ལྷ་སྲས་བསོད་ནམས།
མིང་། བློ་བཟང་ཐུབ་བསྟན།
སྐྱེས་ཡུལ། རེབ་གོང་རྒྱལ་པོ་དཔོན་ཚང་།
ལས་གནས། ཀུན་ཕན་རིག་གནས་སློབ་གྲྭའི་འགན་འཛིན།
སྡོད་གནས། བཞུགས་སྒར་རྡ་རམ་ས་ལ།
ལོ་རྒྱུས་མདོར་བསྡུས།
བློ་བཟང་ཐུབ་བསྟན་ནི། ཕྱི་ལོ་༡༩༨༡ལོར་ཞིང་གཤེགས་བཀའ་ཟུར་ཨ་ལགས་འཇིགས་མེད་རིན་པོ་ཆེ་མཆོག་གི་འཁྲུངས་གཞིས་རེབ་གོང་རྒྱལ་པོ་དཔོན་ཚང་དུ་སྐྱེས་ཤིང་། བོད་ནང་དུ་སློབ་གྲྭ་ཆུང་འབྲིང་དུ་སློབ་སྦྱོང་བྱས། ཕྱི་ལོ་ ༡༩༩༨ ལོར་བཙན་བྱོལ་དུ་འབྱོར་ནས་སུ་ཇ་བོད་ཁྱིམ་སློབ་གྲྭར་འཛིན་རིམ་བཅུ་པ་བར་དང་། ཕྱི་ལོ་ ༢༠༠༣ ནས་ ༢༠༠༤ ལོ་བར་ལྡི་ལིར་རྟེན་གཞི་བྱས་ཡོད་པའི་ Mother’s International School ཟེར་བའི་སློབ་གྲྭའི་ནང་སྤྱི་ཚོགས་འབྲེལ་ལམ་སྐོར་ཆེད་སྦྱོང་བྱས།
ཕྱི་ལོ་ ༢༠༠༥ ནས་ ༢༠༡༢ བར་བདེ་སྲུང་བཀའ་ཟུར་དང་སྤྱི་འཐུས་ཚོགས་གཙོ་ཟུར་པ་ཨ་ལགས་འཇིགས་མེད་རིན་པོ་ཆེ་མཆོག་གི་སྐུ་སྒེར་དྲུང་ཡིག་གི་འགན་ལེན་ཞུས་ཏེ་གོང་འོག་མི་སྣ་མང་པོར་འབྲེལ་གཏུགས་དང་། རང་གཞན་སྤྱི་ཚོགས་ཀྱི་གནད་ཡོད་མི་སྣ་མང་པོའི་ལྷན་ལས་དོན་མཉམ་སྒྲུབ་ཀྱི་ཉམས་མྱོང་རིམ་ཅན་དུ་བསགས། བཀའ་ཟུར་ལྷན་ཚོགས་ཀྱིས་༸གོང་ས་མཆོག་ལ་བརྟན་བཞུགས་བསྟར་འབུལ་སྐབས་འབྲེལ་མཐུད་སོགས་ཀྱི་ལས་དོན་སྣེ་མང་འབད་སྒྲུབ་ཚགས་ཚུད་དང་། གཞན་ཡང་ཨ་རིའི་གྷུ་ར་སུ་ཁྱིམ་ཚང་ཐེབས་རྩ་དང་ཧྥ་རིན་སིའི་ Graines d’Avenir རོགས་སྐྱོར་ཚོགས་པ་གཉིས་དང་མཉམ་འབྲེལ་ཐོག་བཙན་བྱོལ་སྤྱི་ཚོགས་ནང་དང་／གཞིས་ལུས་བོད་མིའི་སྤྱི་ཚོགས་གང་སར་བོད་མི་སྐྱོ་བོ་དང་ཉམ་ཐག་སློབ་ཕྲུག་སོགས་ལ་རོགས་དངུལ་འཚོལ་སྒྲུབ་ཞུས་འབྲེལ་དཀའ་ངལ་ཅན་གྱི་མི་མང་པོ་ཞིག་ལ་འཕྲལ་ཕུགས་གཉིས་ཕན་གྱི་གྲུབ་འབྲས་བྱུང་ཡོད།
ཕྱི་ལོ་ ༢༠༡༠ ནས་ལོ་བཞིའི་རིང་། ༼ཀུན་ཕན་རིགས་གནས་སློབ་གྲྭའི་༽དྲུང་ཆེའི་ལས་ཁུར་ཞུས་པ་དང་། ཕྱི་ལོ་ ༢༠༡༤ ནས་སློབ་གྲྭའི་འགན་འཛིན་གྱི་ལས་ཁུར་ཞུ་མུས་ཡིན། སློབ་གྲྭ་འདི་བཞིན་བོད་ནས་གསར་དུ་འབྱོར་རིགས་སློབ་གཉེར་བ་ཚོའི་ནང་། གཞུང་སྒེར་སློབ་གྲྭ་ཁག་ནས་ལོ་གསུམ་དང་ལྔའི་སློབ་ཡུན་གྱི་མཇུག་ཏུའང་མུ་མཐུད་སློབ་གཉེར་བྱ་འདུན་ཡོད་རིགས་ལ་གོ་སྐབས་འཕར་མ་སྤྲོད་པར་དམིགས་ཏེ་ཕྱི་ལོ་ ༢༠༠༡ ལོར་གསར་དུ་བཙུགས་པ་ནས་ད་བར་ལོ་ངོ་བཅུ་འགོར་བའི་རིང་། འདི་ནས་སློབ་མཐར་སོན་གྲས་ནས་བོད་ཕྱི་ནང་གང་སར་ཡིག་བསྒྱུར་དང་དགེ་རྒན། སྣེ་ཤན་པ་སོགས་ཀྱི་ཕྱག་ལས་གནང་བཞིན་པ་སོགས་གྲུབ་འབྲས་ངེས་ཅན་སོན་ཡོད་པའི་གནས་སྟངས་ལ་ཐུགས་དགྱེས་བརྩེ་དང་བཅས་ཏེ། དེ་སྔ་ཤེས་ཡོན་རྒྱབ་སྐྱོར་སློབ་གཉེར་ཁང་ཞེས་འབོད་ཀྱིན་པ་ནས་༸གོང་ས་མཆོག་གིས་༼ཀུན་ཕན་རིག་གནས་སློབ་གྲྭ་༽ཞེས་པར་མིང་བསྒྱུར་བཀའ་དྲིན་དང་བརྩེ་གཟིགས་རྒྱ་ཆེ་གནངས་པ་བྱུང་ཡོད།
བློ་བཟང་ཐུབ་བསྟན་ལགས་ནི། རྒྱལ་བའི་བཀའ་དགོངས་འགལ་མེད་སྒྲུབ་མཁན་ཞིག་དང་གཞུང་གི་ལངས་ཕྱོགས་ཐོག་ཤར་བསྐྱོད་བྱེད་མཁན་ཞིག མཐོ་དམན་བར་མའི་མི་སྣ་མང་པོར་འབྲེལ་འདྲིས་ཟབ་པ་ཞིག ལས་དོན་ཆེ་ཆུང་མང་པོ་སྒྲུབ་པའི་ཉམས་མྱོང་ངེས་ཅན་ཡོད་པ་ཞིག སྤྱི་ཚོགས་གནས་སྟངས་ཆེ་ཕྲར་དོ་སྣང་ལྡན་པ་ཞིག བོད་རང་གི་སྐད་ཡིག་གིས་གཙོས་ཨིན་སྐད་དང་། གནས་ཡུལ་རྒྱ་གར་སྐད་བཅས་ཀྱི་གནས་ཚད་རང་རྐྱ་འཕེར་ངེས་དང་འབྲེལ་བའི་ཤེས་ཡོན་ལྡན་པའི་གཞོན་རབས་རྒྱུས་མྱོང་ཅན་ཞིག་ཡིན་སྟབས། སྐབས་བཅུ་དྲུག་པའི་མདོ་སྨད་སྤྱི་འཐུས་སུ་འོས་པར་མཐོང་ནས་མཚམས་སྦྱོར་ཞུས་པ་ཡིན། ཕྱི་ལོ་ ༢༠༡༥ ཟླ་ ༨ ཚེས་༡༨ ལ།
རྒྱ་གར། བལ་ཡུལ། ཨ་རི། ཡུ་རོབ། ཨོ་གླིང་བཅས་སུ་གནས་སྡོད་མདོ་སྨད་པ་རྒྱུས་ལྡན་ཁག་ཅིག་ནས་འོས་སྦྱོར་བྱས།
སྤྱི་འཐུས་སུ་བཞེངས་མཁན་ཚང་མར་གུས་བརྩི་ཞུ་གི་ཡོད། ལྷག་པར་དུ་བོད་ཀྱི་སྐད་ཡིག་དང་། དབྱིན་ཇིའི་སྐད་ཡིག རྒྱ་གར་སྐད་བཅས་རང་མགོ་ཐོན་ངེས་ཤེས་མཁན་གཞོན་སྐྱེས་འདི་ལྟ་བུ་མང་ཙམ་སྤྱི་འཐུས་ནང་སླེབས་ན་ཡག་པོ་འདུག ལས་ཀ་གང་ཡང་སྤྱི་ཚོགས་གང་སར་འབྲེལ་ནས་སྒྲུབ་དགོས་སྟབས། སྐད་ཡིག་གི་ཁྱད་ཆོས་འདི་ཡང་གལ་ཆེན་པོ་གཅིག་རེད། དེ་བཞིན་བོད་ཕྱི་ནང་གི་སྤྱི་ཚོགས་གནས་སྟངས་དང་། མཐོ་དམན་གང་སར་འབྲེལ་ལམ་སོགས་ལ་རྒྱུས་མྱོང་ལྡན་པ་འདི་འདྲ་ལ་རྒྱབ་སྐྱོར་དང་འོས་ཤོག་འབུལ་གྱི་ཡིན། ད་དུང་ཡང་ཁོང་འདྲ་བ་མང་ཙན་ཐོན་པའི་རེ་བ་བྱེད་ཀྱིན་ཡོད།
གཞོན་སྐྱེས་ཁྱེད་རང་ལ་རྒྱབ་སྐྱོར་ཡོད། ཡིན་ནའང་གསལ་འདེབས་ཞུ་དགོས་པ་ཞིག་ལ། བོད་ཆོལ་ཁ་གསུམ་གྱི་ལས་དོན་གྱི་གནད་འགག་ལ་ཐུག་དུས་དཔའ་འཁུམ་ནས་མི་སྡོད་པར་བཤད་ཕོད་པ་དང་སྒྲུབ་ཕོད་པ་ཞིག་ཡིན་དགོས་པ་དེ་ཐུགས་ལ་འཛིན་དགོས། ངས་འདི་ལྟར་གསལ་འདེབས་བྱེད་དོན་ངའི་ངོས་ནས་མཚོན་ན། ཁྱེད་རང་གིས་མི་མང་ལ་གཏམ་བཤད་གནང་བ་ཞིག་མཐོང་ཐོས་མེད་པའི་རྐྱེན་གྱིས་ཡིན། བསམ་དོན་ཡིད་བཞིན་འགྲུབ་པའི་སྨོན་འདུན་ཞུ།
བཀའ་ཟུར་འཇིགས་མེད་རིན་པོ་མཆོག་བོད་ལ་ལྷག་བསམ་དཀར་པ་ཙམ་དུ་མ་ཟད། སྐུ་འཚོ་བཞུགས་སྐབས༧རྒྱལ་བའི་བཀའ་དགོངས་འགལ་མེད་ཐོག་རྣམ་དཔྱོད་དང་ལས་ཆོད་གང་ཅིར་འགྲན་ཟླ་བྲལ་བའི་བྱས་པ་མང་པོ་བཞག་ཡོད་པས། ཁོང་གི་རྗེས་རབས་པ་འདི་འང་རིན་པོ་ཆེའི་རྣམ་དཔྱོད་དང་ལས་དོན་ཉམས་མྱོང་གི་བག་ཆགས་ཟབ་མོ་བཞག་ཡོད་ངེས། དགའ་བསུ་ཞུ།
སྐུ་གཤེགས་ཨ་ལགས་འཇིགས་མེད་ལགས་ཀྱི་ཚྭ་བོ་ཐུབ་བསྟན་ཡང་འཐུས་མིར་ལངས་པ་ལ་བཀྲ་ཤིས་བདེ་ལེགས་ཞུ། འོན་ཀྱང་དཀོན་ཅོག་ཚད་བཙུགས་ནས་ཞུས་ན། ཁྱོད་ལ་དངོས་གནས་འདི་འདྲ་ལན་པོ་ཡོད་པ་མ་རེད། ཡིན་ཡང་རང་གིས་ལྟོས།
དེང་སང་བོད་མི་མང་སྤྱི་འཐུས་ལྷན་ཚོགས་ཀྱི་ཞབས་སྟེགས་གོང་ཁེ་བོ་ཞེ་དྲག་རེད།
ཁ་དང་དེ་རིང་གི་སྲིད་སྐྱོང་དང་་སྤྱི་འཐུས་འོས་སྦྱོར་བྱེད་སྟངས་མང་བོ་ཞིག་ངོ་དེབ་སོགས་ནས་ཀྱང་མཐོང་བ་འདི་དག་ལ་བལྟས་ནསྲིད་སྐྱོང་དང་་སྤྱི་འཐུས་ཟེར་བ་དེ་བྱིས་པ་ཚོའི་རྩེད་མོ་རྩེ་་ས་ལྟ་བུ་ཞིག་ཡིན་པའི་ཚོར་སྣང་སྟེར།
ངོ་མ་བཤད་ནི་ཡིན།
བྱིས་པའི་རྩེ་མོ་ལབ་ན་གང་ཤེས། ཡིན་ནའང་། རྩ་བའི་ཤེས་ཡོན་དང་ལྷག་བསམ་ཟུང་དུ་སྦྲེལ་ཞིང་རང་རང་གི་ཆོད་སེམས་དང་སྙིང་སྟོབས་བསྐྱེད་ནས་སྤྱི་བའི་ལས་དོན་སྒྲུབ་བསམ་པའི་གཞོན་སྐྱེས་གང་མང་མང་མདུན་དུ་ཐོན་པར་དགའ་གུས་ཡི་རང་ཡོད།
གཞོན་སྐྱེས་གང་མང་མང་ཕེབས་པར་དགའ་བསུ་ཡོད
སྲིད་སྐྱོང་དང་སྤྱི་འཐུས་ལ་ཚང་ཁ་རྒྱག་མཁན་
མང་པོ་འདུག་པ་ཡག་རྟགས་ཞིག་གང་ནས་
ཡིན་གཞིས་ཆགས་ནང་གི་གྲོང་སྡེའི་བརྒྱ་
དཔོན་དང་བཞི་གྲོང་འཐུས་མི་འདྲ་བོ་ཆགས་
ཉེན་འངུག་ན་མགོ་ཡོད་ཚད་སྲིད་སྐྱོང་དང་སྤྱི་
འཐུས་ལ་ལང་ན་འགྲིག་པའི་ལམ་ལུགས་དེ་
མང་གཙོ་ལ་ངོས་འཛིན་ཞུས་ན་འགྲིགས་ཀྱི་
ཡོད་པ་ཡིན་ནམ་།
ཨ། ཇུང་ཏོག་ལགས། བཀའ་མོལ་གསུང་ན་མིག་གིས་གཟིགས། བསམ་བློ་བཏང་ནས་གསུང་དགོས་རེད་མ་གཏོགས། དག་ག་ཟིག་གསུང་ན་ཕན་ཐོག་གང་ཡང་མི་འདུག་ག མགོ་ཐོགས་ཚད་སྲིད་སྐྱོང་དང་སྤྱི་འཐུས་ལངས་ཟེར་བ་རྣ་བར་མི་འགྲོ་བའི་སྐད་ཆ་རེད་པ། འདིའི་མིང་ལ་དམངས་གཙོའི་འགྲོ་ལུགས་དང་རང་རང་གི་འཇོན་ཐང་མངོན་པའི་འགྲན་རྩོད་ཟེར་ཀ ཁྱེད་ལའང་དེའི་འཇོན་ཐང་ཡོད་ན་སྲིད་སྐྱོང་དང་སྤྱི་འཐུས་འོས་མི་ལངས་ན་མ་འགྲིག་པ་གང་ཡང་ཡོད་པ་མ་རེད།
ཁོང་སུ་རེད་དམ། ཁྱོན་ནས་གོ་མ་མྱོང།
བཙན་བྱོལ་བོད་མིའི་སྤྱི་འཐུས་ནི་ན་ཆུང་བྱིས་པ་ཚོའི་རྩེད་རྭར་བསྒྱུར་འདུག་གོ། ཉིན་རེ་ནས་མ་འདས་པ་བྱིས་པའི་ཁྱུ་ཚོགས་མང་ནས་མང་དུ་འགྲོ་བཞིན་འདུག ཕལ་ཆེར་སྤྱི་འཐུས་ལྷན་ཚོགས་གསར་པའི་ནང་རྐང་རྩེད་དང་ལག་རྩེད་སྤོ་ལོའི་རུ་ཁག་མང་པོ་ཡོང་རྒྱུ་ཁོ་ཐག་རེད།
ཧཧཧཧ འདོ་རིག་རྟ་བོ་རྒྱུག་སར། བོང་ཕྲུག་ཧོན་ལོག་རྒྱུགས་ན་་་་་འདི་འདྲ་རེད་ཡ
ཁ་སང་དེ་རིང་ལ་རང་གིས་རང་ངོ་མ་འཕྲོད་པར། སྤྱི་འཐུས་འོས་མི་མང་པོ་ཞིག་ལང་གི་ཡོད་པ་ན། གཙོ་བོ་དེ་ལ་རང་གིས་རང་ལ་ཅིག་དྲིས་བཏང་། ༸གོང་ས་མཆོག་དགུང་གྲངས་བརྒྱད་ཅུ་དང་དབུས་བོད་མིའི་སྒྲིག་འཛུགས་ཀྱི་དཔུང་བ་མཉམ་གཤིབ་བྱེད་ཐུབ་བམ།
སྲིད་སྐྱོང་དང་སྤྱི་འཐུས་ཀྱི་འོས་མིར་ལངས་མཁན་ཇེ་མང་ནས་ཇེ་མང་ཡིན་པ་ནི་དགའ་འོས་པ་ཞིག་རེད།
ར་དང་ལུག་ཚང་མ་སྤྱི་འཐུས་ལངས་སོང་ཡ
མདོ་སྨད་ལ་མི་རྫོགས་སོང་བ་ཡིན་ནམ། སློབ་སྦྱོང་དང་ཉམས་མྱོང་སོགས་གང་ཡང་མེད་པ་ཨ་ལགས་ཀྱིས་ཀོར་ཟས་ཚང་མ་བདག་པོ་བརྒྱབ་ནས་སྡོད། ཁྱེད་རང་མ་ཤི་བར་དུ་རྫོགས་རྒྱུ་མ་རེད།