ཤིས་ཚང་དགོན་པའི་དགེ་འདུན་པ་ཚོ་རྒྱང་ཐག་སྤྱི་ལེ་ ༦༣ ཙམ་གྱི་སར་སྨོན་ལམ་གསུང་བར་ཆེད་ཕེབས་གནང་བ།

དེ་ཡང་ཕྱི་ལོ་ ༢༠༡༢ ལོའི་ཟླ་ ༡༡ ཚེས་ ༢༩ སྟེ་རེས་གཟའ་ཕུར་བའི་བོད་ནང་གི་ཉིན་གུང་ཆུ་ཚོད་ ༢།༣༠ སྟེང་མདོ་སྨད་ཀླུ་ཆུའི་ཟམ་ཚ་རོང་གི་ལོ་ཙོ་སྡེ་བའི་རྒྱལ་གཅེས་དཔའ་བོ་ཚེ་རིང་རྣམ་རྒྱལ་གྱིས་བོད་བསྟན་སྲིད་ཀྱི་དོན་དུ་རང་གི་ཕ་མ་རྒན་རྒོན་དང་བཟའ་ཟླ་བུ་ཕྲུག་བཅས་པ་ཤུལ་དུ་བསྐྱུར་ཏེ་ཟམ་ཚ་ཡུལ་ཚོའི་སྲིད་གཞུང་གི་ཉེ་འདབས་སུ་རང་ལུས་མེ་སྲེག་བཏང་སྟེ་ས་གནས་དེ་ག་རང་དུ་སྐུ་གྲོངས་པ་དང་།  ས་གནས་ཡུལ་མིས་ཁོང་གི་སྐུ་ཕུང་འདས་པོའི་རང་ཁྱིམ་དུ་གདན་དྲངས་ཤིང་།  ཉེ་འཁོར་གྱི་ཟམ་ཚའི་ཉང་ཚང་གདོང་གཟིགས་དགོན་དང་རྨོག་རི་དགོན་པའི་དགེ་འདུན་པ་ཚོ་ཆེད་ཕེབས་ཀྱིས་སྨོན་ལམ་གསུང་འདོན་གནང་ཡོད་པ་རེད།  དེ་བཞིན་དུ་དེ་རིང་སྟེ་ཕྱི་ཚེས་ ༣༠ རེས་གཟའ་པ་སངས་ཉིན་ཟམ་ཚའི་ལོ་ཙོ་སྡེ་བ་དང་བར་ཐག་སྤྱི་ལེ་ ༦༣  ཡོད་པའི་ཀླུ་ཆུའི་ཤིས་ཚང་དགོན་པའི་དགེ་འདུན་པ་ཉིས་བརྒྱ་དང་སུམ་ཅུ་ལྷག་འདས་པོའི་རང་ཁྱིམ་དུ་ཆེད་ཕེབས་ཀྱིས་སྨོན་ལམ་གསུང་འདོན་དང་ཤུལ་ལུས་ནང་མིར་གདུང་སེམས་མཉམ་སྐྱེད་གནང་ཡོད་པ་རེད།  

རྒྱལ་གཅེས་དཔའ་བོ་ཚེ་རིང་རྣམ་རྒྱལ་ནི་ཆུང་དུས་ཟམ་ཚ་ཡུལ་ཚོའི་སློབ་ཆུང་དུ་ལོ་ངོ་གཉིས་ཙམ་ལ་ཞུགས་པ་ལས་གཞན་སློབ་གྲྭར་འགྲིམ་མྱོང་མེད་མོད།   ཁོང་ནི་རྒྱུན་དུ་མི་རིགས་ཀྱི་ལར་ཞེན་ཆེ་ཞིང་།  བོད་དོན་ལ་དོ་སྣང་ཆེ་བའི་ཁར་ཕྱི་ལོ་ ༢༠༠༦  ལོར་བོད་ཁམས་ཡོངས་སུ་སྲམ་གཟིག་རྒྱན་པགས་མེ་སྲེག་གི་ལས་འགུལ་སྤེལ་སྐབས་ས་གནས་དེ་གར་འགན་འཁུར་མཁན་གཙོ་བོའི་གྲས་ཤིག་ཡིན་འདུག   རྒྱལ་གཅེས་དཔའ་བོ་ཁོང་གི་ཁྱིམ་ཚང་གི་འཚོ་ཐབས་གཙོ་བོ་ཞིང་ལས་ཡིན་ལ།  དེའི་ཞོར་དུ་ཁོང་དང་བཟའ་ཟླ་གཉིས་ཀྱིས་ད་ལྟ་ཟམ་ཚ་ཡུལ་ཚོ་རུ་ཚོང་ཁང་ཆུང་ཆུང་ཞིག་གཉེར་བཞིན་ཡོད་པ་རེད་ཅེས་བོད་ནས་གནས་ཚུལ་འགྲེལ་བརྗོད་གནང་སོང་།