(རང་ཉིད་དང་སྨྲ་བ་ཨམ་ཚུགས་ཀྱིས་བསྡམས་ཤིང་ངོ་གདོང་དང་ཟུར་མིག་སྐྲ་ལོ་ཡི་བཀབ་ནས་ངས་དོན་ངོ་མར་ཅི་ཞིག་བསམ་བཞིན་ཡོད་དམ།)
ཁ་བྱང་གི་རོལ་ཆ་དཀྲོལ་བ།
ཐོར་རྒོད་པ་སྤྱན་ཆབ།
ལོ་ངོ་གཉིས་ཀྱི་ཡར་སྔོན་ཞིག་ང་ལའང་ང་རང་ཉིད་ཀྱི་ང་རྒྱལ་དང་ཕོ་ལོ་ཉི་ཤུའི་སྣང་པ་དེ་ཡོད།ཡིན་ན་ཡང་།ཆུ་ཚོད་ཀྱི་བཞུར་སྒྲས་བསམ་གཞིག་ག་ལེར་སྒུལ་ཞིང་ལག་པ་བྲང་ཁར་བཞག་ན།ངས་ནི་ང་རང་ཉིད་ལ་མགོ་སྐོར་གཏོང་བཞིན་པ་དང་ཀུན་ནས་འདྲ་ལ་ཁྱོད་ཉིད་ལ་སྐྱག་རྫུན་བཤད་བཞིན་པ་དང་ཡེ་ནས་མཚུངས་པས།ཡང་བསྐྱར་རང་ཉིད་ཀྱི་སེམས་པ་འདི་ཐང་མར་བརྡལ་བ་ཡིན།པ་ཀོ
ཤུགས་རིང་གྲངས་མེད་ཅིག་གིས་རང་ཉིད་ཀྱི་སྨྲ་ལྕེ་གཏུབས་ཀྱང་མ་གཏུབ་ཀྱང་ཕྱག་རྒྱ་སྣ་ཚོགས་ཞིག་གིས་རང་སེམས་འདི་མནན་ཡང་མ་མནན་ཡང་།ང་རང་དུང་བའི་སྐྲ་ལོ་ཁྱོད་སར་གཡོ་བ་བདེན་པ་བདེན་རྐྱང་དུ་ཟད་འདུག་ལ་ཁྱོད་རང་སྐྱོ་བའི་མཆི་མས་མི་སེམས་བརླན་པ་དྲང་བོ་དྲང་བཞག་ཏུ་གྲུབ་འདུག པ་ཀོ
དོན་ངོ་མར་ལོ་ངོ་འདི་དག་དང་སྐར་ཆའི་བར་གསེང་རེ་ནས།ལན་རེར་ངས་རང་ཉིད་ལ་དབུ་ཆང་གི་ངར་ཤུགས་བླུད་ནས།སྐབས་རེར་ངས་རང་ཉིད་ལ་དྲང་བདེན་གྱི་རྒྱབ་དཔུང་བཙལ་ནས།ཁ་པར་གྱི་ཆུ་སྒོ་གློ་བུར་གློ་བུར་དུ་ཕྱེས་ཡོང་བར་ཁྱེད་ཀྱི་ཅི་ཞིག་སྙམ་སོང་།ངའི་གནམ་གཤིས་ལ་འགྱུར་བག་རྒོད་པར་ཨེ་བསམ།ངའི་དྲན་སྣང་ལ་རབ་རིབ་རྒོད་པར་ཨེ་འདོད།པ་ཀོ
འུ་ཅག་གིས་ཟླ་བར་རོལ་ཞིང་སྐར་ཚོགས་ཀྱི་སེམས་པ་བཟོས་པ་དེ།ད་དུང”མེ་ཏོག”ཚོད་དུ་ངུས་ཤིང་མིག་ཆུས་ཁྱོད་རང་བརླན་པ་དེ།ཁྱོད་རང་ཚོད་ཚོད་དུ་ལྐུག་ཅིང་རྣམ་པས་ང་རང་བསད་པ་དེ།རྒྱ་ལམ་འོག་གཤམ་ཞིག་སྟེ་གྲོང་གསེབ་ཆུང་ངུ་ཞིག་གི་གོང་རོལ་དེ་དྲན་ནམ།པ་ཀོ
བསམ་གཞིག་ལོ་རྩེག་ཟླ་རྩེག་གྱིས་ཕྱིེར་དྲན་གསལ་ནས་གསལ་དུ་བཏང་ན་ཡང་།ཨམ་ཚུགས་གཅིག་ཐོག་གཉིས་རྩེག་ཀྱིས་རང་ཉིད་ཀྱི་ངོ་གདོང་འདི་ཡོངས་སུ་བཀབ་ནའང།ཞིབ་མོར་གཞིགས་ན་ངས་རང་ཉིད་མི་ཞིག་བྱེད་སྙན་ངག་གི་རལ་གྲི་ཕྱར་ཡོད་པས་གང་དུ་སྐྱག་རྫུན་བཤད་ཅིང་སུ་ལ་དབུ་སྐོར་གཏོང་ས་ཡོད་དམ།པ་ཀོ
ད་དུང་སྤི་རག་གི་དྲི་མ་ཙམ་གྱིས་ང་ཚོ་བཟི་ཞིང་ལུང་ཁུག་གི་རླུང་འཚུབ་ཙམ་གྱིས་ཚོར་བརྙས་ཤིང་སྨོད་མྱོང་བ་དེ་ཁྱོད་ཀྱིས་བརྗེད་ཆེ་ཡོད།དེ་དུས་ངས”རྡོ་ཁང་གྲུ་བཞི་ཞིག་ལ།།སྐུ་མགྲོད་མོད་པོ་འཁོར་ཀི།ཁང་བདག་བཙན་པོ་ཞིག་གིས།།བཀའ་བཀྱོན་མང་པོ་གཏོང་གི།”བྲིས་ཤིང་ཁྱོད་ཀྱིས”སམ་སིམ་ངང་ང་རང་ཁྱོད་ཁ་བྲལ”གྱི་དབྱངས་རྟ་ཡང་ཡང་གྱེན ་བཞིན་པ་ངས་ད་དུང་གསལ་གསལ་ཏང་ཐང་གིས་གོ་ཐུབ་ཀི པ་ཀོ
ཡིན་ན་ཡང་།ངས་བཤད་པའི་སྐད་ཆ་འདི་ལ་སྣག་ཤོག་གི་འགྲོ་གྲོན་ཙམ་ལས་ཅི་ཡང་མེད་པར་སེམས་ཆོགངས་བྲིས་པའི་སེམས་པ་འདི་ལ་སྲ་བརྟན་གྱི་ཞབས་ཅུང་གཅིག་ཀྱང་ཡེ་ནས་བྲལ་བར་སྙམ་ཆོགངས་ནི་རང་ཉིད་ཀྱི་སེམས་པ་འདི་ཐང་མར་བརྡལ་པ་ཙམ་ཡིན་ལ་རང་ཉིད་ཀྱི་མིག་ཆུ་འདི་ཕྱི་རུ་ཕྱུངས་པ་ཙམ་ཡིན།གང་ལྟར།འདི་ཡང་རང་ཉིད་ཀྱིས་སྤྱད་ཆོག་པའི་ཁེ་དབང་ཉ ག་གཅིག་སྟེ་ངས་རང་ཉིད་རང་ཉིད་ངོ་མ་ཞིག་ཏུ་བཟོ་བའི་ལམ་བུའང་ཡིན།པ་ཀོ
Su/5/04/2011