ལྷ་མོ་དོན་གྲུབ་ལ་འཁྲུངས་སྐར་བསུ་བའི་ཐོ་རངས་ཀྱི་སྐར་རྒྱན།

-དཔལ་དགྱེས་པ་རྡོ་རྗེ།

 
ན་མོ་གུ་རུ་བྷོ་དྷི་ས་ཏྭ་ཡེ།
ཤར་ཕྱོགས་གངས་དཀར་རི་བོའི་རྩེར།།རྟེན་འབྲེལ་གཡང་སེང་དཀར་མོ་མཛེས།།སྤྲིན་དཀར་མེ་ཏོག་བཞད་པ་ནས།།དོན་གྲུབ་ལྷ་མོའི་ཟློས་གར་རོལ།།

ཤར་ལྷོ་དྲི་ཟའི་གྲོང་ཁྱེར་གཡས།།དགེ་བཅུ་འཛོམས་པའི་ཞིང་འབྲོག་མཚམས།།རུས་ཆེན་དྲུག་ལས་ཁྱད་འཕགས་པ།།སེ་ཁྱུང་རྒྱལ་པོ་ཁྱེད་ཉིད་འཁྲུངས།།

ལྷོ་གླིང་དབུས་མའི་དཀྱིལ་འཁོར་དུ།།སྤྱན་རས་གཟིགས་དབང་སྤྲུལ་པའི་སྐུ།།གངས་ལྗོངས་སྐྱོབ་པའི་ལྷ་སྐལ་བ།།བསྟན་འཛིན་རྒྱ་མཚོ་ཡོངས་སུ་གྲགས།།

ལྷོ་ནུབ་ནགས་ཀློང་བཙན་པོའི་གདུང་།།མཁར་དམར་གྲུ་འཛིན་བདག་པོའི་ཞིང་།།ཕྱུགས་བདག་དགའ་མའི་རྟུལ་ཞུགས་ཅན།།ཤིང་རྟ་འདྲེན་པའི་དཔལ་དུ་བྱོན།།

ནུབ་ཕྱོགས་ཉི་མ་ལྷ་སའི་གནས།།ནོར་བུའི་གླིང་གི་དགའ་ཚལ་དུ།།སྐྱབས་གནས་དམ་པའི་གདན་ས་ཉིད།།རྒྱ་སྟག་ངར་མའི་དཔུང་བ་ངོམས།།

ནུབ་བྱང་དབང་གཞུ་རི་མོའི་དཔལ།།མཛེས་མའི་རླབས་ཆེན་ཟླ་བའི་འོད།།མུན་པའི་བླ་རེ་གྱོན་པའི་ཚེ།།གཡུ་འབྲུག་སྔོན་མོའི་མགྲོན་དུ་ཕེབས།།

བྱང་ཕྱོགས་ཚན་རྩལ་རིག་པའི་མཐུས།།དམ་ཆོས་འཁོར་ལོ་རིན་པོ་ཆེ།།འཛམ་བུ་གླིང་དུ་གདལ་མཁས་པའི།།ངེས་དོན་རྒྱལ་བའི་དབང་པོ་རྒྱལ།།

བྱང་ཤར་སྐར་མ་སྨེ་བདུན་མས།།རྒྱལ་ཐབས་འཛིན་མའི་བརྡ་ཀླུང་དུ།།གཟི་བརྗིད་འཛུམས་མའི་གར་སྟེགས་སུ།།ཞི་བདེའི་དེད་དཔོན་མངོན་པར་བསྟོད།།

སྐུ་ཚེ་ཞབས་པད་རབ་ཏུ་བརྟན།།གསུང་ཆོས་འགྲོ་ཁམས་མོས་པར་སྨིན།།ཐུགས་རྗེ་མ་འདྲིས་མཛའ་བཤེས་མཆོག།སྐྱེ་དགུའི་མགོན་དུ་རིང་འཚོ་ཤོག།

ཞེས་པ་འདི་ཡང་རབ་གནས་སྣྲོན་ཟླའི་བཟང་པོ་གཉིས་པར་༸ གོང་ས་༸ རྒྱལ་བ་རིན་པོ་ཆེ་མཆོག་གི་འཁྲུངས་སྐར་ལ་མཁའ་འགྲོ་རིག་འཛིན་དབྱངས་ཅན་ལྷ་མོས་དད་གུས་པས་སྐུལ་ངོར་གང་ཤར་དུ་དབྱིན་ཡུལ་རྫོགས་ཆེན་དུས་འཁོར་འོད་གསལ་རི་ཁྲོད་དུ་གང་ཤར་བ་དག་རིག་འཛིན་དཔལ་དགྱེས་པ་རྡོ་རྗེས་སྨོན་པར་དགེའོ།། །།