འབའ་པ་སྐལ་བཟང་འཕྲིན་ལས།
___བདག་གི་བླ་མ་བདག་ཉིད་ཆེན་པོ་༧གོང་ས་རྒྱལ་དབང་ཡིད་བཞིན་ནོར་བུ་མཆོག་གི་འཁྲུངས་སྐར་བསུ་བ།
ཚན་པ་དང་པོ། ཞི་བདེའི་སྟོན་པ།
ཁྲག་སྦྱོར་འཕྲལ་ཕུགས་བརྒྱུད་ལམ་སྤྱད་ནས་གནད་དོན་མཐའ་གཅོད་བྱས་པ་ཡི།།
ཉེར་གཅིག་དུས་ཀྱི་ངེས་མེད་འཕར་མཆོང་མིག་མདས་དེད་ནས་མཐར་གཏུགས་དུས།།
སྣོད་བཅུད་གཉིས་ཀ་ཀླད་ཀོར་གྱུར་བའི་མིག་དཔེ་སྟོང་གི་མཇུག་ཐོགས་སུ།།
ཞི་བདེའི་ལས་ཀྱིས་གོ་ལ་བསྐོར་བའི་ཐབས་ཚུལ་ཞིག་གིས་དཔེ་བརྗོད་བཞག།
གང་དུ་སྲོག་ལྡན་གཟིགས་པར་གྱུར་ན་དེའི་ཚེ་མ་རུ་འདུ་ཤེས་ནས།།
ཡོད་ཚད་རང་གི་བྲང་ཁར་གཏད་པའི་གཞུང་ལུགས་ཟབ་མོའི་མཇུག་བྱང་དུ།།
ཁྱེད་དང་ང་ཞེས་རིས་བཅད་ཞི་བའི་རྗོད་ཚིག་འབུར་མ་བཀོད་པ་ཡིས།།
གོ་ལའི་ཐོག་ཏུ་ཞི་བདེའི་རིགས་པར་ལག་ལེན་བྱེད་པའི་སྲོལ་ཀ་ཚུགས།།
འཁོར་འབངས་ལག་འོག་ཚུད་པའི་སླད་དུ་འགྲན་རྩོད་དམར་པོའི་འུར་ཟིང་བསླངས།།
རྐང་སྟེགས་ཁོར་ཡུག་རྒྱ་རུ་བསྐྱེད་སླད་གྲལ་རིམ་འབྱེད་པའི་འཁྲུག་ཆེན་བསླངས།།
བསླངས་བ་གཉིས་ཀྱི་རྐྱེན་རྩ་དེད་དུས་རང་ལ་གཅེས་པ་ཤས་ཆེ་བའི།།
གནས་ལུགས་ཤིག་གི་ངོ་གདོང་མཐོང་ནས་གཞན་གཅེས་ཁྲིམས་ཀྱི་བསྒྲགས་གཏམ་སྤེལ།།
རང་འདྲ་གཞན་ལ་བདེ་བ་དགོས་པའི་གཏན་ཚིགས་ཟབ་མོའི་སྒུལ་ཤུགས་ཀྱིས།།
མི་དང་མི་མིན་ཚེ་སྲོག་ཚང་མ་འདྲ་མཉམ་ཡིན་པའི་བློ་རེ་འཁྲུངས།།
ཉམས་བཞེས་འདི་ཉིད་རྒྱབ་ཏུ་བསྣམས་ནས་ཤར་ནུབ་ཡུལ་དུ་བཙན་འཛུལ་བྱས།།
བཙན་འཛུལ་ཐེབས་སའི་ཡུལ་གྲུ་ཀུན་ཏུ་རང་གཞན་རིས་བཅད་སྣང་བ་ནུབ།།
ཆོས་ལུགས་ཕན་ཚུན་མཆོག་དམན་བརྩད་དེ་སྣོད་བཅུད་ཕུང་ལ་དེད་པའི་དུས།།
ཆོས་ལུགས་ཡོངས་ཀྱི་མཐའ་མའི་བབ་ས་བདེ་བ་སྒྲུབ་པ་ཉིད་ཡིན་པའི།།
གནས་ལུགས་ལྡན་པའི་གླེང་ཕྱོགས་དེ་ཉིད་གོ་ལའི་ངོས་སུ་བཏབ་པས་ན།།
དོན་མེད་རྩོད་པའི་མེ་ཕུང་ཞི་ནས་འཛའ་བརྩེའི་ལག་མདངས་དམ་དུ་སྒྲིལ།།
ཕ་བསད་མར་རྡུང་ཤ་སྐྱིན་ཡོད་པའི་དགྲ་བོ་ཚོགས་ཀྱི་བྲང་གཞུང་དུ།།
མདའ་དང་མདེའུ་ཆར་པ་ཕབ་ཀྱང་འདས་པ་གསོན་པའི་སྐལ་མེད་པས།།
དགྲར་སྡང་སྦྱོར་བས་རང་ཉིད་ཕུང་པའི་གནས་ལུགས་དམར་རྗེན་མཐོང་བ་ཡིས།།
དཔའ་བའི་ནུས་སྟོབས་ཞི་བར་བཀོད་པའི་དཔེ་བརྗོད་སྨུག་པོ་གོ་ལར་བསྒྲགས།།
ཁེ་དབང་རྩོད་པའི་མཐའ་མའི་བབ་ས་ཁེ་དབང་ཐོབ་པ་ཉིད་ཡིན་པས།།
ཁེ་དབང་ལག་ཏུ་སོན་པར་འགྱུར་ན་ཅི་ཡང་རུང་བའི་ཐབས་ཚུལ་གྱིས།།
ལོ་རྒྱུས་རིང་པོས་བདག་དབང་སྦྱིན་པའི་ཁེ་དབང་ཡོད་ཚད་བློས་བཏང་ནས།།
ངོས་ཆེན་གཉིས་ཀར་ངོ་ཐོག་ཕན་པའི་དབུ་མའི་ལམ་བཟང་སྲོལ་དུ་བཏོན།
ཁྱུ་གཅིག་གོ་འཕང་གནམ་ལ་བཏེགས་ཏེ་ཁྱུ་གཞན་གཉའ་བ་གདན་བསྟིམས་པའི།།
འཁྱོག་པོའི་གཞུང་ལུགས་རྒྱབ་ཤ་གཏོར་ནས་ནང་མཚང་རྫོབ་ཏོ་ཕྱི་རུ་བཏོན།།
ཚེ་སྲོག་ཐམས་ཅད་འདྲ་མཉམ་ཡིན་པའི་སེམས་ཀྱི་ལྟ་ཕྱོགས་ལག་ལེན་ཏེ།
གནམ་འོག་ཚེ་སྲོག་འདྲ་མཉམ་སླད་དུ་གསེར་མདོག་ཞབས་རྗེན་སྤོ་བཞིན་བསྐྱོད།།
ཆེན་པོས་ཆུང་ངུ་བརྫི་བར་བརྩམས་ན་འདྲ་མཉམ་རྨང་ནས་གཏོར་བ་དང་།།
སྡིགས་ར་ཁོ་ནས་མགོ་བོར་གནོན་ནས་དོན་གྱི་འཆམ་མཐུན་གཏོར་བས་ན།།
མགོ་བོ་གནམ་བསྟན་སྲོག་ལྡན་ཅོག་ལ་དོ་མཉམ་གོ་འཕང་རྩལ་འགྱུར་ན།།
དོན་གྱི་འཆམ་མཐུན་དཔེ་བརྗོད་འོས་པའི་རེ་འདུན་མང་པོ་གནམ་སར་བསྒྲགས།།
ཚན་པ་གཉིས་པ། རྟེན་འབྲེལ་གྱི་སྟོན་པ།།
པཎ་ཆེན་ཀླུ་སྒྲུབ་རིགས་པས་དྲངས་པའི་ཤཱཀྱའི་རྒྱལ་པོའི་སྙིང་ནོར་མཆོག།
སྟོང་དང་རྟེན་འབྲེལ་རིགས་པའི་ཚུལ་དེས་དེང་རབས་རིག་པའི་ཁོག་དྲུད་ནས།།
ཕྲ་རགས་གནས་ལུགས་ར་སྤྲོད་གཏོང་བའི་སྔོན་མེད་རྣམ་གཞག་བཏོད་པས་ན།།
ངུར་སྨྲིག་ཅན་གྱི་ཚན་རིག་པ་ཡི་དཔེ་བརྗོད་དང་པོ་ཁྱེད་ཉིད་གྱུར།།
རྡུལ་ཕྲན་འདབ་སྦྱར་བརྟག་ཐབས་ལམ་ནས་རྣམ་གཞག་གཏན་འབེབས་བྱེད་པ་ཡིས།།
དོགས་དང་རྣམ་རྟོག་ཆེས་ཆེར་གྱུར་ནས་གནས་ལུགས་ལ་རྒྱབ་ལུས་པ་ན།།
རྒྱང་ཤེལ་འཕྲུལ་ཆར་ནུས་ཤུགས་མེད་པའི་རང་མཚང་སྐྱུར་མོར་མྱོང་མཁན་ཚོས།།
ཁྱེད་ཀྱི་ཞབས་འོག་མགོ་བོ་བཞག་ནས་སྟོང་དང་རྟེན་འབྲེལ་བྱིན་རླབས་ཞུས།།
ཤེལ་དང་རྩིས་ཀྱི་རིག་པ་སྲབ་མོས་ཤེས་བྱའི་མཐའ་གཅོད་བྱས་པའི་མཐར།།
གྲུབ་པའི་མཐའ་ལས་གཏན་དུ་བརྒལ་བའི་གནས་ལུགས་དུ་མ་ཐོན་པ་ན།།
མངོན་པའི་ང་རྒྱལ་ཆུ་ལ་སྐྱུར་བའི་མགོ་སེར་རྡུལ་སྦྱོར་མཁན་པོ་ཚོས།།
ཁྱེད་ཀྱིས་བསྟན་པའི་རིགས་འཕྲུལ་སྤྱད་པས་ད་གཟོད་གནས་ལུགས་བློ་ལ་བབས།།
རྩིས་དང་རྡུལ་གྱི་གྲངས་ཀ་གཤེར་ནས་གནས་ལུགས་འཚོལ་བའི་འུར་སྒྲོག་ཀྱང་།།
མཐའ་དང་ཐོག་མའི་རྟེན་གཞི་གཟུང་ས་གང་ཞིག་བརྟེན་ནས་ཡིན་པས་ན།།
གནས་ལུགས་འབེབས་པའི་རིགས་པ་དེ་དག་ཕུ་དེད་བྱས་པའི་ལས་བརྩམས་ན།།
རྟེན་ཅིང་འབྲེལ་བའི་རིགས་པ་ཡིན་པར་ཁྱེད་ཀྱིས་དཔེ་བརྗོད་མང་པོ་འཇོག།
འབར་གད་གཅིག་གིས་གོ་ལ་གཏོར་བའི་རྫས་སྦྱོར་མཁན་པོའི་བསམ་བློ་རུ།།
རང་རྐང་རྟེན་སའི་གོ་ལ་གད་ན་རང་ཉིད་གད་པར་འགྱུར་བ་ཡི།།
རྟེན་ཅིང་འབྲེལ་བའི་དཔང་རྟགས་མང་པོས་གནས་ལུགས་དུ་མ་ར་སྤྲོད་པས།།
རང་གཞན་རྟེན་ཅིང་འབྲེལ་ཚུལ་ཤེས་པས་ད་གཟོད་གད་གཏོར་བསམ་བློ་ཞར།།
རང་གི་བདེ་དགའི་སྤྲོ་བ་མ་ལུས་གཞན་ལ་རྟེན་ནས་བྱུང་བ་ཡི།།
དཔེ་བརྗོད་སྟོང་ཕྲག་རིགས་པའི་ལམ་ནས་ཡང་ནས་ཡང་དུ་བསྟན་པ་ཡིས།།
ལུས་སྟོབས་སེམས་ལ་སྤོ་པར་ནུས་པའི་རྗེས་འཛིན་གྲངས་མེད་སྐྱེས་བསྲིངས་ཏེ།།
རྟེན་འབྲེལ་ལམ་ནས་འཚེ་བ་མེད་པའི་ཀུན་སྤྱོད་རྣམ་གཞག་ཁྱབ་སྤེལ་བཏང་།
རིགས་གསར་དར་ཆེན་ལག་ཏུ་འཕྱར་བཞིན་སྲོལ་ལུགས་རྐང་པས་བརྗིས་པ་ཡི།།
གསར་བྱུང་མཁན་པོས་འདབ་སྦྱར་རྡུལ་རིགས་ཁོག་དང་ཁ་ནས་དྲུད་ཀྱང་རུང་།།
གྲུབ་པའི་མཐའ་ཡི་ཕྱི་རུ་གྱར་བའི་སྔ་ཕྱིའི་སྐྱེ་བའི་རྣམ་གཞག་སོགས།།
རྟེན་འབྲེལ་རིགས་པར་བསྟེན་པ་མེད་ན་གཏན་འབེབ་བྱས་པའི་གོ་སྐབས་དབེན།།
སྔོ་ལྗང་ཅན་གྱི་ཁོར་ཡུག་བཀོད་པ་བྱེ་མའི་ཐང་གི་གཡང་སར་གྱུར།།
གནམ་གཤིས་འགྱུར་བའི་ཚད་གཞི་མྱུར་མོས་སྣོད་བཅུད་ཉིས་ཀ་ཚ་བར་སྦྱོར།
རབ་བྱུང་འཇིག་པའི་རྐྱེན་རྩ་དེད་ན་རང་སེམས་འདོད་རྔམ་ཐུག་པ་ཡི།།
གནས་ལུགས་དེའི་སྐེད་རྩ་གཅོད་ཆེད་རྟེན་འབྲེལ་རིགས་པས་བརྡ་ཞིག་གནང་།།
དབུལ་ཕྱུག་ཧེ་བག་ཁྱད་པར་གྱུར་ནས་སྡུག་བསྔལ་ཐོག་ཏུ་བབས་པ་དང་།།
ཆེས་ཆུང་མགོ་བོར་གནོན་པའི་འཐབ་འཁྲུག་འཇིག་རྟེན་ཟང་ཟིང་བཟོ་པ་སོགས།།
མི་འདོད་སྡུག་བསྔལ་ཐོག་ཏུ་བབ་པའི་ངལ་བ་དྲག་པོའི་ཁ་གཏད་དུ།།
རྟེན་ཅིང་འབྲེལ་བའི་རིགས་པ་དེ་ཡིས་ཕྱོགས་ཁག་གཉིས་ཀར་བཟོད་ཚུལ་བསྟན།།
སྔོན་བྱོན་མཁས་པས་གནམ་ངོ་ཁེགས་ཀྱང་ཆོས་སྒྲ་དགོན་པ་ཁོ་ནར་གནང་།།
དེང་གི་ཁྱེད་ཀྱིས་དམ་ཆོས་སྙིང་པོ་སྤྱི་ཚོགས་འཚོ་བའི་ཁྲོད་དུ་དྲངས།།
སྟོང་དང་རྟེན་འབྱུང་རིགས་ཚུལ་རྣོན་པོས་འཕྲལ་ཡུན་སྡུག་བསྔལ་གཏོར་བ་ཡི།།
སྲོལ་ལུགས་དེ་ཡི་མགོ་ཁུངས་དེད་ན་ཤིང་རྟའི་སྲོལ་དེ་ཁྱེད་ལ་ཐུག།
ཕྱག་སྐོར་དད་པའི་རྣམ་འགྱུར་ཙམ་གྱིས་ཆོས་ཀྱི་གོ་ས་འཛིན་སྙམ་པའི།།
ལོག་རྟོག་ངན་པའི་སྐྱུར་ཁ་གཏོར་ནས་དོན་དམ་ཆོས་ཀྱི་ཐ་སྙད་དེ།།
ཤེས་ཡོན་རང་ཞིན་གནས་ལུགས་ལྡན་པའི་དཔང་དང་རྟགས་ཀྱིས་སྒྲུབ་ཟིན་ཏེ།།
ཤེས་ཡོན་ཉམས་པར་མ་གྱུར་བར་དུ་ནང་བསྟན་གནས་པའི་རྨང་གཞི་བསྟིངས།།
སྔོན་བྱོན་མཁས་པས་རྟེན་འབྲེལ་སྤྱད་དེ་ཕྱི་ལུགས་རྒོལ་བ་ཚར་བཅད་ཀྱང་།།
དེང་གི་ཁྱེད་ཀྱིས་རྟེན་འབྲེལ་རིགས་པས་རིག་གསར་མཁན་པོ་ཚུར་ལ་འདུས།།
འདྲིས་ཤིང་འགྲོགས་པའི་ཉེ་གཉེན་ལམ་ནས་རིགས་པས་ཡང་ཡང་འཐག་པ་ཡིས།།
ཚུར་འདུས་བྱས་པའི་གྲུབ་འབྲས་འདི་ཡིས་ཚར་གཅོད་ལས་དེ་ཨང་མཐར་བཀོད།
ཤཀྱཱ་ཐུབ་པའི་རྟེན་འབྲེལ་མཚོ་རུ་པཎ་ཆེན་ཀླུ་ཡིས་པད་མ་འཛུགས།།
ཟླ་བ་གྲགས་པས་གེ་སར་བསྐྱངས་ནས་བློ་བཟང་གྲགས་པས་སྦྲང་རྩི་བསྒྲུབས།།
བསྟན་འཛིན་རྒྱ་མཚོས་སྦྲང་རྩི་ཁྱེར་ནས་ཤར་ནུབ་ཡུལ་དུ་བཙན་འཛུལ་བྱས།།
སྦྲང་རྩི་མྱངས་པའི་སྐྱེ་བོ་མཐའ་དག་ཞི་བའི་སྤྱོད་པས་སྒོ་གསུམ་བསྡམས།།
སྔོན་བྱོན་མཁས་པས་ཚར་གཅོད་གཙིགས་ནས་རྒོལ་བ་སྟོང་ཕྲག་ཕ་མཐར་བསྐྲད།།
ཡོད་ཚད་མཐའ་རུ་བསྐྲད་པ་དེ་ཡིས་རྟེན་འབྲེལ་སྲུང་བའི་བུ་རྒྱུད་དཀོན།།
ཁྱེད་ཀྱིས་ཚུར་འདུས་གཙིགས་སུ་བཟུང་ནས་འདྲིས་འགྲོགས་ཉེ་བའི་བརྒྱུད་ལམ་ནས།།
རྟེན་འབྲེལ་རིགས་པས་ཡོད་ཚད་འདུས་ནས་སྲུང་དམག་སྟོང་གི་སྟོབས་ཤུགས་རྙེད།།
རྟེན་ཅིང་འབྲེལ་བས་སྟོན་པ་གླེང་བའི་གླེགས་བམ་རྔམ་ཁ་ཆེས་མཐུག་ཀྱང་།།
བྱང་སེམས་སྤྱོད་པས་སྟོན་པ་གླེང་བའི་དོན་དམ་ངག་རིག་ད་ཕན་མེད།།
དེའི་ཕྱིར་ཐབས་ཤེས་ཟུང་འབྲེལ་ལམ་ནས་སྟོན་པ་བླ་མ་གླེང་ཚུལ་དེ།།
ཕྱིན་ཆད་བླ་མ་འཚོལ་སྟངས་ཤིག་གི་འགོ་ཁུངས་སྟོན་པའི་དུང་བརྡ་ཡིན།།
ཐབས་ཤེས་ཡ་བྲལ་བརྒྱུད་ལམ་སྤྱད་ནས་བླ་མ་རྙེད་མཁན་ཡོད་སྲིད་ཀྱང་།།
ཐབས་ཤེས་ཟུང་གི་བརྟག་ཐབས་ལམ་ནས་བླ་མ་བཞེངས་མཁན་སྨྱུ་གུ་མེད།།
དེའི་ཕྱིར་ཐབས་ཤེས་ཕྲུགས་ཀྱི་ལམ་ནས་བླ་མ་ཉམས་སུ་མྱོང་བྱས་ཏེ།།
གོ་ལའི་ཐོག་ཏུ་བསྒྲགས་གཏམ་སྤེལ་དེས་སྤྱན་ཅན་ཚོ་ལ་ལེགས་སྐྱེས་འབུལ།
༧ དུས་རབས་ཉེར་གཅིག་དམག་འཐབ་མུན་གླིང་འདིར།།འཚེ་མེད་ཞི་བདེའི་གསེར་ཞུན་ཉི་མས་གསལ།། འཛམ་གླིང་ཞི་བདེའི་ལམ་འཁྲིད་དེད་དཔོན་ཆེ།།ས་གསུམ་བླ་མ་བསྟན་འཛིན་རྒྱལ་མཚོར་འདུད།།