ཨོ་རྒྱན་ཉི་མ།
ངོ་མ་མཁས་དབང་ཞིག་གི་གསུང་རང་རེད། <<སྙན་ངག་རྐང་ཆག་མ།>> ཉིན་ཤས་གོང་དུ་རོ་སྒམ་ཞེས་པའི་ཟིན་བྲིས་ལས་མཐོང་སོང་། འདི་ལ་བརྟེན་ནས་ངས་ཀྱང་རང་མོས་སྙན་ངག་གི་མཚན་ཉིད་འདི་བཞག་པ་ཡིན། <<སྙན་ངག་ཏུ་རློམ་པ་གང་ཞིག་ཚིག་ཆག་རྐྱང་བསྒྲིགས་ཀྱི་ངག་དེ་རང་མོས་ཀྱི་སྙན་ངག་གི་མཚན་ཉིད།>> དེ་ལ་དབྱེ་ན། <མདོ་མེད།> <མདོ་ཤོར།> <མ་རྟོགས།> <ལོག་རྟོག> <ཐེ་ཚོམ་>གསུམ་གྱི་ངག་ལྔའོ། །རང་མོས་ཀྱི་<ལུས་ཚིག་ཆག> <སྲོག་ལུགས་གཉིས་ཀྱིས་སྟོང་པ།> <རྒྱན་དཔེ་དོན་འཛོལ་བའོ།>
དང་པོ་མཚན་ཉིད་ཀྱི་མཐའ་གཅོད་པ་ནི། ཁོ་བོས་བཞག་པའི་མཚན་ཉིད་འདི་ལ་ཟུར་གཉིས་ཡོད། ཟུར་དང་པོས་<སྙན་ངག་ཏུ་རློམ་པ་གང་ཞིག་>མཁས་བླུན་ཕལ་ཆེ་བས་སྙན་ངག་ཡིན་པར་ཁས་བླངས་པ་དེ་ཕར་བཅད། ཡོངས་གཅོད་དུ་ཨུ་ཚུགས་ཀྱིས་སྙན་ངག་མིན་ཡང་སྙན་ངག་ཡིན་ཞེས་བཤད་བཞིན་པ་དེ་ཚུར་བསྒྲུབས། ཟུར་གཉིས་པས་<ཚིག་ཆག་རྐྱང་བསྒྲིགས་ཀྱི་ངག་>མཁས་པ་དགའ་བ་དང་། ཀུན་གྱི་རྣ་བར་འཇེབས་པའི་ཚིག་སྦྱོར་ཕུན་སུམ་ཚོགས་པའི་ངག་ཡིན་པ་ཕར་བཅད་ནས། ཚུར་མཁས་པའི་ཚོགས་སུ་དབྱུང་མི་རུང་བའི་སྡེབས་སྦྱོར་མེད་པའི་ངག་ཕྱོགས་གཅིག་ཏུ་སྤུངས་པ་དེ་བསྒྲུབས་པ་ཡིན།
གཉིས་པ་དབྱེ་བའི་རྣམ་གྲངས་ལ་ལྔ་ལས། དང་པོ་<མདོ་མེད།>ཅེས་པའི་དོན་བཤད་པ། སྤྱིར་འཇིག་རྟེན་ཡོངས་གྲགས་ལ་མདོ་མེད་ཅེས་པ་དེ་རང་དོན་དང་། གཞན་གཉིས་ཀ་མེད་པའི་ཞིག་ལ་གོ་བ་དང་། འདིར་གཏད་སོ་གང་ཡང་མེད་པར་མྱི་རྫ་ཁྱི་ཞེན་བྱེད་མཁན་གྱི་རིགས་ལ་གོ་དགོས། སྲོལ་རྒྱུན་དང་། དེང་རབ་ཅེས་པའི་ཁྱད་འབྱེད་མི་ཤེས་ན་ཡང་། གཞན་པ་ཞིག་གིས་རང་མོས་ཡག་པོ་རེད་ཟེར་དུས། ཨོ་ཡག་པོ་རེད་ཟེར། གང་དྲན་འབྲི་བ་ལས། གཞན་གྱིས་བྲིས་པ་དག་ཕར་ཞོགས། རང་གིས་བྲིས་པ་དག་གི་དོན་ཡང་མི་རྟོགས་པའི་གང་ཟག་དེ་ཚོ་མདོ་མེད་པོ་རེད། དེའི་ངག་ལ་མདོ་མེད་པའི་རང་མོས་ཟེར།
གཉིས་པ་<མདོ་ཤོར།>ཅེས་པའི་དོན་ནི། སྤྱིར་མདོ་ཤོར་ཞེས་པ་རང་ཚུགས་ཤོར་བ་ཞིག་ལ་གོ་དགོས་པ་དང་། འདིར་སྔར་གྲྭ་སར་སོང་སྟེ་གྲྭ་བའི་གོ་མ་ཆོད། སློབ་གྲྭར་སོང་ཡང་སློབ་གྲྭའི་རིག་གནས་མ་རྙེད་པ་དང་། རོང་འབྲོག་གཉིས་ཀའི་འཚོ་བ་ལ་དང་ག་མེད་པའི་ལྡོམ་པོ། ཐམས་ཅད་ཤོར་བ་དག་གིས་ལམ་ཁ་གཞན་མ་རྙེད་དུས་རང་མོས་ཡག་རབས་དང་། རྒྱན་རབས་ཀྱིས་སྨྲ་བཞིན་པའི་ངག་དེ་མདོ་ཤོར་གྱི་རང་མོས་ཞེས་བྱ།
གསུམ་པ་<མ་རྟོགས།>ཞེས་པའི་དོན་ནི། སྤྱིར་མ་རྟོགས་པ་ཞེས་པ་དེ་ཤེས་རབ་ཀྱི་རྩལ་ཞན་པའི་གང་ཟག་ཚོས། རང་ཉིད་ཀྱི་བསླབ་པར་ཡུལ་ལ་བློ་ལས་རུང་དུ་མ་སོང་བ་ཞིག་ལ་གོ་བ་དང་། སྐབས་འདིར་སྙན་ངག་ལ་འཇུག་ཁུལ་བྱས་ཀྱང་། གཙོ་བོ་སྲོལ་རྒྱུན་གྱི་ཁྱད་ཆོས་དང་། རང་མོས་ཀྱི་སྐྱོན་མཚང་མ་རྟོགས་པར། རང་གི་རྣམ་རྟོག་ལ་མཐུན་པ་ཙམ་དུ་རྒྱུ་མཚན་དུ་བྱས་པའི་ངག་ཙམ་པོ་དེ་ལ་མ་རྟོགས་པའི་རང་མོས་ཞེས་ཟེར།
བཞི་པ་<ལོག་རྟོག>ཅེས་པའི་དོན་ནི། སྤྱིར་ལོག་རྟོག་ཅེས་པ་དེ་བསླབ་བྱ་དེ་ཉིད་མ་རྟོགས་པར། སྦྱོང་བ་པོའི་བློ་དེ་སྦྱང་བྱའི་ཆོས་དེའི་ནང་དོན་ལས་ཕྱིན་ཅི་ལོག་ཏུ་སོང་བ་གོ་བས། སྦྱངས་པ་སྲོལ་རྒྱུན་ལ་བྱས་ཀྱང་། བློར་ངེས་པ་དང་། ངག་ནས་འཆད་རྒྱུ། ལག་གིས་འབྲི་བྱ་སྲོལ་རྒྱུན་གྱི་དྲི་ཙམ་ཡང་མེད་པའི་ངག་དེ་ལ་ལོག་རྟོག་གི་རང་མོས་ཟེར།
ལྔ་པ་<ཐེ་ཚོམ་>ཞེས་པའི་དོན་ནི། སྤྱིར་བཏང་ཐེ་ཚོམ་ཞེས་པའི་དོན་དེ་བློ་རྩེ་གཉིས་སུ་འཇུག་པ་ཞིག་ལ་གོ་བ་དང་། སྐབས་འདིར་སྲོལ་རྒྱུན་དང་། རང་མོས་གཉིས་ཀྱི་དབྱེ་འབྱེད་མ་ནུས་ཤིང་། རང་གིས་ཀྱང་ཐག་མ་ཆོད། མིས་བཤད་མི་ནུས་པའི་གཏད་སོ་གང་ཡང་མེད་པའི་རྩོམ་འཆལ་སྣ་ཚོགས་པའི་ངག་ལ་ཐེ་ཚོམ་གྱི་རང་མོས་ཞེས་བཤད་པ་ཡིན།
གསུམ་པ་རང་མོས་ཀྱི་ལུས་སྲོག་རྒྱན་གསུམ་ལས། དང་པོ་ལུས་<ལུས་ཚིག་ཆག> ཀྱི་དོན་བཤད་པ་ནི། ཚིག་ནི་དོན་རྩ་གཞི་ནས་བསླང་བར་བྱེད་པའི་རྣོ་བའི་མཚོན་དང་གཅིག་མཚུངས་ཡིན་པས། ཚིག་ལ་སྙན་འཇེབས་ཤིག་དང་། རྣོ་ངར་ཞིག་ཡོད་ན། བརྩེ་བ་ཅན་གྱི་གང་ཟག་དང་། དཔའ་ངར་ལྡན་པའི་ཕོ་རྒོད་ཚོར་སྔར་མེད་ཀྱི་ཚོར་བ་གཏིང་ཟབ་ལ། རྒྱུན་རིང་བའི་འཆར་སྣང་ཞིག་སྟེར་ངེས་པ་དང་། དེ་ནི་སྲོལ་རྒྱུན་བྱུང་བའི་བཅད་ལྷུག་སྤེལ་གསུམ་གང་རུང་ལ་བརྟེན་ནས་སྨྲ་བ་ལས། ཨ་བསྐོར་ཡང་བསྐོར་དང་། བསྐྱར་བཟློས་རྐྱང་རྐྱང་གི་ཚིག་ཆག་ཅིག་གིས་ཚོར་བ་གསོན་པོ་ཞིག་ནམ་ཡང་སློང་མི་ནུས་པས། རང་མོས་ཀྱི་ལུས་དེ་ནི། བཅད་ལྷུག་སྤེལ་མ་གང་ཡང་མ་ཡིན་པའི་འགོ་བཅད་རྔ་རྡུམ་གྱི་ཚིག་ཆག་ཅིག་རེད་ཅེས་བཤད་པ་ཡིན།
གཉིས་པ་སྲོག་<སྲོག་ལུགས་གཉིས་ཀྱིས་སྟོང་པ།> གི་དོན་བཤད་པ་ནི། སྲོག་ཅེས་པ་དེ་རྗོད་བྱེད་ཚིག་གིས་བསྟན་བྱའི་དོན་ཆོས་དཔལ་སྲིད་གསུམ་སྟེ། ཆོས་བཤད་ན་ལྟ་གྲུབ་གནད་གསང་དང་། ནང་གི་མྱོང་བ་ཡོད་པ་ཞིག་དང་། དཔལ་དང་འབྱོར་བ་བཤད་ན་བཅའ་དངོས་དེའི་རིན་ཐང་དང་། ཚད་གཞི་དངོས་པོ་རང་གི་སྟེང་དུ་ཇི་ལྟར་ཡོད་པ་དེ་ལྟར་སྟོན་ཡོད་པ་ཞིག་དང་། ཆབ་སྲིད་བཤད་ན་རང་གི་འབངས་བདེ་བ་དང་། གཞན་སྡེ་ཟིལ་གྱིས་གནོན་པའི་ཐབས་ལམ་གྱི་གནད་ཕུག་པ་ཞིག་ཡོད་དགོས་པ་རེད། རང་མོས་ཀྱིས་འདི་དག་བཤད་དགོས་ན་བརྗོད་དོན་ཡོངས་སུ་རྫོགས་པ་སྟོན་ནུས་བྲལ་བ་ རེད། གང་ཡིན་ཞེ་རང་མོས་ཀྱི་བརྗོད་དོན་གཅིག་མ་རྫོགས་པའི་བར་ནས། ཡང་བྱ་བ་གཞན་ཞིག་ལ་སྦྱར་ཏེ། བཅད་མཚམས་རེ་ནས་བརྗོད་དོན་ཁ་མ་ཚང་བ་རེ་སྟོན་བཞིན། གཏད་སོ་དང་། འཛིན་མཚམས། གང་ཡང་མེད་པ་ཤ་སྟག་ཡིན་པས་སོ། །
གསུམ་པ་།<རྒྱན་དཔེ་དོན་འཛོལ་བར།>བར་བཤད་པ་ནི། དཔེ་དོན་ཞེས་པ་དེ་ཕན་ཚུན་མཚུངས་ཆོས་བྱ་བ་དང་། ཡོན་ཏན། ཡུལ། དུས་སོགས་ལ་ལྟོས་ཏེ་མཚུངས་པ་གསལ་བྱེད་ཀྱི་སྒྲ་དངོས་སུ་ཡོད་མེད་གང་ལྟར་ཡང་། མཁས་བླུན་སུས་བཀླག་ན་ཡང་། དོན་རྟོགས་ནུས་པ་ཞིག་དང་། བསམ་དུ་ཡོད་པ། སྤང་བླང་བྱ་རུ་ཡོད་པ་ཞིག་དགོས་པ་རེད། ཡིན་ན་ཡང་སྙན་ངག་གསར་བར་རློམ་པ་འགའ་ཞིག་གིས་དཔེ་དོན་གཉིས་རྒྱང་གྲགས་དང་དཔག་ ཚད་ཀྱིས་བར་ཆོད་པའི་དཔེ་རྐྱང་རྐྱང་ལས། དོན་གང་དུ་སོང་ཡིན་མི་ཤེས་པ། ཡང་འགའ་ཞིག་གིས་དཔེ་དང་དོན་གཉིས་འབྲེལ་མེད་ཀྱི་མེ་ཆུ་བཞིན་འགལ་ན་ཡང་། ད་དུང་ཨུ་ཚུགས་ཀྱིས་ཕན་ཚུན་མཚུངས་ཆོས་སུ་སྦྱར་མཁན་ཡང་མང་པོ་རེད།
མདོར་བསྡུས་ན། སྙན་གསར་ལ་དགའ་བ་དང་། སྐད་གྲགས་ཨེན་ཙམ་ཆོད་པ་ཚོས་ཀྱང་སྙན་ངག་གསར་བ་ཞེས་ཁ་སྤོབས་ཅི་ཙམ་བཤད་ཀྱང་། ཁོ་ཚོས་དངོས་ཀྱི་ལག་ལེན་གཏུག་ས་དེ་ལྷུག་རྩོམ་རེད། སྲོལ་རྒྱུན་གྱི་ཚིག་བཅད་ལ་ཁྲིམས་དང་བསྒྲིགས་ལམ་མང་པོ་ཞིག་ཡོད་པ་དང་། དེའི་ར་བ་ལས་འདས་དགོས་ཞེས་སྨྲ་བ་ཙམ་དུ་ཟད། སྤྱིར་བཏང་ཚིག་བཅད་ཅེས་པ་དེ་དོན་གྱི་གནད་གསང་བསྡུས་པའི་ཆེད་དུ་རེད། ལྷུག་རྩོམ་ཟེར་བ་དེ་དོན་རྒྱས་པར་འགྲོལ་བའི་ཆེད་དུ་རེད། དེ་ཕྱིར་ཚིག་བཅད་མེད་ན་ལྷུག་རྩོམ་ཁོ་ནས་བརྗོད་དོན་བསྡུས་ཏེ་བསྟན་པ་ཁག་པོ་ རེད། ལྷུག་རྩོམ་མེད་ན་བརྗོད་དོན་ཁ་གསལ་དུ་གཏོང་ཐབས་མེད་པས། སྲོལ་རྒྱུན་གྱི་སྙན་ངག་མེ་ལོང་མའི་ལྟ་གྲུབ་ཀྱི་བཅད་རྒྱ་ནི་ལུགས་གཉིས་ཀྱི་ སྲོག་དང་གཅིག་མཚུངས་ཡིན། འོ་ན་རང་བཞིན་བརྗོད་པ་ཙམ་གྱིས་ཆོག་གི་རྒྱན་ཕྱི་མ་དག་དགོས་པ་མེད་དོ་ཞེ་ན། དེ་ཙམ་ཞིག་ཆོག་པ་ཞིག་ཀྱང་མ་རེད། ཁྱེད་ཚོས་ས་པཎ་གྱི་ས་སྐྱའི་ལེགས་བཤད་དང་། རིག་འཛིན་འཇིག་མེད་གླིང་པའི་ཡོན་ཏན་མཛོད། གུང་ཐང་པའི་ཆུ་ཤིང་གི་བསྟན་བཅོས། མི་ཕམ་པའི་རྒྱལ་པོ་ལུགས་ཀྱི་བསྟན་བཅོས་སོགས་གཟིགས་དང་། ཚིག་ལ་སྙན་འཇེབས་ལྡན་ཞིང་། དོན་ལ་རོ་བཅུད་ཀྱིས་ཕྱུག་པ་དང་། དཔེ་དོན་གཉིས་ཕན་ཚུན་གཅིག་གིས་གཅིག་གསལ་བྱེད་དུ་གྱུར་བ་ལྟ་བུའོ། །
སྙན་གསར་བ་ཚོར་གཞུང་ཞིག་དང་། རང་ལུགས་ཤིག ད་དུང་རྩ་བ་དང་། འགྲེལ་བ། རང་གིས་ཉར་ན་རིག་གཞུང་དུ་རུང་བ། མི་ལ་ངོམས་ན་རིན་ཐང་ཡོད་པ་ཞིག་བྱེད་རོགས་ཞེས། ཐེངས་མང་པོ་བསྐུལ་མ་ཞུས་པ་ཡིན་ཏེ། སྤྱོང་དུས་མེ་ལོང་མ་ལ་འཇུག འབྲི་དུས་ཁྲིམས་དང་། རང་ལུགས་གང་ཡང་མེད་པ་ཞིག་ལ་འཇུག་ཁུལ་བྱེད་བཞིན་ལས། ཁྱད་ཆོས་ཤིག་ཐོན་ཚོད་མ་རེད། སྔོན་བྱོན་འཕགས་ཡུལ་གྱི་མཁས་པ་དང་། དེ་དག་གི་རྗེས་འབྲང་མཁས་དབང་ཚོ་ནི་ངོ་མ་འགྲོ་བ་མིའི་རིགས་ཀྱི་གཟི་བརྗིད་ཅིག་རེད། བོད་མི་ཙམ་དུ་མ་ཟད། འཛམ་གླིང་ཤར་ནུབ་ཀྱི་དཔྱོད་ལྡན་དུ་མའི་ཡིད་དབང་འཕྲོག་བཞིན་པ་རེད། ལུགས་གསར་བ་འདི་ཚོས་རིན་ཐང་བྲལ་བའི་བོད་བརྒྱུད་ནང་བསྟན་དང་། བརྡ་དག་སྙན་གསུམ་སོགས་ལ་མ་རུང་བའི་རྣམ་འགྱུར་གྱིས་བོད་ཀྱི་སྲོག་གཅོད་ཀྱིན་འདུག་ཅེས་བཤད་པ་ཡིན།
སྙན་ངག་གསར་བའི་དགེ་སྐྱོན་གླེང་གི་མིན་པས།
སྙན་ངག་གསར་བ་ལ་སྙན་ངག་གསར་བའི་ཁྱད་ཆོས་ཡོད། གལ་ཏེ། ཁྱོད་ཀྱིས་སྙན་ངག་གསར་བ་ལ་ལྟ་འདོད་ན། ཐོག་མར་ཁྱོད་ཀྱིས་སྙན་ངག་གསར་བའི་མིག་ཤེལ་གྱོན་དགོས། མེག་ཤེལ་དེ་ལས་ཁྱོད་ཀྱིས་སྙན་ངག་གསར་བའི་ཕྱི་ནང་གསང་གསུམ་མཐོང་ཐུབ་རྒྱུ་རེད།
ཡིན་ན་ཡང་། ཁྱོད་ཀྱིས་སྲོལ་རྒྱུན་སྙན་ངག་གི་མིག་ཤེལ་གྱོན་ཏེ། སྙན་ངག་གསར་བ་ལ་ལྟོས་ན། དེ་ལས་ཁྱོད་ཀྱིས་ཅི་ཡང་མཐོང་རྒྱུ་མ་རེད།
དེ་བས། སྙན་ངག་གསར་བས་བོད་ཀྱིས་སྲོག་རྩ་གཅོད་བཞིན་ཡོད་པ་མ་རེད། དྲང་མོར་བཤད། རྩོམ་ཆག་འདིས་ཁྱོད་རང་ཉིད་ཀྱི་སྲོག་རྩ་བཅད་འདུག དེ་ཡང་། ཁ་ཇེ་གསལ་དུ་བཏང་ནས་བཤད། ཁྱོད་ལ་སྙན་ངག་གསར་བའི་་སྐོར་གྱི་གོ་རྟོགས་ཏིལ་འབྲི་ཙམ་ཡང་མེད་པ་དེ་དམར་རྗེན་དུ་བཏོན་འདུག དེ་དང་པོ་ཡིན།
གཉིས་པ། སྙན་ངག་གསར་བས་བོད་ཀྱིས་སྲོག་རྩ་གཅོད་བཞིན་ཡོད་མེད་ཇི་ལྟར་ཡང་། རྩོམ་ཆག་འདིས་གང་བྱུང་བྱུང་དང་ཡིན་ཆོག་ཆོག་གིས་སྙན་ངག་གསར་པ་འབྲི་མཁན་ཚོའི་གདོང་ལ་མིག་འབུར་ཚུགས་དང་མཛུབ་མོས་གདོང་གཏད་ཀྱི་སྒོ་ནས་བྲིས་པ་ཞིག་ཏུ་བཏང་ན། དེ་ནི་རྩོམ་འདི་ཡི་དགེ་མཚན་ཆུང་ཆུང་ནང་གི་ཆུང་ཆུང་། དེ་ཡི་ནང་གི་ཆུང་ཆུང་དེ་རེད་འདོད།
ཉི་ཟླ་རི་བོའི་སྙན་ཚིག
གཅན་མེ་སྟག (མགོ་ལོག)2011ལོའི་ཟླ 01ཚེས 12ཉིན་དང་། གངས་རྒྱན་མེ་ཏོག༢༠༡༠ལོའི་དེབ༣པ་ལས་བདམས།
ཁྱོད་ཀྱི་མིང་ལ་ཉི་ཟླ་ཐོགས་པ་ནས་བཟུང
ངས་རྒྱུན་དུ་རྟ་ཁ་གློད་ནས་སྨོན་ལམ་བཏབ་མྱོང
དགུ་ཚིགས་ཀྱི་གཙང་པོས་བར་དུ་བཅད་པ་ནས
ཟླ་འོད་ཀྱིས་ང་རང་ཕ་མཐར་སྐྱེལ་བའི་དུས་སུའང
ཁྲུང་ཁྲུང་སྐེ་རིང་དང་མཚུངས་པའི་རི་སྒང་དེའི་ཞོལ་དུ
སྔོ་ཡོམ་ཡོམ་གྱི་ལྡོག་འབབ་གཙང་པོ་ཡང་དྲན་པས་མནར
__ སྒམ་ལ་དཀྱེལ་ཆེ་བའི་བཙན་པོ་དང་གཡེར་བག་ལྡན་པའི་རྒྱ་བཟའ་ཡང་ས་འདི་ནས་ཕྲད་པ་སྟེས་དབང་ཡིན
མེ་ལོང་བོར་ས་ནས་ཁུ་སིམ་མེར་སྨོན་ལམ་བཏབ་མྱོང་ཕྱིར
ངས་རྒྱུན་དུ་ཉི་ཟླ་རི་བོའི་མཚམས་སྤྲིན་བརྗེད་ག་ལ་ནུས
གླང་རྫི་དང་འཐག་མཁན་བུ་མོ
ཟླ་བའི་ཀློང་ན་དྲན་གདུང་གི་གླིང་བུ་དལ་གྱིས་འབུད
དེ་དག་གི་དུས་ན
ངས་ཀྱང་ཉི་ཟླའི་གོང་ཁ་རུ་རེ་སྒུག་གི་ཤུགས་གླུ་བླངས་མྱོང་ཨང
ཡིན་ནའང་ད་ལྟ་ཉི་ཟླ་གཉིས་ལྷན་འཛོམས་གྱི་སྐལ་བ་ཧ་ཅང་ཕྲ་བས
__ངས་སྨོན་ལམ་འདེབས་པ་ནི་རི་བོ་ཁྱོད་ཁོ་ན་མིན
(ཕྲན་དཔྱད།/ བདུད་ལྷ་རྒྱལ ལན་གྲུ) དུས་རབས་ཉི་ཤུ་པའི་ལོ་རབས་བརྒྱད་ཅུ་པའི་མགོར་བོད་ལ་སྙན་ངག་གསར་བ་དར་ནས་བཟུང་།སྙན་ངག་གི་བརྗོད་བྱའི་ཁྱབ་ཁོངས་ཡངས་པར་གྱུར་བ་དང་། སྒྱུ་རྩལ་མཚོན་ཐབས་སྣ་མང་ཅན་དུ་གྱུར་ཏེ། བོད་ཀྱི་སྙན་ངག་དེ་ལོ་རྒྱུས་གསར་བ་ཞིག་གི་དུས་སྐབས་སུ་བསླེབས། དེ་ནས་བཟུང<>དང་<>ལྟ་བུའི་མཚོན་དོན་ཧྲིལ་པོ་ཅན་གྱི་སྒོ་ནས་འབྲི་བ་ཅན་ཡོད་ལ།<>ལྟ་བུའི་དུངས་བརྗོད་སྙན་ངག་གི་ཚུལ་གྱིས་བྲིས་བ་ཅན་ཡང་ཡོད། གཅན་མེ་སྟག་གིས་བརྩམས་པའི<>ནི་བོད་ཀྱི་ཡིད་བརྙན་སྙན་ངག་གི་འཐུས་ཚབ་ཏུ་བྱེད་ཆོག་པ་ཞིག་ཡིན། འབྲི་ཐབས་གསར་བ་དེ་དག་གིས་བོད་ཀྱི་སྙན་ངག་ལ་སྔར་མེད་ཀྱི་སྒྱུ་རྩལ་གྱི་མཛེས་པ་ལྷག་པོ་ཞིག་སྦྱིན་ཞིང་། བོད་ཀྱི་སྙན་ངག་གི་ངོ་བོ་ལའང་འགྱུར་བ་ཆེན་པོ་བཟོས་ཏེ། སྔར་གྱི་ཀློག་འདོན་དང་མྱོང་རོལ་གྱི་གོམས་གཤིས་ལའང་དོ་ཆེན་པོ་བཟློས་ཏེ་བྱུང་།
སྤྱིར་ཡིད་བརྙན་ལ་སྙན་གཞུང་གསར་བར་འགྲེལ་སྟངས་མང་དུ་ཡོད་ལ། ཡིད་བརྙན་རང་གི་ངོ་བོའི་ཆ་ནས་ཀྱང་མང་དུ་བཤད་དུ་ཡོད་ཀྱང་། སྐབས་དོན་དང་འབྲེལ་ཏེ་སྙན་ངག་གི་སྒྲིག་གཞིའི་ཆ་ནས་བཤད་ན། ཡིད་བརྙན་ནི་སྙན་ངག་གི་ཐ་ཆུང་སྡེ་ཚན་ཡིན་ཞིང་། དེ་སྙན་རྩོམ་དུ་བརྗོད་བྱའི་དོན་དང་ཐད་ཀར་འབྲེལ་བའི་ཚུལ་དུ་གནས་པ་ཞིག་མིན་པར། དོན་དེ་མཚོན་པར་ཕན་ནུས་ཡོད་པའི་ཕྱི་རོལ་གཟུགས་སྣང་གི་ཚུལ་དུ་གནས་པ་ཞིག་ཡིན། ཡིན་བརྙན་སྙན་ངག་ནི་དེ་ལྟའི་གཟུགས་སྣང་གི་ཕུང་པོས་གྲུབ་པ་ཞིག་ཡིན།
<>ལ་སྤྱིར་བཏང་གི་བསྟན་དོན་ཐད་ཀར་དུ་མི་སྟོན་པར་བསྟན་དོན་མཚོན་བྱེད་ཀྱི་ཆོས་གཞན་པ་རི་བོ་ཉི་ཟླ་བཀོད་འབྲི་མེད་པས། ང་ཚོའི་ཡིད་ངོར་ཡང་རི་བོ་ཉི་ཟླའི་གཟུགས་སྣང་དེ་རྦབ་ཆུ་ལྟབུའི་གསལ་བོ་ཞིག་མི་འཆར། སྙན་རྩོམ་ཧྲིལ་པོ་རི་བོ་ཉི་ཟླ་ལས་གཞན་དུ་གྱུར་པའི་ཆོས་ཏེ་ཡིད་བརྙན་གཞན་མང་པོ་ཞིག་གིས་ཁེངས་ནས་ཡོད་དེ། སྙན་ངག་གི་ཐ་ཆུང་སྡེ་ཚན་གྱི་ཆ་ནས་བཤད་ན། སྙན་རྩོམ་གྱི་མགོའི“ཁྱོད་ཀྱི་མིང་ལ་ཉི་ཟླ་རི་བོ་ཐོགས་པ”ཟེར་བ་དང་། “རྟ་ཁ་གློད་ནས་སྨོན་ལམ་བཏབ་མྱོང་”ཟེར་བ་ནས།མཇུག་གི“ངས་སྨོན་ལམ་འདེབས་ན་ནི་རི་བོ་ཁྱོད་ཁོ་ན་མིན”སོགས་ཀྱིས་གྲུབ་པར་བརྩམས་ཡོད། དེ་དག་ལ་ཡིད་བརྙན་གྱི་ཚོགས་པ་ཞེས་བརྗོད་པ་ལ། འདི་དག་གིས་སྙན་ངག་འདི་གྲུབ་ཡོད། རི་བོ་སྙན་ངག་འདི་གྲུབ་ཡོད། རི་བོ་ཉི་ཟླ་ནི་གནས་ཆ་ནས་སྙན་རྩོམ་ཡོངས་ཀྱི་སྒྲོམ་མམ་དཀྱུ་ས་ལྟ་བུ་ཞིག་ལས་མ་འདས།
ཡིད་བརྙན་སྙན་ངག་གིས་ཆོས་དངོས་གང་ཞིག་གི་ཕྱོགས་དང་ངོས་མང་པོ་ནས་ཆོས་དེ་ཉིད་བཀོད་འབྲི་བྱ་བ་མིན་པར། ཆོས་དངོས་སོ་སོ་བ་མང་པོ་ཞིག་སྙན་རྩོམ་དུ་ཐོར་བུའི་ཚུལ་གྱིས་འདུ་བར་བྱ་བ་ཡིན་པས། ཀློག་འདོན་དང་མྱོང་རོལ་ལ་མཚོན་ན། ཐོག་མ་ནས་ཁ་ཕྱོགས་མི་རྙེད་པའི་མགོ་འཕྲུལ་སྟེར་འོངས། ཀློག་པ་པོ་མང་པོ་ཞིག་གིས་སྙན་ངག་གསར་བར་བལྟས་ན་ཅི་བཤད་ཧ་མི་གོ་ཟེར་བའང་འདིའི་རྐྱེན་གྱིས་ཡིན། ཡིན་ན་ཡང་། ཞིབ་ཏུ་དང་སྒྱུ་རྩལ་གྱི་ཚོར་བས་ཉམས་སུ་མྱངས་ཚེ། བལྟས་ན་ཟངས་ཐལ་དུ་ཡོད་པའི་ཡིད་བརྙན་དེ་དག་ལ་གཞི་མཐུན་གྱི་ཆ་ཞིག་གམ། ག གཅིག་ཏུ་འབབ་ས་ཞིག་ཅིས་ཀྱང་ཡོད་པ་ཡིན། ཡང་ན་ཚིག་ཟུར་གང་རུང་ཞིག་ན་དཀྱུ་ས་ཞིག་བསྟན་ནས་ཡོད་པ་ཡིན། དེ་ནི་ཡིད་བརྙན་སྙན་ངག་གི་འཇུག་ངོགས་ཡིན།
<>ཀློག་པར་དེའི་ནང་ཡིད་བརྙན་ཐོར་བུ་མང་པོ་ཞིག་ཡོད་ཀྱང་། ཕལ་ཆེ་བ་ཞིག“གྱེས་པ”ལ་མངོན་པར་ཕྱོགས་ཡོད་པ་མཐོང་ཐུབ། “དགུ་ཚིགས་ཀྱི་གཙང་པོས་བར་དུ་བཅད་པ”ཞེས་པ་དང་། “སྔོ་ཡོམ་ཡོམ་གྱི་ལྡོག་འབབ་གཙང་པོ་ཡང་དྲན་པས་མནར་པ”ཞེས་པ་དང་། “གླང་རྫི་དང་འཐག་མཁན་བུ་མོས་དྲན་གདུང་གི་གླིང་བུ་འབུད་པ”སོགས“གྱེས་པ” དང“དྲན་པ”ལ་གཞོལ་ལ། ཚིག་ཟུར་ནའང་“དྲན་པས་མནར” “དང་གདུང”ཞེས་ཀྱང་ཐོན་ཡོད་པས། གྱེས་བྲལ་དང་དེ་ལས་བྱུང་བའི་གྱེས་གདུང་ནི་སྙན་ངག་འདིའི་འབབ་ས་ཡིན་ལ། དོན(གྱེས་གདུང)འདི་སྙན་ངག་འདིའི་འཇུག་ངོགས་ཀྱང་ཡིན། འདི་ཡོད་པས་སྙན་ངག་ལ་བསྐྱར་དུ་བལྟས་ཚེ། སྔོན་འབྲེལ་མེད་དུ་གནས་པའི་ཡིད་བརྙན་གཞན་སྐོར་ཞིག་འདི་དང་བརྒྱུད་ནས་འབྲེལ་ཡོད་པ་ང་ཚོས་མཐོང་ཐུབ། “མེ་ལོང་བོར་ས་ནས་ཁུ་སིམ་མེར་སྨོན་ལམ་བཏབ་མྱོང་ཕྱིར”ཞེས་པས་རྒྱ་བཟའི་མེ་ལོང་བསྟན་པ་གོ་ཐུབ་ལ། དེའི་སྒོ་ནས་བློན་པོ་མགར་གྱིས་རྒྱ་བཟའི་མེ་ལོང་ཐབས་ཀྱིས་བཅག་པ་དེ། རྒྱ་བཟའ་ལ་མཚོན་ན་ཕ་ཡུལ་གྱི་སྦྲེལ་ཐག་རྩད་ནས་བཅད་པ་མཚོན་པས། ཡིད་བརྙན་འདི་ཉིད་ཀྱང་གྱེས་གདུང་ལ་འབྲེལ་ནས་ཡོད་པ་ཤེས་ཐུབ་པ་ལྟ་བུ། དེ་བས་སྙན་ངག་གི་བསྟན་དོན་ཇེ་གསལ་དུ་གྱུར་ཏེ་བརྗོད་བྱའི་སྙིང་པོ་ཙམ་ང་ཚོས་རྙེད་སོང་བ་ཡིན།
གྱེས་གདུང་ངམ་དྲན་གདུང་ལའང་དོན་གྱིས་རིགས་མང་དུ་ཡོད་དེ། ཡུལ་དུས་ཀྱི་ཁྱད་པར་ལས་བརྩམས་པའི་མཛའ་ཉེ་དང་རེ་ཞིག་གྱེས་གདུང་ཡོད་ལ། ཚེ་ཡི་འདུ་བྱེད་བཏང་བ་ལྟ་བུའི་གཏན་ནས་གྱེས་པའི་གྱེས་པ་དང་གྱེས་གདུང་ཡང་ཡོད། དེས་ན་སྙན་རྩོམ་འདིའི་གྱེས་པ་སྤྱིའི་གྱེས་པ་ཞིག་གམ་བྱེ་བྲག་གི་གྱེས་པ་ཞིག་ཡིན། མདོར་ན་ཅི་འདྲའི་གྱེས་པ་ཞིག་ཡིན་པའི་ཁྱད་པར་ང་ཚོས་་ཤེས་ཐུབ་བམ་ཞེ་ན། ཤེས་པར་འགྱུར་ཏེ། སྙན་རྩོམ་གྱི་ཡིད་བརྙན་གྱི་སྒོ་ནས་ཤེས་ཐུབ། མཛའ་ཉེ་དང་རེ་ཞིག་གྱེས་པ་ལྟ་བུ་ལ་མཚོན་ན། གོང་གི་ཡིད་བརྙན་དེ་དག་ཆེ་ཐལ་བའམ་ལྗིད་དྲགས་པས་དེ་འདྲའི་འཚམས་པོ་ཞིག་མིན་ལ། གཏན་དུ་གྱེས་པ་མཚོན་ན་དེ་དག་ཅུང་ཟད་ཆུང་ཐལ་བའམ་ཡང་དྲགས་པའི་སྣང་བ་སྟེར་བ་ཡིན། རེ་ཞིག་གྱེས་པ་ལ་དགུ་ཚིག་ཀྱི་གཙང་པོས་བར་དུ་བཅད་པ་ཞེ་ན་མིའི་རིགས་པ་སྨོས་མ་དགོས། གླང་རྫི་དང་འཐག་མཁན་བུ་མོ་ཡིན་ནའང་འདྲ། རྒྱ་བཟའ་ཡིན་ནའང་འདྲ། ལྷན་འཛོམས་ཀྱི་སྐལ་བ་ཆེས་ཕྲ་ཡང་གཏན་བྲལ་ལྟར་ཐུག་འཕྲད་ཀྱི་སྐལ་བ་གཏན་ནས་མེད་པ་མིན། དེ་བས་ན་འདིའི་གྱེས་པ་ནི་བར་གྱི་གྱེས་པ་ཞིག་སྟེ། ལྷན་འཛོམས་ཀྱི་སྐལ་བ་མེད་པ་མིན་ཡང་འཛོམས་པ་ཆེས་ཆེར་དཀའ་བས་གདུང་བ་ལྕི་མོ་དང་ལྡན་པའི་གཞིས་བྱེས་ཀྱི་གྱེས་པ་དང་ཤིན་ཏུ་འཚམས་པ་ཡིན།
མི་རིགས་གང་ཡིན་ཡང་ལོ་རྒྱུས་ཀྱི་དབང་གིས་ཕ་ཡུལ་དང་རིང་དུ་གྱེས་པ་མ་ཟད། ཡུལ་དུས་ཀྱི་དབང་གིས་ཕྱིར་འོང་དཀའ་བའི་གནས་ཚུལ་ཡོད་སྲིད་ལ། དེའི་སྟབས་ཀྱིས་མི་ཚེ་དང་དྲན་པ་མཉམ་པའི་སྐྱོ་བ་ཡོད་པ་ཡིན། དེ་ལྟའི་ཡིད་འགྱུར་དྲག་པོ་ནི་སྙན་ངག་གི་བརྗོད་བྱ་རྨ་མེད་ཞིག་ཡིན་པ་སྨོས་མ་དགོས། ཀྲུང་གོའི་རྒྱལ་ཁབ་ལ་མཚོན་ནའང་མཚོ་ཆེན་པོའི་ངོགས་གཉིས་ཀྱི་གྱེས་པ་དང་དྲན་གདུང་གིས་མི་སེམས་སྒུལ་བའི་སྙན་ངག་རབ་དང་རིམ་པ་བརྩམས་ཡོད། ང་ཚོ་བོད་ལ་མཚོན་ནའང་དེ་ལྟར་དུ། ད་ལྟ་བོད་མི་མང་པོ་ཞིག་ཕྱི་ཕྱོགས་ན་ཡོད་པ་ལས་གཞིས་སེམས་བྱེས་ལ་ཤོར་བ་དང་། བྱེས་སེམས་གཞིས་ལ་ཤོར་བའི་སེམས་གདུང་ཡོད་པ་མགོ་ནག་མི་ཡི་སེམས་ཀྱི་ཆོས་ཉིད་ཅིག་ཡིན་ལ། སྙན་ངག་འདིས་དེ་ལྟའི་བསྟན་དོན་གསར་བ་སྔར་བཏོན་མྱོང་བ་ཞིག་སྙན་ངག་ཡིན་ལ། སྙན་ངག་འདིས་དེ་ལྟའི་བསྟན་དོན་གསར་བ་སྔར་བཏོན་མ་མྱོང་བ་ཞིག་སྙན་ངག་འདིར་བཏོན་ནས་བསྟན་དོན་ལའང་གསར་བའི་ཁྱད་ཆོས་མངའ་བར་བྱས་ཡོད། ཆེས་གལ་ཆེ་བ་ནི། རྩོམ་ནང་གཞིས་པ་དང་བྱེས་པའི་མིང་དོན་གྱི་ཟུར་ཙམ་མ་བསྟན་པར་གཞིས་བྱེས་ཀྱི་དྲན་གདུང་ཡིན་པ་ང་ཚོས་ངེས་ཐུབ་ཅིང་། རྩོམ་ནང་མངོན་ནས་ང་ཚོས་ཉམས་སུ་མྱོང་ཐུབ་པ་འདི་སྒྱུ་རྩལ་གྱི་ཐབས་ལམ་མཆོག་ཏུ་གྱུར་པ་ཞིག་གི་བྱེད་ལས་ཀྱི་རྐྱེན་པས་ཡིན་པ་དེའོ། །འདི་འདྲ་ལ་ཡང་དག་དོན་གྱི་སྙན་ངག་ཅེས་བོས་ཆོག
གཞིས་བྱེས་ཀྱི་དྲན་གདུང་ནི་སྙན་ངག་འདིའི་བསྟན་དོན་གཙོ་བོ་ཡིན་་པར་ངེས་ཚེ། ང་ཚོས་སྙན་རྩོམ་ཁྲོད་ཀྱི་ཡིད་གཟུགས་གཞན་པ་ཐོག་མར་ཅི་ཡིན་ཧ་མི་གོ་བ་འབྲེལ་མེད་འགལ་ལའང་། གོ་བ་ཡོད་པར་གྱུར་ཏེ། སྙན་ངག་གི་དཀྱིལ་འཁོར་དུ་འཇུག་ཐུབ་པར་འགྱུར། མགོའི“ངས་རྒྱུན་དུ་རྟ་ཁ་གློད་ནས་སྨོན་ལམ་བཏབ་མྱོང”ཞེས་པ་དང་། མཇུག་གི་རེ་སྒུག་གི་ཤུགས་གླུ་དང་སྨོན་ལམ་སོགས་ཀྱང་དོན་གྱིས་གཞིས་བྱས་ལྷན་འཛོམས་ཀྱི་ཆེད་དུ་བཏབ་པའི་སྨོན་ལམ་དང་དེ་ལ་རེ་སྒུག་གི་ཤུགས་གླུ་དང་དེལ་རེ་སྒུག་བྱེད་པ་ཞིག་ཡིན་པ་ཤེས་ཐུབ། འདིའི་སྒོ་ནས་བསམས་ན་རྟ་ཁ་གློད་ནས་སྨོན་ལམ་བཏབ་ཞེས་པ་དེ་ལ་ལྷག་པར་ཚིག་ཤུགས་ཆེན་པོ་ཞིག་ཡོད་དེ། གྱེས་གདུང་ལས་བྱུང་བའི་སྨོན་འདུན་དྲག་པོས་སེམས་པ་ཡོངས་སུ་བཟུང་བས་ན། རྟ་ཁ་བསམ་གྱིས་གློད་པ་མ་ཡིན་པར་ངང་གིས་ལྷོད་པར་གྱུར་བ་ཡིན་པ་འདིས་སྙན་ངག་པའམ་རྩོམ་གྱི་མི་སྣའི་སེམས་གདུང་མཚོན་མ་ནུས་པ་མཚར་བོ་ཞིག་ཐོན་ཡོད།
དེ་ལྟར་སྙན་རྩོམ་འདི་ཐེངས་རེ་རེར་བཀླགས་པས་གོ་བ་ཇེ་གསལ་དང“ལག་ཡོང”ཇེ་མང་དུ་འགྲོ་བ་འདིས་སྙན་ངག་གི་གབ་སྦེད་རང་བཞིན་ཞེས་པའི་དོན་རྟོགས་པར་འགྱུར་བ། གབ་སྦེད་རང་བཞིན་ཞེས་པའི་དོན་རྟོགས་པར་འགྱུར་ལ། གབ་སྦེད་ཅན་ལ་ཀློག་པ་པོའི་ཀུན་རྟོག་འགྱུ་སའི་ཡུལ་ཡངས་པོར་ཡོད་པས་སྙན་ངག་གི་བར་གླགས་སམ་བར་གསེང་གི་གོ་དོན་དང་དེའི་དགེ་མཚན་ཡང་རྟོགས་པར་འགྱུར་བ་ཡིན། ཡིན་ན་ཡང་། ཡིད་བརྙན་ཐབས་ཅད་པོའི་སངས་རྒྱས་བསྟན་དོན་གྱི་སྒོ་ནས་གྲོལ་དགོས་པ་ཞིག་མིན་ཏེ། ཡིད་བརྙན་ལ་ལ་ནི་ནམ་ཡང་ཁ་གསལ་དུ་དགྲོལ་དུ་མེད་པའི“གཉན་པོ་གསང་བའི”ཚུལ་དུ་བཞག་ཆོག་པ་དང་འཇོག་དགོས་པ་ཡིན། དེ་དག་གིས་སྙན་ངག་གི་ཁམས་སམ་ཉམས་ཤིག་གྲུབ་པར་རྒྱང་རིང་གི་ལྗོངས་ལྟ་བུ་ཞིག་གི་ཚུལ་གྱིས་རྒྱང་ནས་ནུས་པ་འདོན་པ་ཡིན། ཡང་ན་དེ་དག་བསྟན་དོན་ལ་གཟས་པ་མིན་པར་ཡིད་བརྙན་རང་ཉིད་གཟུགས་སྣང་ཞིག་ཡིན་པའི་གཟུགས་ཀྱི་སྣང་བ་ཇེ་གསལ་ལམ་གསོན་ཉམས་་ཅན་དུ་བགྱི་བྱེད་ཅིག་ཡིན། ཡིད་བརྙན་ཐམས་ཅད་པོ་རེ་རེ་ནས་བསྟན་དོན་ལ་སྦྱོར་བ་འདི་དཔེ་དཔེ་ཅན་དང་བསྡུས་བརྗོད་ཀྱི་བསམ་གཞིག་བྱེད་སྟངས་ཤིག་གི་བསམ་པའི་འཁྱེར་སོ་ཡིན།
<>གི“ཁྱོད་ཀྱི་མིང་ལ་ཉི་ཟླ་ཐོགས་པ་ནས་བཟུང”ཞེས་པ་དང་། “ཟླ་འོད་ཀྱིས་ང་རང་ཕ་མཐར་སྐྱེལ་བའི་དུས་སུའང”ཞེས་པ་དང་། “བཙན་པོ་དང་རྒྱ་བཟའ་ས་འདི་ནས་ཕྲད་པ”ཞེས་པ་སོགས་ནི་དེ་ལྟའི་རྒྱང་རིང་གི་ལྗོངས་ཤིག་གོ །སྙན་ངག་གི་བསྟན་དོན་དང་འབྲེལ་ཏེ་ཚིག་དོན་དེ་དག་གི་དོན་གསལ་ཐག་ཆོད་པ་པ་ཞིག་སུས་ཀྱང་བཤད་དཀའ་ལ། ཐ་ན་ཚིག་དེ་དག་གི་དོན་ལ་གཏན་ཚིགས་ཀྱི་འགལ་བ་ཡང་ཡོད་ཀྱང་། སྙན་རྩོམ་རང་ནས་དེ་ཉིད་སྐྱོན་དུ་འགྱུར་བ་ལྟ་ཞོག སྙན་ངག་གི་ནམ་མཁའ་བསྐྱེད་བྱེད་ཀྱི་ནུས་པ་ལེགས་པོ་ཞིག་ཏུ་གྱུར་ནས་ཡོད། ས་པཎ་གྱིས“ལུང་དང་རིགས་པའི་བསྟན་བཅོད་འགའ་ཞིག་ཏུ་དཔེ་མི་མཛེ་སཔ་དང་། སྒྲ་ཚོགས་པར་དབྱུང་དུ་མི་རུང་བ་བྱུང་ཡང་དོན་ལ་རྟོན་པས་སྐྱོན་མེད་དོ། །སྙན་ངག་ནི་སྒྲ་གཙོ་བོ་ཡིན་པས་ཐམས་ཅད་དུ་སྐྱོན་མེད་པར་སྦྱར་བར་བྱོའོ། །”ཞེས་གསུང་པ་ལ་རིགས་འགྲེ་ནས་སྙན་ངག་གསར་བའི་ཁྲོད་དུ་གཏན་ཚིགས་ལ་རེ་ཞིག་སྐྱོན་བྱུང་ཡང་མི་སྐྱོན་ནོ་ཞེས་བཤད་ཆོག
སྙན་ངག་འདིའི་སྒྲིག་གཞི་ཀློག་འགྲེལ་གྱི་གོ་རིམ་ནི་མདོར་ན་ནང་ནས་ཕྱི་རུ་མཆེད་པའི་གོ་རིམ་ཞིག་སྟེ། ཐོག་མར་དྲན་གདུང་གི་ལྟེ་བ་ནས“དགུ་ཚིགས་ཀྱི་གཙང་པོས་བར་དུ་བཅད་པ”ཞེས་པ་དང་། “གླང་རྫི་དང་འཐག་མཁན་བུ་མོ”གཉིས་ཀྱི་ཡིད་བརྙན་གྱི་ནང་གི་དཀྱིལ་འཁོར་ཞིག་གྲུབ་པ་དང་། དེ་ནས་གྲུབ་ཟིན་གྱི་དཀྱིལ་འཁོར་དེ་ཉིད་ལྟེ་བ་བྱས་ཏེ་རྒྱ་བཟའི་མེ་ལོང་དང། རྟ་ཁ་གློད་ནས་སྨོན་ལམ་བཏབ་པ་དང་། རེ་སྒུག་གི་ཤུགས་གླུ་ལེན་པའི་ཡིད་བརྙན་གྱི་ཚོགས་ཀྱིས་བར་གྱི་དཀྱིལ་འཁོར་ཞིག་གྲུབ་པ་དང་། དེ་ནས་གསལ་བོར་འགྲེལ་དུ་མེད་པའི་ཡིད་བརྙན་གཞན་དེ་དག་རྒྱང་རིང་གི་ལྗོངས་ལྟ་བུ་ཞིག་གི་ཚུལ་གྱིས་མཐའ་དང་ཚད་གཞལ་དུ་མེད་པའི་ཕྱིའི་དཀྱིལ་འཁོར་ཞིག་གྲུབ་པའི་སྒོ་ནས། སྙན་རྩོམ་རང་ཉིད་ལྟེ་བའམ་དཀྱུས་ཡོད་ལ་མཐའ་དང་ཚད་གསུང་དུ་མེད་པའི་སྙན་ངག་གི་ཀློང་ཡངས་པོ་ཞིག་ཏུ་གྲུབ་པར་བྱས་ནས་ཡོད།
དེ་ལྟར་གཞིས་བྱེས་ཀྱི་དྲན་གདུང་གི་ཚིག་ཟུར་ཙམ་མ་ཐོན་པར། ཡིད་བརྙན་གྱི་ཚོགས་པ་བརྒྱུད་ནས་བསྟན་དོན་དེ་ཉིད་རིམ་གྱིས་ཉམས་སུ་མྱོང་ཐུབ་པ་དང་། ཡིད་བརྙན་གྱི་ཚོགས་པ་དེ་དག་བསྟན་དོན་དང་འབྲེལ་བ“ཡོད་མིན་མེད་མིན”ཞིག་གི་ཚུལ་དུ་གནས་ཡོད་པ་སྙན་རྩོམ་འདི་དང་བཅས་པའི་སྙན་ངག་གསར་བའི་སྒྱུ་རྩལ་གྱི་རང་མདངས་ངོ་མཚར་བ་ཞིག་ཡིན།
ངོ་མ་སྙན་ངག་གསར་བ་ལ་ཁྱད་ཆོས་ཤིག་ཡོད་ན། སྙན་ངག་གསར་བ་ལ་མཁས་པ་ཞིག་ཡོད་ན་མ་འཆུགས། ད་ལྟ་མེད་ན་མེད་རྟགས་ཡིན། ཧཧཧཧཧཧཧཧཧཧ
རྩོམ་པ་པོ་ཨོ་རྒྱན་ཞུ་བ་འདི་མཁས་ཚུལ་ལ་གཟིགས་དང་ལྟད་མོ་མི་ཆེའམ།
འདི་ཉིད་སྙན་ངག་ལ་ཅི་ཙམ་མཁས་པ་དེ་ཙམ་གྱིས་དབྱེན་སྦྱོར་ནང་དཀྲུགས་ལ་ཡང་མཁས་པའི་མཁས་པ་ཁ་ནག་ཅིག་ཡིན་པར་སེམས།
འདིས་མེ་ལོང་མ་ཡང་ཡག་པོ་མཇལ་མེད་པ་འདྲ།སྙན་ངག་གསུང་དུས་སྙན་ངག་གི་བརྡ་ཆད་གཅིག་ཀྱང་བེད་སྤྱོད་བཏང་གནང་མིན་འདུག
ལགས་སྐུ་རྩེད་ཞུས་པ་ཡིན་ལགས། ཁྱེད་ལས་མཁས་པ་གཞན་དུ་འཚོལ་དཀའ་ལ།།
གཞན་ལས་རྙེད་པ་ཁྱེད་ཀྱི་ཟླར་མི་འོང་།།།