སྒོ་ཤེས་རབ་ལ་ལག་པ་ཡར་སྒྲེང་པ།

བོད་ནང་གི་རྩོམ་པ་པོ་མེ་བཙའ །  འོས་སྦྱོར་བ། རང་དབང་རྒྱལ

༡༽ སྒེར་གཅོད་པའི་མིག་ནང་གི་ཤེས་ཡོན་པའི་ལས་དབང་།

 

སྤྱིར་བཏང་སྒེར་གཅོད་ཅེས་པ་ནི་དབང་ཆ་ཐམས་ཅད་གང་ཟག་ཅིག་དང་ཚོགས་པ་ཞིག་གིས་གཅིག་བསྡོམས་བྱས་པ་ལ་ཟེར་འདུག་སྟེ།འདི་ལ་སྲིད་དབང་སྒེར་གཅོད་དང་།བསམ་བློའི་སྒེར་གཅོད་སོགས་ཡོད་མོད། འོག་ཏུ་གླེང་བར་འདོད་པ་ནི་ཕྱི་མ་དེ་ཡིན།དེས་ན་སྒེར་གཅོད་ཅེས་པ་དེས་བསྐྱེད་པའི་མཇུག་འབྲས་དང་།   དེས་སྤེལ་བའི་སྦྱོར་བ་ནི་ག་རེ་ཡིན་ནམ་ཞེ་ན།དེ་ནི་བློ་ཡུལ་ལས་འགོང་པ་ཤ་སྟག་རེད་དེ།མུན་ནག་གི་དུས་ སྐབས་རེ་རེ་དང་གཉའ་གནོན་གྱི་སྤྱི་ཚོགས་རེ་རེའི་ནང་ཁོ་ཚོས་ཉེས་མེད་ཀྱི་ཚེ་སྲོག་མང་པོ་མེ་རུ་སྒྲོན་མྱོང་ལ། རླབས་ཆེན་གྱི་སྐྱེས་ཆེན་མང་པོའི་སྙིང་ཁྲག་ཀྱང་ཧུབ་ཀྱིས་བཞེས་མྱོང་།དེས་བས་ཁོ་ཚོའིགདུག་རྩུབ་ཀྱི་ངར་ཁ་ མདུང་ལས་རྣོ་ལ།དབང་ཤེད་ཀྱི་བཙན་གནོན་རི་ལས་ལྕི།ཡིན་ན་ཡང་།ཡོད་ཚད་དམངས་གཙོ་ཅན་དང་ཐམས་ཅད་རང་དབང་ཅན་དུ་བསྒྱུར་དང་འགྱུར་བཞིན་པའི་དུས་འདིར།སྔོན་ཆད་སྒེར་གཅོད་ཀྱི་དུག་ཆུ་འཕྱུར་མྱོང་ཞིང་གཉའ་གནོན་གྱི་རྦ་རླབས་རྒྱས་མྱོང་བའི་འཛམ་གླིང་གི་ཡུལ་གྲུ་མང་ཆེ་བར།སྔར་ནས་བཟུང་ལྟ་བ་འདིའི་རིགས་གནས་ས་དང་འཇུག་ས་ཡེ་ནས་མེད་པར་བྱས་ཏེ་ཡོད་མོད།འོན་ཀྱང་།རང་རེ་བོད་ལ་མཚོན་ན་གསའ་དང་གསེང་། ཟ་དང་ཟུར། ཕྱི་དང་ནང་གང་ནས་ཀྱང་བྱ་ངན་འདིའི་རིགས་ཀྱིས་ནམ་ཡང་ཁ་ལོ་བསྒྱུར་དེ་ཡོད་པས། མི་རིགས་ཀྱི་ལས་དོན་ལ་ཤ་ཚ་ཞིང་ཐུགས་ཁུར་གནང་ཤེས་མཁན་གྱི་མི་ཞིག་བྱུང་ཚེ་དེ་མ་ཐག་འབུར་འཇོམས་བཏང་སྟེ་མེད་པར་བཟོ་རྒྱུ་ནི་འུ་ཚང་གི་བྱ་བའི་རྩ་དོན་དང་བོ་རུ་བཟུང་འདུག་པ་མ་ཡིན་ནམ།དེ་བས་ད་ ཐེངས་ཡང་བོད་ཡུལ་ན་སྙན་གྲགས་ཆེ་བའི་གདན་ས་ཆེན་མོ་རྔ་ཡུལ་ཀིརྟི་དགོན་ནས་ཀྱང་འདི་ལྟ་བའི་གནས་ཚུལ་ཡིད་སྐྱོ་བ་ཞིག་བྱུང་སོང་བས།   སྤྱི་ཚོགས་ཀྱི་ཚོགས་པ་སོ་སོ་དང་དྲ་རིགས་གང་རུང་གི་ལམ་ན་འདིའི་སྐོར་གྱི་རྩོམ་ཡིག་འབྲི་བ་དང་བགྲོ་གླེང་བྱེད་པ་ལ་སོགས་པའི་གནས་ཚུལ་བྱུང་དང་འབྱུང་གིན་འདུག་པ་མཐོང་བས། བདག་གིས་ཀྱང་རང་ཉིད་ཀྱི་བསམ་ཚུལ་དང་ལྟ་ཚུལ་ཙམ་ལྷུག་པོར་བརྗོད་ན་འདོད་བྱུང་།

 མ་གཞི་དོན་རྐྱེན་འདིའི་རྩ་བའི་འབྱུང་ཁུངས་ནི་སྒེར་གཅོད་ཚོགས་པ་གང་ཞིག་གིས་བསྒྲགས་པའི་ཁྲིམས་ཡིག་ཅིག་རེད་ལ།ཁྲིམས་ཡིག་དེའི་ནང་དོན་ཡང་མི་བུ་རེ་རེའི་རྣམ་དཔྱོད་ཀྱི་ཤེས་རབ་དང་རང་དབང་གི་བསམ་བློ་ལ་ཚད་བཀག་བཟོ་རྒྱུ་ཟེར་བ་དེ་རེད་འདུགའདི་ནི་ཇི་འདྲའི་འཇིགས་ཡེར་བ་ཞིག་རེད་ཨང་།ང་ཚོ་སུ་ཡིན་ཡང་རང་ཉིད་ལ་རང་ཉིད་ཀྱི་ཤེས་རྟོགས་ཤིག་དང་རང་ཉིད་ཀྱི་བཞེད་ཕྱོགས་ཤིག་ཡོད་པས། དེ་ལ་འདི་ནས་ཚོད་འཛིན་དང་དེ་ནས་བཀག་བསྡོམ་བྱེད་ཟེར་བ་ནི་བཟོད་ཐབས་མེད་པའི་སྡུག་བསྔལ་ཞིག་ག་ལ་མིན་དེ་ཡིན་ནོ་།།དེ་བས་ད་ལན་རྩོམ་པ་པོ་སྒོ་ཤེས་རབ་རྒྱ་མཚོ་ཁོང་གིས་ཀྱང་《ཁ་ཞིག་མི་གྲག་ཀ་མེད་བྱུང་སོང་།》ཞེས་རྩོམ་ཡིག་ཅིག་སྤེལ་འདུག་པ་ལའང་ཁག་མི་འདུག་སྟེ།ཁོང་གིས་གསུངས་པ་བཞིན“རྩོམ་འབྲིའི་ལས་ཀ་དེ་རང་གི་མི་ཚེའི་བྱ་བ་གལ་ཆེན་ཞིག་ཏུ་ངོས་འཛིན་མཁན་གྱི་ངོས་ནས།བཙན་ཁྲིམས་འདིས་བསླངས་པའི་ན་ཟུག་ནི་གཞན་ལས་ཆེ་ལ།”ཞེས་གསུངས་པ་བཞིན་རྩོམ་པ་པོ་དང་ཤེས་ཡོན་པ་སུ་ཞིག་ལ་མཚོན་ནའང་རང་དབང་གི་གདམ་ག་ཞིག་ནས་རང་དབང་གི་བསམ་གཞིགས་བྱེད་མ་ཐུབ་ཚེ་དེ་འདྲའི་སྐྱོ་བ་ཅིག་དང་ན་ཟུག་ཅིག་གང་ནས་སྐྱེ་སྟེ་སྐྱེ་མི་སྲིད་དོ།།    དེས་ཕྱིར་བསམ་བློའི་བས་གདོང་གཏོད་ས་ནི་སྒེར་གཅོད་པའི་གདོང་པགས་བཤུ་རྒྱུ་དེ་རེད་ལ། སྒེར་གཅོད་པའི་དམིགས་འབེན་ཅིང་བསམ་བློ་བ་མཐའ་སྤྲོད་བྱ་རྒྱུ་དེ་ཡིན་པར་སེམས། འོན་ཀྱང་། འདི་ནི་དེ་འདྲའི་ལས་སླ་མོ་ཞིག་ག་ལ་ཡིན་ཏེ། འགོག་མི་ཐུབ་པ་ནི་བསམ་བློའི་ཁྱད་གཤིས་རེད་ལ། གཏོར་མི་ནུས་པའང་བསམ་བློའི་སྟོབས་ཤུགས་རེད། དེས་ན་གང་དུ་སྒེར་གཅོད་ཀྱི་ལྟ་བའི་མེ་དཔུང་འཕྱུར་ན།དེ་རུ་བསམ་བློའི་ཆུ་གཏེར་སྔར་ལས་རྒྱས་སྲིད་ལ། གང་དུ་གཡོ་སྒྱུ་དང་གནོན་ཤུགས་ཀྱ་ངོ་བོ་ཆེ་རུ་ཕྱིན་ན། དེ་རུ་དྲང་བདེན་དང་གནས་ལུགས་ཀྱི་རྒྱབ་དཔུང་སྔར་ལས་ནུས་མཐུ་བཙན།

༢༽ རུལ་སུངས་པའི་ཚོགས་པ་དང་དེའི་ཁ་གཏད་དུ་འགྲེང་བའི་སྨྱུ་གུའི་སྟོབས།

རུལ་སུངས་པའི་སྡེ་དང་ཚོགས་པ་རེ་རེ་ནི་རུལ་སུངས་སུ་གྱུར་བའི་མི་བུ་རེ་རེས་གྲུབ་པ་རེད་ལ། དེ་ཡང་བསམ་བློ་རུལ་སུངས་དང་ལྟ་བ་རུལ་སུངས་སུ་གྱུར་བས་བསྐྱེད་པ་ཡིན་ཕྱིར། དེ་ལ་གཙང་ཆབ་སྔོན་མོས་ཁྲུས་ཤིག་དང་། དྲི་ཞིམ་སྡུག་སྤོས་བསང་ཞིག་མ་བཏང་ཚེ། ཁོང་ཚོ་གང་དུ་གནས་པ་དེ་དག་ཏུ་རུལ་དྲིའི་ཁེངས་ཤིང་སྐྱུར་དྲིའི་ཁྱབ་ཏེ་ཡོད་པས།གནས་དེ་ནས་གསར་སྐྱེས་ཀྱི་མྱུ་གུ་ནམ་ཡང་འཁྲུང་དཀའ་ལ། དྭངས་གཙང་གི་མྱི་ཞིག་ཀྱང་འབྱོན་ཐབས་བྲལ་ལོ།།དེ་བས་དཔྱོད་ཤེས་ཀྱི་བློ་མིག་རིང་དུ་བསྲིངས་ཤིང་དྲང་བདེན་གྱི་ལྟ་བར་རྒྱབ་དཔུང་བཅོལ་བའི་སྨྱུག་འཛིན་པ་རེ་རེས་འདིའི་སྐོར་ནས་བསམ་གཞིགས་བྱས་ཏེ་ལྷག་བསམ་རྣམ་དག་གིས་རྩོམ་ཡིག་རེ་བྲིས་ན་ཡང་།‘སྒེར་སྡོམ་གྱི་ལྟ་བའི་ཕྱི་ཟིན་ནང་ཟིན་དུ་གྱུརབའི་’མྱི་ཆེན་ཚོས་ནི།   སྔོན་ནས་གོམས་གཤིས་སུ་ཆགས་ཟིན་པའི་ཞྭ་མོ་རྙིང་བའི་རིག་གནས་བསྐྱར་གསོ་བརྒྱབ་ཏེ། རྣམ་དཔྱོད་ཅན་གྱི་སྐྱེས་བུ་གང་ཞིག་གི་དབུ་མགོར་བཙན་གྱིས་བགོས་རྗེས། གཞི་ནས་གཡོ་ཅན་ཝ་མོའི་སྤྱོར་བ་ལྷུར་ལེན་བྱས་པ་དེ་ནི་སྙིང་རྗེ་བའི་ཡུལ་དུ་མ་གྱུར་གྲང་། རང་ཉིད་ལ་མཚོན་ན་དོན་རྐྱེན་འདི་བྱུང་མ་ཐག་ནས་གོ་ཐོས་བྱུང་ཡང་། གནས་ཚུལ་ཆ་ཚང་ཞིག་དང་རྒྱུས་ལོན་འཚམས་པོ་ཞིག་བྱུང་མ་ཐུབ་པས་ཉིན་ཤས་རིང་བགོར་འགྱངས་བྱས་ཏེ་བསྡད་པ་ཡིན། ཡིན་ན་ཡང་།ཁ་སང་གཞི་ནས་རྩོམ་པ་པོ་ཁོང་གིས་དངོས་སུ་བྲིས་པའི་རྩོམ་ཡིག་གཉིས་པོ་ཆ་ཚང་ལག་སོན་བྱུང་སོང་ལ། བྱུང་ནས་ཀྱང་བསྲན་མི་ཐུབ་པའི་ན་ཟུག་ཅིག་ཀྱང་ལྷག་མར་སྐྱེ་བྱུང་།    མ་གཞི་དོན་རྐྱེན་འདིའི་རྩ་བའི་འབྱུང་ཁུངས་ནི་སྔོན་དུ་སོང་བ་བཞིན་སྒེར་སྡོམ་གྱི་རང་ལུགས་ལ་སྲོང་སྐྱོབ་རྒྱག་ཅིང་། ཆིག་གཅོད་ཀྱི་ལྟ་བ་འཛིན་སྐྱོང་བྱེད་པའི་ཚོགས་པ་གང་དེའི་ཐུགས་བཞེད་ཅིག་རེད་ལ།ཡིད་ཕངས་དགོས་པ་ཞིག་ནི་ཚོགས་པ་གང་དེའི་གྲུབ་མི་ཚང་མ་གཞུང་ཆེན་པོ་ཏི་ལྔ་ལ་སྤྱངས་མཐར་ཕྱིན་ཅིང་། གསང་བ་སྔགས་ཀྱི་ཉམས་ལེན་ལའང་སྒོམ་པ་མི་དམན་པའི་གླིང་དེའི་དགེ་པའི་བཤེས་གཉེན་རྐྱང་རྐྱང་རེད་བཞག

ཨ་ཙི། ཁོང་ཚོས་འདི་ལྟ་བའི་སྤྱོར་བ་སྤེལ་བའི་རྒྱུ་མཚན་ག་རེ་ཡིན་ནམ། དམིགས་ཡུལ་ནི་ཅི་ཞིག་ཡོད་དམ། རང་གི་ ལྟ་ཚུལ་དང་མ་མཐུན་པས་ཡིན་ནམ། རང་གི་མཚན་སྙན་ལ་དོགས་པས་ཡིན་ནམ། ཡིན་མི་སྲིད། ཁོ་ཚོ་ཚང་མ་མི་ཚེ་གང་བོར་ཐོས་བསམ་གནང་སྟེ་རྩོད་པ་བྱས་ནས་འོངས་པ་ཤ་སྟག་ཡིནཔས། ཁོ་ཚོའི་བློ་ཁོག་འདི་འདྲ་དོག་ག་ལ་སྲིད། འོ་ན་ཅིའི་ཕྱིར་ཞེ་ན། གླིང་འདིའི་ཤེས་རིག་འཕེལ་རྒྱས་ཀྱི་ཕྱིར་དུའོ ། ཞེས་སྨྲ་སྲིད་མོད། དེ་ནི་ལྷག་དུ་མི་འགྲིག་སྟེ། ཁྱོད་ཚོས་དགག་བྱའི་ཡུལ་ནི་རྩོམ་རིག་ཟེར་བ་དེ་རེད་ལ། དེ་ནི་མཁས་པའི་བྱ་བ་རྣམ་གསུམ་གྱི་ཡ་གྱལ་ཡིན་ཞེས་སྔོན་བྱོན་དམ་པ་མང་པོས་གསུངས་མྱོང་བ་མ་ཡིན་ནམ། དེ་ཡང་མ་ཡིན་དེ། ཐ་ཤལ་རྩོམ་ཡིག་གི་རིགས་ལ་བྱའོ་ཟེར་ན། ཁྱོད་ཚོས་ཐ་ཤལ་རྩོམ་ཡིག་ཟེར་བ་དེ་ཚད་ག་འདྲ་ཞིག་ནས་འཇོག་གི་ཡོད། བསྟོད་རྩོམ་མ་ཡིན་གང་ཞིག་མཐའ་དཔྱོད་མ་ཡིན་པ་ལ་བྱའོ་ཞེས་ན། འཛམ་གླིང་ན་གྲགས་པ་འབར་བའི་དེང་གི་རྩོམ་ཡིག་རྣམས་རེ་རེ་བཞིན་ཀློགས་དང་། གང་ཞིག་གང་གི་བསྟོད་རྩོམ་དང་གང་ཞིག་གང་གི་མཐའ་དཔྱོད་ཙམ་བྱས་ཏེ་བྲིས་ཡོད། ཁྱོད་ཚོ་ལྟར་ན།   དོན་དངོས་ཀྱི་གནས་ཚུལ་བརྗོད་པ་དེ་ཡང་ཐ་ཤལ་ཡིན་ནམ།   དྲང་བདེན་གྱི་སྐྱོན་བརྗོད་བྱས་པ་དེ་ཡང་ཐ་ཤལ་ཡིན་ནམ། ཐ་ན་མི་བུ་རེ་རེའི་དགའ་སྐྱོ་ཆགས་སྡང་གི་ཚོར་བ་སྣ་ཚོགས་སྨྱུག་རྩེར་སྒྲོན་པ་དེ་ཡང་ཐ་ཤལ་ཡིན་ནམ། ཡིན་མི་སྲིད། རྩོམ་ཡིག་ཅི་ཞིག་ཡིན་ཡང་སྐྱེས་བུ་སྒེར་རེ་རེའི་ཤེས་རབ་ཀྱི་རྩལ་ལས་ཐོན་པའི་འབྲས་རྟགས་རེ་རེ་ཡིན་པས།འདི་ལེགས་དང་དེ་མི་ལེགས་པའི་མཐའ་མའི་དབང་ཆ་ནི་ཀློག་པ་པོ་སྤྱི་ལ་ཡོད་པ་ལས།ཁྱོད་ཚོ་ཚོགས་པ་རེ་གཉིས་དང་གང་ཟག་སྒེར་རེ་གཉིས་ལ་དབང་ཆ་འདི་གང་ན་ཡོད་དེ་ཡོད་མི་སྲིད་དོ།། དེ་ལས་ཀྱང་མཉམ་འཇོག་དགོས་པ་ཞིག་། སྐྱེས་བུ་རེ་རེའི་ནང་བསམ་བློའི་རང་དབང་དང་འཕེལ་རྒྱས་ལ་གནོན་ཤུགས་སྤྲོད་པའམ་བཀག་འགོག་བྱེད་པ་ནི་སྡུག་བསྔལ་ཐམས་ཅད་ལས་ལྕི་ཤོས་ཡིན་པས།    འདི་ལས་ཉེས་པ་ཆེན་པོ་ཞིག་དང་སྡིག་པ་སྟོབས་ཆེན་ཞིག་གཞར་ཡང་མི་སྲིད་པས། གནས་བསྟན་འདུལ་བ་འཛིན་པ་ཚོས་ནམ་ཡང་དོགས་ཟོན་རེ་གནང་རོགས་ཞུ་ཞེས་ཞུས་པ་ཡིན།

 

༣༽ སྐྱོ་གར་སྙིང་སྟོབས་དང་དེས་བསྐྱེད་པའི་ན་ཟུག

མི་ཚེ་ནི་སྐྱོ་གར་གྱི་འཇིག་རྟེན་ཆེན་པོ་ཞིག་རེད་ལ།འཇིག་རྟེན་དེ་ནས་སྐྱེས་ཆེན་གང་མང་ཞིག་ནམ་ཡང་ཡིད་ཆེས་དང་སྤོབས་པས་བཏེགས་ཏེ་བཞུད་འགྲོ་ཡི་འདུག དེས་ཕྱིར་བདག་གིས་སྐྱོ་གར་ནི་སྙིང་སྟོབས་ཅིག་ཡིན་པར་རློམ་ཡོད་ལ།སྙིང་སྟོབས་ཏེ་འཛད་མེད་ཅིག་ཡིན་པར་ཡང་རྟོགས་ཡོད།དེས་ན་ས་སྒང་རིལ་བོ་འདིའི་སྒང་དུའང་དེ་ལྟའི་སྙིང་སྟོབས་ཅན་གྱི་སྐྱེས་ཆེན་བྱུང་བ་གྲངས་མེད་ལ།   རང་རེ་བོད་ལ་མཚོན་ན་ཡང་མཛུབ་གུ་ནང་དུ་བཀུག་ཆོག་བྱེད་ཀྱི་དམ་པ་རེ་གཉིས་བྱོན་མྱོང་ཡོད།   ཡིན་ན་ཡང་།   ཁོང་ཚོ་ཚང་མའི་རེ་བ་དང་དམིགས་ཡུལ་ནི་སོ་སོ་ཡིན་སྲིད་མོད་།འོན་ཀྱང་།ཁོང་ཚོར་ཐུན་མོང་གི་ཆ་ཞིག་ཡོད་པ་ནི་གནས་ལུགས་ཀྱི་མདུན་ནས་གཞན་ལ་མགོ་མི་སྒུར་བ་དང་།དྲང་བདེན་གྱི་ཆེད་དུ་ཡོད་ཚད་འབུལ་ཐུབ་པའི་སྤོབས་པ་དང་ང་རྒྱལ་དེ་རེད། དེ་བས་ཁོང་ཚོས་རང་གི་མི་ཚེ་བཞུད་ལམ་རིང་མོའི་ཁྲོད་སྐྱོ་བའི་ཟློས་གར་གང་མང་འཁྲབ་མྱོང་ལ།   འཁྲབ་མྱོང་བའི་ཟློས་གར་རེ་རེ་ལས་ཀྱང་དུས་སྐབས་ཤིག་དང་མི་རིགས་ཤིག་ཡང་ན་ཁོར་ཡུག་ཞིག་གི་ཕྱི་ནང་གསང་གསུམ་གྱི་མུན་ནག་གི་ངོ་གདོང་རེ་རེ་དང་གཉའ་གནོན་གྱི་ཟུར་ཁ་རེ་རེ་ངང་གིས་མཐོང་ཐུབ་པས། ཁོང་ཚོའི་བྱས་རྗེས་དང་མཇོན་ཐང་ནི་ལོ་རྒྱུས་ཀྱིས་ནམ་ཡང་བརྗེད་མི་སྲིད་དོ།།དེས་ན་རང་རེ་ལ་མཚོན་ནའང་ལུས་སུ་ཆོས་གོས་གྱོན་ཅིང་ལག་ཏུ་ལྕགས་མདའ་ཐོགས་པའི་དགེ་སློང་གཅིག་གིས་བོད་བཙན་པོའི་རྒྱལ་རབས་མཇུག་བསྡུས་པ་ནས་བཟུང་དེ་རིང་གི་བར་དུ་སྐྱོ་གར་སྐྱུར་མོ་འདི་མགོ་ཐོག་ཏུ་ལྷུང་མཁན་མང་པོ་འདུག་སྟེ།དཔའ་བོ་ལུང་ཤར་གྱི་མིག་འབྲས་བཏོན་པ་ནས་བཟུང་སྒོ་ཤེས་རབ་རྒྱང་ཕུད་བཏང་བའི་བར་དུ་

སྐྱེས་ཆེན་གང་མང་ཞིག་ལ་ལྟ་ལོག་པ་དང་།གསང་མྱུལ་བ།ངོ་ལོག་པ་ལ་སོགས་པའི་དམོད་ཚིག་ཚོད་མེད་བསྒྲགས་ཏེ་སྤྱི་ཚོགས་ཀྱི་བས་མཐའ་རུ་འདེད་ཀྱིན་པ་འདི་དག་ནི། བློ་གཟུ་བོར་གནས་པའི་གང་ཟག་ཅིག་གིས་མཐོང་ཚེ་སེམས་སུ་ན་ཟུག་ཅིག་སྐྱེ་སྟེ་ངག་ནས་ཤུགས་རིང་ཞིག་མི་འབྱིན་ག་ལ་སྲིད། དེ་ཡང་ལོས་ཡིན་ཏེ། བསམ་བློ་དེང་རབས་ཅན་དང་སྤྱི་ཚོགས་དཔལ་ཡོན་ཅན་དུ་ཁ་ཕྱོགས་པའི་ད་ལྟའི་དུས་སྐབས་འདིར།   ཡུལ་གྲུ་མང་ཆེ་བར་འདི་ལྟའི་མི་ཤིན་དུ་ཉུང་བས་སོ། འོན་ཀྱང་། རང་རེའི་་ཡུལ་ན་ད་དུང་ཐལ་མཐའ་བའི་རང་ལུགས་འཛིན་མཁན་གྱི་བྱེད་གཏེ་རྣམས་ནི་གང་ས་གང་དུ་ལྷོད་ཡངས་ཀྱིས་བཞུགས་འདུག་པས། འདི་ལ་ང་ཚོས་ངེས་པར་དུ་གཙང་སེལ་ཞིག་བྱ་དགོས་པ་མ་ཟད་འཕྱིས་འདུག་པ་འདྲ་སྟེ།   ང་ཚོར་མཁོ་བ་ནི་དཀྱེལ་ཡངས་ཀྱི་བསམ་བློ་ཡིན་པ་ལས །མཁྲེགས་འཛིན་གྱི་ལྟ་བ་ནི་ག་ལ་ཡིན།དེས་རྐྱེན་གྱིས་རྩོམ་པ་པོ་སྒོ་ཤེས་རབ་རྒྱ་མཚོ་ལ་མཚོན་ནའང་རང་ཉིད་གང་ལ་གནས་སའི་ཁོར་ཡུག་དེར་སློབ་སྤྱོང་གི་མཁའ་དབུགས་ལེགས་པོ་ཞིག་འོང་ཕྱིར། ལྷག་བསམ་ཟོལ་མེད་ཀྱི་སྒོ་ནས་རྩོམ་ཡིག་ཅིག་བྲིས་ནའང་། གཡོ་དང་སྒྱུ་ཡི་ལས་ལ་ནང་བྱན་ཆུད་ཀྱང་དོན་དང་མཐུན་པའི་སྐྱོན་བརྗོད་སྣ་གཅིག་ཀྱང་མི་ཐེག་པའི་ཚོགས་པ་གང་དེས་ནི་གནས་

ལུགས་ཀྱི་སྐད་ཆ་ཚིག་གཅིག་ཀྱང་མི་ཟློ་བར་འཆར་གཞི་དང་དམིགས་ཡུལ་ཡོད་པའི་སྒོ་ནས་གྲྭ་རྐྱང་ཤེས་ཡོན་

པ་ཞིག་འདི་ལྟར་རྒྱང་ཕུད་བཏང་སོང་བ་ནི་ཡིད་སྐྱོ་བའི་གནས་ཤིག་ཅི་ལ་མ་ཡིན་ཏེ་ཡིན་ནོ།།

      འོན་ཀྱང་། ང་ཚོས་འདང་ཞིབ་ཏུ་བརྒྱབ་ཏེ་འོངས་ན་དེ་ཡང་སྐྱོ་དགོས་པ་ཞིག་ཁྱོན་ནས་མ་རེད་དེ། ཤེས་ཡོན་པ་ནི་གང་དུ་སོང་ཅིང་ཤེས་ཡོན་ཅན་ཡིན་པས། ཁོའི་རྒྱུད་ཀྱི་རྣམ་དཔྱོད་ཀྱི་ཤེས་རབ་ལ་སུས་ཀྱང་རྡོག་རྫིས་གཏོང་མི་ནུས་ལ། ཁོའི་ཡིད་ཀྱི་དྲང་བདེན་གྱི་རྡོ་རིང་ནི་ནམ་ཡང་གཞིག་ག་ལ་སྲིད། ཡང་གཅིག་བཤད་ན། འདི་ནི་གོ་སྐབས་ཤིག་ཀྱང་ཡིན་ཤས་ཆེ་སྟེ།    རྩོམ་པ་པོ་ཁོང་ལ་མཚོན་ན། ད་ནས་བཟུང་ཚོགས་པ་གང་ཞིག་དང་དབང་ཤེད་ཅན་སུ་ཞིག་གི་ བཀའ་བཀོད་འོག་ཏུ་གནས་མ་དགོས་པས། ཁོང་གི་ཡིད་སེམས་ཀྱི་གཏིང་ན་ཉར་བའི་རླབས་ཆེན་གྱི་བྱ་གཞག་དག་ད་ནི་དོགས་ས་དང་འཇིགས་ས་ཡེ་ནས་མེད་པར་བདེ་ལེགས་ངང་འགོ་བརྩམ་ཐུབ་པའི་ལྟས་བཟང་ཞིག་ཀྱང་མ་ཡིན་ཞེས་སུ་ཡིས་བསྙད་ཐུབ། དེས་ན་ང་ཚོས་སྙིང་རྗེ་ཡུལ་གྱི་ཡུལ་དུ་གྱུར་བ་ནི་རྗེས་ན་ལུས་པའི་ན་གཞོན་རེ་བ་ཅན་རྣམས་ཡིན་ཏེ།ཁོ་ཚོས་ད་ནི་ཅི་ཞིག་བྱའམ། མུ་མཐུད་དུ་སྒེར་གཅོད་ཚོགས་པ་གང་དེའི་བཀའ་ཁྲིམས་བཙན་པོའི་འོག་ཏུ་འཚོ་དགོས་སམ།ཡང་ན《དབང་མེད་ཐབས་མེད་ཀྱི་གྱེས་ཕྱག》གཉིས་པ་རེ་ཕུལ་ཏེ་འགྲོ་དགོས།ཁོ་ཚོར་མཚོན་ན་གནོན་ཤུགས་འདི་ནི་ཇི་འདྲའི་ལྕིའང་།ཁོ་ཚོས་མུ་མཐུད་དུ་སེམས་ཤུགས་བསྐྱེད་དེ་ཡང་བསྐྱར་རེ་འདུན་ཞུ་ཡིག་རེ་ཕུལ་བའི་དབངདུ་བཏང་ན། ཁོ་ཚོའི་ཚེ་སྲོག་ལ་གནོད་པ་ཡོད་དམ། ཁོ་ཚོའི་འཚོ་གནས་ལ་བར་ཆད་འབྱུང་ངམ། དཀོན་མཆོག་མཁྱེན། ཁོ་ཚོས་དངོས་ནས་དེ་འདྲ་བྱས་ན། ཁོ་ཚོ་གནོད་པ་མེད་པར་སྨོན། ཁོ་ཚོས་རང་ཉིད་ཀྱི་མི་ཚེ་དང་ཤེས་རིག་འཕེལ་རྒྱས་ཀྱི་ཕྱིར་དུ་རང་ཉིད་ཀྱི་ལྟ་ཚུལ་ཐུང་ཐུང་རེ་བཏོན་ན།ཁོ་ཚོའི་ལས་དབང་ལ་ཆག་སྒོ་མི་འབྱུང་བར་སྨོན།ཁོ་ཚོས་རང་ཉིད་ཀྱི་མི་རིགས་དང་རང་ཉིད་ཀྱི་རིག་གཞུང་གི་དོན་དུ་རྩོམ་ཡིག་ཐུང་ཐུང་རེ་བྲིས་ན། ཁོ་ཚོའི་སྨྲ་ལྕེ་ལ་ལྕགས་ཟྭ་མི་རྒྱག་པར་སྨོན། སྨོན་ལམ་དེ་དག་གི་ཞོར་དུ་ད་དུང་བརྗོད་འདོད་པ་ཞིག་ནི། དུས་རབས་གཅིག་གི་འོག་ནས་འཚརལོངས་བྱུང་ཞིང་། མི་རིགས་གཅིག་གི་ལས་དོན་ཁ་ནས་གླེང་མཁན་གྱི་འུ་ཅག   ཕུགས་ཀྱི་སྙེགས་བྱ་དང་སེམས་ཀྱི་སྒོམ་བྱ་མི་འདྲ་ནའང་། ལུས་ཀྱི་འཚོ་གནས་དང་མདུན་གྱི་ལས་རིགས་མི་གཅིག་ནའང་།   འདྲ་ས་གཅིག་ཡོད་པ་ནི། ང་ཚོ་ཚང་མ་ཤེས་ཡོན་ལ་དགའ་ཞིང་བདེ་སྐྱིད་ལ་དུངས་བ་ཤ་སྟག་ཡིན་པས། ང་ཚོས་ནམ་ཡང་ཁྱོད་ཚོའི་མདུན་ལམ་ལ་རྒྱབ་སྐྱོར་བྱེད་ཀྱང་། ཁྱོད་ཚོའི་སྐྱོ་གར་ལ་སྐད་འབོད་རྒྱག་གི་ཡིན།

 ༤༽ མཇུག་གཏམ་གྱི་དོད་དུ།

བདག་ལ་མཚོན་ན་རྩོམ་ཐུང་འདི་འབྲི་དགོས་པའི་དམིགས་ཡུལ་ནི་ཉེ་བའི་ཆར་འདི་ལ། བོད་ཡུལ་ན་སྙན་གྲགས་ཆེ་བའི་རྩོམ་པ་པོ་སྒོ་ཤེས་རབ་རྒྱ་མཚོ་ཁོང་རང་དགོན་དང་ཁ་བྲལ་དགོས་བྱུང་བའི་གནས་ཚུལ་ཞིག་གོ་ཐོས་བྱུང་བས།རང་སེམས་ལ་བཟོད་པར་དཀའ་བའི་ན་ཟུག་ཅིག་སྐྱེ་བྱུང་ལ། ལྷག་པར་ཁ་སང་གཞི་ནས་ཁོང་གིས་དངོས་སུ་བྲིས་པའི་《དབང་མེད་ཐབས་མེད་དུ་ཕུལ་བའི་གྱེས་ཕྱག》ཅེས་པ་མཐོང་རྗེས་རང་དབང་མེད་པར་མིག་ཆུའི་ཐིགས་པ་རེ་ཡང་གཏོར་དགོས་བྱུང་སོང་བས།    དེ་རིང་འདི་ལྟར་རང་ཉིད་ཀྱི་བསམ་ཚུལ་དང་ལྟ་ཚུལ་ཐར་ཐོར་ཞིག་མི་འབྲི་ཐུ་མེད་དུ་གྱུར་སོང་། སྤྱིར་བཏང་རྩོམ་པ་པོ་ཁོང་ནི་རང་ཉིད་ཆེས་དགའ་སའི་བོད་ཀྱི་ཤེས་ཡོན་པའི་གྲས་ཤིག་ཡིན་ལ། ཁོང་གི་འཆད་པའི་ཡོན་ཏན་དང་རྩོམ་པའི་ཡོན་ཏན་(རྩོད་པའི་ཡོན་ཏན་ལ་ཆ་རྒྱུས་མེད།)གྱིས་བདག་གི་དད་པའི་སྤུ་ལོང་ཆེས་ཆེར་གཡོས་མྱོང་བ་མ་ཟད། ཁོང་གི་ལྷན་སྐྱེས་ཀྱི་རྣམ་དཔྱོད་ལ་ནམ་ཡང་སྨོན་པ་ཤོར་བཞིན་ཡོད། ཡིན་ན་ཡང་། ད་ཐེངས་ལོ་རྒྱུས་ཀྱི་ཉེས་ཅན་དུ་གྱུར་བའི་ཚོགས་པ་གང་ཞིག་གིས་ཁོང་གི་མགོ་ཐོག་ཏུ་འདི་འདྲའི་གནས་མ་ཡིན་པའི་སྐྱོ་གར་འཇིགས་ཡེར་བ་ཞིག་བསྐྱལ་འོང་དུས་ཁོང་གི་ལུས་སེམས་ཀྱི་སྡུག་བསྔལ་ནི་ཇི་འདྲའི་ལྕིའང་། ཁོང་གིས་ཉེས་པ་ཏིལ་འབྲུ་ཙམ་ཡང་བསགས་མེད་པས་སྐྱོར་གར་འདི་ཁོང་གཅིག་པུའི་འཁུར་དགོས་པ་ག་རེ་ཡིན་ནམ། ཡང་གཅིག་བཤད་ན།

བདག་གིས་ནི་ཇི་ལྟར་བསམ་ཅིང་གང་ནས་བལྟས་ཀྱང་རུང་སྐྱོ་གར་འདི་ཁོང་གཅིག་པུའི་ཁུར་དགོས་པ་ཞིག་ཡིན་པ་གཏན་ནས་མ་རྟོགས་ཏེ། འདི་ནི་བོད་མི་རིགས་བྱིངས་དང་ལྷག་པར་བོད་ཀྱི་ཤེས་ཡོན་པའི་སྡེ་ཡི་སྐྱོ་གར་ཞིག་ཡིན་པས།སྐྱོ་གར་འདིའི་ཆ་ཤས་རེ་རེ་ཡང་ཤེས་ཡོན་པ་རེ་རེའི་ཕྲག་ཏུ་འཁུར་དགོས་པའི་ངེས་ཤེས་ཅིག་ང་ཚོ་ཚང་མ་ལ་སྐྱེ་ཐུབ་རྒྱུ་ནི་ཤིན་དུ་ནས་ཀྱང་རབ་ཏུ་གལ་ཆེ་བ་བདག་གིས་སེམས་སོ།།

       མཇུག་མཐར་རྩོམ་པ་པོ་ཁོང་གི་མ་འོངས་ལོ་ཟླའི་ནང་དུ་སྐུ་ཁམས་བདེ་ཞིང་སྐྱིད་ལ་བཞེད་དོན་ལྷུན་འགྲུབ་ཡོང་བའི་སྨོན་ལམ་ལན་བརྒྱར་བཏབས་པ་ཡིན།

 ༢༠༡༣ /༦/ ༡༣   ཉིན་ལན་གྲུ་ནས།