འབྲི་སྐལ་ལྡན།
དེང་སྐབས་དགའ་འོས་པ་ཞིག་ལ་བོད་མི་ཚོས་མང་གཙོའི་ལམ་དུ་དངོས་སུ་འཇུག་སྟེ་རང་རང་བློ་ལ་བབས་པའི་ 2016 ལོའི་སྲིད་སྐྱོང་རེ་འཚོལ་བཞིན་པ་ལྟར། གུས་པ་རང་ཉིད་ཡང་དགའ་གུས་སྤྲོ་གསུམ་གྱི་སྒོ་ནས་དོ་སྣང་དང་ངལ་བ་མི་ཉུང་བ་ཞིག་བྱས་ཀྱང་བཀྲ་སེང་གཉིས་ལས་གཞན་པའི་འོས་འཚམས་ཀྱི་སྲིད་སྐྱོང་ཞིག་འདི་ལོར་རྙེད་མ་སོང་། གཅིག་བྱས་ན་རང་ཉིད་ཤེས་ཚད་ཞན་དྲགས་པ་དང་མཐོང་རྒྱ་ཆུང་དྲགས་པས་ཡིན་རྒྱུ་རེད། གང་ལྟར་སྤྱི་ཚོགས་འདིའི་ཁྲོད་ནས་མིག་མདུན་དུ་ལམ་ལམ་ཤར་ཡོང་བ་ནི་འཇོན་ཐང་གི་དཔུང་པ་བསྡུར་ཏེ་ཡོང་སྐབས། སུ་ཞིག་གིས་འགྲན་མི་ནུས་པའི་ཕོ་རྒོད་འདི་གཉིས་ཡིན། འདི་གཉིས་ལས་གཞན་པའི་འོས་མི་འགའ་ཤས་ཡོད་པ་རྣམས་ལ་དགའ་གུས་དང་རྒྱབ་སྐྱོར་ཡོད་ཀྱང་ལོ་འདིའི་སྲིད་སྐྱོང་འོས་བབ་དང་མི་དམངས་སེམས་བདེ་ཡོང་བའི་འོས་མི་ཞིག་ཏུ་མཐོང་མ་ཐུབ།
གང་ཡིན་ཞེ་ན། འགའ་ཤས་ལོ་རྒྱུས་དཔྱད་པར་དཀའ་བ་དང་འགའ་རེས་འཇོན་མིན་ཚོད་མི་ཐེག་པ་སོགས་ཀྱིས་འབྲི་བར་མ་ནུས་པས་མཚམས་འདི་ནས་མི་འཇོག་དཀའ་མེད་བྱུང་། རང་གིས་བདམས་ཟིན་པའི་མི་བུ་འདི་གཉིས་ལ་ཡང་དབྱེ་ཞིབ་མི་ཉུང་བ་རེ་བྱས་མཐར།
བསྐྱར་ལྟ་རེ་བྱས་ཏེ་བཤད་ན། ད་ལྟའི་སྲིད་སྐྱོང་མཆོག་ནི་ཤེས་འཇོན་གཉིས་ལྡན་གྱི་མི་བུ་ཞིག་ཡིན་པ་མ་ཚད། ཀུན་གྱིས་མཁས་དབང་ཞེས་མཚན་སྙན་འབྲུག་ལྟར་གྲགས་པ་ཞིག་དང་འབུམ་རམས་པའི་མཚན་སྙན་དངོས་སུ་ཐོབ་པའི་མི་བུ་ཁྱད་པར་འཕགས་པ་ཞིག་ཡིན་པ་ལས་ད་ག་སའི་མི་སྣ་ཞིག་ཁྱོན་ནས་མ་ཡིན། ཁོང་གིས་ལོ་ཤས་ནང་ཕྱག་ལས་གང་མང་གནང་ཡང་ཞབས་འདྲེན་དང་ངོ་ཚ་དགོས་པའི་གནས་ཚུལ་མ་ཐོན་ཀྱང་།
ང་རང་ཉིད་ཀྱི་རེ་བ་ལྟར་དུ་བྱས་ན་སྔོན་མའི་འཛིན་སྐྱོང་ལས་ཕྱོགས་རྣམས་རྒྱུན་གནས་ཐོག་འཛིན་སྐྱོང་གསར་པའི་ཐད་ལས་གཞི་གསར་པ་ཁ་གསལ་གོ་བདེ་མང་དག་གྲོས་ཚོགས་སུ་ཕུལ་ཏེ། བོད་པའི་སྤྱི་ཚོགས་སུ་ཆབ་སྲིད་འཛིན་སྐྱོང་བྱེད་སྟངས་སྔོན་དང་མི་འདྲ་པར་ལེགས་བཅོས་གང་མང་ཡོང་བ་དང་། ཁོང་གིས་གསུངས་པ་བཞིན་བཙན་བྱོལ་དུ་ཆེད་ལས་སློབ་མ་མང་པོ་གསོ་སྐྱོང་དང་། དེའི་ཁྲོད་དུ་བོད་པའི་རིག་གཞུང་ཐད་ཆེད་ལས་པ་མི་ཉུང་བ་ཞིག་གསོ་སྐྱོང་དང་ལྷག་ཏུ་ཁོང་གིས་བཏོན་པའི་ལྟ་གྲུབ་གསུམ་ལ་དམིགས་བསལ་གྱིས་ལས་གཞི་གང་མང་ཞིག་ཡོད་རེ་བྱས་ཀྱང་ལོ་ཆེན་བཞིའི་ནང་རྒྱ་གར་གྱི་མཐོ་སློབ་ཁག་ཏུ་བོད་ཕྲུག་ཚོར་སློབ་ཡོན་སྤར་ཆ་ཙམ་ལས་གཞན་རྣམས་ལ་ལས་གཞི་ཕལ་ཆེར་མཐོང་དུ་མེད་པ་ལྟ་བུར་སྣང་བ་མ་ཟད། སྲིད་སྐྱོང་གིས་བྱ་དགའ་སྤྲོད་ཚུལ་ལ་བསམ་ན་ཁོང་གིས་རང་རིག་ལ་དགའ་ཞེན་ཅུང་ཆུང་དྲགས་པའི་ཚུལ་སྣང་ཡང་ཤུགས་ཆེན་སྐྱེས་བྱུང་།
བོད་རྒྱ་གྲོས་མོལ་ཐད་ལ་ཡང་སྐུ་ངོ་བཀྲ་ཤིས་དབང་འདུས་ལགས་ཀྱིས་གསུངས་པ་ལྟར་བློ་ཁ་གང་བའི་བྱེད་སྟངས་ཞིག་གཏན་ནས་མ་རེད་སྙམ། ཡིན་ན་ཡང་ངས་སྔོན་དུ་རྒྱབ་སྐྱོར་བྱས་པ་ནོར་བར་མ་བསམ་ཡང་། ལོ་འདིའི་འོས་ཤོག་དེ་ཁོང་ལ་འབུལ་རྩིས་མེད་པ་རང་བཞིན་དུ་གྱུར་སོང་། དེའི་ཕྱིར་འདི་ལོའི་འོས་ཤོག་གཅིག་རང་ཡོད་པ་དེ་ཉིད་སྐུ་ངོ་བཀྲ་ཤིས་དབང་འདུས་ལགས་ཀྱི་ཕྱོགས་སུ་གཡོ་བར་གྱུར། འདི་ལྟར་གཡོ་དོན་འདི་ཡང་ཕྱོགས་སུ་ལྷུང་བའི་འཐེན་ཤུགས་ཤིག་གིས་དེད་པ་མིན་ལ་འཐོམ་ནས་ལྐུག་པ་ཨུ་ཚུགས་ཀྱིས་དེད་པ་དེ་བས་མིན། འདི་ལ་གུས་པ་མི་ཆུང་ལ་དཔག་པའི་སེམས་ཆུང་དང་དོན་དངོས་ལ་དཔག་པའི་རེ་བཟང་རེ་མཐོང་ནས་མདོར་ན་རྒྱུ་མཚན་ཁྱད་པར་བ་འགའ་ཤས་ཤིག་གི་སྒོ་ནས་ཡིན། དེ་ཡང་ཁོང་སྲིད་སྐྱོང་འོས་དམིགས་ཐོབ་ན་སྔོན་གྱི་རེ་དམིགས་དེ་དག་བསྒྲུབ་རེ་གཅིག་མཚུངས་ཐོག ཁོང་ཐོབ་ན་དམིགས་བསལ་དགེ་མཚན་གཞན་ཡང་མང་པོ་མཐོང་སྟེ། དཔེར་ན།
1 བོད་པའི་མི་རབས་གསར་པ་ཚོས་སྤོབས་སེམས་དང་བཅས་ཏེ་གཅིག་རྗེས་གཉིས་མཐུད་དུ་རྒྱ་དམར་གཞུང་ལ་འགྲན་ནུས་པའི་བརྡ་ལན་གསལ་པོར་ཞིག་སྤྲོད་ཐུབ། རྒྱུ་མཚན་ནི་ཁོང་ནི་སྲིད་སྐྱོང་བློ་བཟང་སེང་གེ་ལས་འཇོན་ཐང་དང་ཤེས་ཚད། ཉམས་མྱོང་གང་གི་ཐད་ནས་ཞན་པ་ཞིག་གཏན་ནས་མིན་པས་སོ།།
2 གཞིས་ལུས་མི་དམངས་ཀྱི་བློ་སེམས་འཁོར་བའི་བཙན་བྱོལ་གཞུང་འདི་ཉིད་མི་གཅིག་གཉིས་ཞིག་གིས་འཛིན་པ་ལས་གཞན་འཛིན་ཐུབ་མཁན་མེད་པར་རློམ་པའི་ལྟ་ཚུལ་མང་དག་ཡོད་པ་རྣམས་རང་བཞིན་གྱིས་མེད་པར་འགྱུར་བ་དང་། འཇོན་མཁན་མང་པོ་ཡོད་པའི་དཔང་རྟགས་ཡང་གསལ་པོ་སྟོན་ཐུབ།
3 ང་ཚོས་རེ་སྒུག་བྱེད་བཞིན་པའི་བོད་རྒྱའི་གྲོས་མོལ་དང་བོད་ཕྱི་ནང་གཉིས་སུ་སྟོང་པར་གནས་པའི་དཔལ་འབྱོར་ལམ་ལུགས་སམ་ཡང་ན་དཔལ་འབྱོར་འབྱུང་ཁུངས་གསར་སྐྲུན་ཐུབ་པར་རེ། གང་ཞེ་ན་ རང་ཉིད་དཔལ་འབྱོར་ལ་དགའ་དྲགས་པ་ཙམ་གྱིས་མ་ཡིན་པར། ཉེར་གཅིག་དུས་འདིར་ཆབ་སྲིད་བརྟན་ལྷིང་དང་རིག་གནས་ཡར་རྒྱས། མི་རིགས་རྒྱུན་གནས་སོགས་མདོར་ན་བོད་མིའི་རྩ་དོན་འགྲུབ་མིན་ནི་དཔལ་འབྱོར་གྱི་ནུས་ཤུགས་ལ་ཧ་ཅང་གི་རག་ལུས་པས་ཁོང་ལ་འོས་ཆོས་ལྡན་པ་མ་ཟད། ཁོང་ནི་ཆབ་སྲིད་ལ་ཡང་གོ་རྟོགས་ཚད་མཐོ་པོར་སླེབས་ཡོད་པ་སྔོན་གྱི་མི་ལོ་ཉི་ཤུའི་ནང་ལོ་བཞི་ལྔ་ཙམ་ལས་ཕར་ཆེར་ཆབ་སྲིད་འཛིན་སྐྱོང་དང་ཁྲིམས་ལུགས་ལག་བསྟར་ཐོག་ཕྱག་ལས་གནང་སྟེ་སྙན་གྲགས་ཀྱི་སྡིངས་ཆ་མཐོ་པོ་འདི་ཟིན་ཡོད་པས་གསལ་རྟོགས་ཐུབ་པ་ཞིག་ཡིན་པར་སྙམ།
ལྷག་ཏུ་བོད་པ་ཟེར་བ་ཞིག་ས་སྒང་འདིའི་སྟེང་དུ་གནས་མིན་གྱི་འགག་རྩར་ཐུག་པའི་བོད་མིའི་རིག་གཞུང་ལ་དགའ་གུས་དང་རིན་ཐང་མཐོང་བའི་ཐོག་ཡར་རྒྱས་གཏོང་འདོད་ཀྱི་འདུན་པ་ལྡན་པའི་མི་བུ་ཁོང་ལྟ་བུ་ཞིག་སྲིད་སྐྱོང་གི་ས་མིག་ཐོབ་ན་སྔར་ལས་ལྷག་པའི་གྲུབ་འབྲས་ཤིག་འབྱུང་ཐུབ་པ་ལས། རང་རིག་དང་བོད་ཀྱི་ལོ་རྒྱུས་ལ་རྒྱུན་མངའ་གང་འཚམས་ཞིག་མེད་ཚེ་བོད་རྒྱའི་གྲོས་མོལ་ཡང་ཇི་ལྟར་བྱེད། དེའི་ཕྱིར་སྔོན་དང་རྗེས་གང་ལ་བལྟས་ཀྱང་ང་ལ་དབང་བའི་འོས་ཤོག་འདི་སྐུ་ངོ་བཀྲ་ཤིས་དབང་འདུས་ལགས་སུ་འབུལ་འདོད་པ་ལས་གཞན་ལ་མི་འབུལ་རྒྱུས་བློ་ཐག་བཅད་ཟིན་པ་ཡིན།། །།
ཁོང་གི་དགོངས་གཞི་རླབས་ཆེན་དག་མྱུར་འགྲུབ་ཡོང་བའི་རེ་སྨོན་དང་བཅས་རེ་ཞིག་འདི་ནས་མཇུག་བསྡུས་ཡོད།
ཕྱི་ལོ་2015 ཟླ་ 08 ཚེས་10 ཉིན་ལ་ཕུལ།།
སྲིད་སྐྱོང་དང་སྤྱི་འཐུས་ཀྱི་འོས་བསྡུ་དེ་བསང་བའི་འོས་
བསྡུ་ཡིན་པ་འོས་བསྡུའི་སྒྲིག་གཞིའི་ནང་གསལ་
ཡོད་ན་འོས་བསྡུའི་སྒྲིག་དང་འགལ་ནས་སྲིད་སྐྱོང་དང་
སྤྱི་འཐུས་ཁྲོམས་བསྒྲགས་བྱས་ནས་འོས་འཕེན་
མཁན་ཡོད་ན་ཁྲིམས་འགལ་ལ་ངོས་འཛིན་དགོས་
པ་མ་རེད་།
ལོ་ཉི་ཤུ་ལས་བྱེད་བྱས་པ་ཙམ་གྱི་སྲི་སྐྱོང་ལ་རེ་བ་བཅོལ་མཁན་ཡོད་ན་བཙན་བྱོལ་སྤྱི་ཚོགས་ནང་མི་ལོ་
སུམ་བཅུ་བཞི་བཅུ་ལས་ཀ་བྱེད་མང་པོ་འདུག་པ་དེ་
ཚོ་ལ་རེ་བ་བཅོལ་ན་ཡག་གི་མ་རེད་དམ་།
བློ་སེང་རྒྱ་མི་ཚོང་པའི་བྲང་ཁུག་ནང་གི་ལག་ཆ་རེད་ཟེར་བ་བདེན་པ་ཡིན་ཤས་ཆེ། ང་ལ་དོགས་གནས་མང་པོ་བྱུང་།
འབྲུག་གྲགས་ལགས་དོགས་གནས་མང་པོ་ཡོད་ཟེར་ནས་མ་བཞུགས་པར་་་་་་་དོག་གནས་གཅིག་ཚང་མའི་མདུན་དུ་ཁ་གསལ་ཁུང་རྐྱེལ་ར་སྤྲོད་གནང་དང་་་་་་་་་དེ་མིན་ཆང་རང་གི་བཏུང་ན་མགོ་ན་་་་གཞན་གྱི་བཏུང་ན་སྙིང་ན་ཟེར་བའི་དཔེ་རང་རེད་
འབྲུག་གྲགས།་ལགས་ཉིད་ཀྱིས་བློ་སེང་རྒྱ་མི་ཚོང་པའི་བྲང་ཁུག་ནང་གི་ལག་ཆ་རེད་ཟེར་བ་བདེན་པ་ཡིན་ཤས་ཆེ། ང་ལ་དོགས་གནས་མང་པོ་བྱུང་་ཞེས་པར་དོགས་པ་སེལ་ཐུབ་མིན་གང་ལྟར་ཡང་འོག་ཏུ་དྲ་ཐོག་གནས་ཚུལ་གང་འཚམས་ཡོད་སྟབས་དྲ་ཐག་འདི་ཡིན།
1) http://www.washingtontimes.com/news/2015/jul/10/maura-moynihan-tibet-china-same-washington-lobbyis/
2)http://www.phayul.com/news/article.aspx?c=4&t=1&id=36330&article=M.Moynihan%27s+reply+to+Office+of+Tibet+rejoinder