སེམས་གཏམ།

ལྡོང་ཆུ་ཤེལ། (འོས་སྦྱོར།)

 
རིག་གནས་ནང་འདྲེན་བྱེད་པ་ནི། རབ་དང་མཆོག་དང་གྱ་ནོམ་པ་ཡིན་ནོ།།
རིག་གནས་ཕྱིར་གཏོང་བྱེད་པ་ནི། ངོ་ཚ་མེད་པ་དང་། ཁྲེལ་མེད་པ་དང་། ཀླད་མེད་དག་གི་ལས་ཡིན་ནོ།།
གཞན་གྱི་ཡང་དག་པའི་རིག་གནས་ནང་འདྲེན་བྱས་ཏེ་བོད་ཡིག་ཏུ་བསྒྱུར་བ་ནི། བོད་ཀྱི་ཆོས་དང་རིག་གནས་ལ་ཟུངས་བཅུད་སྣོན་པ་དང་མཚུངས་ཏེ། དཔེར་ན། སྔོན་བྱོན་ལོ་ཙཱ་བ་བཀའ་དྲིན་ཅན་རྣམས་ཀྱི་བྱས་འབྲས་ལ་གཟིགས་རོགས།

རང་གི་རིག་གནས་ཕྱིར་གཏོང་བྱས་ཏེ་གཞན་གྱི་ཡི་གེར་བསྒྱུར་བ་ནི། བོད་ཡིག་འཇིག་བྱེད་ཀྱི་རྒྱུ་གཙོ་བོ་གཅིག་བསྒྲུབས་ཡོད་པ་ཡིན་ནོ།།
དཔེར་ན། དེང་གི་བླ་སྤྲུལ་དང་མཁན་པོ་ད་དུང་སློབ་གྲྭའི་དགེ་རྒན་ཆེན་མོའི་མིང་འཛིན་འགའི་བྱས་ཉེས་ལ་གཟིགས་ན་རྟོགས་འོང་ངོ་།།
འཛམ་གླིང་ལ་ཁ་ཕྱོགས་པ་ཟེར་བ་ནི་རང་གི་རིག་གནས་ཚང་མ་གཞན་གྱི་ཡི་གེར་བསྒྱུར་རྒྱུའི་དོན་རྩ་བ་ཉིད་ནས་མིན་ནོ།།
ཁྱེད་ཀྱིས་ཇི་འདྲར་བསྒྱུར་ཀྱང་མོས་པ་དང་ཀློག་འདོད་མེད་མཁན་ཚོས་མིག་ཟུར་ཙམ་ཡང་མི་ལྟའོ།།
ཁྱོད་ཀྱིས་ཚིག་གཅིག་མ་བསྒྱུར་ནའང་མོས་པ་ཡོད་མཁན་ཚོས་བོད་ཡིག་ལ་འབད་འབུངས་ཀྱིས་སློབ་གཉེར་བྱེེད་ཀྱིན་ཡོད་དོ།།
འདི་ལྟ་བུའི་ལས་བསྒྲུབས་ཚེ་སྔོན་ཆད་ཀྱང་བོད་ལ་ཕན་ཐོཊ་མ་མྱོང་ལ་ཕྱིན་ཆད་ཀྱང་ཕན་ཐོགས་འབྱུང་མི་སྲིད་དོ།།

ཁྱོད་ཚོ་བྱང་ཆུབ་སེམས་དཔའ་ཡིན་ཀྱང་སྲིད་མོད། གཞན་དོན་གྱི་ཆེད་དུ་རང་ཉིད་བློས་བཏང་ཆོག་ཀྱང་། བོད་དང་བོད་ཀྱི་ཆོས་དང་རིག་གནས་བློས་བཏང་མི་ཆོག་གོ།།
དེ་བས་རང་གི་ཡོད་ཚད་གཞན་དུ་སྒྱུར་བའི་བསམ་སྤྱོད་ངན་པ་དེ་མཚམས་འཇོག་རོགས།
འཛམ་གླིང་རང་བཞིན་ཅན་ཞེས་སྐད་ཆ་རྫིག་པོ་སྨྲ་བཞིན་བོད་ཡིག་ཐལ་བར་གཏོང་མཁན་གྱི་མི་ཡང་བླ་ཆེན་མི་ཆེན་གྱི་གྲས་ན་མང་ངོ་།།
འཛམ་གླིང་ཁྱིམ་ཚང་གཅིག་ཟེར་བ་ནི་མངོན་འགྱུར་བྱེད་ཐབས་བྲལ་བའི་མི་ཡ་རབས་དག་གི་སྨོན་འདུན་དང་རྨི་ལམ་ཙམ་ཡིན་ནོ།

ང་ཚོ་ནི་སོ་སོ་སྐྱེ་བོ་སྟེ། འཁོར་བའི་འདམ་ལ་གནས་ཤིང་ཉོན་མོངས་པའི་གཞན་དབང་ཅན་ཡིན་པ་ཤེས་དགོས་སོ།།
འདི་ནི་དོན་དངོས་དང་ལོ་རྒྱུས་ཀྱིས་ང་ཚོར་བརྡ་བཏང་བ་ལས་ངས་དོན་མེད་ཉོག་གཏམ་བཤད་པ་ནི་མིན་ནོ།།
རང་ནོར་གཞན་ལ་མ་སྟོན།།
རང་ནོར་གཞན་ལ་བསྟན་ན།།
རྐུ་ལ་ཤོར་བའི་ཉེན་ཡོད།།
དེ་བས་བདག་པོ་རྒྱག་རོགས།།

༢༠༡༦.༡༠.༡༠

(ལྷ་སྒྲོལ་སྐྱབས་ཀྱིས་མཚམས་སྦྱོར་བྱས།)