ལྷ་མྱི་ཁྱི་གསུམ།

—-འདྲེ་གླེན་པ།

 
དང་པོ་ལྷ་མ་གཏོགས་མི་འགྲོ་མ་མྱོང་བའི་ལྷ་ལམ་དུ །
དེང་སང་མི་ཡང་འགྲོ་ཆོག་པའི་དམངས་ལམ་དུ་གྱུར་ཡོད་མོད །
མི་ནི་ཁྱི་ལྟར་དུ་དབུགས་ཐག་མི་རིང་བས་རིང་པོར་རྒྱུག་མི་ཐུབ།
ལྷ ། མྱི ། ཁྱི །
དེ་རིང་གི་ཟླ་གསུམ་པའི་ཚེས་ཉི་ཤུ་ནི་ལྷ་མི་གང་ལ་ཡང་མ་དབང་བར།
ཁྱི་ཁོ་ནར་དབང་ཡོད །
ཁྱི་རྒྱུག་གི་མཐའ་མའི་རྒྱུག་འགྲན་ཟླ་གསུམ་པའི་ཚེས་ཉི་ཤུར་ཡིན།

མྱི་རིགས་སུ་གཏོགས་པའི་སེམས་ཅན་ས་ཡ་དྲུག་གིས །
ཁྱི་ལ་ལྷ་ལྟར་དུ་རེ་བ་བྱས་ཤིང་།
མི་ལྟར་དུ་བརྩི་འཇོག་བྱས་ཏེ།
རང་ལ་དབང་བའི་གསེར་གྱི་ཤོག་ལྷེ་གཅིག་པུ །
ཁྱི་སྤྱང་གི་ལུས་བླངས་རུང་།
རང་ཤ་རང་གིས་མི་བཟའ་བའི་གཏན་ཚིགས་གཅིག་པུས།
དེ་རིང་དགོང་གི་ཉི་མ་ཐང་ལ་ལྷུང་།
ཕོ་ཁྱོ་ག་ཟད་ནས་མོ་ལ་ཐུག
སྨན་བུ་མོ་རྫོགས་ནས་ཁྱི་ལ་ཐུག་ཀྱང་།
རང་གི་ཤ་གསེང་རུས་གསེང་གི་ལ་རྒྱ་གཅིག་པུས།
ང་ཚོས་ད་དུང་ཁྱོད་ལ་ཁྱི་ལས་རིན་ཐང་ཆེ་བ་བྱས་ཡོད །
སང་ཉིན་གི་རྒྱུག་འགྲན་པ་ལགས།
གཏམ་འདི་ཚོ་རིམ་ལ་འཛིན་པའི་གྲོ་བྱོས །
སེམས་ལ་འཛིན་པའི་ཚིག་བྱོས །

ཕ་མེས་པོ་དམ་པའི་གཏམ་དཔེ་ལ།
ཕ་དམ་པ་ཆང་གིས་བཟི་རུང་།
དོན་དམ་པ་རླུང་ལ་མི་སྤུར།

བདག་གི་མི་མང་ལགས།
དེ་རིང་གི་དབང་འཛིན་པ་ལགས།
འདེམས་ཤེས་ན་ཕ་བཟང་བུ་ཡི་སྐྱིད་ཡིན།
འདེམས་མ་ཤེས་ཕ་རྒྱུད་ཚང་གི་སྡུག་ཡིན།
སང་ཉིན་རང་གི་མི་རིགས་ཀྱི་ཆེད་དུ །
སྐུ་གཤེགས་རྒྱལ་གཅེས་པ་ཁྲི་ཚོ་འགའ་ཡི་ཁ་ཆེམས།
གཞིས་ལུས་རྒྱ་ཆེའི་མི་མང་གི་རེ་བཞག
བོད་རང་དབང་རང་བཙན་གྱི་འཐབ་རྩོད །
རྒྱ་ནག་དམར་པོ་གཞུང་གི་སྲིད་ཇུས།
བོད་གཞི་བྱེས་གཉིས་ཀྱི་ལས་དབང་།
མདོར་ན་བོད་བཙན་པོ་ཚང་གི་ཁ་རྗེ་དབང་ཐང་ལ།
ཁ་ཁོག་པའི་བར་ནས་འདང་རྒྱོབས།
ལས་རྒྱུ་འབྲསག་ཉིས་ཆ་དཔང་དུ་བཞག་སྟེ །
འོས་འཕེན་པར་གྲ་སྒྲིག་ཡིན་ནམ། ཡོད་དམ།

གལ་སྲིད་དེ་ལྟར་དུ་མིན་པར།
ཆོལ་ཁའི་འཐེན་ཁྱེར།
ལུང་ཚན་གྱི་དགའ་ཞེན།
ཆོས་ལུགས་ཀྱི་ཕྱོགས་རིས།
གྲོགས་དང་གྲོགས་པོའི་འབྲེལ་བ།
ཤ་ཉེ་སྤུན་མཆེད་ཀྱི་འབྲེལ་བ་སོགས།
དུང་ཞེན་དང་ཕྱོགས་རིས་ཀྱི་འོས་འཕེན་པར་གྲ་སྒྲིག་ཡིན་ཚེ།
དེ་ནི་ལས་འབྲས་མེད་མཁན།
རྒྱལ་ཁབ་བཙོང་མཁན།
ཕ་ཤ་བཟའ་མཁན།
མ་མགོ་གཅོད་མཁན།
འཇིག་རྟེན་མི་ལུགས་ཀྱི་ནག་ཉེས་ཀྱི་གཏེ་པོ་ཉིད་དུ་གྱུར་པ་ཡིན་པས།
དེ་ལྟར་མིན་པའི་རེ་བ་དང་རེ་སྐུལ་བྱེད་བཞིན་ཡོད །

མཆན།
ཧ་ཅང་བྲེལ་འཚུབ་ཀྱི་ལས་ཀའི་བར་གསེང་ནས་གལ་ཆེན་དོན་ཆེན་དུ་བརྩིས་ནས་རང་གི་ལྷག་བསམ་ཟོལ་མེད་ཀྱིས། གོ་སླ་བའི་ཆེད་དུ་སྙན་ངག་གི་རྐང་བ་ལྟར་དུ་བསྒྲིགས་ནས་ཁ་སྐད་དང་ཕལ་སྐད་ཀྱི་ཚིག་གང་ཐུབ་ཀྱིས་བཀོལ་ཏེ་ཤར་མར་དུ་བྲིས་པ་ལགས།

ད་དུང་མཚོན་བྱེད་ཁྱི་ཡི་པར་ཞིག་འཇོག་དགོས་དོན། ང་ཚོ་མི་ཡིན་པ་ལས་ཁྱི་མིན་མོད། གལ་སྲིད་ཁྱི་ཡིན་ཡང་རང་ཤ་རང་གིས་མི་བཟའ་བའི་གནས་ལུགས་དེ་ང་ཚོས་མ་ཤེས་ཐུ་མེད་ཀྱི་གདམས་པ་ཡིན་པས་དྲན་སྐུལ་གྱི་ཚུལ་ཏུ་བཞག་པ་ལགས། །

19 /3 / 2016 ཉིན་གྱི་མཚན་མོར།