འབའ་སྲས།
སྙན་ངག་ཤོག་དཀར་ངོས་ནས་མིན།།
སྙན་ངག་སྙུ་གུའི་རྩེ་ནས་མིན།།
སྙན་ངག་དཔེ་དེབ་ངོ་ན་མེད།།
སྙན་ངག་ཡི་གེའི་ཚོགས་ན་མེད།།
རི་དང་རྒྱ་མཚོ་སྙན་ངག་ཀློང་།།
ཁྱིམ་དང་གྲོང་ཁྱེར་སྙན་ངག་མཛོད།།
ལྗོན་ཤིང་མེ་ཏོག་སྙན་ངག་སྤུན།།
གྲོགས་དང་བཟའ་ཟླ་སྙན་ངག་གཉེན།།
སྙན་ངག་ཆུང་མའི་རུམ་ནས་ཕྲིས།།
སྙན་ངག་ཟ་འཐུང་བར་ནས་ཕྲིས།།
བརྩེ་བའི་མཁའ་རུ་སྙན་ངག་འཁྱུག །
འཚོ་བའི་ཐང་དུ་སྙན་ངག་ཐོར།།
བརྩེ་དུང་སྙན་ངག་འཕྱུར་ཡུལ་དང་།།
འཚོ་བ་སྙན་ངག་འབྱུང་ཁུངས་ཡིན།།
བརྩེ་དུང་མེད་པའི་འཚོ་བ་ནི།།
སྙན་ངག་འགྱུར་ཉམས་མེད་དང་འདྲ།།
སྙན་ངག་དཔོན་པའི་རྐུབ་ན་ཡོད།།
སྙན་ངག་ཕྱུག་པོའི་མཛོད་ན་ཡོད།།
སྙན་ངག་མཛེས་མའི་གཟུགས་ན་ཡོད།།
སྙན་ངག་ཕོ་སར་བྲང་ན་ཡོད།།
དཔོན་ཆེན་རྐུབ་ཀྱི་སྙན་ངག་སྒོར་མོས་ཕྲིས།།
ཕྱུག་པོའི་མཛོད་ཀྱི་སྙན་ངག་ནོར་གྱིས་ཕྲིས།།
མཛེས་མའི་གཟུགས་ཀྱི་སྙན་ངག་མཇེ་ཡིས་ཕྲིས།།
ཕོ་སར་བྲང་གི་སྙན་ངག་ནུ་མས་ཕྲིས།།
དེང་སང་དཔོན་པོ་མིང་འདི་སྒོར་གྱིས་ཉོས།།
ཕྱུག་པོའི་རླུང་རྟ་དར་བ་རྫུན་གྱི་དྲིན།།
མཛེས་མ་ང་རྒྱལ་ཆེ་བ་ལང་ཚོས་བཀྱགས།།
ཕོ་སར་བྲང་ཁ་ཡངས་པའང་ཆགས་པས་བསྐྲུན།།
རྒྱབ་ཁབ་བར་གྱིས་སྙན་ངག་སྲིད་ཀྱིས་ཕྲིས།།
རྒྱབ་ཁབ་སྐྱོང་བ་གཙོ་བོ་སྲིད་ལ་ཐུག །
ཕོ་མོ་བར་གྱིས་སྙན་ངག་ཆགས་པས་ཕྲིས།།
ཆགས་པ་མེད་པའི་སྐྱེ་བོ་སུ་ཞིག་ཡོད།།
ཕ་མ་རྒས་པའི་སྙན་ངག་དྲིན་གྱིས་ཕྲིས།།
རང་ལ་བྱམས་པ་བསམ་བཞིན་བསམ་བཞིན་ཕྲིས།།
རང་གི་བུ་ཡི་སྙན་ངག་ཤ་ཚས་ཕྲིས།།
ཤ་ཚ་མེད་ན་ཕ་དང་མ་ཡིས་ཅི།།
བགྲེས་པོའི་གདོང་གི་སྙན་ངག་འཛུམ་གྱིས་ཕྲིས།།
མིག་ཟུང་ཉམས་ཀྱང་སེམས་ཀྱི་མིག་གིས་མཐོང་།།
ནད་པའི་ལུས་ཀྱི་སྙན་ངག་རེ་བས་ཕྲིས།།
ལུས་ནི་ཉམས་ཀྱང་སེམས་ན་གསོན་ཤུགས་དར།།
མདོར་ན་གང་སོང་ས་རུ་སྙན་ངག་ཕྲིས།།
མིག་གིས་མཐོང་བ་ཐམས་ཅད་སྙན་ངག་ཡིན།།
གང་དུ་མི་འགྲོ་ཅི་ཡང་མི་འབྲི་བ།།
ཡོན་ཏན་ཡོད་ཀྱང་དོན་གྱིས་སྟོང་བར་ཟད།།
ཇི་ལྟར་དགའ་ན་དེ་ལྟར་སྙན་ངག་ཕྲིས།།
ཤིན་ཏུ་སྐྱོ་བའི་དུས་སུའང་སྙན་ངག་ཕྲིས།།
དགའ་དུས་སྙན་ངག་ཁྱོད་ཀྱི་དགོད་སྒྲ་ཡིན།།
སྐྱོ་དུས་སྙན་ངག་ཁྱོད་ཀྱི་གདུང་དབྱངས་ཡིན།།
མི་ལ་གདུང་དབྱངས་མེད་པའི་སྙན་ངག་ཕྲིས།།
ཕྱུགས་ལ་གོ་ཁ་མེད་པའི་སྙན་ངག་ཕྲིས།།
རྒྱབ་ཁབ་འཁྲུག་རྩོད་མེད་པའི་སྙན་ངག་ཕྲིས།།
མི་རིགས་དབྱེ་འབྱེད་མེད་པའི་སྙན་ངག་ཕྲིས།།
༡༤/༠༦/༢༦ ཉིན་གྱི་ཕྱི་དྲོར།
ཕྱུགས་ལ་གོ་ཁ་་་། གོད་ཁའམ་གོད་ཆག་ལ་བཅོས་ན་ཡག
༼(རྒྱབ་ཁབ་)(བར་གྱིས་སྙན་ངག)་སྲིད་ཀྱིས་ཕྲིས།།
(རྒྱབ་ཁབ)་སྐྱོང་བ་གཙོ་བོ་སྲིད་ལ་ཐུག །
ཕོ་མོ་(བར་གྱིས་སྙན་ངག)་ཆགས་པས་ཕྲིས།།
དེང་སང་(དཔོན་པོ་མིང)་འདི་སྒོར་གྱིས་ཉོས།།
ཡོན་ཏན་ཡོད་ཀྱང་དོན་གྱིས་(སྟོང་བར་ཟད)།།
(ཕོ་སར)་(བྲང་ཁ་ཡངས་པ)འང་ཆགས་པས་བསྐྲུན།།༽ ཆགས་པས་བཟོས་བའི་བྲང་ཁ་ཡངས་པ་ཅན། ཕོ་གསར་འདི་འདྲ་ཞིག་མིག་བཙུམ་ན་ཤར་རྒྱུ་མེད་ཀི། མྱིག་ཕྱེ་ནའང་རིག་རྒྱུ་མེད་ཀི། ཁྱོས་འདི་འདྲ་ཞིག་ལྷ་ཡུལ། ཀླུ་ཡུལ་གང་ཞིག་ནས་མཐོང་སོང་། ཧ་ཧ་ཧ།
བྱེད་འབྲེལ་འཆུག་ན་སྙན་ངག་གཟའ་རོ་རེད།
དག་ཆ་ནོར་ན་སྙན་ངག་ཁ་ཤོ་རེད།
ཆད་ལྷག་ཡོད་ན་སྙན་ངག་བཅུད་མེད་རེད།
བསྟན་བྱ་མེད་ན་སྙན་ངག་གཅེར་བུ་རེད།
བཅུད་མེད་གཅེར་བུ་གཟའ་རོ་ཁ་ཤོ་འདི།
སྙན་ངག་པ་ཡི་ཐུགས་སྲས་འཕྲུལ་མེད་ཞིག།
ཧ་ཧ་ཧ། བོད་དགེ། སྤྲོ་མ་འཕར་ཨ།
སྙན་དངགས་མེད་ན་སྤྱི་ཚོགས་དར་རྒུད་མེད།།
སྙན་དངགས་མེད་ན་དཔོན་རིགས་དཀྱགས་ས་མེད།།
སྙན་དངགས་མེད་ན་མཛེས་མ་སླུ་ས་མེད།།
སྙན་དངགས་མེད་ན་ཕོ་རྒོད་གྱང་རོ་རེད།།