རྔ་བ་ཀུན་བཟང་།
དེ་རིང་ང་རང་གཅིག་པོ་ཁ་ཁུ་སིམ་པོར་སྐོར་ལམ་གྱི་རྐུབ་བཀྱག་བདག་མེད་སྟེང་དུ་བསྡད་དེ་ལམ་འགྲོ་དག་ལ་ཞིབ་པར་བལྟས། སྐོར་ལམ་སྟེང་དུ་འགྲོ་མཁན་འགྲུལ་པ་རྣམས་ཀྱི་ལག་ཏུ་ཉི་གདུགས་དང་ཕྲེང་བ་འཁྱེར་བ་དང་། ནད་ཡམས་ལ་དོགས་ནས་ཁ་ལག་ཚང་མ་བཏུམས་ཏེ་ལམ་དུ་འགྲོ་བས་ངོ་ཡང་མི་ཤེས།
ནམ་རྒྱུན་ཡིན་ན་མི་རྣམས་ཀྱི་སྐད་ཆ་བཤད་པ་དང་རྩེད་མོར་རོལ་ཏེ་སྐོར་ལམ་ཧྲིལ་པོ་དགོད་སྒྲས་ཁེངས་ལ། ཁང་པའི་ནང་དུ་འཛུལ་ནས་སྡུག་སྒོམ་རྒྱག་པ་དང་ལམ་ཁ་འདི་ནས་མི་ཚང་མར་དོགས་སྣང་ངང་འགྲོ་ག་ལ་དགོས་ཨང་།
འདི་ལོའི་རྒྱུན་གཏན་མིན་པའི་འཚོ་བ་ལ་བལྟས་ཏེ་ལོ་ན་བགྲེས་པའི་པྭ་ལགས་དང་རྨོ་ལགས་རྣམས་ཀྱིས་མགོ་བོ་འཕྲེད་དུ་གཡུག་ཏེ་དབུགས་རིང་གཏོང་ནས་འགྲོ་བའི་ཚོར་སྣང་གྲང་ཤུར་ཤུར་ཞིག་བྱུང་བ་དང་། འདས་པའི་དུས་ཀྱི་གཏམ་རྒྱུད་མང་པོ་ཡིད་ལ་ལྷམ་མེར་འཆར།
སྐབས་དེ་དུས་ཧ་ལམ་ང་ལོ་ལྔ་དྲུག་ཙམ་ཡིན་ན་ཐང་། ཟ་འཐུང་མ་གཏོགས་མི་དྲན་མཁན་གྱི་བྱིས་པ་ལྐུགས་རྟགས་ཚ་བོ་ཞིག་ཡིན།དོན་དུ་ཁོ་ཚོས་དེ་ལྟར་བཤད་པ་རྒྱུ་མཚན་ཡོད་དེ། ང་ག་དུས་ཡིན་རུང་ཚར་རྒྱུ་མེད་པའི་ཟས་སྣ་ལ་དགའ་ལ། བྱིས་པ་གཞན་ཚོ་ལྟར་གོང་ཚད་ཆེ་ཆུང་དང་བཟང་ངན་ཡང་ངོ་མི་ཤེས། ཨ་ཡེ་མཉམ་ཏུ་སྐོར་བ་འགྲོ་དུས་ནམ་ཡིན་ན་ཁོག་ན་འབབ་རྒྱུའ་མེད་པའི་ཟས་རིགས་ཙག་ཙིག་རགས་ཐབས་ཙམ་མ་གཏོགས་གཞན་གང་ཡང་དྲན་རྒྱུ་མེད།
ཨ་མདོ་རྔ་བའི་ཡུལ་ན་དེ་རིང་ཁ་སང་ཡང་ལོ་ལྟར་དགུན་སྣང་ལ་ཟླ་བ་གཅིག་གི་རིང་ལ་སྐོར་ཚད་ཞེས་ལེན་ཡ་ཞིག་ཡོད། ཀློག་པ་པོ་རྣམས་ཀྱི་ཡུལ་ལུང་ན་དེ་འདྲ་ཡོད་པ་དྲན་གྱི་འདུག་གམ། སྐོར་ཚད་ལ་འགྲོ་མྱོང་ངམ། དྲན་འཛིན་དུ་གསལ་བའི་བྱིས་སྒྲུང་ཡོད་དམ།
བདག་ཀྱང་ཨ་ཡེ་དང་མཉམ་དུ་དགོན་པའི་མཆོད་རྟེན་ལ་སྐོར་ཚད་ལེན་བར་འགྲོ་གི་ཡོད། བྱིས་པ་ནི་བྱིས་པ་རང་རེད། སྐོརལམ་གྱི་ཐལ་བའི་དཀྱིལ་ནས་རྩེད་མོ་ལ་རོལ་ནས་སྐོར་བ་ཟེར་བ་གང་ཡིན་མིན་ལ་ཁ་ཡ་བྱེད་ཁོམ་མེད། དྲང་པོ་བརྗོད་ན། སྐབས་དེ་དུས་སློབ་གྲྭ་ལ་འགྲོ་མཁན་རེ་འགའ་ལས་མེད་པས། སྐོར་ལམ་ནི་བྱིས་པའི་རྩེད་ར་ཆེན་པོ་ཞིག་ཡིན་པས། ཁྱིམ་བདག་ཕ་མ་རྣམས་ལ་དལ་དལ་ལྷོད་ལྷོད་དང་། བློ་བདེ་བག་ཕེབས་ངང་ནས་དགེ་བ་སྒྲུབ་པའི་སྐལ་བ་ཡག་པོ་ཞིག་བྱུང་ཡོད་མེད་བཤད་དཀའ། གང་ལགས་ཤེ་ན། ཁོ་ཚོའི་བྱིས་བཞི་ལྔ་ལ་ལྟ་ཞོར་དང་བྱིས་པ་རེ་འགའ་ཟླ་གཅིག་ལས་ཟིན་མེད་ཀྱང་།སྐོར་ལམ་གྱི་ཟུར་ལ་བཞག་ཡོད་པ་ཧ་ཅང་མང་།
དེ་རིང་དེ་ལྟར་སྐོར་ལམ་ལ་ཞིབ་པར་བལྟས་ན། བྱིས་པ་ཞིག་གི་གྲིབ་གཟུགས་ཙམ་ཡང་མཐོང་ས་ན་མེད། མ་གཞི་ནར་མ་སོན་པའི་ཕྲུ་གུ་ཉུང་དྲགས་བ་དང་། ཡང་ན་ཤེལ་དམ་ནང་དུ་བླུགས་པའི་མེ་ཏོག་ལྟར་ནང་ལ་ཡོད་ན་ཐང་། གང་ལྟར། སྐོར་ལམ་འདི་ན་དྭངས་གཙང་ལྷད་མེད་པའི་བྱིས་པ་དང་། དགོད་སྒྲའི་ཁེངས་བའི་མི་ཧ་ཅང་ཉུང་བས། རང་ཉིད་གཅིག་པོ་མྱ་ངན་ཐང་དཀྱིལ་དུ་ལུས་སོང་བའི་སྣང་བ་རབ་རིབ་ཞིག་བྱུང་ཐལ།
ཕྱི་ལོ་2021ཟླ་བ་8ཚེས་3གི་ཞོགས་པ་དུས་ཚོད་8:པ་ཙམ་ལ་རྡ་སའི་སྐོར་ལམ་ནས་བྲིས།