“སྐྱེས་པ་རླབས་ཆེ་ཞིང་འཆི་བ་ལ་གཟི་བརྗིད་ལྡན།”

༼རང་རེའི་བོད་ཀྱི་རྒྱལ་གཅེས་དཔའ་བོ་དཔའ་མོ་ཚོ་ལ་རྗེས་དྲན་ཆེད་དུ་བྲིས་པ།༽

ཚྭ་རུ་མ་ཐབས་མཁས་ཀྱིས་བྲིས།

༡༽ ཁ་སང་།

སྐྱེས་པ་རླབས་ཆེ་ཞིང་འཆི་བ་ལ་གཟི་བརྗིད་ལྡན་ཞེས་པ་ལྟར་ང་ཚོའི་ཕ་ས་ཕ་ཡུལ་ན། མཚམས་འཇོག་མེད་པར་རྒྱུན་མཐུད་དུ་འབར་བཞིན་པའི་མེ་ལྕེ་འདི་དག་བུད་ཤིང་དང་། འབར་སྣུམ་སོགས་ལས་བྱུང་བ་མིན་པར་འདི་དག་ནི། ཕུང་ལྔའི་ཚོགས་ཙམ་ཉིད་དུ་གྲུབ་པའི་རང་རེའི་བོད་མི་ཚོའི་ཤ་ཁྲག་རུས་གསུམ་ཚག་སེར་བསྒྲོན་པ་དང་། ལྷམ་སེར་འབར་བའི་མེ་ལྕེ་ཏག་ཏག་ཡིན་པ་ང་ཚོས་ངེས་པར་དུ་ཤེས་དགོས། ཐེ་ཚོམ་དང་མཚམས་འཇོག་མེད་པར་ལོ་ཟླ་ཉིན་སྦྲེལ་ངང་ང་ཚོའི་ཕ་ཡུལ་གྱི་རྒྱལ་གཅེས་དཔའ་བོ་དཔའ་མོ་ཚོས་འདི་ལྟར་རང་རང་གི་གཅེས་སྲོག་དམར་པོ་ང་ཚོའི་རྒྱལ་ཁབ་དང་མི་རིགས་ཀྱི་ཆེད་དུ་ཕུལ་དང་འབུལ་བཞིན་པ་ནི། ང་ཚོ་བཙན་བྱོལ་ཕྱི་ཡུལ་ན་ཡོད་པའི་སྒེར་དོན་དང་། རང་གཅེས་ལ་འཇོན་པའི་བོད་པ་ཚོར་ཁ་བཤད་དོན་ཐོག་ཏུ་ལག་བསྟར་དགོས་པའི་ལམ་སྟོན་དང་སྣེ་ཁྲིད་གནངས་པ་ཞིག་ཡིན་ཞིང་། རང་དོན་ལས་གཞན་དོན་དང་སྒེར་ལས་སྤྱི་གཙོ་བོར་འཛིན་པའི་ཀུན་སྤྱོད་རྣམ་དག་དགོས་པའི་མིག་དཔེ་གསོན་པོ་ཞིག་ཀྱང་གསར་བཏོད་གནང་བཞིན་པ་རེད།

ཡིན་ཡང་ང་ཚོ་བཙན་བྱོལ་གཞུང་མང་གཉིས་ཀྱིས་ཕ་ཡུལ་བོད་ནས་ལུས་སྲོག་གིས་མེ་མཆོད་ཕུལ་ཐེངས་རེར་ཕྱི་ཡུལ་ནས་ཞག་སྒྲོན་གྱི་མཆོད་མེ་རེ་སྦར་ནས་སྡོད་པ་ལས་རྒྱལ་སྤྱི་དང་། འཛམ་གླིང་མི་སྡེ་ཡོངས་ལ་གོ་བརྡ་འཕྲོད་པའི་ཛ་དྲག་གནས་ཚུལ་གྱི་གསར་འགྱུར་ཁྱབ་བསྒྲགས་དོན་དང་མཐུན་པ་ཞིག་ཀྱང་ད་བར་བྱེད་ཐུབ་ཀྱི་མེད། ད་དུང་ཡང་འདི་ལྟར་སྡོད་པ་ལས་ཆེད་དམིགས་ཀྱིས་ལས་འགུལ་ཅི་ཡང་མི་བསྒྲུབ་པར་ངེས་ཏེ། ང་ཚོ་བཙན་བྱོལ་གཞུང་མང་གཉིས་ཆ་ལ་ཡང་ཕ་ཡུལ་གྱི་རྒྱལ་གཅེས་དཔའ་བོ་གཅིག་གི་ལྷག་བསམ་དང་གཞན་གཅེས་ཀྱི་བསམ་སྤྱོད་མེད་པས་སོ། །

ཕྱི་ཡུལ་ན་ང་ཚོ་བཙན་བྱོལ་བོད་པ་ཚོས་འཇོན་པ་ནི། རང་གི་རྒྱལ་ཁབ་དང་མི་རིགས་ཀྱི་མ་འོངས་པའི་ཆེད་དུ་ལུས་སྲོག་ལོངས་སྤྱོད་དང་བཅས་པ་ཡོད་ཚད་ཀྱི་ཡོད་ཚད་འབུལ་ཐུབ་ཀྱི་མེད་པར་རང་གི་ཁྱིམ་ཚང་དང་། ཕྱི་ཡུལ་ནས་ཕྱི་ཡུལ་དུ་བསྐྱོད་རྒྱུའི་སང་ཉིན་གྱི་རང་དོན་ཆུང་ངུ་ཞིག་གི་ཆེད་དུ་ཡོད་ཚད་ཀྱི་ཐམས་ཅད་བློས་གཏོང་ངང་རྒྱུག་གིན་ཡོད་ཅིང་། ཕ་ཡུལ་གྱི་རྒྱལ་གཅེས་སྤུན་ཟླ་དཔའ་བོ་དཔའ་མོ་ཚོའི་དཔའ་མཛངས་ཀྱི་བསམ་སྤྱོད་ལྟ་བུ་ནི། ང་ཚོ་བཙན་བྱོལ་བོད་པ་ཕལ་ཆེ་བའི་བསམ་བློར་འཁོར་མྱོང་ཙམ་ཡང་མེད་ཟེར་ནས་བཤད་ཆོག་པར་སྙམ།

རྒྱུ་མཚན་ནི། ང་ཚོ་བཙན་བྱོལ་བོད་པ་མང་ཆེ་བར་རང་དོན་དང་རང་ཉིད་གཅིག་པུ་ལས་གཞན་དོན་དང་། མང་ཚོགས་ཀྱི་ཆེད་དུ་ལས་ཀ་བསྒྲུབས་མྱོངས་མེད་ཅིང་། གཞན་ཕན་གྱི་ཆེད་དུ་བསམ་བློ་ཙམ་ཡང་གཏོང་ཁོམ་མེད་པས་རེད།

ངོ་མ་བཤད་ན། རྒྱལ་གཅེས་དཔའ་བོ་དཔའ་མོ་ཁྱེད་ཅག་གིས་ང་ཚོའི་ཆེད་དུ་འདི་ལྟར་རང་ཉིད་བློས་གཏོང་བྱས་པ་འདི་འདྲ་ནི། ང་ཚོས་ང་ཚོ་རང་ཉིད་སྒེར་གྱི་ཆེད་དུ་ཡང་བསྒྲུབ་མི་ཐུབ་པར་མ་ཟད་བསམ་ཡང་མི་ཕོད་པར་ངེས་སོ། །

༢༽ དེ་རིང་།

དེ་རིང་ད་དུང་ཡང་མུ་མཐུད་དུ་ཕ་ས་ཕ་ཡུལ་ན། འདི་ལྟར་རང་བདེ་དང་རང་ཉིད་དབུས་སུ་འཛིན་པའི་བསམ་སྤྱོད་ཡོངས་སུ་དོར་ནས། རང་གི་ཡོད་ཚད་གཞན་ཕན་དང་གཞན་དོན་དུ་བློས་གཏོང་གནང་བཞིན་པའི་རྒྱལ་གཅེས་དཔའ་བོ་དཔའ་མོ་ཚོས་ང་ཚོ་བོད་དང་། བོད་པའི་སང་ཉིན་གྱི་ཆེད་དུ་དྲག་གནོན་དང་། མེ་མདའི་རྩེ་མོ་ནས་རང་གི་གཅེས་སྲོག་དམར་པོི་མེ་རུ་སྦར་བཞིན་བཞུད་དང་། བཞུད་ཀྱིན་ཡོད་པ་ལ་ཞིབ་ཏུ་ཇི་ལྟར་ཅིའི་ཕྱིར་ཁོང་ཚོས་རང་ལུས་མེ་རུ་སྲེག་གིན་ཡོད་པར་བསམ་གཞིགས་རྣལ་མ་ཞིག་ཐོངས་དང་། གལ་སྲིད་སེམས་པ་རྡོ་ལས་མ་གྲུབ་ཅིང་། དྲན་ཤེས་རྣལ་དུ་གནས་པའི་མི་ཞིག་ཡིན་ཕྱིན། ང་ཚོའི་སེམས་ལ་ཧང་སངས་པ་དང་། བཟོད་དཀའ་བའི་ན་ཟུག་གི་ཚོར་བ་འབར་བཞིན་ཕངས་སེམས་ཆེན་པོ་རེ་མི་སྐྱེ་བ་ག་ལ་སྲིད།

ཡིན་ཡང་ང་ཚོའི་བཙན་བྱོལ་སྤྱི་ཚོགས་ནང་ང་ཚོ་ལས་ང་གཙོ་བོར་འཛིན་པའི་བསམ་སྤྱོད་ཉིན་རེར་བཞིན་ཤུགས་ཆེ་ནས་ཆེ་རུ་འབར་བཞིན་ཡོད་པས། འདི་ལྟའི་རང་རེའི་རྒྱལ་གཅེས་པ་ཚོའི་ཕུལ་དུ་བྱུང་བའི་རླབས་ཆེན་གྱི་བྱས་རྗེས་ལ་དོ་སྣང་ཙམ་ཡང་མེད་པར་རང་དོན་རང་གཅེས་ཀྱི་ན་ཟུག་མ་ཐེག་པར་འཛམ་གླིང་གི་ས་ཆ་གང་སར་མེད་མུག་གི་ངུ་དབྱངས་འཐེན་ཞོར་སྤྲང་ཕོར་གནམ་ལ་བཟེད་ནས་སྡོད་མཁན་ཧ་ཅང་མང་བར་སེམས་སོ། །

༣༽ སང་ཉིན།

ང་ཚོ་གཞིས་བྱེས་ཀྱི་བོད་མི་ཡོངས་ཀྱིས་ནམ་ཡང་བརྗེད་མི་སྲིད་པ་དང་མི་ཆོག་པ་ནི། ང་ཚོའི་རྒྱལ་ཁབ་དང་མི་རིགས་ཀྱི་སང་ཉིན་གྱི་ཆེད་དུ་སྐྱེས་པ་རླབས་ཆེ་ཞིང་འཆི་བ་ལ་གཟི་བརྗིད་ལྡན་པའི་ང་ཚོའི་སྙིང་དབུས་ནས་ཆེས་བཀུར་བར་འོས་པའི་རྒྱལ་གཅེས་དཔའ་བོ་དཔའ་མོ་ཁྱེད་ཚོ་ཡིན་ཞིང་། ཁྱེད་ཚོ་ནི་དུས་རབས་ཤིག་གི་དཔའ་བོ་དང་རྒྱལ་ཁབ་ཅིག་གི་དཔའ་བོ། མི་རིགས་ཤིག་གི་དཔའ་བོ་ཡང་ཡིན་པས། ཁྱེད་ཚོ་ལ་དཔའ་མིང་སུམ་རྩེག་ནས་དགུ་རྩེག་ངང་ང་ཚོའི་ཡབ་མེས་ཀྱི་འོད་སྟོང་འབར་བའི་ལོ་རྒྱུས་ནང་གསེར་བྲིས་སུ་བྲིས་ཡོད་ལ། ང་ཚོའི་བློན་པོ་མགར་སྟོང་བཙན་དང་སྟག་སྒྲ་ཀླུ་གོང་། མཛངས་པའི་མི་བདུན་སོགས་ཡབ་མེས་རྒྱལ་གཅེས་པ་དག་གི་རླབས་ཆེན་བྱས་རྗེས་བཞག་པའི་རྗེས་དྲན་རྡོ་རིང་ངོས་སུ་ཡང་ཁྱེད་ཚོའི་མིང་ཡིག་གསལ་བོ་རུ་བརྐོས་ཟིན་ཡོད།

ཁྱེད་ཚོའི་ཡོད་ཚད་ང་ཚོའི་ཆེད་དུ་འདི་ལྟར་ཕུལ་ནས་བཞུད་དང་བཞུད་ཀྱིན་ཡོད་པས། ང་ཚོས་དུས་གཏན་དུ་ཁྱེད་ཚོ་ནི་རང་རེའི་རྒྱལ་ཁབ་ཀྱི་གངས་སེང་གིས་མཚན་པའི་རྒྱལ་དར་གྱི་ཆེན་པོའི་གཟི་མདངས་སུ་ཤར་ནས་མཁའ་དབྱིངས་སུ་ལྷབ་ལྷུབ་ངང་བསྐྱོད་བཞིན་ཡོད་ཅིང་། སེངྒེ་ཁ་སྤྲོད་ཀྱི་ང་ཚོའི་རྒྱལ་རྟགས་ཀྱི་གཟི་བརྗིད་ངོ་མ་དེ་ཡང་ཁྱེད་ཚོ་ཁོ་ན་ཡིན།

ཁྱེད་ཚོ་འདི་ལྟར་ལྷག་བསམ་གྱི་སྙིང་སྟོབས་ཆེན་པོ་ཞིག་དང་མེ་ལྕེ་ཆེན་པོ་ཞིག འབོད་སྒྲ་ཆེན་པོ་ཞིག་དང་བཅས་ང་ཚོའི་མིག་སྔུན་ནས་བཞུད་སོང་ན་ཡང་། ང་ཚོའི་མི་རབས་ནས་མི་རབས་བར་ང་ཚོའི་སེམས་ནང་ནས་དུས་ནམ་ཡང་བཞུད་མི་སྲིད་དོ། །

ད་དུང་ཁྱེད་ཚོའི་བླ་ན་མེད་པའི་བཀའ་དྲིན་གྱིས་ད་ལྟའི་དུས་སུ་ང་ཚོ་གཞིས་བྱེས་བོད་མིའི་སེམས་པ་ལྷན་དུ་མདུད་ནས་འཕར་ལྡིང་དང་འཕག་འཚག་ཅིག་ཅར་ངང་བྱེད་དུ་བཅུག་ཅིང་། ང་ཚོའི་ཆོལ་ཁ་གསུམ་གྱི་བོད་པ་ཚོ་ཡང་ཆོལ་ཁ་གཅིག་ཏུ་བྱས་སོང་། མ་ཟད་ང་ཚོ་བོད་པའི་མི་རིགས་དང་ས་ཆ་ལ་རང་གི་རིགས་ལ་ཞེན་པ་དཀར་པོ་ངོ་མ་ཞིག་དང་། རང་གི་རྒྱལ་ཁབ་ཀྱི་རྒྱལ་མཚམས་ལའང་ཐིག་གསལ་བོ་ཞིག་བྲིས་བྱུང་།

ད་དུང་ཕ་ས་ཕ་ཡུལ་གྱི་གྲི་མདུང་གི་རྩེ་མོ་ནང་ལ་སྐོར་བའི་འཁྲུགས་རྩོད་ཡ་ང་བ་དེ་ཡང་གློ་བུར་དུ་འཇགས་ནས། རང་རེའི་མདོ་དབུས་ཁམས་གསུམ་གྱི་བོད་མི་ཡོངས་ལ་བོད་ཟེར་བའི་མིང་ཡིག་འདི་ང་ཚོའི་ཡབ་མེས་ཚོའི་ཚེ་སྲོག་གིས་བྲིས་པའི་མིང་ཡིག་ཅིག་ཡིན་པར་ངོ་ཤེས་པར་བྱས་ཤིང་། མིང་ཡིག་འདི་ཉིད་ང་ཚོས་ཀྱང་ཚེ་སྲོག་གིས་སྲུང་སྐྱོབ་བྱ་དགོས་པར་ངོ་སྤྲོད་བྱས་སོང་།

ང་ཚོ་གཞན་ཡུལ་ན་གྱར་པའི་བོད་པ་ཚོར་ཡང་ལོ་ངོ་ལྔ་བཅུ་ལྷག་གི་རིང་རང་རང་གི་སྒེར་དོན་གཙོར་སྒྲུབ་བྱེད་བཞིན་པའི་རང་གི་བསམ་སྤྱོད་སྐྱུག་བྲོ་བ་དེར་འགྲིག་མིན་བསྐྱར་ཞིབ་ཅིག་དགོས་པར་དྲན་གསོ་བྱས་སོང་ལ། ཁ་བཤད་ཁོ་ན་ལས་ལག་ལེན་མེད་པའི་ང་ཚོའི་དཔོན་རིགས་སྐུ་ངོ་ཚོར་ཡང་བཤད་མཁས་པ་གཅིག་པུས་མི་ཆོག་པར་ང་ཚོའི་རྩ་དོན་ཐོག་འཕག་འཚག་རྒྱག་དགོས་པའི་སློབ་གསོ་བྱས་སོང་།

ཐ་ན་ཁྲོམ་སྲང་ན་གཅེར་ཉལ་བྱེད་བཞིན་པའི་རང་རེའི་བོད་པ་ཐ་མག་ནག་པོ་འཐེན་མཁན་དང་། ཆང་གིས་བཟི་བོ་ཚོས་ཀྱང་གཅིན་པ་སྒྱིད་ཁུག་ལ་འཛར་ཞོར་ཁ་ནས་Free Tibet (བོད་རང་དབང་།)ཟེར་ནས་ངར་ཤུགས་གསར་པ་ཞིག་འཕར་དུ་བཅུག་སོང་ལ། རང་གི་ཉིན་རེའི་འཚོ་བ་དང་ཕུགས་འདུན་ཡོད་ཚད་བོད་དང་། བོད་པའི་མིང་བྱང་འོག་ནས་འཚོ་ཞིང་། ཆབ་སྲིད་གར་སྟེགས་ཐོག་ན་འབར་བཞིན་པའི་སྐབས་འཚོལ་ཆབ་སྲིད་པ་ཚོས་ཀྱང་བདེན་རྫུན་སྣ་ཚོགས་བསྲེས་པའི་བོད་དང་། བོད་པའི་དེང་སྐབས་ཀྱི་གནས་ཚུལ་སྣ་ཚོགས་ར་མ་ལུག་གི་སྐད་ཆ་བཤད་ཀྱིན་འཛམ་གླིང་གི་རྒྱལ་ཁབ་གང་སར་རླུང་འཕྲིན་དང་། བརྙན་འཕྲིན་སོགས་བརྒྱུད་ལམ་སྣ་ཚོགས་ནང་སྐད་འཛེར་འཛེར་ངང་འབོད་རྒྱངས་སྒྲོག་ཏུ་བཅུག་སོང་།

མདོར་ན་ཁྱེད་ཚོས་རང་གི་ཡོད་ཚད་ང་ཚོའི་ཆེད་དུ་འདི་ལྟར་སྦར་ཞིང་འདི་ལྟར་ཕུལ་དུས། ང་ཚོ་བོད་མི་ཡོད་ཚད་གཉིད་ལས་སད་དུ་བཅུག་ཅིང་། ང་ཚོའི་རྨི་ལམ་ནང་གི་བོད་དང་བོད་པ་དེ་ཡང་རྨི་ལམ་ཞིག་མིན་པ་ཚོར་དུ་བཅུག་སོང་།

དུས་གཏན་དུ་རླབས་ཆེན་གྱི་ལོ་རྒྱུས་མི་སྣ་རུ་བཀུར་འོས་པའི་རང་རེའི་རྒྱལ་གཅེས་དཔའ་བོ་དཔའ་མོ་ཁྱེད་ཚོ། ང་ཚོས་དུས་ནམ་ཡང་བརྗེད་མི་སྲིད། ང་ཚོས་ཁུ་ཚུར་གནམ་ལ་བསྒྲེངས་ནས་བོད་རྒྱལ་ལོ་ཟེར་དུས་ཁྱེད་ཚོ་དྲན་ངེས་ལ། ང་ཚོས་ཐལ་མོ་སྙིང་གར་ཟུམ་ནས་གསོལ་བ་སྨོན་ལམ་འདེབས་དུས་ཀྱང་ཁྱེད་ཚོ་དྲན་ངེས་ཡིན། ཁྱེད་ཚོས་འདི་ལྟར་ང་ཚོའི་རྒྱལ་ཁབ་དང་མི་རིགས་ཀྱི་ཆེད་དུ་རང་ཉིད་མེ་རུ་བསྒྲོན་ཞིང་མེ་རུ་འབར། མེ་རུ་ཚིག་ནས་མེད་པར་གྱུར་པ་ང་ཚོས་དུས་གཏན་དུ་བརྗེད་མི་སྲིད་དོ།། །།

ཕྱི་ལོ་ ༢༠༡༢ ༢ ༡༨