ས་ཡོམ་ཁྲོད་དུ་ཚེ་སྲོག་ཤོར་བ་ཡོངས་ལ་བསྔོ་བའི་ཀ་བཤད།

ཀོ་ལི་གྷ་གཞུང་པ་ཚེ་དབང་བསོད་ནམས།

 
ཀ་ཐ་མན་གྲུར་རླུང་ཁ་ཤོར་ནས་ས་ཡོམ་ཤུགས་ཚད་བདུན་གྱི་འོག །
ཁ་ཙམ་མིན་པའི་གདུང་སེམས་མཉམ་བསྐྱེད་ཁ་བརྡ་བརྒྱུད་ནས་ཕུལ་བ་འདི།།
ག་ས་ག་ལ་གོད་ཆག་ཕོག་པའི་རྐྱེན་འདས་ཡོངས་ལ་བསྔོ་བ་ཡོད།།
ང་ཚོ་འཇིག་རྟེན་མི་ཡི་བྱེད་ལས་འབྱུང་བའི་གནོད་འཚེ་གླིང་འདིར་མང་།།
ཅ་དངོས་ལོངས་སྤྱོད་གྱོང་གུན་ཆེ་ཁར་མི་དང་དུད་འགྲོའི་ཚེ་སྲོག་འཕྲོག །
ཆ་རྒྱུས་ཉམས་མྱོང་མངོན་ཤེས་མེད་པའི་འཇིག་རྟེན་མི་ནི་དུད་འགྲོ་འདྲ།།
ཇ་ཕོར་ཆང་ཕོར་མདུན་དུ་བསྐངས་ནས་ཕྱི་མའི་ལམ་སྣེ་འབྱུང་བས་བསྟན།།
ཉ་དང་འབུ་སྲིན་སྲོག་ཆགས་གྲངས་མེད་ས་དང་རྡོ་ཡི་འོག་ཏུ་ཐིམ།།
ཏ་ཐ་ག་ཏའི་བསྟན་པའི་བྱིན་རླབས་རང་རིགས་བོད་མིར་སྐྱོན་ཆག་ཉུང་།།
ཐ་མཚམས་ཡུལ་གྱི་རི་རྩེར་གནས་པའི་ཁྱིམ་ཚང་དེ་ཚོ་སུ་ལ་རེ།།
ད་ལམ་བྱུང་བའི་ས་ཡོམ་སྔོན་བརྡ་ཚན་རྩལ་རིག་པ་གཟིམ་ལ་ཤོར།།
ནེ་སྤལ་རྒྱལ་ས་ཀ་ཐ་མན་གྲུར་ས་ཡོམ་འོག་གི་གནོད་འཚེའི་ནང་།།
དཔའ་རྩལ་ཆེ་བའི་ཞི་བའི་མི་མང་བློ་རྩལ་རྣོ་ནས་སྐྱོན་ཆག་ཆུང་།།
ཕ་བཟང་འདྲ་བའི་མྱུར་སྐྱོབ་དམག་མིས་ཞི་བའི་མི་མང་ཚེ་སྲོག་བསྐྱབས།།
བ་ཕྱུགས་མ་ཧེ་དུད་འགྲོ་སེམས་ཅན་མགོན་མེད་སྲོག་ཆགས་སྙིང་རེ་རྗེ།།
མ་གྱུར་སེམས་ཅན་བདེ་ཆེན་ཞིང་འདྲེན་འོད་དཔག་མེད་ལ་འཚལ་།
རྩ་བའི་ས་ཡོམ་མི་ཡི་བྱེད་ལས་ས་བཅུད་ཡོངས་རྫོགས་ཉམས་སུ་བཅུག །
ཚ་གྲང་བྱུང་དུས་གཞི་ནས་འགྱོད་ན་རྗེས་ལུས་སྤྱི་ཚོགས་ཡིན་པ་ཐལ།།
ཛ་དྲག་མྱུར་སྐྱོབ་འཛམ་གླིང་ཚང་མས་ས་ཡོམ་ཕོག་ས་ཀུན་ལ་སྙོམས།།
ཝ་ལེར་སོམས་དང་ང་ཚོོ་མི་ནི་ནུས་པ་མེད་པའི་འབུ་སྲིན་འདྲ།།
ཞྭ་རིགས་མི་འདྲའི་མི་རིིགས་མང་བའི་འཇིག་རྟེན་མི་ལ་འབྱུང་གནོད་མང་།།
གཟའ་དང་རྒྱུ་སྐར་རླུང་གི་འཁོར་རྒྱུག་རླུང་ཁ་ཤོར་ནས་འབྱུང་གནོད་མང་།།
འ་ཆད་འུ་ཐུག་སྐྱོན་ཆག་འོག་གི་རྨས་སྐྱོན་ཕོག་རྣམས་མྱུར་སྐྱོབས་དགོས།།
ཡ་ང་སྙིང་རྗེའི་གདུང་སེམས་མཉམ་བསྐྱེད་ས་ཕྱོགས་ཡོངས་ནས་གནང་བར་མཛོད།།
ར་བ་གངས་རི་མཐུག་པོའི་ཁྲོད་དུ་ས་ཡོམ་གནོད་འཚེ་ཕོག་པ་འདྲ།།
ལ་ལུང་ས་ཐག་རྒྱང་རང་དྲགས་ནས་ཞིབ་ཕྲའི་གནས་ཚུལ་ཤེས་པར་དཀའ།།
ཤ་ཚ་ཆེ་བའི་གདུང་སེམས་མཉམ་བསྐྱེད་སྨོན་ལམ་བསྔོ་བ་ཟབ་ན་བཟང་།།
ས་གཞི་འདི་ནི་རླུང་གི་ཀ་བས་བར་སྣང་ཁམས་ལ་བཀྱགས་ནས་འཁོར།།
ཧ་ཅང་འཕྲུལ་ནས་འཇིག་རྟེན་ས་ལ་སྒེར་གྱིས་བག་མེད་མ་གནང་རོགས།།
ཨེ་མ་འཇིག་པའི་འོག་ཏུ་འཚོ་བའི་སྲོག་ཆགས་རྟག་བདེ་གང་ན་ཡོད་།