སྐུ་ཞབས་སེང་རྡོར་གྱིས་བདག་གི་འབེལ་རྩོམ་གསར་མའི་འབྲི་ཐབས་བླངས་པ།

ཤེད་བུ།

བདག་གིས་ད་ལོའི་ལོ་མགོ་ནས་བཟུང་འབེལ་རྩོམ་གྱི་གཞི་སྒྲོམ་མ་འཆོལ་བའི་སྟེང་ནས། འབྲི་སྟངས་གསར་བ་ཞིག་ལ་ཚོད་ལྟ་ལན་མང་བྱས་པ་ཡིན། དེ་ལ་བདག་གིས་ཀློག་དཀའ་བའི་འབེལ་རྩོམ་གསར་མའི་འབྲི་སྟངས་ཟེར་གྱིན་ཡོད། དེ་ནི་ཚིགས་བཅད་གང་ཞིག་ལ། ཚིགས་བཅད་ཀྱི་དབྱངས་འགྲོས་དོར་ཏེ། ཚིགས་ལྷུག་མའི་དབྱངས་འགྲོས་ལ་ཞུགས་པའི་རྩོམ་ལུས་ཤིག་ཡིན་པས། དབྱངས་འགྲོས་ངོས་མ་ཟིན་པའི་མི་དག་གི་ལྕེ་གཅོག་གྲབས་བྱེད་ཀྱང་སྲིད། ཡིན་ནའང་། དབྱངས་འགྲོས་རྙེད་རྗེས་ཆུ་བཞུར་བ་བཞིན་ཁ་ནང་ལ་ལྷུང་ནས་ཡོང་བའི་ཁྱད་ཆོས་ཤིག་ཡོད། མཐར་དེ་ལུགས་ཀྱི་སྙན་ངག་ཉི་ཤུ་ལྷག་བྲིས་པ་ལས་ཐོག་མར་ཚོད་ལྟའི་ཚུལ་གྱིས། འབེལ་རྩོམ་<<ཟླ་འོག་གི་གདུང་བ་>>ཞེས་པ་སྤྱི་ལོ་ ༢༠༡༣ ཟླ་ ༥ ཚེས་ ༢༥ ཉིན་། མཚོ་སྔོན་པོའི་བདག་གི་ཟིན་བྲིས་<<ཤེད་བུའི་གསོན་སྐད་>> (http://blog.amdotibet.cn/kangwod/index.aspx?page=2) ནང་སྤེལ་མོད། དམིགས་བསལ་གྱི་གྲགས་འགུལ་མ་བྱུང་། དེ་རྗེས་རིམ་པར་འབེལ་རྩོམ་<<དོམ་དྲེད་ཀྱི་བརྩེ་བ་>>དང་། འབེལ་རྩོམ་<<བསྐལ་ཆང་མངར་མོ།>> <<དཀར་ཡོལ་ནང་སྐྱག་པ་བཏང་བ།>> <<སྐྱག་པ་སྐྱག་དོང་ལ་གཡུག>> (ཕྱི་མ་འདི་གཉིས་སྙན་ངག་གླེང་སྟེགས་ནང་མ་གཏོགས་སྤེལ་མེད)ཞེས་པ་སོགས་དྲ་ཐོག་དང་སྐད་འཕྲིན་གྱི་བར་སྟོང་སྐར་ཁུང་ནང་སྤེལ་བ་ཡིན་ལ། ངེད་ཅག་གི་སྐད་འཕྲིན་ཚོགས་པ་<<སྙན་ངག་གླེང་སྟེགས་>>ནང་འདིའི་རིགས་ལ་བགྲོ་གླེང་ལན་མང་བྱས་ཤིང་ལྕེ་གཅོག་གྲབས་བྱེད་པ་ལྟར་ཀློག་དཀའ་བ་ལ་ངོས་འཛིན་གཅིག་གྱུར་དང་ཡིད་བརྙན་དང་མཚོན་ཐབས་རྣམ་པའི་སྒྱུ་རྩལ་གྱི་ཆ་ནས་ཚད་མཐོ་བའི་ངོས་འཛིན་བྱུང་། ཟླ་༨ ཚེས་༢༦ ཉིན་བདག་གི་འབེལ་རྩོམ་<<བསྐལ་ཆང་མངར་མོ་>>གྲོགས་གཅེར་བུ་བས་སེང་དྲའི་ནང་བརྒྱུད་འགོད་བྱས་པ་དང་། དེ་ནས་ཉིན་ཤས་ལས་མ་འགོར་བའི་ཟླ་ ༩ ཚེས་ ༣ ཉིན་སྐུ་ཞབས་སེང་རྡོར་གྱིས་བདག་གི་རྩོམ་སྟངས་གསར་བ་དེ་གཞིར་བཞག་ལྟར་<<ལྕེ་གཅོག་པའི་ཚིག་>>ཅེས་པའི་སྙན་ཐུང་ཞིག་བྲིས་འདུག་ལ།  དེ་རིང་སྤྱི་ལོ་ ༢༠༡༣ ལོའི་ཟླ་ ༩ ཚེས་ ༦ ཉིན་སེང་དྲའི་( http://www.sangdhor.com/blog_c.asp?id=12300&a=sangdhor) ནང་སྤེལ་འདུག ད་དུང་འཕྲིན་གྲོགས་ཚོས་ ”འདི་ཁྱེད་ཀྱི་འབེལ་རྩོམ་གསར་མའི་བུ་རེད་” ཟེར་བ་དང་། “འདི་ཁྱེད་ཀྱི་འབེལ་རྩོམ་གསར་མ་དང་ཨེ་འདྲ་གི་”ཟེར་བའི་རྩོམ་ཁ་ཤས་འབྱོར་སོང་ལ། སེང་རྡོར་ལས་གཞན་དག་རྒྱ་གར་གྱི་མཐོ་སློབ་དང་གདན་སར་བཞུགས་པའི་སློབ་གཉེར་བའི་གྲས་རེད། བདག་གིས་ “སྔོན་ཆད་མ་བྱུང་བའང་འདིར་བརྗོད་མེད་” ཅེས་པའི་རྒྱལ་སྲས་ཞི་བ་ལྷའི་སྡོམ་ཚིག་རང་ལ་ངོས་འཛིན་ལས་ངའི་རྩོམ་ལུགས་བརྐུས་སོང་བར་སྙམ་གྱིན་མེད་པ་མ་ཟད། རང་གིས་བཙལ་བའི་རྩོམ་ལུས་འདི་སྤྱི་ཚོགས་ཀྱིས་ངོས་ལེན་བྱེད་སྟངས་ཤིག་དང་རྒྱབ་སྐྱོར་བྱེད་སྟངས་ཤིག་ཡིན་པར་ངོས་འཛིན་བཞིན་ཡོད། ཡིན་ནའང་། རྩོམ་སྟངས་འདི་གསར་རྙེད་ཀྱི་བདག་ཐོབ་གཞན་ལ་ཡོད་ཀྱི་མ་རེད། ལྷག་པར་གཞིས་ཀྱི་གཞོན་སྐྱེས་རྩོམ་པ་པོ་གྲགས་པ་ཅན་ཞིག་གིས་བདག་ལ་རྒྱབ་སྐྱོར་འདི་འདྲ་བྱས་པར་དགའ་བོ་བྱུང་ལ། འདི་ནི་བདག་གི་འབེལ་རྩོམ་གསར་མའི་འབྲི་སྟངས་འདི་ཤོག་ཐོག་ལ་མ་ཡོང་བར་དྲ་ཐོག་ནས་བསྟན་པ་དར་སྟངས་ཤིིག་ཀྱང་རེད་སྙམ། རྩོམ་སྟངས་འདི་ལ་དོ་སྣང་བྱེད་མཁན་མང་ཚོད་གདའ་བས་བདག་གིས་ཀྱང་འབེལ་རྩོམ་དེབ་ཕྲེང་གཉིས་པ་<<སྟོང་བའི་རྐང་མར་>>ནང་ལ་འབྲི་ཐབས་འདིའི་རིགས་ཀྱི་སྡེ་ཚན་ཞིག་བཟོས་ཡོད། གཤམ་འཁོད་གཉིས་ནི་བདག་གི་རྩོམ་སྟངས་འདིའི་རིགས་ཀྱི་འབེལ་རྩོམ་ཐོག་མ་<<ཟླ་འོག་གི་གདུང་བ་>>དང་སེང་རྡོར་གྱིས་བདག་གི་འབེལ་རྩོམ་གསར་མའི་རྩོམ་སྟངས་ལྟར་བརྩམས་པའི་རྩོམ་ཐོག་མ་<<ལྕེ་གཅོག་ཐུབ་པའི་ཚིག་>>ཅེས་པ་གཉིས་རེད།

 ______________________________________

བདག་གིས་འབེལ་རྩོམ་གསར་མའི་རྩོམ་སྟངས་ལྟར་བརྩམས་པའི་རྩོམ་ལས་ཐོག་མར་ཕྱི་ལོགས་སུ་བཀྲམ་པའི་རྩོམ།།

༑ཟླ་འོག་གི་གདུང་བ།

 

ཟླ་འོད་བསིལ་ལ་རླུང་བུ་བསིལ་བསིལ་གཡོ་བའི་དོ་ནུབ། །

གཤིས་ཀ་འཇམ་ལ་ངང་རྒྱུད་གཞུངས་པའི་བུ་མོ་ཁྱོད་བཞིན། །

དལ་བ་དལ་བུར་ལུས་དང་སེམས་ཀྱི་ཟབ་སར་སྨིན་དུས། །

དོ་ནུབ་དངོས་གནས་ང་ནི་ལྷིང་འཇགས་བག་ཕེབས་ངང་ཡོད། །

 

དོ་ནུབ་ལྟ་བུའི་དྲོད་བག་འཛོམས་པའི་མཚན་མོ་རེ་རེར། །

ལང་ལོང་འཁྲིགས་པའི་སྨུག་སྤྲིན་བཞིན་གྱི་བདག་གི་སེམས་པ། །

ཁྱོད་ཀྱི་ཐག་ཉེ་ཐག་ཉེར་བཅར་ཞིང་གདུང་བས་འཚོ་ཡོད། །

བརྙས་བཅོས་འདི་ནི་ལྷ་ཡིས་གནང་སམ་འདྲེ་ཡིས་བྱས་ཡོད། །

 

བརྩེ་བ་ཟེར་བའི་འོད་ཟེར་དེ་ཀོ་དྲན་པའི་རི་བོར་འཕྲོས་དུས། །

དྲན་པ་ཞེས་པའི་གདུང་བ་དེས་ཀྱང་རུས་པའི་རྐང་ལ་རྡེག་སོང་། །

སྐྱིད་ལ་སྡུག་པའི་འཇིག་རྟེན་སྣང་བར་འདི་ལྟར་རྡོག་པ་ལེན་དུས། །

འཚོ་བ་ལས་ཀྱང་མངར་ཆ་ཆེ་བ་བརྩེ་དུངས་འདི་ཀོ་རེད་བཞག །

 

ཟླ་འོད་འོག་ནས་མགོ་བོ་སྨད་དེ་བསིལ་རླུང་ལྡང་བར་བསྒུག་ཀྱང་། །

ཡོམ་ཡོམ་གཡོ་བའི་བསིལ་རླུང་ལས་ཀྱང་བདག་གི་གདུང་བ་མ་སངས། །

བདག་སེམས་གསོ་བའི་བརྩེ་བའི་ཟླ་གཞོན་ཧ་ཅང་རིང་ཞིང་བསྐལ་ཚོད། །

ཚ་གདུག་འོག་གི་མཚན་མོ་འདིར་ཡང་གྲང་རླུང་ངར་པོ་ལྡང་བྱུང་། །

 

སྟོང་བ་ཉིད་ལ་བདེན་པའི་གཟུགས་མེད་སྒྲ་མེད་དྲི་མེད་རོ་མེད། །

བརྩེ་བ་ལ་ཡང་རྟག་པའི་གཟུགས་མེད་སྒྲ་མེད་དྲི་མེད་རོ་མེད། །

བསྟན་པའི་སྙིང་བོ་སྣང་བའི་ཆོས་རྣམས་ཐམས་ཅད་སྟོང་བ་ཉིད་ཡིན། །

དྲན་པའི་སྲོག་དང་སྣང་གཟུགས་སྒྱུ་མའི་གར་དག་སྟོང་བ་ཉིད་ཡིན། །

 

བརྩེ་བའི་འོད་ཀྱིས་བླ་སྲོག་བཀུགས་ཤིང་རང་སེམས་གཅུན་ཏེ་འཛར་བ། །

དྲན་པའི་དུས་ལ་བཟོད་ཐབས་བྲལ་བས་དབང་ཕྱུག་ལྷ་ཡིས་གཟིགས་ཤིང་། །

དུངས་བརྩེའི་ནོར་གྱིས་ཕོངས་པར་གྱུར་པའི་ཉམ་ཐག་བུ་ལོ་སྐྱོབས་དང་། །

མཚན་ནམ་རིང་མོར་དྲན་པས་རྡེག་ཅིང་སྐྱོ་གདུང་ནད་ཀྱིས་གཟིར་ཡོད། །

༢༠༡༣། ༥། ༢༣ ལ།

  ______________________________________

སེང་རྡོར་གྱིས་འབེལ་རྩོམ་གསར་མའི་རྩོམ་སྟངས་ལྟར་བརྩམས་པའི་རྩོམ་ཐོག་མ།

 

༈ ལྕེ་གཅོག་ཐུབ་པའི་ཚིག

 

ངས་རང་གི་ཉལ་ཁང་ནང་གི། །

ཅ་ལག་ག་གེ་མོའི་རྒྱབ་ཏུ། །

སྐད་རིགས་གྲངས་མེད་པ་ཤེས་པའི། །

རྨ་བྱ་ཞིག་བསྐུངས་ཡོད་པར་འདོད། །

ལྷ་སྒྲུང་གི་ལུང་གིས་བསྟན་པའི། །

རྨ་བྱ་དེ་འཕུར་གྲབས་བྱེད་དུས། །

ང་ནི་སྦྱར་དུག་གིས་ཟིན་ཏེ། །

ལག་པ་འདར་འདར་བྱེད་ངེས་མོད། །

ཆུང་མ་ཡི་བསམ་གཏན་དཀྲོགས་པའི། །

རྨ་བྱ་ཁྲ་ལང་ལིང་བ་དེ། །

ཁྱོད་རང་ཚོས་མཐོང་མྱོང་མེད་དེ། །

ངའི་སྐྱེ་བ་གཞུག་མའི་བླ་བྱའོ། །

༢༠༡༣ ༩ ༣

 ______________________________________

བདག་གིས་རྩོམ་ལུགས་འདི་བཞིན་བྲིས་པའི་སྙན་ངག་འགའ་ཟུར་བཀོད།

 དོམ་དྲེད་ཀྱི་བརྩེ་བ།
ཟླ་འོད་ཀྱིས་ཚེས་པའི་ཆར་སྤྲིན་གྱི་མཚོ་མོ། །
བདག་ཁོ་ནའི་གདུང་སེམས་ཆེན་པོ་རུ་ངེས་པས། །
ནམ་ཡིན་ཡང་བདག་གི་དོན་ལྔ་རུ་ཟགས་འོས། །
སྐྱོ་སྐྱོ་དང་སྤྲོ་བས་ཁྱེད་ཉིད་ལ་མ་གནོད། །

སྐྱོ་ངལ་གྱིས་གཟེར་བའི་སེམས་པ་དང་གློ་བ། །
དོན་མེད་དུ་ཁྱོད་ལ་སྦྱར་བ་ཡང་ཐལ་སོང་། །
ཧམ་པ་ཞིག་ཁྱོད་ལ་ཡང་ཡང་དུ་བསྟན་པས། །
ཁྱོད་ཉིད་ཀྱང་ཉོབ་ཐག་ཆོད་པ་ལ་དགོངས་དག །

སྟག་ཤར་རའི་སྣང་བ་ཐེག་མཁན་གྱི་བུ་མོ། །
འཇིག་རྟེན་ལ་ད་དུང་འབྱོན་མེད་ཚོད་རེད་སྙམ། །
གནམ་འོག་ན་བུད་མེད་མེད་སོང་བ་མིན་ལ། །
བོད་ཡུལ་ནི་ཁྱོད་ཚོ་ཡོང་མི་འོས་ས་དེའང་མིན། །

དགའ་དུས་སུ་དགོད་རོགས་ཁོ་ན་ཞིག་ཡིན་ན། །
བུད་མེད་ལགས་རང་གི་གཟུགས་པོ་ལ་བདག་བྱོས། །
སྨྱུ་གུ་ལ་འདྲེས་པའི་ང་རང་ནི་དོམ་དྲེད། །
ནགས་གསེང་ན་རྒྱུ་བ་དེ་འདྲ་ཞིག་ཡིན་སྲིད། །

ཞེ་སྡང་གིས་བརྩེ་བ་སྟོན་མཁན་ལ་ཉོབ་ཀི །
བརྩེ་བ་ནི་ཁྱོད་ཀྱི་ཕྲག་དོག་རང་ཡིན་ན། །
འཇིག་རྟེན་འདི་བརྩེ་བས་སྟོང་ན་ཡང་འོས་བས། །
ངས་ཁྱོད་ལ་རྣམ་ཀུན་ལྟ་སྟངས་དེ་ནོར་འདུག །

དོ་ནུབ་ནི་བདག་ལ་བསིལ་རླུང་ཞིག་མཁོ་བས། །
དོན་ལྔ་བོ་མཉམ་དུ་ཁམས་གསེང་ལ་རོལ་འདོད། །
རྒྱང་རིང་ནས་ང་ལ་མ་བཅར་རོགས་བུ་མོ། །
དོམ་དྲེད་ང་བརྩེ་བའི་གཤིན་རྗེ་རང་ཡིན་ནོ། །

༣༠།༠༨།༢༠༡༣ ཉིན།

 འབེལ་རྩོམ་བསྐལ་ཆང་མངར་མོ།

མིག་ཟུང་སྦྲིད་པ་བཞིན་མུན་པའི་མཚོ་ལས་གསེར་གྱི་ཆུ་བྱ་ཞིག་གདུང་བས་འཕྱོ། །

ཕངས་མེད་ན་ཟུག་གིས་འཕྱུར་བའི་རྒྱ་མཚོ་རླབས་ཀྱིས་རྐུབ་ཤ་དེ་འཁྲུག་པོར་གཡོས། །
མཐོ་བ་གནམ་འདེགས་ཀྱི་གངས་དང་རི་བོ་ཞོགས་ནས་མཚོ་མོ་ལ་བརྡབས་ཤིང་རྡེག །
རང་བྱུང་ཁམས་ཆེན་པོར་འདྲེས་ཤིང་འཛིང་བའི་ཁྱོད་རང་རྟ་རྒོད་ཀྱི་རྨིག་རྡུལ་ན། །

རྐང་པ་སྤྲུག་ཙམ་ནས་རླབས་ཞགས་དགུང་དུ་སྐྱོམ་པར་སུ་ཞིག་གིས་རོལ་བར་འགྱུར། །
ཁྲག་རྟགས་ལ་འཐིམ་པའི་ལག་ཟུང་ཤུགས་ཀྱིས་མ་གནོན་འཕག་འཚག་གིས་གདུང་ཞིང་གཟེར། །
བྱེ་ལྗོངས་རྐང་རྗེན་དུ་གཤག་པའི་གདུང་བ་མ་གསང་སྤོབས་སེམས་ཀྱི་མགོ་བོ་དེ། །
བགྲོད་པར་དཀའ་བ་ཡི་གངས་དང་མཚོ་དང་བྱེ་མའི་ཐང་ཆེན་དང་སྤྲིན་པ་རེད། །

མཐུ་སྔགས་ཀྱིས་ཟོས་པའི་ཆོས་པ་ཧམ་པ་ཅན་ཀྱི་བློ་ངོ་ལ་ཤོང་དཀའ་བ། །
མིག་ཤེལ་ལ་གྱུར་བའི་མི་བོ་གོང་འོག་དག་གི་བློས་བསླངས་ལས་བརྒལ་བ་ཡི། །
ཚོར་བའི་གཏིང་མ་རུ་བསྙལ་བའི་བསྐལ་ཆང་འཁྲུག་པོ་འདམ་འབག་དང་ལྷན་དུ་བཏོན། །
སྙན་ངག་ལ་གྱུར་བའི་སྣང་བརྙན་བསྐལ་བར་བསྙལ་བའི་ཝུ་ཆང་དེས་བཟི་བ་འདྲ། །

རྟ་རྒོད་ཐོང་འོག་ནས་ཞོགས་ཀྱང་འཕྱོ་བའི་གར་གྱི་རང་དབང་ལ་ཞོན་ཏེ་ཤོག །
གནམ་གྱི་ཕྱེད་ཀ་རུ་སྨྲ་བའི་ལུགས་སྲོལ་རལ་བའི་གསེར་བྱ་ཁྱོད་མཐོང་ཙ་ན། །
གཤོག་པ་གཟེང་བ་ཡི་ཐང་ནག་འཕུར་རྩལ་ཆེ་བ་གནས་དེ་རུ་འགྱེལ་གྱིན་པས། །
པི་ཝང་ཆག་རོ་ཞིག་ཉམས་ཀྱིས་བརྡར་བའི་ལྷ་མོ་འོད་ཟེར་ཅན་ལ་སུ་ཞིག་ཕྱོགས། །

རྐང་བ་བརྡབས་ཙ་ན་སྨྱོས་པར་འགྱུར་བའི་སྨུག་རྡུལ་ཐོལ་བྱུང་དུ་ལངས་ལགས་སམ། །
གྲོད་པ་ནུབ་པ་ཡི་སྐྱེས་པ་དེ་ལ་འཁོར་གསུམ་རྐུབ་གཡུག་གིས་བསྐོར་ཙ་ན། །
ཁྱོད་ཀྱིས་སུ་ཞིག་གི་ལག་པར་ལྕགས་འཛེར་བརྡབས་པ་ཕྱི་མ་དང་གང་ལ་གསང་། །
བསྐྱར་དུ་ནམ་མཁའ་རུ་བརྗེད་ཐབས་བྲལ་བའི་མི་སྐད་འཇིག་རྟེན་ལ་འགྲིམ་ངེས་སམ། །

གནས་ས་ངེས་མེད་དུ་དབུགས་དང་བྲལ་བའི་གར་བ་སྣ་ཚོགས་ཤིག་ཁྲིད་དེ་ཤོག །
རི་བོ་མཐོན་པོ་དང་བྱེ་མའི་ཐང་ཆེན་བརྒྱུད་དུས་སུ་ཞིག་ནི་དེ་དག་རེད། །
ཁྱེད་ཀྱིས་དེ་དག་ལ་སྨྲ་བ་སྦྱིན་ཞིང་སྲོག་དབུགས་ཕངས་མེད་དུ་སྩོལ་དོན་ཡང་། །
འཇིག་རྟེན་བཞེངས་པ་ལ་རྐང་ལག་བཞི་རྐྱོང་བྱེད་པ་སྡུག་གྱོང་དུ་བལྟས་ལགས་སམ། །

བརྩེ་བ་ང་ལ་སྤྲོད་མཚམས་སྤྲིན་ཞུགས་པའི་ལང་ཚོ་འོད་ཟེར་གྱི་བདག་རང་ཡིན། །
སྡིགས་པ་ང་ལ་སྤྲོད་བཙོག་པར་གྲུབ་པའི་འདམ་རྫབ་བརྩེ་བ་ཡི་བསྐལ་ཆང་ཡིན། །
གསེར་གྱི་ཆུ་བྱ་ལགས་རི་དང་ཀླུང་ཁམས་བཅས་པའི་རང་བྱུང་ཁམས་སྩོལ་རོགས་ཞུ། །
འཁོར་བ་སུ་ཞིག་གིས་མ་བྱས་མ་གྲུབ་བདག་དང་བརྩེ་བ་ཡི་སྟོང་བ་དེའོ། །

༢༥།༠༨།༢༠༡༣ ཉིན།

 ཟླ་མཚན་གྱིས་གཤེར་བ།

ནམ་མཁའ་དྭངས་ཤིང་ཟླ་འོད་ཀྱིས་ས་གཞི་མེར་བར་གྱུར།།

ང་རང་ག་ལེར་མཚོ་ཆེན་དེས་རླབས་རྒྱུན་གྱིས་ཁྱེར་བྱུང།།
རྨི་ལམ་མིན་པའི་སྟོང་སྣང་གི་དོ་ནུབ་འཇམ་པོ་འདུག
ང་ལ་ཟླ་འོད་ཀྱིས་གཟས་པ་ཁོ་ན་བརྩེ་བ་འོ།།

རླུང་བུ་འཇགས་པས་ས་གཞི་ལ་གདོས་ཚད་འཕར་བར་གྱུར།།
རྒྱང་ཐག་རིང་བོའི་དགོད་སྒྲ་ཡིས་སེམས་ཀྱི་རོལ་མོ་དཀྲོལ།།
ཟླ་འོད་སབ་སིབ་འཕྱོ་བ་ཡི་གར་སྟེགས་ཡངས་ཤིང་ཆེ།།
བརྩེ་བའི་ཡི་དྭགས་སྨུག་པོ་ཁྱོད་བདག་ལ་སྡོངས་གྲོགས་མཛོད།།

མི་དང་ཁྱི་དང་འདབ་ཆགས་ཀྱི་འུར་སྒྲ་འཇགས་པར་གྱུར།།
སུ་ཞིག་རང་དབང་བླ་མེད་ཀྱིས་བདག་གི་མཚོ་མོར་ཞུགས།།
ཡས་དང་མས་ཀྱི་སྟོང་བ་ཉིད་དོ་ནུབ་གཞར་ཡང་མེད།།
ཁྲག་གི་རྩ་འཁོར་གདུས་བྱུང་བ་བདེ་བ་ཆེན་པོ་དེའོ།།

ལུས་དང་ངག་གི་རིག་བྱེད་ལས་འདས་པ་བདེན་པར་སྲིད། །
འོན་ཏེ་ཁྱོད་ཀྱི་མངལ་ལམ་ལ་སྦྲུམ་པ་འདི་ཡོད་ཚད། །
ཉེས་པ་མེད་པའི་གནམ་འོག་གི་གཙང་བོ་དེ་ཡིན་ངེས། །
ཡན་ལག་ཉིང་ལག་དང་བཅས་པ་གཙང་བོར་ཞུགས་སུ་གསོལ། །

ལྷུང་ལྷུང་འབབ་པའི་གཙང་བོ་ཁྱེད་ཡུན་གྱིས་གང་དུ་འབབ། །
རེ་བཞག་ཡོད་ཚད་ཁྱོད་ཉིད་ལས་བདག་ལ་བསྟམས་བྱུང་བས། །
རང་གི་སྣ་ཤེས་ཀྱིས་ཚོར་བའི་ཟླ་འོད་དཀར་མོ་ལགས། །
ཡོམ་ཡོམ་འདར་འདར་བསྐྱོད་པ་ཡི་ཀོ་གྲུར་མཐོང་བར་མཛོད། །

ཁྲག་དང་རྣག་དང་ཁྱིམ་ཕྱགས་ཀྱི་རྡུལ་འཚུབ་དང་བཅས་པ། །
ཐ་མག་རྐང་གཅིག་གི་ཡུན་དུ་བདག་ལ་སྦྲུམ་བྱུང་བས། །
ཁྱོད་ཀྱིས་མགོ་བོ་མི་སྨད་པར་བདག་ལ་ཡི་གེ་ཐོངས། །
ཁྱོད་ལ་རང་གི་སེམས་པ་དང་གློ་བ་བདག་གིར་ངེས། །

ཤཱཀྱ་ཐུབ་པའི་གཞུང་ལུགས་ལ་འདི་ཉིད་གསལ་བ་དང་། །
རང་བྱུང་ཁམས་ཀྱི་སྣང་ཚུལ་ན་ཁྱོད་ཉིད་འགྲེལ་གྱིན་པས། །
ཇ་ཡུན་ཙམ་གྱི་གཏམ་དག་ཀྱང་རླུང་ལ་སྐུར་བར་ངེས། །
གནམ་ལ་བཟེད་པའི་ཉེས་པ་ཀུན་བདག་ལ་སྨིན་གྱུར་ཅིག །

ལམ་ཕྲན་དེ་རུ་ཀ་ཁ་ཡི་དབྱངས་རྟར་གྱུར་བ་དག།
བྱམས་བརྩེའི་ཉི་འོད་ལ་འཇུས་ནས་འཚང་ཁ་རྒྱག་གིན་གདའ།།
གཉིད་མ་སད་ཀྱི་ནམ་མཁའ་ལའང་སྤྲིན་པ་མང་པོ་འདུག
སྔོན་ཆད་སུ་ཞིག་གི་གཉའ་བ་རུ་སྤོབས་པས་ཞོན་པ་དྲན།།

ང་ལ་རང་དབང་མེད་ཀྱང་འཐུས་རྦད་དེ་རྒྱགས་ཐལ་བ།།
ཁྱོད་ཀྱིས་གཅེར་རྒྱན་དམར་ཧྲེང་ལ་ལྟོ་བ་མ་སྟོན་ཀྱེ།།
ང་ལ་ཞོགས་པ་བསིལ་མོ་འདིའི་འཇིད་རྟེན་མཁོ་བར་ངེས།།
སྦྲུམ་མ་མིན་ལ་ཟླ་མཚན་ཡང་བྲལ་བ་དེར་རོལ་དགོས།།

རྩྭ་ལྗང་གི་བསིལ་བ་ལས་འཐུལ་བའི་ལུས་དྲི་བརྗེད་ཐབས་བྲལ།།
བདག་གིས་དངོས་ཡོད་ཚོར་ཤེས་ཀྱིས་རོལ་ཞིང་ཐོབ་པ་འདི།།
བརྩེ་བའི་ལྷ་ཆེན་གྱིས་གནང་བའི་བྱིན་རླབས་ཕྲན་ཚེགས་ཤིག།
འདི་ཙམ་བདག་གིས་སྟབས་གཟར་མོའི་སྐད་ཅིག་མ་དེ་ལའོ།།

༢༢།༠༧།༢༠༡༣ ཉིན།

 

དཀར་ཡོལ་ནང་སྐྱག་པ་བཏང་བ།

 

རྐང་སྣུམ་གྱི་ཁ་ཐག་བཀྲོལ་བ་སྒྱུ་རྩལ་ཞིག་མིན་ཚོད་རེད་དེ། །

དཀར་ཡོལ་གྱི་ནང་ལ་ནན་གྱིས་སྐྱག་རྒན་ཞིག་བཙན་གྱིས་བཙིར་བ། །

སྒྱུ་རྩལ་ལས་རྒྱུ་མ་ཉོག་བྱེད་འབག་སྐུ་ཞིག་གཟེར་བ་འདྲ་བྱུང་། །

རང་ཉིད་ཀྱི་སྣ་བུག་བསུམ་ནས་སྒོར་འགྲོ་བ་དག་ཞིང་རང་རེད། །

 

གནའ་ཞིག་ལ་རྒྱ་གར་བྱེད་པ་སྲིད་གཞུང་གི་ཁ་བྲལ་རེད་མོད། །

སྐྱག་རྒན་དེས་དཀར་ཡོལ་བརྫད་རྗེས་ཉེས་ཅན་ཚོ་དག་སེལ་བྱས་སོང་། །

གནའ་ཤི་དག་རོ་ལངས་བརྒྱབ་ནས་རུལ་མྱགས་ལ་ལག་པ་འཆང་སོང་། །

བསྡད་ཀྱིན་ལ་དྲི་མ་ཁ་དང་ཁོག་ལ་འང་འཐིབས་ནས་སླེབས་སོང་། །

 

སྲིད་གཞུང་གིས་ཇུས་འགོད་མཁན་ཚོས་སྤྱོད་ཁང་ལ་བརྙས་མགོ་ཚུགས་རྗེས། །

ཏག་ཏག་ལ་ཁྱི་ཕྲུག་མགོ་གཟེང་པ་ལགས་ཀྱི་ལག་མགོར་འཐམ་ཏེ། །

དཀར་ཡོལ་ནང་སྐྱག་པ་གཏོང་གིན་སྤྱང་ཀི་དང་འབྲེལ་ལམ་བཙུགས་སོང་། །

ཁྱི་སྤྱང་གཉིས་ལུག་ཤ་ཟ་བར་ཁྱད་པར་ཞིག་གང་ན་ཡོད་ཨང་། །

 

སྐྱག་པ་དང་འདྲེས་པའི་རྩྭ་སྐྱ་ཟ་བ་ལས་ང་རང་འབར་ཆོག །

སྤྱང་ཀི་ལ་གུས་པའི་མགོ་བོ་འདུད་པ་ལས་ང་རང་འབར་ཆོག །

འབྲོང་རྒོད་དང་རྟ་རྒོད་ཐ་ན་ཞོལ་ལུག་བཅས་ཚག་ཚག་འབར་སོང་། །

ཨ་ཕ་ལགས་མེ་ལྕེར་ཧེད་ནས་ཐལ་མོ་ཞིག་བྲང་ཁར་སིམ་སོང་། །

 

ལྟ་གྲུབ་ལ་འགལ་ཟླ་ཤོར་བའི་སྤྱོད་ཁང་འདི་ཆེ་སོང་ཆུང་སོང་། །

གནའ་ཞིག་ལ་ཨ་ཕ་ལགས་ཀྱིས་ཇུས་འགོད་དང་གཙང་སྦྲ་བྱས་མོད། །

ཨ་མ་ལགས་ཁ་དབང་ཆེ་བས་གཙང་ཤོག་རེས་སྐྱག་ཐུམ་བརྒྱབ་རྐྱེན། །

གཙང་ཤོག་ལས་སྐྱག་པ་འཛར་ནས་སྤྱོད་ཁང་འདིའི་བཟོ་ལྟ་འཆོལ་སོང་། །

 

དཀར་ཡོལ་ལས་སྐྱག་པ་ཟ་བའི་ཁྱི་གུ་དག་སྙིང་རྗེ་རང་རེད། །

དཀར་ཡོལ་ལས་སྐྱག་པ་གཙང་ཞིང་དཀར་ཡོལ་ལ་རྣམ་རྟོག་ཟོས་སོང་། །

ཧ་ཧ་ཧ་རྣམ་སྲས་རྟ་བརྒྱད་འཕྱོ་བ་ཡི་མེས་པོའི་གཙང་ཕོར། །

ད་ངོ་མ་འཇིག་རྟེན་འདི་ལ་སྙིང་བོ་ཞེས་ཨེན་ཙམ་གདའ་འམ། །

 

ན་ནིང་ནས་མི་བོ་དག་གིས་སྐྱག་རྒན་རེ་གཏོང་མགོ་ཚུགས་སོང་། །

དཀར་ཡོལ་གྱི་ངོས་དང་ཕྱི་རོལ་ཙམ་ཞིག་ཀྱང་མ་མཐོང་ཁུལ་དུ། །

ཐལ་མོ་དང་ཕྲེང་བ་མཉམ་དུ་དྲི་ངན་དང་བཅས་ཏེ་བཙིར་སོང་། །

རེ་ཞིག་ལ་བདག་ཀྱང་ཧེད་ནས་ནུབ་ཕྱོགས་ལ་དྲི་བ་འདི་བཏང་། །

 

ཁྱི་ཞིག་གིས་སྐྱག་པ་གཏོང་བར་ལོ་མང་ཞིག་དགོས་པ་རེད་དམ། །

ཁྱེད་ཅག་གིས་དཀར་ཡོལ་སྐྱག་པས་སྦང་བཞིན་དུ་ཆབ་སྲིད་སྦྱངས་སམ། །

ནུབ་ཕྱོགས་ལ་རྒྱུ་འབྲས་མེད་པ་ད་དངོས་གནས་ར་སྤྲོད་བྱུང་ཐལ། །
ཤར་ཕྱོགས་ཀྱི་གཙང་བཙོག་རིག་པར་ནམ་ཞིག་ལ་གསར་བརྗེ་བྱས་ལགས། །

 

དེ་ལས་ཀྱང་དྲི་བ་མཚར་པོ་མང་པོ་ཞིག་རིམ་གྱིས་འཁོར་སོང་། །

བརྩེ་དུང་གིས་ཡུལ་སྐད་སྦྱར་བ་དམར་ཕྱོགས་ཀྱི་ལྟ་བ་ཡིན་ལ། །

འགྱིང་ཉམས་ཀྱིས་ཕོར་བར་གཟེར་བ་མང་གཙོ་དང་རང་དབང་རེད་དམ། །

ངས་ངོ་མ་དྲི་བ་འདི་ལ་ལན་བཟོ་ཙམ་རྙེད་པར་མ་གྱུར། །

 

གཟན་ཕབ་ནས་སྐྱག་པ་བཟེད་པའི་དགེ་བཤེས་དེར་དངོས་གནས་མཚར་སོང་། །

སྐྱག་པ་ལ་ངོ་མཚར་ཆེ་བའི་གཞོན་སྐྱེས་དག་སྙིང་རྗེ་རང་རེད། །

ཤེས་འཆལ་གྱི་ང་ཚོ་དོན་ལ་འཇིག་རྟེན་གྱི་ལྟ་ཚུལ་ནོར་ཞིང་། །

རྒྱུ་འབྲས་དང་ཀུན་སྤྱོད་གནད་དོན་བཅས་པར་ཡང་གས་ཁ་ཤོར་ཡོད། །

 

སྐྱིད་པོ་རེད་གསེར་གྱི་ཚིགས་ཁེབས་བྱུར་དམར་གྱི་སྐྲ་ཡི་ལན་བུ། །

གནའ་དཔེ་ལ་འོས་པའི་མི་རིགས་འགྲེམ་སྟོན་ལ་མཁོ་བའི་མི་རིགས། །

ཤེས་རིག་དང་གོ་རྟོགས་མེད་སར་གླེན་རྟགས་ཀྱི་མཚོ་མོ་འཕྱུར་བ། །

སུ་ལ་ཡང་འགྲེལ་བཤད་དགོས་པའི་གནད་དོན་ཞིག་ག་ལ་ཡིན་ཨང་། །

 

ངག་ལྡབ་ལྡིབ་བོད་སྐད་ཨམ་སྐད་འདྲ་བོ་ཞིག་འདི་ལྟར་བཤད་ན། །

ཨ་མ་ཡིས་ཤོག་བུར་གཅུད་པའི་སྐྱག་ཕྲུག་ཚོ་གད་ན་ཐང་ཨང་། །

སྐྱག་པ་ལགས་ཇི་འདྲ་བཙན་རུང་སྤྱོད་ཁང་ལས་གཞན་དུ་མི་མཛའ། །

མེས་པོ་ཡི་གཙང་ཕོར་བརྫད་ན་ཤི་འཛིང་ཞིག་ཡིན་རུང་ལོས་བྱ། །

༢༩།༠༨།༢༠༡༣ ཉིན།

 སྐྱག་པ་སྐྱག་དོང་ལ་གཡུག

 

མི་ལ་དགོས་པའི་བདེ་སྐྱིད་འདི་ཅུང་ཙམ་སྔ་སོང་། །

ཨ་ཕ་ལགས་ཀྱིས་ཕོ་ཚོད་དང་ཤེས་རབ་བཀོལ་ནས། །

ཧི་མ་ལ་ཡའི་འདམ་གཞུང་གི་བ་གླང་དག་ལ། །

ཆེ་ལ་བརྗིད་པའི་བདེ་སྐྱིད་འདི་བསྐྲུན་པ་སྔ་སོང་། །

 

ནུབ་ཀྱིས་མཁས་པ་སོ་ཁོར་ཁྲིར་འོས་འདེམས་བྱས་ཏེ། །

འཇིག་རྟེན་དཀར་ངོགས་ལ་བྲལ་བས་བདག་ཀྱང་ཞེད་སོང་། །

རྣམ་དཔྱོད་ལྐུགས་པའི་སྤྱི་ཚོགས་ལ་བདེ་སྐྱིད་བསྐྲུན་པ། །

སྔ་ཐལ་ཆེ་བའི་མཇུག་འབྲས་ཀྱི་མེ་ཏོག་ཡིན་སྲིད། །

 

མི་སྟེ་རྣམ་དཔྱོད་རྒྱུད་ལྡན་གྱི་སྐྱེ་བོ་དག་གིས། །

ཁྲག་དྲོན་ས་ལ་གཏོར་བཞིན་དུ་འདི་ལ་བསྙབས་མྱོང་། །

ཕྱུགས་སྟེ་བ་གླང་ཁྱུ་ཚོགས་ཀྱིས་འདི་ནི་ངོ་སོ། །

ཕ་ལ་ཕུལ་བའི་དམ་ཚིག་གི་འབྲེལ་བ་ཡིན་ཟེར། །

 

དཀོར་གྱིས་བསྒྱངས་པའི་ཞོལ་གཡག་གིས་ཤུགས་རིང་འཕེན་གྱིན། །

སྤྲང་བོས་སྤྲང་གཞུང་བཙུགས་པ་དེ་བཀྲ་ཤིས་མ་ཡིན། །

ལྟོས་ངན་རྒྱ་འགོང་དར་དུས་སུ་ཕལ་བའི་མི་ཡིས། །

སྡེ་མགོ་ཚོ་མགོ་འཛིན་པ་ལ་ཧབ་ཐོབ་བྱེད་ཟེར། །

 

བ་རྫི་ཁ་བདེ་མགོ་བདེ་ཡིས་ཨ་ཕའི་འཆར་སྣང་། །

རབ་རིབ་གླེན་ཤད་འདྲེས་ཆེ་བས་ནུབ་ལའང་མ་དར། །

ཨེ་ཤ་ཡ་ནས་ལྟ་གྲུབ་ལ་འགལ་ཟླ་ཤོར་སོང་། །

འབོད་སྒྲ་ཡ་བྲལ་དུ་མ་གྱེས་པར་བདེ་སྐྱིད་མེད་ཟེར། །

 

གླེན་ཤད་ཆེ་ལ་རྣམ་དཔྱོད་དང་བླང་དོར་བྲལ་བའི། །

ཧི་མ་ལ་ཡའི་འདམ་གཞུང་གི་བ་གླང་དག་གིས། །

ཕ་ཡི་རྣམ་དཔྱོད་ལྷའི་བྱིན་རླབས་ཉག་གཅིག་ཡིན་པས། །

བསོད་ནམས་གསེར་བྲིས་མ་བོ་འདི་ལྷ་ཡིས་བསྩལ་ཟེར། །

 

བདག་གི་ཨ་ཕའི་རྔུལ་ཆུ་འདི་རྣམ་དཔྱོད་རང་དང་། །

མི་ལོ་བདུན་ཅུའི་དཀའ་སྡུག་གི་འཚོལ་སྙེག་ཅིག་དང་། །

སྤྲང་བོའི་ཕོར་བ་འཆི་མེད་མ་ཁོ་ན་ཡིན་པས། །

དྲི་ངན་འཐུལ་བའི་སྐྱག་པ་དག་སྐྱག་དོང་ལ་གཡུགས། །

 

སྐྱག་པ་གཏོང་བ་རྒྱུན་ལྡན་ཞིག་ཡིན་ཆོག་མོད་ཀྱང་། །

ཕོར་ནང་སྐྱག་པ་གཏོང་བ་ནི་ང་ལ་མཚོན་ན། །

ན་ཟུག་དྲག་པོ་གཏོང་བ་ཡི་སྐྲན་འབུར་ཞིག་སྟེ། །

སྒལ་གཟེར་ཙག་ཙག་བྱེད་པ་ཙམ་གཞར་ཡང་མིན་ནོ། །

 

ཤ་འཁོན་ལྟ་བུའི་ཞེ་སྡང་འདི་ནོར་ཡོད་སྲིད་མོད། །

འབེལ་རྩོམ་སེང་ཆེན་ངར་མ་ཡིས་མ་ཁྲོལ་བ་དང་། །

འབེལ་རྩོམ་དོམ་ནག་སྨྱོན་པ་ལས་རྩུབ་སྤྱོད་ལྡན་པའི། །

གཏན་ཚིགས་འདི་དག་ཤི་སོང་རུང་བཤད་དགོས་པར་བསམས། །

༠༢།༠༩།༢༠༡༣ ཉིན།