མགར་རྡོར།
1 སངས་རྒྱས་སྒྲོལ་མས། མི་ལོ་ཉིས་སྟོང་ལྔ་བརྒྱའི་ཡར་སྔོན་ཞིག་ལ། སངས་རྒྱས་གོའུ་ཏ་མ། ས་འདི་ནས་འཁྲུངས་པ་རེད་ཟེར། ལོས་ཡིན། སྐྱབས་སུ་མཆི། གོའུ་ཏ་མའི་ཨ་ཕའི་ཨ་ཕ་བུ་རམ་གྱི་ཤིང་སྡོང་ཞིག་ལས་སྐྱེས་པ་རེད་ཟེར། ལོས་ཡིན། སྐྱབས་སུ་མཆི། གོའུ་ཏ་མའི་ཨ་མྱེ་ཞིག་གི་མིང་ལ་ཡང་གོའུ་ཏ་མ་ལབ་གི་རེད་ཟེར། ལོས་ཡིན། སྐྱབས་སུ་མཆི། འདུལ་བ་ལུང་ལྟར་ན། གོའུ་ཏ་མའི་མི་རྒྱུད་ལ་ལོ་ངོ་ས་ཡ་བརྒྱད་ཀྱི་ལོ་རྒྱུས་བཤད་རྒྱུ་ཡོད་རེད་ཟེར། ལོས་ཡིན། སྐྱབས་སུ་མཆི། ལོ་རྒྱུས་བཤད་མཁན་ཉན་ཐོས་ཆེན་པོ་ཤཱ་ར་དྭ་ཏིའི་བུ་རེད་ཟེར། ཁོང་གིས་ཀྱང་ཏིང་ངེ་འཛིན་ལ་སྙོམས་པར་བཞུགས་ནས་གསུང་བ་རེད་ཟེར། ལོས་ཡིན། སྐྱབས་སུ་མཆི།
2 སངས་རྒྱས་གོའུ་ཏ་མ་འཁྲུངས་སྟངས་དེ། ཁྱོད་སྐྱེ་སྟངས་དང་མི་འདྲ་ཟེར། དེ་ཡང་ལོས་བདེན། ཁོང་སངས་རྒྱས་རེད་མོད། སྐྱབས་སུ་མཆི། སངས་རྒྱས་གོའུ་ཏ་མ་མོ་མཚན་ནས་སྐྱེས་པ་མ་རེད། མཆན་ཁུང་ནས་འཁྲུངས་པ་རེད་ཟེར། དང་པོ་ང་རྦད་དེ་མགོ་འཐོམ་སོང་། ཡང་ཅུང་ཙམ་རྗེས་ལ། ཅིག་བྱས་ན་མི་ལོ་ཉིས་སྟོང་ལྔ་བརྒྱའི་ཡར་སྔོན་དེ་བར། མི་ཆེན་སྐྱེས་ཆེན་དེ་ཚོ་མཆན་ཁུང་ནས་འཁྲུངས་གི་ཡོད་ན་ཐང་བསམ་སོང་མོད། མཆན་ཁུང་ན་མི་ཞིག་སྐྱེ་སའི་ཁུང་བུ་ཞིག་ད་སྔ་བར་མཐོང་མྱོང་མེད་པས། ཡང་ང་རྦད་དེ་མགོ་འཐོམ་སོང་། འོན་ཀྱང་མཆན་ཁུང་གཉིས་སུའང་མོ་མཚན་དང་འདྲ་བར། སྤུ་རིང་པོ་ནག་སོབ་སོབ་ཏུ་སྐྱེས་ཡོད་པ་མཐོང་མྱོང་ཡོད་པས། ཅིག་བྱས་ན་ངས་མ་མཐོང་བ་མ་གཏོགས་སྤུ་གསེབ་ཏུ་ཁུང་བུ་ཆུང་ཆུང་རེ་ཡོད་ནའང་ཐང་བསམ་ནས། སྤུ་ཚོགས་ཀྱིས་ཁེངས་པའི་སངས་རྒྱས་སྒྲོལ་མའི་མཆན་ཁུང་གཉིས་ལ་ཡང་ཡང་བལྟ་དགོས་ཐུག་སོང་།
3 སངས་རྒྱས་སྒྲོལ་མའི་མཆན་ཁུང་གཉིས་ན་མི་ཞིག་སྐྱེས་སའི་ཁུང་བུ་ཞིག་ཤིག་བཙལ་བཙལ་བྱས་ཀྱང་རྙེད་མ་སོང་། འོན་ཀྱང་ད་རུང་སྣང་བ་འཁྲུལ་བར་སྲིད་པས་མྱོང་བ་མངོན་སུམ་ལ་ཡིད་མ་ཆེས་པར། ཚུལ་གསུམ་རྟགས་ཡང་དག་གིས་ཤ་གཙབ་གཙབ་ཅིག་བྱས་ནའང་། མཇུག་འབྲས་གཅིག་པ་རེད། སྒྱུ་འཕྲུལ་མ་དང་སངས་རྒྱས་སྒྲོལ་མ་གཉིས་ལ་ཡག་བཙོག་གིས་ཁྱད་པར་ཅུང་ཡོད་ན་ཐང་མོད། མཆན་ཁུང་དང་མཆན་སྤུ་ལ་ནི་ཁྱད་པར་མེད་ཐག་ཆོད་པས། གོའུ་ཏ་མ་མཆན་ཁུང་ནས་སྐྱེས་པ་མིན་པར་རྦད་དེ་རང་ཐག་ཆོད་སོང་། དེ་བས་དཀྲོགས་གཏམ་འདི་དང་པོ་སྤེལ་མཁན་ལིམ་བི་ནིའི་རྒན་མོ་ཞིག་ཡིན་པ་ཐག་ཆོད་ཡིན་བསམ་ནས། མི་ལོ་ཉིས་སྟོང་ལྔ་བརྒྱ་ལོན་པའི་རྒན་མོ་ཞིག་བཙལ་ཏེ་གསལ་བོར་འདྲི་དགོས་བསམ་ཡང་། ལིམ་བི་ནིའི་རྒན་མགོ་དཀར་དག་ལ་རེ་རེ་བཞིན་དྲིས་ནའང་། བརྒྱད་ཅུའི་སྒང་ལ་འདྲི་ས་རག་མ་སོང་།
4 ཡང་བསམ་བློ་གཞན་ཞིག་བཏང་ན། ཅིག་བྱས་ན་སངས་རྒྱས་གོའུ་ཏ་མ་འཁྲུངས་དུས་འགྲམ་གྱི་མི་དེ་ཚོས། མོ་མཚན་དང་མཆན་ཁུང་ནོར་བ་ཡིན་ན་ཐང་བསམ་སོང་མོད། འོན་ཀྱང་སངས་རྒྱས་སྒྲོལ་མས་དེ་ནི་གཏན་ནས་ནོར་མི་སྲིད་པ་ཞིག་རེད་ཅེས་རྦད་དེ་ཁས་བླངས་མ་སོང་། ཡང་བསམ་བློ་གཞན་ཞིག་བཏང་ན། ཅིག་བྱས་ན་སྒྱུ་འཕྲུལ་མའི་མོ་མཚན་མཆན་ཁུང་ན་ཡོད་དེ། དངོས་གནས་མཆན་ཁུང་ནས་འཁྲུངས་པའང་ཡིན་ན་ཐང་བསམ་སོང་མོད། སངས་རྒྱས་སྒྲོལ་མས་དེ་ཡང་གཏན་ནས་ཁས་བླངས་མ་སོང་། གལ་སྲིད་གོའུ་ཏ་མ་དངོས་གནས་མཆན་ཁུང་ནས་འཁྲུངས་པར་གཏན་ཁེལ་དགོས་ན། ད་ནི་རིགས་པས་བསྒྲུབ་རྒྱུ་མ་གཏོགས་ཐབས་མེད་རེད། ཟས་གཙང་མའི་ལིངྒ་ཧ་ཅང་རིང་པོ་ཅུང་གཡས་ལ་ཕྱོགས་པ། སྒྱུ་འཕྲུལ་མའི་མངལ་གནས་ཀྱང་གློ་བའི་གཡས་འགྲམ་ན་ཡོད་པ། ད་རུང་མངལ་སྒོ་ཡང་ཁ་གནམ་ལ་འཁོར་བ། དེ་ལ་རྒྱུ་རྐྱེན་རྟེན་འབྲེལ་ཚོགས་པས་མཆན་ཁུང་ལ་བུ་ག་རྡོལ་སྟེ་འཁྲུངས་སོ་ཞེས་ལབ་རྒྱུ་རེད། རིགས་ལམ་མ་སྦྱང་བའི་སངས་རྒྱས་སྒྲོལ་མས་ད་ཐེངས་དགག་པ་བརྒྱབ་མ་སོང་ལ་མོས་མཐུན་ཡང་བྱས་མ་སོང་།
5 སངས་རྒྱས་སྒྲོལ་མས། གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ།། ས་ཆེན་འདི་ལ་གོམ་པ་བདུན་བོར་ནས།། ཞེས་སྔོན་ལ་བཏོན་སོང་། ང་ནི་འཇིག་རྟེན་འདི་ན་མཆོག་ཅེས་གསུང་།། དེ་ཚེ་མཁས་པ་ཁྱེད་ལ་ཕྱག་འཚལ་ལོ།། ཞེས་ངེད་གཉིས་མཉམ་དུ་བཏོན་ཡིན། སངས་རྒྱས་གོའུ་ཏ མ་མ་གཏོགས་སྐྱེས་མ་ཐག་ཡར་ལངས་ནས་འགྲོ་ཐུབ་མཁན་ཞིག་ཡོད་རྒྱུ་མ་རེད་ཟེར། ད་རུང་ང་ལ་ཁྱོད་ལོ་གཅིག་འགོར་ནའང་ད་རུང་ཡར་ལངས་མི་ཐུབ་ནི་ཅན་པོ་ཡིན་ན་ཐང་ཟེར། རྟ་དང་བ་གླང་། ནོར་དང་ལུགས་སོགས་སྐྱེས་མ་ཐག་ཡར་ལངས་ནས་འགྲོ་ཐུབ་པ་མཐོང་མྱོང་ཡོད་མོད། འོན་ཀྱང་མི་ཞིག་སྐྱེས་མ་ཐག་ཡར་ལངས་ནས་འགྲོ་བ་དེ་འདྲ་གཏན་ནས་མཐོང་མྱོང་མེད་པས། ཡང་ང་རྦད་དེ་མགོ་འཐོམ་སོང་། འོན་ཀྱང་བསམ་བློ་ཁ་ཐུག་བཏང་ན། ནོར་ངོ་མ་ང་སྐྱེ་སྟངས་དེ་ནོར་མི་འདུག། གོའུ་ཏ་མ་འཁྲུངས་སྟངས་དེ་ནོར་ཡོད་པ་འདྲ།
6 སངས་རྒྱས་སྒྲོལ་མས། ང་ལ་ཁྱོད་དང་སངས་རྒྱས་གོའུ་ཏ་མ་གཉིས་འདྲ་གི་མ་རེད་ཅེས་ཡང་ཡང་བསྙད་བསྐོས་སོང་བས། ང་ཡང་འདུག་མ་བཟོད་པར། འདྲ་གི་རེད། ཕལ་ཆེར་ཕལ་ཆེར་འདྲ་གི་རེད། འོན་ཀྱང་ཚང་མ་འདྲ་གི་མ་རེད། སངས་རྒྱས་གོའུ་ཏ་མ་སྐྱེས་མ་ཐག་ཡར་ལངས་པ་རེད། ང་སྐྱེས་ནས་ལོ་གཅིག་འགོར་རྗེས་ཡར་ལངས་པ་རེད། ངེད་གཉིས་ལ་ལོ་གཅིག་གིས་ཁྱད་པར་མ་གཏོགས་མེད་གི། ང་ཨ་མའི་སྨད་ཕྱོགས་རྐུབ་ནས་སྐྱེས་པ་རེད། གོའུ་ཏ་མ་ཨ་མའི་སྟོད་ཕྱོགས་མཆན་ཁུང་ནས་འཁྲུངས་པ་རེད། སྐྱེ་སའི་གནས་ལའང་མཐོ་གསུམ་ཙམ་གྱིས་མཐོ་དམན་མ་གཏོགས་མེད་གི། ང་སེམས་ཅན་འདོགས་ས་ཤོད་ནས་ཨ་མ་གཅིག་པོས་སྐྱེས་པ་ཡིན་ཟེར་མྱོང་། གོའུ་ཏ་མ་བསིལ་གྲིབ་ལྡན་པའི་ལྗོན་ཤིང་ཞིག་གི་ཡལ་གའི་འོག། ཞལ་ཏ་མ་མང་པོས་སྐྱེ་རོགས་བྱས་ནས་འཁྲུངས་འདུག། འོན་ཀྱང་སྐྱེ་ས་མ་འགྲིག་པའམ། སྐྱེ་སྟངས་མ་འགྲིག་པ་ཅིག་ཡིན་ས་རེད། སྐྱེས་ནས་ཞག་གསུམ་མ་གཏོགས་མ་འགོར་བར་ཨ་མ་གྲོངས་འདུག། ངའི་ཨ་མ་རང་ལོ་བརྒྱད་ཅུ་བརྒལ་ནས་ད་རུང་བདེ་འཚམས་ཡིན།
7 སངས་རྒྱས་གོའུ་ཏ་མ་སྐྱེས་མ་ཐག་ཡར་ལངས་པ་བདེན་མོད། འོན་ཀྱང་ཡར་ལངས་ནས་གོམ་པ་བདུན་མ་གཏོགས་བོར་ཐུབ་མི་འདུག། ང་ནི་སྐྱེས་མ་ཐག་ཡར་ལངས་མ་ཐུབ་པ་བདེན་མོད། འོན་ཀྱང་ལོ་གཅིག་གི་རྗེས་ཡར་ལངས་ནས་གོམ་པ་བདུན་ལས་མང་བ་བོར་ཐུབ་ཡོད། དེ་བས་སངས་རྒྱས་གོའུ་ཏ་མ་དང་ངེད་གཉིས་གཅིག་པ་མིན་ཡང་འདྲ་བོ་འདྲ་བོ་རེད། སྤྱིར་ན་གོའུ་ཏ་མ་མ་གཏོགས་སྐྱེས་མ་ཐག་ཡར་ལངས་ནས་འགྲོ་ཐུབ་མཁན་ཞིག་བྱུང་མྱོང་མེད་པས། ཁོང་རང་ཐོག་མ་རེད་ལ་མཐའ་མའང་ཡིན་རྒྱུ་རེད། མཐའ་ན་འཁོར་བ་འཇིག་དང་གསེར་ཐུབ་འོད་སོགས་ཀྱང་འཁྲུངས་མ་ཐག་ཡར་ལངས་ནས་སོང་བ་དེ་འདྲ་གོ་མྱོང་མེད། མ་འོངས་པར་བྱམས་པ་མགོན་པོ་ཡང་དཀའ་རྒྱུ་རེད་བསམ་གི།
8 སངས་རྒྱས་གོའུ་ཏ་མས་ས་ཆེན་ལ་གོམ་པ་བདུན་ཐོག་མར་བོར་དུས། ཞབས་རྗེས་ནས་མེ་ཏོག་བདུན་ཆེད་དུ་སྐྱེས་པ་རེད་ཟེར། འོན་ཀྱང་སངས་རྒྱས་གོའུ་ཏ་མ་ཆེན་པོ་ཆགས་དུས། དོན་དེ་དྲན་གི་ཡོད་མེད་གང་ཤེས། ངས་ནི་ས་ཆེན་ལ་གོམ་པ་མང་པོ་བོར་དུས། ཆེད་དུ་སྐྱེས་པ་ཡིན་མིན་གང་ཤེས་ཏེ། མེ་ཏོག་བདུན་ལས་མང་བ། སྣ་བརྒྱའི་མེ་ཏོག་རྣམ་པར་བཞད་ཡོད་པ་གསལ་བོར་དྲན་གི། སྤྱིར་ན་དབྱར་ཁ་མེ་ཏོག་སྐྱེ་བ་དང་དགུན་ཁ་ཁ་བ་འབབ་པ་ལྟ་བུ་ནི་གོའུ་ཏ་མ་སྐྱེས་མ་སྐྱེས་ལ་འབྲེལ་བ་གང་མེད་མོད། རིག་བྱེད་པའི་བྲམ་ཟེ་དེ་ཚོ་རྫིག་པོ་བཟོ་རྒྱུར་དགའ་དྲགས་པས། གོའུ་ཏ་མ་ཡང་བྲམ་ཟེ་དེ་ཚོའི་ལག་ཏུ་ཤོར་སོང་བ་མིན་ནམ་སྙམ་གི
9 ལིམ་བིའི་ཚལ་ནས་ཤཱཀྱའི་གྲོང་ཁྱེར་ལ་ཐག་མི་རིང་བ་ཤེས་མོད། ས་ཆ་གང་ཡིན་ཏག་ཏག་ཅིག་སུས་ཀྱང་མི་ཤེས། གལ་སྲིད་ཏག་ཏག་ཅིག་ཤེས་ན། གནའ་བོའི་གྲོང་ཁྱེར་དེ་ལ་འཆམ་འཆམ་ཞིག་བྱེད་ན་འདོད་སོང་། བདུད་ལྷས་བྱིན་དང་སངས་རྒྱས་གོའུ་ཏ་མ་གཉིས་མཉམ་དུ་ཡང་ཡང་སོང་མྱོང་བའི་ས་ཆ། སྐྱེ་རྒ་ན་འཆིའི་སྡུག་བསྔལ་གཏན་ནས་མཐོང་ཡ་མེད་པའི་གནས་ཆེན། འཇིག་རྟེན་དགའ་བའི་དཔལ་ལ་རོལ་སའི་གནས་མཆོག་མེ་ཏོག་གླིང་ལའང་མཇལ་འདོད་ཆེན་པོ་ཞིག་སྐྱེས་སོང་། ལྷག་ཏུ་གོའུ་ཏ་མ་ནེ་ར་ཇྱ་ནར་འབྲོ་སའི་གློ་སྒོ་དང་། གོའུ་ཏ་མས་སྐྱེ་རྒ་ན་འཆིའི་སྡུག་བསྔལ་ཐོག་མར་མཐོང་ས། ཕྱོགས་བཞིའི་སྒོ་ཆེན་བཞི་ལའང་རྒྱང་མཇལ་ཞིག་བྱེད་ན་འདོད་སོང་།
10 སངས་རྒྱས་སྒྲོལ་མས། ངེད་གཉིས་ཤཱཀྱའི་གྲོང་ལ་མི་འགྲོ་ཟེར། གྲོང་ཁྱེར་གྱི་ཕྱོགས་བཞིའི་སྒོ་བཞི་ལ་ལྷག་ཏུ་མི་འགྲོ་ཟེར། རྒྱུ་མཚན། མི་ལོ་ཉིས་སྟོང་ལྔ་བརྒྱའི་སྔ་གཞུག་ལ་ཁྱད་པར་མེད་པར། སྐྱེ་རྒ་ན་འཆིའི་སྡུག་བསྔལ་ཁུར་བའི་མི་ནི་ད་རུང་སྔར་ལས་མང་མིན་ན་ཉུང་མ་རེད་ཟེར། ཁྱོད་ལ་འཁོར་བའི་སྡུ་བསྔལ་མཐོང་ནས་ནེ་ར་ཇྱ་ནར་འབྲོ་འདོད་རེ་སྐྱེས་བཞག་ན། ཅིག་བྱས་ན་བུད་འགྲོ་ན་ཐང་མོད། འོན་ཀྱང་ང་ནི་འཇིག་ཟིན་པའི་མཁར་ཤུལ་རྙིང་ཀོག་འདི་བསྲུངས་ནས་ཁེར་འདུག་བྱེད་མི་འདོད་ཁོ་ཁག་ཡིན་ཟེར། ད་རུང་གྲགས་འཛིན་མ་ནང་བཞིན་དེ་འདྲའི་ལོ་མང་པོར་སྒུག་ཀྱང་མི་ཐུབ། ལྷག་ཏུ་འོ་མའི་ཚལ་དུ་ཁྱོད་སར་ཡོང་ནས་ཇོ་མོ་དེ་འདྲ་གཏན་ནས་བཟོ་མི་ཐུབ་ཟེར་རོ།།
2024.12.11 ཉིན་ལིམ་བིའི་ཚལ་དུ་སྦྱར་རོ།།