སེམས་ནང་གི་མར་མེ་ཚེ་འབར།

སྙིང་སྡུག་མཚམས་གཅོད་སྒྲོལ་མ་ལ་སྦྱར་བ།

དོལ་སྨྱོན།

༡༽
དལ་གྱིས་རྒྱུ་བའི་ཆུ་འཛིན་མིན།།
དྲག་ཏུ་འབབ་པའི་རྦབ་ཆུ་མིན།།
རླབས་ཀྱིས་བརྩེན་པའི་རྒྱ་མཚོ་མིན།།
མེ་ཏོག་སྟོང་གི་མཛེས་སྡུག་མིན།།
༢༽
སྔོ་སངས་ནམ་མཁའི་དཀྱིལ་འཁོར་ན།།
དཀར་འཇམ་སྤྲིན་པའི་ཁྱུ་ཚོགས་དེ།།
ཁྱོད་ཀྱི་ལང་ཚོའི་ཆ་ཤས་ཀྱི།།
རླུང་གིས་ཕྱོགས་བཅུར་གཏོར་ལ་ལྟོས།།
༣༽
འདམ་ལས་སྐྱེས་པའི་པདྨ་མིན།།
རླུང་གིས་ཁུར་བའི་དྲི་ཞིམ་མིན།།
མེ་ཏོག་སྟོང་གི་རྩེར་འཕྱོ་བའི།།
སྦྲང་ཆུང་བུང་བ་དེ་བས་མིན།།
༤༽
ཐིག་ལེ་མཆོག་མའི་ཞལ་རས་དེ།།
ཁྱོད་ཀྱི་གདོང་ན་རབ་ཏུ་མཛེས།།
དབྱངས་ཅན་ལྷ་མོའི་མྱོས་བུམ་དེ།།
ཁྱོད་ཀྱི་བྲང་ན་བརྟན་ཞིང་བརྗིད།།
༥༽
རྒུན་ཆང་མངར་མོའི་བཟི་ཁ་མིན།།
བསིལ་བསིལ་རླུང་གི་རྒྱུ་ཕྱོགས་མིན།།
རབ་མཛེས་གངས་རི་དཀར་པོ་མིན།།
སྲབ་འཇམ་ཁ་བའི་འདབ་མ་མིན།།
༦༽
ཁྱོད་ཀྱི་འཇམ་མཉེན་ཕྱག་ཟུང་དེ།།
བདག་གི་སྐེ་ནས་འཁྱུད་པའི་ཚེ།།
གནམ་ས་གཉིས་ཀྱི་བར་གསེང་ནས།།
ཁོ་བོ་ལན་གཅིག་བརྒྱལ་བར་བྱས།།
༧༽
དལ་གྱིས་འབབ་པའི་སྦྲང་ཆར་མིན།།
སྲོད་ཀྱི་དམར་སེར་མཚམས་སྤྲིན་མིན།།
དགུང་སྔོན་དབྱིངས་ཀྱི་ཟླ་བ་མིན།།
དཔྱིད་དཔལ་གཞོན་ནུའི་ལང་ཚོ་མིན།།
༨༽
ཁྱོད་ཀྱི་སོར་མོས་རེག་པ་ཡི།།
ཉམ་ཐག་ནད་པའི་ཚོགས་དེ་དག།
སེམས་ཀྱི་འཕར་སྒྲ་མ་ནོན་པར།།
དབུག་རིང་ཤུགས་ཀྱིས་ཤོར་ཞེས་ཐོས།།
༩༽
ཕྱི་ཡི་ལང་ཚོ་མིག་ལ་མཛེས།།
ནང་གི་དཔལ་ཡོན་སེམས་ལ་ཞིམ།།
གསང་བའི་སྤྱོད་པ་བདེ་བའི་ཕུལ།།
བདེ་སྟོང་ཌཱཀྐི་འབུམ་གྱི་མཆོག།
༡༠༽
ཕོ་ལོ་སུམ་ཅུ་དལ་གྱིས་ཟད།།
ཡངས་པའི་རྒྱལ་ཁབ་རིམ་གྱིས་བསྐོར།།
ཁྱོད་ཀྱི་དཔལ་ལ་བདོ་བ་ཡིས།།
མཛེས་མ་དེ་འདྲ་ངས་མ་མཐོང་།།
༡༡༽
སྔོ་སངས་ནམ་མཁའི་དཀྱིལ་འཁོར་མིན།།
རབ་མཛེས་བཅོ་ལྔའི་དུང་ཟླ་མིན།།
དལ་གྱིས་རྒྱུ་བའི་གཙང་ཆུ་མིན།།
ཟིལ་པས་དུད་པའི་ལོ་མ་མིན།།
༡༢༽
གུར་ཀུམ་ཆབ་ཀྱིས་མ་བཀྲུས་ཤིང་།།
ཙན་དན་དྲི་ཡིས་མ་བགོས་མོད།།
རང་བྱུང་སྟོང་གི་མཛེས་སྡུག་དེས།།
སྟག་ཤར་འབུམ་ལ་འགྲམ་ཆུ་བསླངས།།
༡༣༽
ཡིད་འཕྲོག་ལྷ་མོར་མ་ཐོབ་ཅིང་།།
དྲང་སྲོང་རྣམས་ལའང་མ་ཡིན་པའི།།
སྨན་གྱི་བླ་མའི་ལྷུང་བཟེད་ཀྱི།།
བདུད་རྩི་དྲོན་མོ་ཁྱོད་ལ་གཏོར།།
༡༤༽
ཐང་ཕྱེ་རིལ་བུས་མ་ཕན་པའི།།
ཉམ་ཐག་ནད་པ་དུ་མ་ཞིག།
ཁྱོད་ཀྱི་ལང་ཚོ་མཐོང་བའི་མོད།།
ཟུག་རྔུའི་ཚོགས་ལས་རྣམ་པར་རྒྱལ།།
༡༥༽
ཕྱི་ནས་འདོད་པའི་བདེ་བ་སྟེར།།
ནང་ནས་བརྩེ་བའི་བཟི་ཁ་འཕྲོ།།
གསང་བ་སེམས་ཀྱི་མུན་སེལ་བའི།།
མར་མེ་ཚེ་འབར་ཁྱོད་ཡིན་ནོ།།