སྙིང་ནས་དགོངས་དག་ཞུ།

—–ལྷ་རྒོད།
 
དེ་རིང་ངས་དོན་ཚན་བཞིའི་སྒོ་ནས་དགོངས་སེལ་དང་བཅས་ཏེ་ཁྱེད་ཅག་ལ་འདི་ལྟར་མོལ།

དང་པོ། དེ་རིང་ནི་སྐྱེ་བོ་འབུམ་ཕྲག་མང་པོའི་སྐྱོ་གདུང་དང་ངུ་འབོད་ཀྱིས་རྒྱལ་གཅེས་པ་རྡོ་རྗེ་ཚེ་རིང་ལགས་ཕེབས་སྐྱེལ་ཞུས་སོང་། ངོ་མ་ཁྱེད་ཀྱི་བློས་བཏང་ནི་བསམ་བརྗོད་ཀྱི་ཡུལ་ལས་འདས། ཁྱེད་ཀྱི་རྗེས་ཤུལ་དུ་ཅི་ཡང་མི་ནུས་གང་ཡང་མི་འཇོན་པའི་ངས་ནི་མིག་ཆུ་དང་དབུགས་རིང་ཙམ་ལས་ཐབས་ཤེས་ཟད། སྐབས་རེར་རང་ཉིད་ཀྱི་ངང་ཚུལ་འདིར་ཡང་ཡང་བསམ་སྐབས་འགྲོ་བ་མིའི་ལུས་བླངས་པར་མཚུངས་ཀྱང་། རྒྱ་སྟག་གི་སྙིང་ཁམས་ལ་འགྲན་པར་ནུས་པའི་ཁྱེད་ཀྱི་བློས་བཏང་དང་ནམ་ཡང་བསྡུར་ཐབས་མེད་པ་རིག་དུས་ངའི་སྤོབས་པ་ཝ་མོའི་མཇུག་མ་ལྟར་ཞུམ།

གཉིས་པ། ད་དུང་སྐུ་ཉིད་ཀྱིས་མཚོན་པའི་གཅེས་སྲོག་མི་རིགས་ཀྱི་དོན་དུ་ཤོར་བའི་དཔའ་བོ་དཔའ་མོ་དག་ཡིད་ལ་དྲན་པ་དང་ལྷན་དུ་ཁྱེད་ཅག་གི་བློས་བཏང་དང་ཐག་གཅོད་དེ་ལྟ་བུ་ཤུལ་ལུས་རྒྱལ་གཅེས་པ་ཚོས་མ་གནང་ན་བསམ་པའི་སེམས་ཁོང་གི་རེ་སྨོན་ཙམ་ལས། ལེགས་ཉེས་དང་བླང་དོར་སོགས་ཀྱི་བསམ་འཆར་དང་ལམ་སྟོན་ནི་སུས་ཀྱང་བྱེད་འོས་སུ་མ་མཐོང་།

རྒྱུ་མཚན་ནི། ཁྱེད་ཅག་གི་སྙིང་དུ་བཟོད་པར་དཀའ་བའི་སྡུག་བསྔལ་དང་། དཔོག་པར་དཀའ་བའི་ཕུགས་བསམ་ལ་འགན་ཁུར་དང་བློས་བཏང་གང་ཡང་མི་ནུས་པའི་བདག་དང་བདག་ལྟ་བུའི་སྐྱེ་བོ་དག་གིས་འདི་ཡིན་འདི་མིན་བཤད་ཁུལ་བྱས་ཚེ་དེ་ནི་ཁྱེད་ཅག་གི་སེམས་ཁོང་དུ་ཡོད་པའི་སྡུག་བསྔལ་དང་། ཁྱེད་ཅག་གི་ཤ་ཁྲག་རུས་རྐང་ལ་ཐིམ་ནས་ཡོད་པའི་སྙིང་སྟོབས་དང་ལྷག་བསམ། ཆོད་སེམས་སོགས་དང་དོ་མཉམ་པའི་བསམ་ཤེས་མེད་པའི་རང་རྟགས་སུ་འགྱུར་བར་ངེས།

གསུམ་པ། ངས་བསམ་ཤེས་ཐུབ་པ་ནི། ཁྱེད་ཅག་གིས་ཐབས་ལམ་དེ་ལྟ་བུ་ཞིག་མི་འདེམས་ཀ་མེད་ཡིན་པ་དང་། ཁྱེད་ཅག་གིས་ཐག་གཅོད་དེ་ལྟ་བུ་ལག་བསྟར་མ་ཐུབ་ན་སྙིང་དབུས་སུ་བཟོད་པར་དཀའ་བའི་ན་ཟུག་དྲག་པོ་ཞིག་དང་། སྡུག་བསྔལ་ལྕི་མོ་ཞིག་གིས་མནར་གྱིན་ཡོད་པ་གསལ་པོར་ཤེས་ཀྱིན་འདུག །

བཞི་པ། མདོར་ན་ངས་ཁྱེད་ཅག་གི་དོན་དུ་ཡིག་དྲུག་དང་བསྔོ་སྨོན་ཙམ་ལས་ཅི་ཡང་མི་ནུས་པས་དགོངས་དག ། སྙིང་ནས་དགོངས་དག་ཞུ།།