ས་གནས་མི་མང་ཁྲི་གཉིས་ཀྱི་རྒྱང་རྒྱུག་དང་གོམ་བགྲོད་ནང་བོད་དོན་དྲིལ་བསྒྲགས་བྱས།

གནས་ཚུལ་གཏོང་མཁན། གཅན་ཡེ་རྒྱམ།

བྱང་ཨ་རིའི་ཝེ་སི་ཀོན་སིན་གྱི་མེ་ཌི་སིན་གྲོང་ཁྱེར་ནང་ལོ་ལྟར་ཕྱི་ཟླ་བཞི་བའི་ཟླ་མཇུག་ཏུ་མངའ་སྡེ་མི་མང་རྣམས་འདུ་འཛོམས་གྱིས་རྒྱང་རྒྱུགས་ཀྱི་འགྲན་བསྡུར་དང་། གོམ་བགྲོད་ཀྱི་འགྲན་བསྡུར་ཁག་གཉིས་སུ་བགོས་ཏེ་མངའ་སྡེ་གྲོས་ཚོགས་ཀྱི་མདུན་ནས་མི་མང་སྟོང་ཕྲག་མང་པོ་མཉམ་ཞུགས་བྱེད་བཞིན་ཡོད་ལ། ད་ལོར་ཡང་མུ་མཐུད་དུ་༢༠༡༤ལོའི་ཕྱི་ཟླ་༤བའི་ཚེས་༢༦གཟའ་སྤེན་པའི་ཉིན་མི་ཁྲི་གཉིས་ལྷག་རྒྱང་རྒྱུགས་དང་། གོམ་བགྲོདགཉིས་ཀའི་ནང་མཉམ་ཞུགས་བྱེད་བཞིན་པའི་གོ་སྐབས་འདི་དང་བསྟུན་ནས་བོད་ཀྱི་གཞོན་ནུ་ལྷན་ཚོགས་ཀྱི་བཀོད་སྒྲིག་འོག་ལོ་སྔོན་མ་གཉིས་ལ་མཉམ་ཞུགས་ཀྱིས་གྲུབ་འབྲས་ཡག་པོ་ཐོན་པ་མ་ཟད། ད་ལོར་ཡང་མུ་མཐུད་དུ་མི་གྲངས་ཉེར་བདུན་མཉམ་ཞུགས་བྱས། བོད་མི་གྲངས་བཅོ་ལྔ་ནས་རྒྱང་རྒྱུགས་ནང་མཉམ་ཞུགས་བྱས་པ་དང་། བོད་མི་བྱིངས་གཞན་རྣམས་གོམ་བགྲོད་ནང་མཉམ་ཞུགས་བྱས། སྟོད་གོས་སྟེང་( Run for Tibet) དང་རྒྱབ་ཏུ་(Solidarity with Tibet) ཞེས་འཁོད་ཡོད་སྟབས་ལམ་ཁའི་གཡས་གཡོན་གྱི་ལྟད་མོ་བ་ས་གནས་མི་མང་གིས་དོ་སྣང་ཆེན་པོས་ལྟ་བཞིན་ཡོད་བཞིན་འདུག་ལ། ཆུ་ཚོད་ཁ་ཤས་ཀྱི་རྗེས་སློབ་ཆེན་རྩེད་ཐང་རྭ་བའི་ནང་འབྱོར་མཚམས་མིའི་གདོང་དང་གདོང་ཐུག་ནས་ཡིག་ཆ་འགྲེམས་སྤེལ་དང་མཉམ་དུ་བཀའ་མོལ་གནང་བཞིན་བོད་དོན་སྐོར་ཞུས།

ཐེངས་འདིའི་གོམ་བགྲོད་དང་རྒྱང་རྒྱུགས་ནང་དམིགས་བསལ་གྱི་བྱ་བཞག་གལ་ཆེན་ཞིག་ནི་པཎ་ཆེན་རིན་པོ་ཆེའི་ཡང་སྤྲུལ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་དང་སྟབས་འཁེལ་སྟབས། ང་ཚོས་ཡང་སྤྲུལ་རིན་པོ་ཆེའི་སྐོར་དགོང་གྲངས་དྲུག་ལོན་པའི་སྐབས་རྒྱ་དམར་པོས་བཙན་ཁྲིད་ཀྱིས་གར་སོང་ཆ་མེད་དུ་གྱུར་ནས་ལོ་ངོ་བཅོ་བརྒྱད་ཕྱིན་པ་དང་། བོད་མི་ཡོངས་ཀྱིས་ད་ལྟར་དགོངས་གྲངས་ཉེར་ལྔ་སོན་པའི་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་ཡོད་ཤེས་འདོད་ནི་སྐོམ་ལ་ཆུ་འདོད་ལྟར་ཡོད་ནའང་སྐུ་གཟགས་ཀྱི་དྲི་མ་ཙམ་ཡང་མཇལ་རྒྱུ་མེད་པ། གལ་སྲིད་ཁྱེད་རང་གིས་པཎ་ཆེན་རིན་པོ་ཆེའི་ཡང་སྤྲུལ་མཆོག་གི་སྐོར་ཤེས་འདོད་ན་དྲ་ཚིགས་(releasepanchenlama.org)སྟེང་ཕེབས་ན་གནས་ཚུལ་གསལ་རྟོགས་ཐུབ་པའི་སྐོར་འཁོད་པའི་ཡིག་ཆ་འགྲེམ་སྤེལ་གྱིས་དྲིལ་བསྒྲགས་བྱས།

ཉིན་གུང་གོམ་བགྲོད་པ་དང་རྒྱང་རྒྱུགས་པ་སོགས་འབྱོར་ཟིན་མཚམས་གཞས་སྣ་འཁྲབ་སྟོན་གྱི་མགོ་ཚུགས་པའི་སྐབས་བོད་པའི་གཞོན་ནུ་མ་ཚོ་གར་སྟེགས་ཀྱི་ཉེ་སར་བཅར་ནས་ཞབས་བྲོ་ཤུགས་ཆེར་འཁྲབ་སྟེ་བརྙན་འཕྲིན་ནང་སྟོན་པར་ཐབས་ཤེས་བྱས་པར་བོད་པའི་གཞོན་ནུ་མ་ཚོའི་འཁྲབ་སྟོན་བརྙན་འཕྲིན་ནང་ཡང་ཡང་བསྟན། ཆུ་ཚོད་གཅིག་དང་ཕྱེད་ཀྱི་རྗེས་མཛད་རིམ་གྲོལ་བའི་སྐབས་ཞིས་ཀ་རྒོ་ནས་གདན་འདྲེན་ཞུས་པའི་གཞས་པ་གཞས་མ་གཉིས་ང་ཚོ་བོད་པ་ཚོའི་ཕྱོགས་སུ་ཕེབས་ནས་”ཁྱེད་རང་ཚོ་བོད་པ་ཡིན་ནམ་”ཟེར་བྱུང་། ང་ཚོས་”ཡིན་”ཞེས་ལན་བརྒྱབ་པ་ཡིན་ལ། སྐབས་དེར་ཁོང་གིས་”ང་ཁྱེད་རང་ཚོ་དང་མཉམ་དུ་པར་རྒྱག་འདོད་ཡོད་”གསུངས་སོང་། ང་ཚོ་དགའ་སྤྲོ་ཚད་མེད་སྐྱེས་བཞིན་”ཡིན་དེ་ཡིན་”ཟེར་བཞིན་ཁོང་གཉིས་མཉམ་དུ་པར་བརྒྱབ་པ་མ་ཟད། ལག་པ་ཀྱང་གཏོང་རེ་བྱེད་རྒྱུ་བྱུང་། དེ་ནི་བྱམས་དང་སྙིང་རྗེ་ལྡན་པའི་ང་ཚོ་ཉམས་ཆུང་བོད་མི་ཚོར་དམིགས་སུ་བཀར་ནས་མཐོང་ཆེན་སྤྲད་པ་ཞིག་རེད་ལ། ང་ཚོ་སྐྱབས་བཅོལ་བོད་མི་ཚོའི་དབུ་འཕང་ཐོན་པོ་འདེགས་བཞིན་པའི་དན་རྟགས་གསལ་བོ་ར་མངོན་ཡོད། ཨ་རི་བ་རྣམས་མུ་མཐུད་དུ་གཞས་པ་གཞས་མ་གཉིས་དང་མཉམ་དུ་པར་རྒྱག་པར་འཚང་ཀ་ཤིག་ཤིག་བྱེད་བཞིན་འདུག ང་ཚོ་ཚང་མ་དགའ་བཞིན་སྤྲོ་བཞིན་རང་ཁྱིམ་དུ་ལོག་རྒྱུ་བྱུང་།