བོད་ཀྱི་སྐད་ལ་མི་ཤེས་པ། །
ཕལ་ཆེར་ཐོས་པ་ཆུང་བའི་སྐྱོན། །
འགའ་ཞིག་འགྱུར་གྱི་བྱེ་བྲག་དང༌། །
ཡུལ་སྐད་དག་གིས་བསྒྲིབས་པ་ཡོད། །
བོད་ཀྱི་སྐད་ལ་འཆད་པ་པོ་དག་གིས་ཅུང་ཟད་མ་ཤེས་པ་ཡོད་དེ། དེ་དག་ནི་ལོ་ཙཱ་བ་སྔ་རབས་པ་དང་ཕྱི་རབས་པ་དག་གིས་བརྡ་གསར་རྙིང་གི་ཁྱད་པར་ལ་བྱུང་བའང་ཡོད། ལ་ལས་རྒྱ་གར་གྱི་རང་སྐད་དུ་བཞག ལ་ལས་བོད་སྐད་དུ་བསྒྱུར། དེ་གཉིས་མ་འཕྲོད་པས་མ་ཤེས་པའང་ཡོད། ལ་ལས་སྒྲ་འགྱུར་ལ་དོན་འགྱུར་དུ་བྱས་པའང་ཡོད། སྒྲ་འགྱུར་ལའང་ཁམས་ཐ་དད་ཀྱིས་དྲངས་པས་སྒྲ་དོན་མི་འདྲ་བ་ཐ་དད་དུ་སོང་བ་ཡོད། འགའ་ཞིག་ཡུལ་ཐ་དད་ཀྱི་སྐད་ཀྱི་ལུགས་སུ་བསྒྱུར་བས་འགའ་ཞིག་ལ་མ་གྲགས་པའི་སྟོབས་ཀྱིས་མ་ཤེས་པར་སོང་བ་ཡོད། དཔེར་ན་ཧྲགས་ལ་བྱེ་མ་ཀ་ར་དང༌། །གླ་གོར་ཞོ་ཤ་ལ་གོ་ཡུ་དང༌། །རིན་ཆེན་ཏོག་ལ་རིན་ཆེན་དབལ་དང༌། །ནམ་ཡང་ལ་གཞར་ཡང་ལ་སོགས་པ་བོད་ཀྱི་བརྡ་རྙིང་པ་རྣམས་དེང་སང་གོ་དཀའ་བ་དང༌། གཞན་ཡང་ཤཱཀྱ་ལ་ཕོད་པར་བསྒྱུར། གོ་པ་ལ་ས་འཚོར་བསྒྱུར། མ་ག་དྷཱ་ལ་བྱིངས་འཛིན། ཝཱ་རཱ་ཎ་སཱི་ལ་འཁོར་མོ་འཇིག ཀོ་ས་ལ་ལ་མཛོད་ལེན། སིནྡྷུ་ར་ལ་ལི་ཁྲིར་བསྒྱུར་བ་ལ་སོགས་པ་སྒྲ་མི་ཤེས་ན་གོ་དཀའ་བ་དང༌། གཞན་ཡང་གདུགས་དཀར་ལ་ཚད་སྐྱོབ་དཀར་པོ། སྨོན་ལམ་ལ་ཡོངས་སུ་བསྒྱུར་བ། དགེ་བ་ལ་ངན་འབྱོལ་ལ་སོགས་པ་ལྟ་བུ་སྒྲའི་ཁམས་མི་ཤེས་ན་གོ་དཀའ། སྒྲ་འགྱུར་ཉིད་ལའང་ཁམས་ཐ་དད་ཀྱིས་འགྲོ་བ་ཡོད། དཔེར་ན་ཀཱ་ཡའི་སྒྲ་དབྱངས་སུ་འགྲོ་བ་དང༌། ལེན་པའི་སྒྲ་གཅད་པར་འགྲོ་བ་དང༌། འཁོར་བའི་སྒྲ་འཁྲུལ་པར་འགྲོ་བ་ལ་སོགས་པ་སྒྲ་མི་ཤེས་ན་ནི་གོ་དཀའ་བ་ཡོད། གཞན་ཡང་རང་རང་གི་ཡུལ་གྱི་སྐད་དུ་བསྒྱུར་བས། མདའ་ལ་ཉག་ཕྲན། གཞུ་ལ་གནམ་རུ། ཏོག་ཙེ་ལ་འཇོར་རམ་ཤིམ་པ། གཤོལ་ལ་ཐོང་པ། གཞོང་པ་ལ་ཡོལ་གོ བུ་རམ་ལ་ལྀ་ཁ་ར། འཕངས་པ་ལ་འགྱོང་པ། ལག་པ་ལ་སུག་པ། བཞོན་པ་ལ་ཕྱུགས་ཆུང༌། ཆུད་མི་འཛའ་བ་ལ་ཆབ་མི་འཚལ་བ་ལ་སོགས་པ་ཡུལ་ཕན་ཚུན་དུ་མ་གྲགས་པ་བསྒྱུར་བས་གོ་དཀའ་བ་ཡོད།
འགའ་ཞིག་རྣམ་གྲངས་ནོར་བ་དང༌། །
ལ་ལས་ས་མཚམས་འཆུགས་པ་དང༌། །
ལ་ལ་མུན་སྤྲུལ་ཀྱིས་བསླད་པས། །
ལོག་པར་བསྒྱུར་བ་གོ་བ་དཀའ། །
སཾ་སྐྲྀ་ཏའི་རྣམ་གྲངས་ཀྱི་སྒྲ། །བསེ་རུ་ལ་རལ་གྲི་རལ་གྲི་ལ་བསེ་རུར་བསྒྱུར་བ་དང༌། རྗེས་དང་རྐང་པའི་སྒྲ་བཟློག་ནས་བསྒྱུར་བ་དང༌། བྱིས་པ་དང་བྱེ་མ་དང་སྐྲའི་སྒྲ་ཕན་ཚུན་འཆོལ་བར་བསྒྱུར་བ་ལ་སོགས་པ་དང༌། ལ་ལ་ས་མཚམས་འཆུགས་པ་ཡོད་དེ། རྣམ་དབྱེ་གསུམ་པའི་ནའི་སྒྲ་ཚིག་འོག་མའི་དགག་པའི་སྒར་འོག་ཏུ་སྦྱར་བ་དང༌། ཚིག་འོག་མའི་དགག་སྒྲའི་ན། གོང་མའི་རྣམ་དབྱེ་གསུམ་པའི་ནའི་སྒྲ་ཡར་སྦྱར་བའི་སྟོབས་ཀྱིས་སྒྲ་འཁྲུལ་པར་བསྒྱུར་བ་དང༌། གཏོར་མ་ཤ་ཁྲག་མེད་པ་ལ། །ཁྲག་མེད་པའི་གཏོར་མ་ཤ་དང་བཅས་པར་བསྒྱུར་བ་ལ་སོགས་པ་གཅོད་མཚམས་འཆུགས་པས་དོན་ནོར་བར་བསྒྱུར་བའང་ཡོད། ལ་ལ་སྒྲ་མི་ཤེས་པས་མ་རྟོགས་ཏེ་མུན་སྤྲུལ་དུ་བསྒྱུར་བ་སྙིང་པོ་ལ་མདར་བསྒྱུར་བ་དང༌། ལྗང་གུ་ལ་འཕྲོག་པ་དང༌། འབྱུང་པོའི་དབང་པོ་ལ་བརྒྱ་བྱིན་བྱང་ཆུབ་ཏུ་བསྒྱུར་བ་ལ་སོགས་པ་འཁྲུལ་པར་བསྒྱུར་བའི་སྟོབས་ཀྱིས་བརྗོད་བྱའི་དོན་ཇི་ལྟར་ཡིན་པ་མི་རྟོགས་པ་མཐོང་ངོ༌། །
ལ་ལ་སྔོན་རབས་ལས་བྱུང་བའི། །
གཏམ་རྒྱུད་ལེགས་པར་མི་ཤེས་པས། །
མིང་གི་རྒྱུ་མཚན་མ་རྟོགས་ནས། །
ལོག་པར་བསྒྱུར་བ་ཅུང་ཟད་མཐོང༌། །
མུ་སྟེགས་བྱེད་ཀྱི་སྔོན་རབས་དང༌། །མདོའི་རྟོགས་པ་བརྗོད་པ་སྣ་ཚོགས་ལས། །སེམས་ཅན་གྱི་མིང་དང་ཡུལ་གྱི་མིང་ཐ་དད་དུ་འདོགས་པ་རྣམས་སྔོན་རབས་ཀྱི་གཏམ་རྒྱུད་མ་ཤེས་པས། ལོ་ཙཱ་བ་མཁས་ཀྱང་ཕྱིན་ཅི་ལོག་ཏུ་བསྒྱུར་བ་མཐོང་སྟེ། དཔེར་ན་ས་ར་སྭ་ཏཱི་སྒྲ་སྔོན་རྒྱ་མཚོ་བསྲུབས་པ་ལས་བྱུང་བས་མཚོ་ལས་བྱུང་བ་ཡིན་མོད་ཀྱི། གཏམ་རྒྱུད་མ་གཟིགས་པ་དང་བོད་ཀྱིས་གོ་བདེ་བར་བྱ་བའི་དོན་དུ་དབྱངས་ཅན་མར་བསྒྱུར་རོ། །ས་ར་སྭ་ཏཱི་ཞེས་སྒྲ་བཟློག་ན་དབྱངས་ཅན་ཡིན་མོད་ཀྱི། འདིར་ས་ར་སྭ་ཏཱི་ཡིན་པས་དབྱངས་ཅན་དུ་བསྒྱུར་དུ་མི་རུང་ངོ༌། །དེ་བཞིན་དུ་གླང་པོ་ཆེ་ས་སྲུང་གི་བུའང་དེ་དང་འདྲའོ། །ཡང་པྲིདྡྷ་སནྡྷ་ན་ཞེས་བྱ་བ་གཏམ་རྒྱུད་ལས་ལྷ་མ་ཡིན་རྒན་མོ་ཞེས་བྱ་བ་ལུས་ཕྱེད་དུ་སོང་བ་སྦྱར་བ་ཡིན་མོད་ཀྱི། རྒན་པོས་སྦྱར་བ་ཞེས་བྱ་བར་བསྒྱུར་བ་དང༌། བྷ་གི་ར་ཐ་ཞེས་བྱ་བ་སྔོན་རབས་ལས་བདག་ཉིད་ཆེན་པོ་དུག་ཅན་པའི་བུ་མོ་དག་གི་བྷ་ག་བསྲུབས་པ་ལས་སྐྱེས་པས་བྷ་ག་སྲུབ་ཅེས་བྱ་བ་ཡིན་མོད་ཀྱི། སྒྲ་འགྱུར་དུ་སྐལ་ལྡན་ཤིང་རྟ་ཞེས་བསྒྱུར་བ་དང༌། གོ་དཱ་ཝ་རི་ཞེས་བྱ་བ་དྲང་སྲོང་ཞིག་གིས་བ་ལང་བསད་པའི་སྡིག་སྦྱོང་གི་ཆུ་ཡིན་པས། བ་ལང་བསད་པའི་ཆུ་ཞེས་བྱ་བར་འགྱུར་མོད་ཀྱི། བའི་མཆོག་སྦྱིན་ཞེས་དོན་འགྱུར་བྱས་པ་དང༌། ན་ར་ཡ་ནའི་སྒྲ་མིའི་ཐེག་པ་བྱ་བ་ཡིན་མོད་ཀྱི་སྲེད་མེད་ཀྱི་བུར་བསྒྱུར་བ་དང༌། མནྡ་ཀའི་སྒྲ་དལ་འགྲོའམ་གྱ་གྱུ་ཞེས་བྱ་བ་ཡིན་མོད་ཀྱི། དལ་གྱིས་འབབ་ཏུ་བསྒྱུར་བ་དང༌། མནྨ་ཐའི་སྒྲ་བདུད་སྡིག་ཅན་གྱིས་སེམས་ཅན་གྱི་ཡིད་བསྲུབས་པས་ཡིད་སྲུབ་དང༌། ཨ་ནཾ་ག་ཀྲྀ་ཌའི་སྒྲ་ལུས་མེད་པ་སེམས་ཅན་གྱི་སེམས་རོལ་ཅིང་རྩེ་བར་བྱེད་པས་ལུས་མེད་རྩེན་བྱ་བར་འཐད་མོད་ཀྱི། འདོད་པའི་བདུད་དམ་འདོད་པའི་ལྷར་བསྒྱུར་བ་དང༌། སྐནྡྷའི་སྒྲ་སྨིན་དྲུག་གི་བུས་ལྷ་མ་ཡིན་གྱི་དམག་དཔུང་མཐོང་བ་ན་ངུས་པས་དྲང་པོར་བསྒྱུར་ན་ངུ་བ་ཡིན་མོད་ཀྱི། སྐེམ་བྱེད་དུ་བསྒྱུར་བ་དང༌། དྷ་མོ་ད་རའི་སྒྲ་ནོར་ལྷའི་བུ་བྱིས་པའི་གནས་སྐབས་ན་ཐ་གུ་ལྟོ་བ་ལ་དཀྲིས་པས་ཐ་གུ་ལྟོ་ཞེས་འཐད་མོད་ཀྱི་ཁྱབ་འཇུག་ཏུ་བསྒྱུར་བ་དང༌། སིངྒ་ལའི་སྒྲ་དེད་དཔོན་སེང་གེ་ཞེས་བྱ་བས་རྒྱ་མཚོ་ལས་ནོར་བུ་ལེན་པའི་ཚེ་རྙེད་པའི་གླིང་ཡིན་པས། དོན་དུ་སེངྒེའི་གླིང་ཞེས་བྱ་བ་ཡིན་མོད་ཀྱི། སིངྒ་ལར་གཞག་པ་དང༌། ཧི་མ་ལ་ཡའི་སྒྲ་ལྷ་མོ་ཨུ་མའི་ཕ་དབང་ཕྱུག་ཆེན་པོ་འདུག་པའི་གནས། མཚོ་མ་དྲོས་པ་དང་ཉེ་བའི་རི་བོ་གངས་ཅན་ཞེས་བྱ་བ་ཡིན་མོད་ཀྱི། ལོ་ཙཱ་མི་ཤེས་པ་དག་གིས་ཏི་སེར་བསྒྱུར་བ་འགའ་རེ་མཐོང༌། གངས་ཅན་ལ་རྒྱ་གར་སྐད་ཧི་མ་ལ་ཡ་ཟེར། ཏི་སེ་ལ་རྒྱ་གར་སྐད་དུ་ཀེ་ཏ་ར་ཟེར་བ་ཡིན། གངས་ཅན་དང་ཏི་སེ་གཉིས་རྒྱ་གར་གྱི་སྒྲ་ཡང་ཐ་དད། དོན་ཡང་ཐ་དད་དུ་གནས་པ་ལ་མ་ཤེས་པས་འཁྲུལ་པར་བསྒྱུར་བ་ཡོད་དོ། །
འགའ་ཞིག་བོད་ལ་གོ་བདེའི་ཕྱིར། །
ལེགས་པར་སྦྱར་ལ་མེད་ན་ཡང༌། །
ཅུང་ཟད་ལྷག་པར་བསྒྱུར་བ་ཡོད། །
དེ་ལ་མཁས་པས་བཤད་མི་དགོས། །
ལེགས་པར་སྦྱར་བའི་སྐད་ལ་མེད་ཀྱང་བོད་ཀྱིས་གོ་བདེ་བར་བྱ་བའི་ཕྱིར་ཚིག་གི་རྒྱན་ཅུང་ཟད་བསྣན་ནས་བསྒྱུར་བ་ཡོད་དེ། རྒྱ་གར་ལ་སྒྲ་མེད་ཀྱང་རིན་པོ་ཆེ་བཻ་ཌཱུ་རྻ་དང༌། རིན་པོ་ཆེ་པདྨ་རཱ་ག་ཞེས་བྱ་བ་ལ་སོགས་པ་དང༌། རྒྱ་གར་ལ་མེ་ཏོག་གི་སྒྲ་མེད་ཀྱང་མེ་ཏོག་ཨུཏྤ་ལ་དང༌། མེ་ཏོག་པདྨ་དང༌། མེ་ཏོག་སཽ་གནྡྷི་ཀ་ཞེས་བྱ་བ་ལ་སོགས་པ་བསྣན་པ་དང༌། རྒྱ་གར་ལ་ཤིང་གི་སྒྲ་མེད་ཀྱང་ཤིང་ནྱ་གྲོ་དྷ་དང༌། ཨ་ཤྭ་ཀ་དང༌། ཤིང་པ་ལ་ཤ་ཞེས་བྱ་བ་ལ་སོགས་པ་བསྣན་པ་དང༌། རྒྱ་གར་ལ་རི་དྭགས་ཀྱི་སྒྲ་མེད་ཀྱང་འགའ་ཞིག་གིས་རི་དྭགས་ཁྲི་སྙན་ས་ལེ་དང༌། རི་དྭགས་ཨེ་ཎ་ཡ་ཞེས་བྱ་བ་ལ་སོགས་པ་བསྣན་པ་དང༌། རྒྱ་གར་ལ་ཉའི་སྒྲ་མེད་ཀྱང་ཉ་ཏི་མི་ལ་སོགས་པ་དེ་དག་བསྣན་པའི་རྒྱུ་མཚན་གང་ཡིན་སྙམ་ན། བོད་བརྡ་མི་ཤེས་པ་དག་གིས། རིན་པོ་ཆེ་དང༌། མེ་ཏོག་དང༌། ཤིང་དང༌། རི་དྭགས་དང༌། གོས་དང༌། སྲོག་ཆགས་ཀྱི་བྱེ་བྲག་ལ་སོགས་པའི་མིང་གང་ཡིན་ཞེས་དོགས་པ་སྐྱེ་བས། དེ་གཅད་པའི་དོན་དུ་རིན་པོ་ཆེ་དང༌། མེ་ཏོག་དང༌། ཤིང་ལ་སོགས་པ་བསྣན་པའོ། །དེ་བཞིན་དུ་ཡེ་ཤེས་དང༌། ཕྱག་རྒྱ་དང༌། གོ་རིམ་ལ་སོགས་པ་ལ་རྒྱ་གར་ན་ཡེ་དང༌། ཕྱག་དང༌། གོ་ལ་སོགས་པའི་སྒྲ་མེད་ཀྱང་བོད་ལ་ཚིག་སྦྱར་བ་བདེ་བའི་དོན་དུ་བསྣན་ནས་བསྒྱུར་བ་དང༌། རྒྱ་གར་ལ་ཞེ་སའི་སྒྲ་དང་ཕལ་པའི་སྒྲ་ཕལ་ཆེར་ཁྱད་མེད་ཀྱང༌། སངས་རྒྱས་ཀྱིས་གཞན་ལ་སྨྲས་པ་བཀའ་སྩལ། གཞན་གྱིས་སངས་རྒྱས་ལ་ཞུས་པ་ལ་གསོལ་པ། མཉམ་པོ་ཕན་ཚུན་འདྲི་བ་ལ་སྨྲས་པ་ཞེས་བྱ་བར་བསྒྱུར། དེ་བཞིན་དུ་ཞེ་ས་དང་ཞེ་ས་མ་ཡིན་པའི་ཚིག་ཐམས་ཅད། བོད་ཀྱི་ཚིག་བཟང་ངན་ལ་གོ་བདེ་བར་སྒྱུར་ཅིག་ཅེས་སྐད་གསར་བཅད་ལས་འབྱུང་བ་ལྟར་ཤེས་པར་བྱའོ། །གཞན་ཡང་རྒྱ་གར་ལ་ལྷའི་མེ་ཏོག་དང༌། ལྷའི་བདུག་སྤོས་དང་ཞེས་བྱ་བ་ལ་སོགས་པ་ལ་འགའ་ཞིག་གིས་རྫས་ཀྱི་སྒྲ་བསྣན་ནས། ལྷ་རྫས་ཀྱི་མེ་ཏོག་དང་ལྷ་རྫས་ཀྱི་བདུག་སྤོས་དང་ཞེས་བྱ་བ་ལ་སོགས་པར་བསྒྱུར་བ་དང༌། དེ་བཞིན་དུ་མེ་ཏོག་ཟ་བ་དང་བདུག་སྤོས་ཟ་བ་དང་ཞེས་བྱ་བ་ལ་སོགས་པ་ལ་ཟས་སུའི་སྒྲ་བསྣན་ནས་ཟས་སུ་མེ་ཏོག་ཟ་བ་དང༌། ཟས་སུ་བདུག་སྤོས་ཟ་བ་དང༌། ཟས་སུ་དྲི་ཟ་བ་དང་ཞེས་བྱ་བ་ལ་སོགས་པར་བསྒྱུར་བ་དང༌། དེ་བཞིན་དུ། གཞན་ཡང་བོད་ཀྱི་མགོ་བདེ་བའི་དོན་དུ་ཚིག་གི་ལྷད་བག་རེ་བསྣན་པ་ཡོད་མོད། དེ་ཤེས་པར་བྱས་ལ་བཤད་པ་དཀྱུས་མའི་ནང་དུ་མི་གཞུག གལ་ཏེ་བཅུག་ན་སྒྲ་ཤེས་པ་རྣམས་ཀྱིས་ཁྲེལ་བར་འགྱུར་ཏེ། དཔེར་ན་ཡེ་ཤེས་ལ་གདོད་མའི་ཤེས་པ་དང༌། བཅོམ་ལྡན་འདས་ལ་མྱ་ངན་ལས་འདས་པ་དང༌། ཕྱག་རྒྱ་ཆེན་པོ་ལ་ལག་པའི་རྒྱར་བཤད་པ་ལ་སོགས་པ་བོད་ལ་བཤད་དུ་རུང་ཡང༌། སྒྲ་ཤེས་པས་མཐོང་ན་བཞད་གད་ཀྱི་གནས་སུ་འགྱུར་བའི་ཕྱིར་རོ། །
འགའ་ཞིག་དོགས་པ་བཟློག་པའི་ཕྱིར། །
རྣམ་གྲངས་ཟློག་པར་བཤད་ན་ཡང༌། །
དེ་དག་སྐྱོན་དུ་མི་གཟུང་སྟེ། །
དགོས་པ་མཐོང་ནས་བཤད་ཕྱིར་རོ། །
དཔེར་ན་བརྒྱད་སྟོང་པ་ལས། འདབ་ཆགས་བྱ་ཞིག་ཅེས་འབྱུང་སྟེ། འདབ་ཆགས་དང་བྱ་གང་རུང་གིས་དོན་གོ་མོད་གཉིས་ཀ་བཟླས་པ་དོན་མེད་དོ་སྙམ་ན་མ་ཡིན་ཏེ། འདབ་ཆགས་ལ་སཾ་སྐྲྀ་ཏས་པ་ཀྵི་ཟེར་ལ། སྒྲ་དེ་ཕྱོགས་ལ་སོགས་པ་མང་པོ་ལ་འཇུག་པས་དེ་སྤང་བའི་དོན་དུ་བྱ་ཞེས་སྨོས་སོ། །ཡང་བྱ་ལ་སཾ་སྐྲྀ་ཏའི་སྐད་ཤ་ཀུ་ན་ཞེས་ཟེར་ལ། དེ་བཀྲ་ཤིས་དང་དགེ་མཚན་ལ་སོགས་པ་གཞན་ལ་ཡང་འཇུག་པས། དེ་གཅད་པའི་དོན་དུ་འདབ་ཆགས་ཞེས་སྨོས་པ་ཟློས་པའི་སྐྱོན་མེད་དོ། །དེ་བཞིན་དུ་ཤིང་ལྗོན་པ་ལ་སོགས་པ་ལའང་སྦྱར་ཏེ་ཤེས་པར་བྱའོ། །
འགའ་ཞིག་གུས་པ་བསྐྱེད་པའི་ཕྱིར། །
བཟླས་པའི་ཚིག་དོན་སྦྱོར་བར་བྱེད། །
སངས་རྒྱས་བཅོམ་ལྡན་འདས་ཞེས་བྱ་བ་ལ་གང་རུང་གིས་གོ་བ་ལ་གཉིས་བཟླ་ཅི་དགོས་སྙམ་ན། འདི་ལ་ཊཱི་ཀ་བྱེད་པ་འགའ་ཞིག་གིས་འདི་ལྟར་བཤད་དེ། སངས་རྒྱས་ཞེས་ཚིག་རྐྱང་པ་བརྗོད་ན་མ་གུས་པར་འགྱུར་ལ། བཅོམ་ལྡན་འདས་ཞེས་བརྗོད་ན་གུས་པའི་ཚིག་ཏུ་འགྱུར་རོ་ཞེས་ཟེར་རོ། །འགའ་ཞིག་ན་རེ་སངས་རྒྱས་ཞེས་བརྗོད་ན་བློའི་བྱེ་བྲག་ལའང་འཇུག་པས་བཅོམ་ལྡན་སྨོས་སོ། །བཅོམ་ལྡན་ཞེས་བརྗོད་ན་འཇིག་རྟེན་གྱི་ལྷ་ཆེན་པོ་ལ་ཡང་འཇུག་པས་སངས་རྒྱས་ཞེས་སྨོས་སོ། །གཉིས་ཀ་ལྟར་ཡང་འགལ་བ་མེད་དོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ལ་སོགས་པ་ལའང་སྦྱར་བར་བྱའོ། །དེ་བཞིན་དུ་རྒྱལ་པོ་མིའི་བདག་པོའམ། ལྷའི་དབང་པོ་བརྒྱ་བྱིན་ལ་སོགས་པ་ཐམས་ཅད་ལ་བརྟགས་ཏེ་ཤེས་པར་བྱའོ། །དེ་ལྟར་ཚིག་གི་དོན་ལེགས་པར་ཤེས་པར་འདོད་ན། རིག་པའི་གནས་ལྔ་ཀ་ལ་ཅི་རིགས་པར་སྦྱང་དགོས། ཁྱད་པར་དུ་སྒྲ་དང་སྡེབ་སྦྱོར་དང་སྙན་ངག་དང༌། མིང་གི་མངོན་བརྗོད་ལ་སོགས་པ་ལ་འདྲིས་པར་བྱའོ།།