེ། གདོང་དམར་བོད་པ་ཤི་གསོན་ཕྱེད་ལ་གཏུག མའོ་ཤི་རྗེས་རྒྱ་ནག་གི་སྲིད་ཇུས་ཅུང་ཙམ་གུ་ཡངས་ཕྱིན་ཡོད་ཀྱང་། བོད་ཡོངས་ཀྱི་དགོན་པ་དང་། ལྷ་ཁང་མཆོད་རྟེན་དང་། དད་རྟེན་ཡོངས་རྫོགས་དམིགས་མེད་དུ་རྩ་གཏོར་ཟིན། དེ་དག་མི་དམངས་རང་འགུལ་གྱིས་སླར་གསོ་བ་ལས། རྒྱ་གཞུང་གིས་ཉམས་གསོ་བྱས་མེད།
འོན་ཀྱང་སྔར་ལས་ཕྲན་བུ་གུ་ཡངས་ཀྱི་རྣམ་པ་མངོན་ཡང་། འགྲོ་འདུག་སྤྱོད་གསུམ་དང་། དད་མོས་དང་། དཔལ་འབྱོར་རང་དབང་སོགས་མེད། དེ་རྗེས་ཁ་བྲལ་ལ་རྡུང་རྡེག་ཚ་ནན་གཏོང། ཞེས་པའི་ལས་འགུལ་འོག མི་ཁྲི་ཕྲག་མང་པོའི་ཚེ་སྲོག་བརླག དེ་རྗེས་རྒྱལ་གཅེས་ཆོས་གཅེས་ཟེར་བའི་བོད་མི་སྡུག་སྦྱོང་གཏོང་བའི་བྱ་འགུལ་བོད་ཁྱོན་ཡོངས་སུ་ལོ་བཅུ་ཕྲག་གཉིས་རིང་དུ་བསྟུད་མར་སྤེལ་བ་རེད།
སྤྱི་ལོ་གཅིག་སྟོང་དགུ་བརྒྱ་ལྔ་བཅུ་ང་དགུ་ལོའི་ཡར་སྔོན་ནམ། སྤྱི་ཚོགས་རྙིང་པའི་སྐབས་སུ། རྒྱ་གཞུང་གིས་བརྗོད་པ་ལྟར། ཀླ་ཀློ་དང་། མུན་ནག་གི་དུས་རབས་ཤིག་ཡིན་པ་བདེན་ཡང་། ཨ་ཁུ་བཅིང་གྲོལ་དམག་བསླེབས་རྗེས་ཀྱི་བོད་ཀྱི་སྣོད་བཅུད་གཉིས་ལ་གཏོར་གུད་བྱུང་བ་བཞིན། བོད་རྙིང་པས་སྐབས་སུ་གནོད་སྐྱོན་ཟུར་ཙམ་ཡང་བྱུང་མེད།

བོད་རང་བཙན་ནམ་སྡེ་བ་གཞུང་གི་སྐབས། མི་ཆོས་ལས་འདས་པའི་ཁྲིམ་ལུགས་ལག་ཏུ་བསྟར་ནའང་། བཅིང་གྲོལ་དམག་གིས་བོད་མི་ཤི་གསོན་ཕྱེད་བགོས་བྱེད་ཅིང་བོད་མི་ཕལ་མོ་ཆེ་ལ་རྡུང་རྡེག་ཕོག་པ་མ་ཟད། བོད་ས་ཡོངས་རྫོགས་བཙོན་རྭར་བསྒྱུར་ཏེ། སྔར་མི་ཡུལ་ལ་མ་གྲགས་པའི་གདུག་རྩུབ་གྱི་ཆ་ཙམ་ཡང་མི་མཚུངས།

དུས་རབས་ཉེར་གཅིག་གི་མཇུག་འདིར། ཡུལ་གྲུ་གང་སར་རང་དབང་དམངས་གཙོའི་ཉི་མ་གང་སར་འཆར་བཞིན་པའི་སྐབས་འདིར། རྒྱ་ནག་གི་སྲིད་བྱུས་ལོ་རེ་ནས་གནས་སྟངས་ཇེ་ངན་དུ་འགྱུར་བཞིན་པ་མ་ཟད། དེང་སྐབས་བོད་ས་ཐམས་ཅད་དམག་གིས་བཀང་སྟེ། འཇིགས་རུང་འཛམ་གླིང་དམག་ཆེན་ལངས་བ་ལྟར་གྱུར།
ལྷག་པར་གྲངས་ཉུང་མི་རིགས་རྩ་མེད་བཟོ་རྒྱུ་དེ། རྒྱ་གཞུང་གིས་ངན་བྱུས་འདི་སྔར་ནས་ཡོད་པ་དེ། གྲངས་ཉུང་མི་རིགས་ལྔ་བཅུ་ལྷག ད་ཆ་ཕལ་ཆེར་ལྷག་མེད་པ་ལ་སོམས་དང་ཤེས། དཔེར་ན་བོད་རྩ་མེད་དུ་གཏོང་བའི་ཆབ་སྲིད་ཇི་ལྟར་འཁྲབ་མིན་གོང་དུ་རོབ་བརྗོད་ཟིན་ནའང་། ད་དུང་སྣོན་མ་རགས་སྡུས་འགའ་བཤད་རྒྱུ་ནི། བོད་མི་དམར་གསོད་དང་བཙོན་འཇུག་ལྐོག་བསད། བོར་བརླག་སོགས་བྱུང་དང་འབྱུང་བཞིན་པའི་གནས་ཚུལ་ཉིན་རེ་ནས་ཐོན་བཞིན་པ་དེ། རྒྱུན་ལྡན་གྱི་གནས་ཚུལ་རེད།

ད་དུང་བོད་འདི་འབུར་འཇོམས་དང་། ཁྱད་གསོད་མཐོང་ཆུང་བྱེད་ཀྱིན་པ་ནི། གྲགས་ཅན་གྱི་མི་སྣ། གཞན་པ་སྐད་གྲགས་ཅན་དང་། འབྱོར་ལྡན་དང་། སྒྱུ་རྩལ་བ། མཁས་དབང་། རྩོམ་པ་པོ། མི་རིགས་ལ་གཅེས་མཁན་སོགས། རིམ་བཞིན་རྩ་མེད་དུ་བཟོས་ཡོད་པ་དག་བགྲང་གིས་མི་ལང་ཡང་། དཔེ་མཚོན་ཁ་ཤས་ཙམ་བརྗོད་ན། པན་ཆེན་སྐུ་ཕྲེང་བཅུ་བ། གསེར་རྟ་མཁན་པོ་འཇིགས་མེད་ཕུན་ཚོགས། དགེ་བཤེས་བསོད་ནམས་ཕུན་ཚོགས། གུང་ཐང་རིན་པོ་ཆེ། སོགས་ལྐོག་བསོད་བྱས་པ་ཡོངས་གྲགས་ཀྱི་མི་སྣ་གྲགས་ཅན་དག་རེད། གོང་གི་ལོ་རྒྱུས་དེ་དག་ལ་བསམ་ན། བླ་མ་ཨ་དཀོན་རིན་པོ་ཆེ། རྒྱ་ནག་གིས་ལྐོག་གསོད་བཏང་ཡོད་པར་དོགས་པའི་རླུང་བུ་རང་བཞིན་གྱིས་བོད་མི་ཚོའི་སེམས་ཁོང་ནས་གཡོ་འོང་བ་ཞིག་རེད།
དེང་འདིར་དྲྭ་ལམ་གང་ས་ནས་གནས་ཚུལ་ཐོན་པ་ལྟར། ལྷ་སྐུ་ཁ་ཤས་ཀྱི་གོང་ཚད་ལ། འབྱོར་ལྡན། གཏོང་ཕོད་ཅན་དང་། ལྷག་བསམ་ཅན་གྱི་བླ་མ་ཨ་དཀོན་གྱིས། ཚོད་འཛིན་མེད་པར་དམར་འཛིང་བྱུང་བ་དེ་ཡིད་དུ་མི་འཐད་པའི་གཏམ་དང་། གལ་སྲིད་དམར་འཛིང་བྱུང་ཡོད་ན། མཚོན་ཆ་སྔ་ས་ནས་གྲ་སྒྲིག་ཡོད་པ་དེའང་། ཡིད་མི་ཆེས་པའི་སྐད་ཆ་དང་། ཨ་དཀོན་འཁོར་གཡོག་ཚང་མ་སྡེབ་གསོད་བཏང་བ་དེའང་ཆ་འཇོག་བྲལ་བའི་འུར་གཏམ་གྱི་ལྐོག་གཡོ་ཡིན་པར་དོགས།

དེའི་ནང་དགེ་སྡིག་ལ་ཡིད་ཆེས་ཡོད་པའི་བོད་མི་གསུམ་པོ་སུས་ཀྱང་ཚོད་འཛིན་མེད་པ་སྡེབ་གསོད་བཏང་བ་དེའང་། དོགས་པའི་ཡུལ་རེད། བསད་མ་ཐག་ནས་གསར་འགྱུར་བརྒྱུད་ལམ་མི་འདྲ་བ་མང་པོ་ལས། ཁྱབ་བསྒྲགས་གཅིག་མཚུངས་སུ་བྱུང་བ་དེའང་། ཐེ་ཚོམ་སྐྱེས་གཞི་ཞིག་རེད། ཉེས་ཅན་པ་ཕྲལ་དུ་འཇུས་པ་དེའང་བསམ་ཡུལ་ལས་འདས་པ་ཞིག་རེད། ཉེན་རྟོག་པས་གསར་འགོད་པ་ལ་བཅར་འདྲི་དང་ལེན་མི་ཐུབ་པའི་ཚིག་མགོ་རྔ་མི་མཚུངས་བ་འདི་དག་ཡོང་དོན་ཅི་འདྲ་རེད། བརྒྱུད་རིམ་གང་ལ་དཔྱད་ན། དོགས་གཞི་སྐྱེ་བའི་གནས་ཇེ་མང་རེད། དབྱིན་ཇི་མི་སེར་ཡིན་པས། དབྱིན་གཞུང་ནས་ལས་སླ་པོ་འཇོག་མདོག་མ་རེད་ལ། འཇོག་འོས་པའང་ག་ལ་ཡིན། དབྱིན་གཞུང་གིས་ཞིབ་འཇུག་ཚོགས་ཆུང་རྒྱ་ནག་ནང་གཏོང་གི་ཡོད་ཀྱི་རེད་ལ་གང་མགྱོགས་གཏོང་དགོས་ངེས་རེད།

ངས་ཨ་དཀོན་རི་པོ་ཆེའི་སྐོར་ལ་ཆ་རྒྱུས་ཆེན་པོ་མེད། ཁོང་གི་སྐུ་ཡུལ་ནི། རི་བོ་ཆེ་རེད། དཔའ་ཤོད་ཀྱི་འབྲོག་ཁུལ་ཞིག་གི་བཀའ་བརྒྱུད་དགོན་པ་ཆུང་ཆུང་ཞིག་གི་བླ་མ་རེད། ཁོང་གིས་བོད་མི་རིགས་ལ་རླབས་ཆེན་གྱི་མཛད་རྗེས་བརྗོད་ཀྱིས་མི་ལང་བའི་བྱས་རྗེས་བཞག བོད་ཀྱི་ཆོས་དང་རིག་གཞུང་སྙམ་པ་སླར་གསོ་དང་། མི་ཉམས་གོང་འཕེལ་ཕྱིར་དུ་མི་ཚེ་ཧྲིལ་བོར་བརྩོན་པ་ལྷོད་མེད་གནང་། ཁོང་གིས་བཙུགས་པའི་སློབ་གྲྭ་དང་། སྨན་ཁང་སོགས། བོད་ཡུལ་ཆོལ་ཁ་གསུམ་ལ་ཁྱབ། ལྷག་དོན་ཁམས་ཁུལ་དུ་ཁོང་ལས་ལྷག་པའི་དྲིན་ཆེན་ཞིག་མེད། བོད་ཁྱོན་ཡོངས་ལ་པན་ཆེན་གཉིས་པ་ཞིག་རེད།ཁོང་གིས་རྫོང་ཁག་མང་པོ་ནང་། རྒན་གསོ་ཁང་དང་། སློབ་གྲྭ་དང་། སྨན་ཁང་སོགས་བཙུགས་ཡོད། དབུལ་ཕོངས་དང་། སློབ་གྲྭ་ཆེ་འབྲིང་ཆུང་གསུམ། དགོན་སྡེ་ཁག་སོགས་ལ་རོགས་དངུལ་དང་། ད་རུང་ཁོར་ཡུག་སྲུང་སྐྱོབ་ཚན་པ་སོགས་ཧ་ཅང་མང་པོ་བཙུགས་ཡོད

ཕྱི་རྒྱལ་ཡུལ་གྲུ་མང་པོའི་ནང་། ཆོས་ཀྱི་སྦྱིན་པ་དང་། ཡར་རབས་ཀྱི་སྤྱོད་ལམ་གོང་འཕེལ་གཏོང་ཆེད། འབད་བརྩོན་རྟག་ཏུ་གནང་ཡོད། ༧གོང་ས་མཆོག་གིས་ཐུགས་བརྩེ་ཧ་ཅང་ཆེ་བའི་བླ་སྤྲུལ་ཞིག་ཡིན། གཞན་ནས་ཐོས་པ་དེ་བདེན་ན། སྔར་ནས་ཁོང་གིས་ནུབ་ཕྱོགས་སུ་ཆོས་བཤད་རྒྱུ་དང་། བོད་ལ་སློབ་གསོ་དར་སྤེལ་གྱི་འབད་པ་བྱེད་རྒྱུ་དེ། མི་ཚེ་གང་བོར་བསྒྲུབ་པའི་དམ་བཅའ་བཞག་ཡོད་འདུག
ཁོང་ལ་བླ་མའི་མིང་ཙམ་ལས་བླ་ཆེན་གྱི་གོ་ས་ཞིག་མེད་པས། མི་དམངས་ཁྱོན་ཡོངས་ནས་རྒྱབ་སྐྱོར་བྱེད་མཁན་མེད་ནའང་། གཏམ་དཔེ་ལ། བུ་རྒོད་ན་གཅིག་གིས་ཆོག ཟེར་བ་ལྟར། མཛད་རྗེས་བླ་མེད་དུ་བཞག་ཐུབ་ཡོད།

བོད་ནང་ནས་ཁོང་ལ་མྱ་ངན་དང་སྨོན་ལམ་འདོན་མཁན་སློབ་གྲྭ་དང་དགོན་སྡེ་ཁག ཚོགས་པ་ཁག སྒེར་སོགས་མང་པོ་འདུག་མོད། ང་ཚོ་བཙན་བྱོལ་ནང་། གཞུང་དང་། ཚོགས་པ། སུས་ཀྱང་ཅང་མི་སྨྲ་བའི་བརྟུལ་ཞུགས་བཟུང་སྟེ་གཉིད་དུ་ཡུར་དགོས་དོན་འདི་ཅི་ཡིན་ནམ། ཁོང་རླབས་ཆེན་གྱི་མི་སྣའི་གྲས་སུ་འཇོག་མ་འདོད་ནའང་། བོད་མི་དཀྱུས་མའི་གྲལ་དུ་འཇོག་ལོས་དགོས། ཁོང་འདས་སྟངས་དེ། དོགས་གཞི་སྐྱེས་དགོས་པ་ཞིག་ཡིན་པས་ངེས་པར་དུ་རང་དགར་འཇོག་འོས་ཤིག་གང་ལ་བསམས་ཀྱང་གཏན་ནས་མ་མཐོང་ངོ་།།

ཨོའུ་སི་ཁྲོལ་ལེ་ཡའི་ཞི་བདེ་མཚོ་ངོགས་ནས།