སྙན་ངག་པ།

བཀྲ་ཤིས་དོན་འགྲུབ།

བྲང་ཁོག་དགུང་ལ་གཏོད་པའི་ང་རྒྱལ་གྱིས།།
ལས་ཀྱི་རླུང་དམར་གདོང་གིས་བསུ་ཕོད་ཅིང་།།
སེམས་པ་འཁོར་བར་འཁྲེང་བའི་སྐྱོ་གདུང་གིས།།
མིག་ཆུ་ཁོག་ཏུ་བསྐྱིལ་བའི་མྱ་ངན་ཅན།།

གནམ་གྱི་ལུང་བསྟན་ས་ལ་བབས་པ་དང་།།
རྟེན་འབྱུང་རྒྱལ་མོ་དགྱེས་པའི་དགའ་སྟོན་དུ།།
འབྱུང་བཞི་དྲག་ཏུ་འཐབ་པའི་གཡུལ་ས་ནས།།
སྲིད་པའི་སྙང་ངག་མཁན་པོ་ལྷོད་ཀྱིས་འཁྲུངས།།

སྤྲིན་ནག་ལང་ལོང་འཁྲིགས་པའི་ཀློང་རུམ་ནས།།
གློག་ཞགས་ས་ལ་ཟུག་པའི་རྔམ་ཟིལ་གྱིས།།
འཇིག་རྟེན་གཉིད་དུ་ཡུར་བའི་ལྷིང་འཇགས་དེ།།
ཁྲག་བཞིན་དཀྲུགས་པའི་མཐུ་སྟོབས་མངའ་ནས་གདའ།།

མཚོན་གྱི་རྣོ་དབལ་གྱེན་ལ་གཟེང་ས་ནས།།
ཁྲག་གི་རལ་པ་ཐུར་དུ་འཕྱང་ས་ནས།།
ཕུག་རོན་དཀར་མོའི་གཤོག་འགྱུ་ངོམ་སྟངས་ཀྱིས།།
ཞི་བདེའི་མགུར་མ་གྱེར་བའི་སྤོབས་པ་མཐོ།།

མཚན་ཉུལ་རྐུན་པོའི་འོག་མིག་རིག་རིག་དེ།།
རུམ་གྱི་འབའ་ཁུག་བསླུ་བའི་ལྕགས་ཀྱུ་ཙམ།།
གནམ་སའི་ཁ་དོག་འདྲེན་པའི་སྨྱུག་རྩེ་དེ།།
གཉུག་མའི་བརྩེ་བ་འཕྲོག་པའི་ཇག་པར་གདའ།།

ཕྱོགས་མེད་དགུང་སྔོན་སྟོང་པའི་མཐོ་ཚད་ནས།།
རྒོད་པོའི་གཤོག་ཟུང་རླུང་བུས་བཏེགས་པ་ཡང་།།
དགའ་སྐྱོའི་རྟ་ལ་འཆིབ་པའི་གྲེ་འགྱུར་དེ།།
རྟོག་པའི་གླུ་ལ་དྲངས་པའི་སྣང་ཚུལ་ཙམ།།

རྣག་ཁྲག་གཡའ་ཆུས་གང་བའི་རྫབ་དོང་ནས།།
དྭངས་བཅུད་བདུད་རྩི་ལེན་པའི་ཐབས་རྩལ་དེ།།
སྡུག་གི་སྐྲ་ལོ་འཛིངས་པའི་ཡུགས་ས་མོར།།
འཛུམ་ཆུང་མེ་ཏོག་འདྲེན་པའི་ཕྱག་རྒྱ་ཡིན།།

ས་གཞི་མུན་པས་བཟུང་བའི་དུས་གཉན་ལ།།
གཟེ་བའི་རྦ་རླབས་འཕྱོ་བའི་རྟ་ནག་གིས།།
ཇག་ཚོགས་གཞུང་ལ་བཏེགས་པའི་འཇིགས་ཟིལ་དེ།།
སྨྱུ་གུའི་རྩེ་ནས་འཁྲུངས་པའི་ལྟད་མོ་རེད།།

འཇའ་འོད་གུར་ཁང་ཕུབ་པའི་ལྡིང་ཁང་ནས།།
ཉམས་རྟོགས་གླུ་རུ་ལེན་པའི་དགའ་སྟོན་དེ།།
རྟོག་འགྱུའི་ཕྱྭ་གཡང་འགུག་པའི་ཧམ་སེམས་ཀྱིས།།
མགྲིན་པ་དམར་པོའི་སྦུབས་སུ་བསྐྱིལ་ནས་ཡོད།།

ཆར་པ་མིག་ཆུར་གྱུར་བའི་སྐྱོ་སྣང་དང་།།
ཉི་མ་དམར་པོར་གྱུར་བའི་འཇིགས་སྣང་གཉིས།།
སེམས་ཀྱི་མྱ་ངན་སངས་དུས་ཡེ་མེད་པའི།།
སྙན་ངག་པ་ཡིས་བདམས་པའི་ནམ་མཁའ་རེད།།

དྲག་རླུང་འུར་འུར་ལྡང་བའི་ས་སྲོས་ཀྱི།།
རྐང་གླིང་ཟད་པོའི་ཤུར་སྒྲ་ལྷང་ལྷང་དེ།།
སྙན་ངག་པ་ཡི་རྒྱགས་ཕྱེ་ཡིན་གདའ་བས།།
རྒྱགས་ཕྱེ་བསྐྱུར་ནས་མ་ཕེབས་སྙན་ངག་པ།།