སེམས་གཏམ་རྟ་རིན་མ།（ལྗཊ་ནག་ཟིན་ལན)

རྫ་ཚེ་རིང་བཀྲ་ཤིས།

ལྗགས་ནག་པ་འདི་དགེ་རྒན་ཞིག་རེད་འདུག ཁོང་ལ་ནང་ཆོས་ཀྱི་ཤེས་རྟོགས་དང་ཤ་ཞེན་ཡོད་པ་ནི་ཁོང་གི་བཤད་པ་ལྟར་ཡིན་རྒྱུ་རེད། དེ་ལ་ཡིད་ཆེས་ཡོད། འོན་ཀྱང་། ཐབས་ལམ་གྱི་ཆ་ནས་ངེས་པར་ང་ཚོས་ཕྱིར་རྟོག་དགོས་པ་དག་ཡོད་དེ། གོང་དུ་ཁྱེད་ཀྱིས་དྲངས་པའི་སློབ་ཚན་དག་ཞིབ་ཏུ་བཤད་ན་ཆོས་ལུགས་པའི་ཞན་ཆ་ཙམ་གླེང་པ་ཡིན་སྲིད་མོད། འབྲོག་ཁུལ་ནས་ཡོང་མཁན་གྱི་ལས་དང་པོ་པ་ཞིག་ལ་འདི་དག་འཁྲིད་པ་ནི་ཡང་ན་ཁོང་ཚོའི་ཀླད་པ་གཟེར་སྤྱད་ཅིག་དང་། ཡང་ན་ཁོང་ཚོའི་ཀླད་པ་འགྱུར་སྤྱད་ཅིག་ཡིན་པ་རེད།
མ་གཞི་མི་ཆོས་ཀུན་སྤྱོད་དང་རིག་གནས་ཀྱི་བསམ་བློ། དེང་རབས་རིག་གནས་ཀྱི་རྨང་གཞིའི་རྒྱུན་ཤེས་སོགས་གཞི་རྩའི་ཤེས་བྱ་གལ་ཆེན་ཧ་ཅང་མང་པོ་དག་དང་། སྔོན་གྱི་མཁས་གྲུབ་དག་དང་། དེང་སང་གི་སྐྱེས་བུ་དམ་པ་རང་གི་ཆོས་དང་རིག་གཞུང་གི་རིན་ཐང་མཐིལ་རྟོགས་པའི་བརྩམས་ཆོས་དག་གཙོ་བོར་བྱས་ནས་མི་འདེམས་པར་དོན་རྒྱལ་ལྟ་བུའི་ཆོས་ལུགས་ལ་ལྟ་ཚུལ་ཅི་བས་ཞན་པ་ཞིག་གི་སྐད་ཆ་ཁོ་ན་བསྐྱར་བཟློས་དགོས་པ་འདི་དོན་ལ་ང་ཚོའི་བསམ་བློའི་ནད་རྟགས་ཤིག་དང་མུ་གེ་ཤིག་ཞན་ཆ་ཞིག་ཅིས་ཀྱང་རེད།

དང་པོ་ནས་ཁྱེད་ཀྱི་སྐད་ཆའི་ཁྲོད་ནས་སློབ་དེབ་ཀྱི་ནང་དོན་དོན་གྲུབ་རྒྱལ་དང་འབྲེལ་བའི་རྣམ་གྲངས་མང་པོ་དེ་དག་མཐོང་མ་ཐག་པ་ནས་ང་ལ་ཡང་ཐེ་ཚོམ་ལོག་གེ་བ་ཞིག་སྐྱེས་བྱུང་། ངས་ཁོའི་འདྲེ་འབོད་རྐང་གླིང་ལྟ་བུའི་རྩོམ་ཡིག་དག་བཀླགས་མྱོང་བས་གུར་པར་ཁོའི་བརྩམས་ཆོས་ཀྱི་གཞི་རྩའི་བསམ་བློར་རྩ་བའི་ཆ་ནས་ཆ་རྒྱུས་ཏོག་ཙམ་ཡོད། འོན་ཀྱང་། ཁོང་གི་ལར་ཞེན་དང་རྩོམ་རྩལ་སོགས་གོང་བཀུར་བྱ་རྒྱུ་དེ་སྐབས་འདིར་ཡང་ངས་རྩིས་མེད་བྱས་མེད།
ངས་འདི་ལྟར་བཤད་དུས་ཀློག་པ་པོ་ཚོས། ང་གྲྭ་པ་ཞིག་ཡིན་པ་དང་། ཆོས་ལུགས་མི་སྣ་ཤིག་ཡིན་པའི་ཆ་ནས་ཞེན་ཁོག་གི་སྐད་ཆ་བཤད་ཀྱི་འདུག་མ་དགོངས་རོགས། ང་ཚོའི་བསམ་བློ་གཏོང་སྟངས་མང་པོ་ཞིག་ལ་ཁྱོན་ཡོངས་ནས་རྒྱ་ནག་གི་ཉེ་རབས་བསམ་བློའི་ཤན་ཤུགས་ཆེན་པོ་ཤུགས་མ་ཐུབ་པའི་ཚུལ་དུ་བསླེབས་འདུག

གལ་ཏེ་ང་ཚོའི་ཆོས་དང་རིག་གཞུང་གི་བསམ་བློ་འདི་ཡག་པོ་ཞིག་མིའི་གཤིས་རྒྱུད་ལ་འཇགས་དགོས་ན་ཐོག་མར་ལྷ་སྒྲུང་ནས་མགོ་འཛུགས་དགོས། རིག་པའི་གཞུང་ལུགས་ཀྱི་ཤོམ་ར་གཏན་ནས་འཐེན་རྒྱུ་མེད། ངས་ཀྱང་ནུབ་ཕྱོགས་ཀྱི་སློབ་གསོའི་སྐོར་གྱི་ཆེད་མཁས་པ་ཡིན་ཟེར་མཁན་དེ་འདྲར་འདིའི་སྐོར་གྱི་བསམ་ཚུལ་རེ་འདྲི་མྱོང་། ཁོང་ཚོས་ཀྱང་། ལོ་བཅུ་གསུམ་ལ་མ་སླེབས་ཀྱི་བར་གྱི་སློབ་གསོ་གཙོ་བོ་སྒྲུང་དང་གཏམ་བརྒྱུད་སོགས་ལས་བརྩམས་དེ་ཅུང་རྩིང་བའི་རྣམ་པ་ཅན་གྱི་ཐབས་ལམ་འཚམས་པོ་ཡོད་པའི་ཚུལ་ཡང་ཡང་བཤད་ཀྱི་འདུག
དེ་བཞིན་དེང་སང་ཡར་ཐོན་ཅན་གྱི་སློབ་གྲྭ་དང་གྲོང་ཁྱེར་ཆེན་པོའི་ཁོར་ཡུག་ན་སློབ་མ་ལ་ཁྱིམ་ཚང་སློབ་གསོ་དང་ཕ་མའི་བྱམས་བརྩེ། རང་བྱུང་གི་ཁོར་ཡུག་ནས་ཐོབ་པའི་སློབ་གསོ་དེ་དག་གིས་ཕོངས་ནས་མཇུག་འབྲས་ངན་པ་མང་པོ་ཐོན་གྱིན་ཡོད། དེའི་ཕྱིར་ང་ཚོས་དེང་རབས་སྤྱི་ཚོགས་ཀྱི་སློབ་གསོ་དང་ལེན་བྱེད་པ་དང་ཆབ་གཅིག་སྔར་ཡོད་བསམ་བློ་དང་འདུ་ཤེས་ཀྱི་འཛིན་སྟངས་མང་པོ་ཞིག་ལ་ངོས་འཛིན་བསྐྱར་མ་དགོས་ཀྱི་འདུག འདི་ནི་བོད་ཀྱི་བཅུ་ཕྲག་རིག་གནས་ཡག་པོ་རེད་ཟེར་བ་ཙམ་གྱིས་མཐུས་པ་ཞིག་གཏན་ནས་མ་རེད། དེ་ནི་འཇར་མན་གྱི་མི་ཞིག་གིས་བྲིས་པའི་སྨོན་ལམ་གྱི་ལག་པ་ཞེས་པའི་རི་མོ་སྐད་གྲགས་ཅན་དེའི་སྨྱུག་ཁ་བཞིན་ཞིབ་ཚགས་པོའི་ལྟ་དགོས་པ་ཞིག་རེད་འདུག

ང་ཚོས་ཐོག་མར་ལས་སླ་པོས་སེམས་ལ་འཇུག་པའི་རྣམ་ཐར་དང་སྐྱེས་རབས། རྟོགས་རྗོད་དང་གྲུབ་རྟགས་སོགས་ངེས་པར་འཆད་དགོས། དེ་ལ་ཡིད་ཆེས་དང་ངེས་ཤེས་སྐྱེ་བའམ། དད་པས་མིག་ཆུ་འཆོར་བ་ཞིག་བྱུང་ན་ཡག་ཤོས་ཡིན། མདོ་སྡེ་མཛངས་བླུན་ལྟ་བུའི་སངས་རྒྱས་ཀྱི་སྐྱེས་རབས་ཀྱི་ལམ་ནས་ལས་འབྲས་དང་ཚེ་འདི་ཕྱི་ལ་ཡིད་ཆེས་པའི་འཇིག་རྟེན་ཡང་དག་གི་ལྟ་བ་དང་། གཞན་གྱི་ཚེ་སྲོག་ལ་གཅེས་པར་འཛིན་པའི་ཚེ་སྲོག་འདྲ་མཉམ་གྱི་ལྟ་བ་སོགས་བསྐྲུན་དགོས། འདིས་མི་ཚེ་ལ་སློབ་སྟོན་ལོག་པ་གང་ཡང་བྱེད་ཀྱི་མ་རེད། མ་ཟད། འདིའི་རིགས་ཀྱིས་ང་ཚོའི་སེམས་རྒྱུད་ལས་སྐད་ཆས་ཚབ་བྱེད་མི་ཐུབ་པའི་མངོན་རྟོགས་ཀྱི་ས་བོན་སྐྲུན་གྱི་ཡོད། རླང་རྟའི་དར་ཅོག་དང་མ་ཎི་རྡོ་འབུམ། ད་དུང་ཨ་མའི་ལག་པ་གཉིས་ཀྱིས་མཐོ་སར་བཏེགས་བཞིན་པའི་འབྲུ་མར་གྱི་ཀོང་བུ་དང་ཡིད་ཆེས་ཀྱི་བརྐྱངས་ཕྱག་བཅས་ནི་ང་ཚོའི་མི་རིགས་འདིའི་ཐུན་མོང་མིན་པའི་རིན་ཐང་སློབ་གསོ་ཞིག་གི་འཛུབ་ཁྲིད་ཡིན།
འདི་ལྟར་བཤད་དུས་ཁག་ཅིག་གིས་ངས་གློས་བཤད་ཀྱིན་འདུག་དྲན་རྒྱུ་རེད། དེ་ལ་ཁྱད་པར་མི་འདུག དང་རབས་ཀྱི་རིག་གནས་དང་སྤྱི་ཚོགས་ཀྱི་ཤེས་བྱ་ངེས་པར་དགོས་ན་ཡང་། དེས་ང་ཚོའི་སེམས་ཀྱི་རིན་ཐང་དང་ལེགས་བྱང་གི་ཚབ་མི་བྱེད། ད་ལྟའི་དུས་འདིར་ཕྱིའི་འགྱུར་བ་དང་བསམ་བློའི་འདུ་ཤེས་མང་པོ་ཞིག་ངེས་པར་དུ་འགྱུར་རྒྱུ་ཡིན་པར་ཐག་ཆོད་ཟིན། འདི་ནི་བྱ་དངོས་ཀྱི་ཆོས་ཉིད་ལ་གོ་རྟོགས་ཏོག་ཙམ་ཡོད་མཁན་ཞིག་ཡིན་ན་ཧ་གོ་ངེས་ཡིན། འདིའི་ཐད་ལ་སེམས་ཁུལ་འཕར་མ་མང་པོ་མ་བྱས་ན་ཡང་འགྲིག །

སེམས་པ་རྣམ་དག་ཡིན་པའི་འབྲོག་པའི་སློབ་ཕྲུག་ཅིག་ལ་འབག་སྐུའི་ཞལ་རས་ལྟ་བུའི་སློབ་ཚན་ཞིག་གི་ཐོག་ནས་སྐད་ཆ་བཤད་པ་ཡིན་ན་སྐབས་དིའི་སྐད་ཆ་དག་གི་ཁོའི་སེམས་ཀྱི་ཁུ་སིམ་དག་རིམ་གྱི་དཀྲོགས་པ་དང་ཆབ་གཅིག མ་མཐའ་ཡང་། གཞུང་ལུགས་ཀྱི་ངོས་ནས་ལྟ་བ་མ་ལོག་ན་ཡང་། ལག་ལེན་གྱི་ཐོག་ནས་རིམ་གྱིས་ཉིན་རེ་བཞིན་སེམས་ཀྱི་བག་ཆགས་མང་པོ་ཞིག་སྟོར་བར་འགྱུར། འདི་ལ་ངའི་ངོས་ནས་སེམས་འཚབས་བྱེད་ཀྱིན་ཡོད།
ད་དུང་བཤད་ན། དེང་སང་དཔེ་ཆ་ཙམ་བལྟས་ནས་དགོན་པ་དང་སློབ་གྲྭ་འབའ་ཞིག་གི་ཁོར་ཡུག་ནས་ནར་སོན་པའི་མཁན་པོ་དང་དགེ་བཤེས། དགེ་རྒན་དག་གི་སྤྱི་ཚོགས་སློབ་གསོ་སྤྲོད་སྟངས་འགའ་ཞིག་ལ་ང་ཚོས་བསྐྱར་དུ་བསམ་བློ་གཏོང་དགོས་པ་འདུག ངའི་ཕ་ཡུལ་རྫ་ཆ་ཁར་མཚན་ཉིད་ཡུན་རིང་པོར་བལྟས་མཁན་ཞིག་གིས་ཇོ་དར་དཔར་བ་དང་། ས་ཚ་འདེབས་པ། རྡོ་ལ་མ་ཎི་བརྐོ་བ་བཅས་ཆོས་མ་རེད་ལབ་འདུག་ལ། དེས་དད་ལྡན་པ་མང་པོ་ཞིག་གི་སེམས་ལ་རང་གི་སྔར་བྱས་ཀྱི་ལས་ལ་དོགས་པ་དང་ཐ་ན་དེ་ནི་དོན་འབྲས་མེད་པ་ཞིག་ཡིན་ནམ་སྙམ་པའི་བསམ་བློ་སྐྱེས་འདུག་སྐད། ཁོང་གི་དགོངས་གཞི་དེ་ཅིག་བྱས་ན། སྤྱིར་བཏང་གི་དགེ་སྦྱོར་དག་ངེས་དོན་གྱི་ཆོས་མ་རེད། ཐོས་བསམ་སྒོམ་གསུམ་བྱས་ན་དེ་ལྷག་གི་རེད་བསམ་པ་ཡིན་སྲིད་མོད། སྐད་ཆ་དེས་ལྡོག་ཕྱོགས་ཀྱི་ཤུགས་རྐྱེན་བཞག་འདུག་ལ། འཇོག་གི་ཡང་རེད།

སྐད་ཆ་དེ་གོ་སྐབས་ང་རང་ཧང་སང་སོང་། འདི་དག་ནི་དོན་ལ་ཆོས་ཀྱི་སློབ་གསོ་སྐྱོན་མེད་པ་ཞིག་རེད་ལ། ཆོས་ཉམས་སུ་ལེན་སྟངས་གྱི་བྱེ་བྲག་ཀྱང་རེད། ཁྱད་པར་རོང་འབྲོག་པའི་སྤྱིར་བཏང་གི་མི་དག་ལ་མཚོན་ན་བསྟན་པའི་གོ་རིམ་དང་མཐུན་པའི་ཆོས་ཀྱི་ལག་ལེན་དང་། ཕྱི་རབས་ཚ་རྒྱུད་དག་ལ་ང་ཚོའི་ནང་སེམས་ཀྱི་རིག་གནས་འདི་རྒྱུད་སྤྲོད་བྱེད་པའི་ལག་ལེན་དངོས་ཀྱི་སློབ་གསོ་རེད། འདི་དག་ཚང་མ་ང་ཚོས་ཤེས་དགོས། སྔོན་གྱི་ངའི་ཕ་ཡུལ་གྱི་མཁས་པ་དཔལ་དགེ་རྒྱལ་པོ་ལ་སོགས་པས་ནི་ཆོས་ཉམས་སུ་ལེན་པའི་གང་ཟག་གི་ངོས་ནས་ཀྱང་འདི་དག་ལ་མཐོང་ཆུང་བྱས་མི་འདུག མི་མང་ལ་རྩོད་པ་སློབ་པ་དང་། ནང་ཆོས་ངོ་སྤྲོད་བྱེད་པ་ནི་གལ་ཆེ་མོད། སློབ་གསོའི་ཐབས་ལམ་ཡོངས་རྫོགས་རྩོད་སྒྲུབ་རིག་པ་རང་གི་བསམ་བློའི་འཇུར་མིག་ཏུ་འཛུད་པར་འདོད་པ་ནི་ནམ་ཡང་ནོར་བ་སྟེ། དེ་བཞིན་རང་གི་གོ་རྟོགས་དང་གནས་ཚད་གཞན་གྱི་མ་དཔེར་འཇོག་པ་ནི་དར་མའི་གཟུགས་རིང་ཞིག་གི་ལྭ་བ་ཚད་གཞིར་བཞག་ནས་བྱིས་པ་བུང་ཐུང་ཞིག་ལ་གོས་དྲུབ་པ་བཞིན་དེ་བས་ཀྱང་ནོར་བ་ཡིན་ནོ། །ནང་བསམ་བློའི་ཕུན་སུམ་ཚོགས་པའི་རིག་གནས་ཀྱི་སེམས་ཁམས་རྒྱལ་བར་གྱུར་ཅིག །

རྫ་ཚེ་རིང་བཀྲ་ཤིས་ཀྱིས་2013/12/18ཕྱི་དྲོ་སེང་རྡོར་དྲ་ཐོག་ནས་ལྗགས་ནག་པ་ཞེས་པའི་དྲ་གྲོགས་ཤིག་གིས་ངའི་སློབ་མ་ཚོས་ང་ལྟ་ལོག་པ་རེད་ཟེར་ཞེས་པའི་ཟིན་བྲིས་སྤེལ་འདུག་པ་བཀླགས་རྗེས་ཤར་མར་ཞབས་མཆན་དུ་བཏགས་པ་ཅུང་ཟད་མང་བར་གྱུར་པས་ལོགས་སུ་སྤེལ་བའོ། །