སྙན་ཚོམས་ཁག་གཅིག

Comments (2) on “སྙན་ཚོམས་ཁག་གཅིག”

1. གང་གའི་འགྲམ་གྱི་ཟླ་བ་གཉིས།

   མཚན་མོ་སེམས་པ་ལྟར་ལྷིང་འཇགས་ཤིང
   སེམས་པ་མཚན་མོ་བཞིན་སྨག་ནག་ན
   མགྱོགས་པོར་དགའ་མའི་སྐེ་ལ་དམ་དུ་འཁྱུད་ཅིག
   ཕྱི་ནང་མེད་པར་སེམས་གྱི་གསང་གཏམ་དེ་ཤོད་དང
   ཅི་ཡིན་མེད་པའི་བྱེད་སྨྱོན་དེ་བྱས་དང

   ཟླ་བར་བཅར་བ་དང་
   རི་བོང་དྲན་པ་ནི
   དགའ་མ་མེད་པའམ་ཁོ་མོ་དྲན་པའི་མཚན་མ་ཞིག་སྟེ
   དེ་མིན་ན་མཚན་མོ་གཅིག་པུར་རྒྱུ་ཞིང
   ནམ་མཁའི་ཟླ་བ་དང་དེའི་རི་བོང་ཡང་གཉིད་དུ་མི་འཇུག་དོན་ཅི

   གང་གའི་འགྲམ་གྱི་ལྷ་མོ་དེ་གང་གི་རེད
   སུ་ཞིག་ཡིན་ནམ
   ཨ་རི་དང་དབྱིན་ལན
   ཁོ་རི་ཡ་དང་འཇར་པན
   ཡང་ན
   གངས་དཀར་བོད་ཀྱི་སྲས་མོ་ཞིག

   ལྷག་རླུང་ལ་བསྐུར་བའི་རྣམ་དག་གི་སེམས་པ་དེ
   ཤུབ་བ་ཤུར་བུར
   རྒྱང་དུ་ཡང་ཡང་ཁུར་ནའང
   ཤིང་གྲུ་རྒྱག་མཁན་གྱི་རྒན་པོ་དེས་སྐད་ཆ་ལྡབ་ལྡིབ་ཀྱིས
   ཁོ་མོའི་ཅི་ཡང་གསན་པ་མ་བྱུང་ལགས

   ང་གང་གའི་འགྲམ་དང་ཤིང་གྲུ་ལ་སྡོད་ཐེངས་རེ་རེར
   ངས་མཐོང་ཞིང་ཐོས་པ་ནི
   ཡིད་འཕྲོག་པར་བྱེད་གཏམ་རྒྱུད་ཅིག་སྟེ
   མགྲིན་སྔོན་ཟླ་བ༼༡༽་རེད
   ཟླ་བ་གཞོན་ནུ་མ་རེད༼༢༽

   གང་གའི་ཕ་རོལ་ན་ནགས་ཚལ་ཆེན་པོ་དེ་༼༣༽ད་ལྟ་ཡོད་དམ
   རྒྱལ་སྲས་མགྲིན་སྔོན་ཟླ་བའི་བྱ་ཚང་༼༤༽དེ་ཡང་ད་ལྟ་ཡོད་དམ

   ཨོ ངའི་མཐོང་བའི་གང་གའི་ཕ་རོལ་ནི
   ཅི་འདྲའི་ཉམ་ང་ཞིང་བྱེ་ཐང་ཆུང་ཆུང་ངམ་ཡང་ཆེན་པོ་ཞིག་སྟེ
   ནགས་ཀྱི་ཚལ་ཆེན་པོ་དེ་ཡང་མེས་ཚིགས་སམ
   ཡང་ཆུ་ཡིས་བསྣུབས

   རྡོ་ཡི་ཕོ་བྲང་ན་ཅི་ཞིག་ཡོད་དམ
   ཅི་ཡང་མི་འདུག་སྟེ
   སྙིང་ནས་དུང་བའི་མགྲིན་སྔོན་ཟླ་བ
   རྡོ་རུ་གྱུར་འདུག

   ༼༡༽མགྲིན་སྔོན་ཟླ་བ་ནི་དུས་རབས་བཅོ་བརྒྱད་པའི་འགོར་སྟག་ཕུ་པ་བློ་བཟང་རྒྱ་མཚོས་མཛད་པའི་སྔ་རབས་རྒྱ་གར་གྱི་རྒྱལ་པོ་ལྷ་སྣང་སྟོབས་ལྡན་གྱི་སྲས། རྒྱལ་བུ་ཆོས་ཀྱི་དགའ་བ་ཞེས་བ་གྲོགས་ཀྱི་བསླུ་བྲིད་ལས་བྱ་ཁུ་བྱུག་གི་ལུས་རྟེན་ལ་འཕོས་པ་དང་། དེ་ནས་བྱ་དང་རི་དྭགས་སྣ་ཚོགས་ལ་ཕན་བཏེགས་པའི་སྐོར་ཀྱི་གཏམ་རྒྱུད་ཡིད་འཕྲོག་ཅིང་སེམས་སྐྱོ་བ་ཞིག་ཡིན།
   ༼༢༽ ཟླ་བ་གཞོན་ནུ་ནུ་གང་ག་དང་ཐག་རིང་བའི་གནས་ཆེན་ས་ར་ན་ཐིར་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ཆེར་མོར་སློབ་གཉེར་གནང་བཞིན་པའི་བདག་གི་གྲོགས་པོ་ཞིག་ཡིན།
   ༼༣༽སྔར་གང་གའི་ཕ་རོལ་སྟེ་མགྲིན་སྔོན་ཟླ་བའི་ཕོ་བྱང་ཡོད་སའི་ཕྱོགས་དེ་ཚང་མ་ནགས་ཀྱི་ཚལ་ཆེན་པོ་ཞིག་ཡིན་པར་བཤད་རྟོགས་བརྗོད་དེ་ལས་གསུངས།
   ༼༤༽ རྒྱལ་སྲས་ཆོས་ཀྱི་དགའ་བ་རང་གི་གྲོགས་པོ། ཡབ་རྒྱལ་པོ་ལྷ་སྣང་སྟོབས་ལྡན་གྱི་བློན་པོ་སྟོང་དཔོན་ཡ་མཁས་(མིང་འདི་གསལ་བོ་ཞིག་མི་དྲན)ཀྱི་བུ་ལ་གཱ་ཨ་ནས་བསླུ་བྲིད་བྱས་ཏེ་གང་གའི་འགྲམ་དུ་རྩེད་འཇོར་རོལ་བར་བྱིན། འཕོ་བ་གྲོང་འཇུག་གི་གདམས་པ་ལ་བརྟེན་ནས་བྱ་ཁུ་བྱུག་གི་རོ་ལ་གྲོང་འཇུག་བྱས་ཏེ་གང་གའི་ཕ་རོ་དུ་འཕུར་ཏེ་ནགས་ཚལ་ཆེན་པོའི་ཤིང་འབྲས་སོགས་ལ་རོལ། གྲོགས་ལ་གཱ་ཨ་ནས་ལྐོག་ཏུ་གང་གའི་ཚུལ་རོལ་དུ་འཕུར་ཡོང་སྟེ་རང་གི་ཕུང་བོ་ཆུར་བསྐྱུར། རྒྱལ་བུ་ཆོས་ཀྱི་དགའ་བའི་ཕུང་པོར་གྲོང་འཇུག་བྱས་ཏེ་ཕྱིར་ཕོང་བྲང་དུ་ལོག རྒྱལ་སྲས་ཀྱི་བཙུན་མོ་འཁོར་བཅས་ལ་ལོངས་སྤྱད་པ་སོགས་ཡིད་སྐྱོ་ལ་སེམས་འདྲོངས་པའི་གཏམ་རྒྱུད་ཅིག་ཡིན།

   གྲོགས་ཟླ་བ་གཞོན་ནུ་ལགས། ད་ནངས་ཞོགས་པར་ལས་ཤག་ཏུ་འབྱོར་ནས་ཁྱོད་ཀྱི་སྙན་ངག་འདི་མཐོང་འཕྲད་རང་གིས་ཀྱང་འདི་འདྲ་བ་ཞིག་བྲིས་པ་ཡིན། ཡིག་གཏགས་སོགས་ལ་ནོར་འཕྱུག་གང་ཡོད་བཟོད་པར་གསོལ།

2. ང་གང་གའི་འགྲམ་དང་ཤིང་གྲུ་ལ་སྡོད་ཐེངས་རེ་རེར

   ངས་མཐོང་ཞིང་ཐོས་པ་ནི

   ཡིད་འཕྲོག་པར་བྱེད་པའི་གཏམ་རྒྱུད་ཅིག་སྟེ

   མགྲིན་སྔོན་ཟླ་བ༼༡༽་རེད

   ཟླ་བ་གཞོན་ནུ་མ་རེད༼༢༽

   ཨ་ཧ་ཧ
   བཟོད་རྒྱམ་ལགས།
   སྐྱིད་པོ་ཞིག་བྲིས་འདུག་ལ། འབྲི་སྟངས་ཀྱང་ཡག་པོ་འདུག
   བྱ་མགྲིན་སྔོན་གྱི་སྐོར་དེར་སྔོན་མར་ང་རང་ཡང་ཆ་རྒྱུས་ཅང་མེད་མོད། དྷ་ས་ནས་ཕེབས་པའི་གྲོགས་པོ་ཞིག་གིས་འདིར་ཡོང་སྟེ་དེར་ཡིན་གཅིག་འཁྲིད་དགོས་པའི་སྐོར་བཤད་བྱུང་བས། ང་རང་ཡང་ཐེངས་གཅིག་སོང་མྱོང༌། ཕལ་ཆེར་སྒྲུང་དེའི་སྐོར་འདིའི་ཁུལ་གྱི་མི་རྣམས་ལའང་ཅང་བཤད་རྒྱུ་མི་འདུག་ལ། དེ་འདྲ་ཞིག་ཡོད་པའང་ཤེས་ཀྱི་མི་འདུག ང་རང་གིས་ཀྱང་གྲོགས་པོ་དེ་ལ་བརྟེན་ནས་དེ་སྐོར་གོ་མྱོང་བ་ཙམ་ཡིན།
   རྗེས་ལ་དེབ་དེ་ཡང་ཐེངས་གཅིག་བཀླགས་དུས། ཆུང་དུས་གོ་མྱོང་བའི་སྒྲུང་ཡིད་སྐྱོ་བ་ཞིག་ཡོད་པ་དེ་རེད་འདུག