ཧི་མ་ལ་ཡའི་འཕྲུལ་སྨྱུག
ལས་འབྲས་སྤྱི་ཡི་རྣམ་གཞག་ལ་བགྲོ་གླེང་དེ་ཙམ་གྱིས་ཆོག་པར་བྱ་ཡང༌། ལོག་ལྟ་ཟེར་བའི་མ་འདྲ་འདྲ་ཞིག་འདུག་པ་འདི་ལ་ནི་དམིགས་བསལ་གྱིས་ཅུང་ཟད་ཅིག་མ་ཞུས་ན་མི་བཟོད་པ་ཞིག་རེད། རང་རེའི་ཁྲིད་གཞུང་རྣམས་སུ། མི་དགེ་བཅུ་ལས་ལོག་ལྟ་ལྕི། ཞེས་གསུངས་ཡོད་ལ་དེའི་དོན་ཚེ་སྔ་ཕྱི་དང་ལས་རྒྱུ་འབྲས་ཟེར་བ་འདི་ཚོ་ཟེར་ཚོད་ཙམ་ལས་བདེན་རྒྱུ་རང་དག་མ་རེད་སྙམ་པའི་བསམ་བློ་སྐད་ཅིག་མ་ཅིག་སྐྱེས་ན། དེ་མ་ཐག་ཏུ་ཚེ་ཚེ་རབས་རབས་སུ་བསགས་ཚད་བསྒྲུབས་ཚད་ཐམས་ཅད་འོ་ཟོ་ཁ་སྦུབས་པ་ལྟར་ནག་གོར་རེར་འགྱུར་འགྲོ་བ་ཡིན་ཟེར། དེ་ལྟར་ན་མི་དགེ་བཅུ་དག་ཕར་བཞག་སྟེ་མཚམས་མེད་ལྔ་ལས་ཀྱང་རབ་ཅིག་ལྕི་ཚོད་རེད། ལས་བྱས་པ་ཆུད་མི་ཟ། མ་བྱས་པ་དང་མི་འཕྲད། དཀར་ནག་འཆོལ་ནས་མི་སྨིན་སོགས་དྲང་བདེན་ཚུལ་མཐུན་གྱི་སྐད་ཆ་དེ་ཚོ་ཡོད་ཚད་ལོ་ལྟ་འདིས་གྱུར་མིད་བཏང་ཚར་བཞག ཤུགས་མ་ཐུབ་ཀྱི་བསམ་བློ་གཏོང་སྟངས་ཏོག་ཙམ་འགྲིག་མིན་བྱུང་ཚེ་ལམ་སེང་ཁ་རྗེ་དབང་ཐང་ཡོད་ཚད་གཞུང་བཞེས་བཟོ་འགྲོ་མཁན་ཞིག་གིས་ད་དུང་གནས་ལུགས་དང་རྒྱུ་འབྲས་གླེང་འོང་ན་ཚིག་པ་མི་ཟའམ། ལས་འབྲས་མེད་སྙམ་པ་ཙམ་གྱིས་དགེ་རྩ་ཆད་འགྲོ་ན་ལས་འབྲས་ཡོད་སྙམ་པ་ཙམ་གྱིས་སྡིག་རྩ་ཆད་མི་འགྲོ་བ་ཅི་ཡིན་ནམ། སྡིག་པ་ཁོ་ན་ལ་འདི་ཙམ་གྱི་ཁ་ངོ་སྟེར་གནང་བའི་སྟོན་པ་སངས་རྒྱས་ཁོང་གལ་སྲིད་ཞལ་བཞུགས་ཡོད་པའི་དབང་དུ་བཏང་ན། ད་རེས་དྲང་ཚུགས་ཟིན་མ་བྱུང་ཞེས་ངོ་རྒོལ་རྔམ་སྟོན་བྱ་དགོས་ངེས་རེད་འདུག་གོ །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གཞན་དུ་མིན། །ཞེས་པའི་ལུང་འདི་ཁ་ཤ་ལ་བཏགས་ནས་འགྲོ་འདུག་མཁན་དེ་ཚོས་ཐུགས་བསམ་དྲང་མོ་རེ་བཞེས་དང༌། གཟི་བརྗིད་ཁོག་སྟོང་ཞིག་མ་གཏོགས་དོན་དངོས་སུ་ཁོང་གིས་ང་ཚོར་བསམ་བློའི་རང་དབང་སྤྲད་འདུག་གམ། ཁོར་ཡུག་གི་གནས་བབ་ཉ་རྫའི་ནང་གི་ཉ་ལས་ཀྱང་སྐྱོ་བཞིན་དུ་ད་དུང་ང་ཚོར་ཞེད་པོ་ཞིག་ཡོད་ཅེས་དགའ་ཀྲོག་ཀྲོག་ཏུ་འདུག་དགོས་སམ། བརྟག་དཔྱད་དང་ཉམས་ཞིབ་ཡོངས་རྫོགས་ཡག་ས་བཟང་ས་ཁོ་ན་ནས་བྱེད་དགོས་པ་ལས། སྐྱོན་དང་དྲི་མའི་སྐོར་དྲན་ཙམ་ཡང་མི་ཆོག་པའི་ལུགས་ཤིག་ལ་བསམ་བློའི་དང་དབང་ཟེར་རུང་ངམ། ང་ཚོ་ལ་ཚེ་སྔ་ཕྱི་དང་རྒྱུ་འབྲས་མེད་ན་དགའ་རྒྱུ་དང༌། ཡོད་ན་སྡུག་རྒྱུ་ཅུང་ཙམ་ཡང་མེད་མོད། ཉེས་པ་ཁབ་ཙམ་མ་བསགས་ཀྱང་ཆད་པ་རི་ཙམ་རེ་གཅོད་འོང་ན་ང་ཚོས་མགོ་བོ་སྒུར་མི་ཐུབ། དེ་བས་བདག་ལེགས་སུ་འདོད་པའི་མི་ཚེས་ཉི་མ་དེ་རིང་ནས་འོས་ལངས་བྱས་ཏེ། དགེ་རྩ་ཁྱུ་གསོད་བྱེད་མཁན་གྱི་ལོག་ལྟ་འདི་ལས་གྲལ་ནས་ཕྱིར་འབུད་གཏང་རྗེས། འདྲ་མཉམ་གཉིས་ཕན་གྱི་ཁྲིམས་ལུགས་གསར་པ་ཞིག་གཏན་ལ་མི་འབེབས་ཀ་མེད་རེད་འདུག་གོ།
མི་དགེ་བཅུ་ལས་ལོག་ལྟ་འདི་ལྕི་ཤོས་ཡིན་པ་ནང་པ་གཅིག་པུས་འདོད་པ་མ་རེད། ཕྱི་རོལ་མུ་སྟེགས་པས་ཀྱང་དེ་ལྟར་འདོད་པ་རེད། ལོག་ལྟ་སྐྱེ་བ་ཙམ་གྱིས་དགེ་བ་ཐམས་ཅད་བཅོམ་པའི་ཁུངས་གང་དུ་ཡང་ཡོད་མ་རེད། ཁྱོད་ཀྱི་རི་བོང་གནམ་རྡིབ་ཀྱི་འཁུར་འདི་ཕར་བཞག་ནས་སེམས་ལྷོད་ལྷོད་བྱས་ནས་སྡོད།
བཤེས་པའི་སྤྲིང་ཡིག་ལས། གང་ཟག་ལོག་པར་ལྟ་བས་ལེགས་སྤྱད་ཀྱང༌། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་དང་། ཚུལ་ཁྲིམས་བརྟུལ་ཞུགས་མཆོག་འཛིན་རང་ལུས་ལ། །ཕྱིན་ཅི་ལོག་པར་ལྟ་དང་ཐེ་ཚོམ་སྟེ། །ཀུན་ཏུ་སྦྱོར་བ་འདི་གསུམ་ཐར་པ་ཡི། །གྲོང་ཁྱེར་སྒོ་འགེགས་ལགས་པར་མཁྱེན་པར་མཛོད། །ཅེས་གསུངས་སོ།།
རྩྭ་མ་ཟས་པར་ལྕི་བ་བཏང་གི་ཡིན་སྙམ་ན་ལོག་ལྟ་སྐྱེས་པ་རེད། ཡིད་གཉིས་འདུག་ན་སྐུ་ཉིད་ཀྱིས་དབུགས་བསྒོམ་རོགས།
དྭགས་པོ་ཐར་རྒྱན་ལས། ཁྱད་པར་ནི། གནོད་སེམས་ཀྱི་ནང་ནས་མཚམས་མེད་པ་གཤོམ་པར་བྱེད་པ་འདི་སྡིག་ཆེའོ།།
ལོག་པར་ལྟ་བ་ལ་དབྱེ་ན་གསུམ་སྟེ། ལས་འབྲས་ལ་ལོག་པར་ལྟ་བ་དང༌། བདེན་པ་ལ་ལོག་པར་ལྟ་བ་དང༌། དཀོན་མཆོག་ལ་ལོག་པར་ལྟ་བའོ།།
དེ་ལ་དང་པོ་ནི། ལས་དགེ་སྡིག་དེ་འབྲས་བུ་བདེ་སྡུག་གི་རྒྱུར་མི་འདོད་པའོ། །གཉིས་པ་ནི། ལམ་གྱི་བདེན་པ་ཉམས་སུ་བླངས་ཀྱང༌། འགོག་པའི་བདེན་པ་མི་ཐོབ་པར་འདོད་པའོ། །གསུམ་པ་ནི། དཀོན་མཆོག་གསུམ་མི་བདེན་པར་ལྟ་ཞིང༌། སྐུར་པ་འདེབས་པའོ།།
དེའི་འབྲས་བུ་ལ་ཡང་གསུམ་ལས། རྣམ་པར་སྨིན་པའི་འབྲས་བུ་ནི། དུད་འགྲོར་སྐྱེ་བར་འགྱུར་རོ། །རྒྱུ་མཐུན་གྱི་འབྲས་བུ་ནི། གལ་ཏེ་མིར་སྐྱེས་ན་ཡང༌། གཏི་མུག་ཤས་ཆེ་བར་འགྱུར་རོ། །དབང་གི་འབྲས་བུ་ནི། །འབྲས་བུ་ཡེ་མེད་པའི་སར་སྐྱེ་བར་འགྱུར་རོ།།
ཁྱད་པར་ནི། ལོག་ལྟའི་ནང་ནས་ལྟ་བས་གཟིངས་པ་འདི་སྡིག་ཆེའོ། །ཞེས་གསུངས་སོ།།
སྡོམ་གསུམ་རྣམ་ངེས་ལས། རྒྱུ་འབྲས་མེད་ལྟས་རྩ་བ་ཆད་རྣམས་ལྕི།། ཞེས་རྒྱུ་འབྲས་མེད་ལྟས་སོར་སྡོམ་རྩ་བ་ནས་གཏོང་པར་བཤད་འདུག་ཏ
ལུང་མ་བསྟན་པ་བཅུ་བཞི་འཇིག་རྟེན་ན།
ཉི་མའི་གཉེན་གྱིས་རབ་གསུངས་གང་ལགས་པ།
དེ་དག་རྣམས་ལ་བསམ་པར་མི་བགྱི་སྟེ།
དེ་ཡིས་བློ་ནི་ཞི་བར་བགྱིད་མ་ལགས།། ༡༠༧ །། བཤེས་སྤྲིངས་།
དགེ་སློང་དག་གམ་མཁས་རྣམས་ཀྱིས།
བསྲེགས་བཅད་བརྡར་བའི་གསེར་བཞིན་དུ།
ལེགས་པར་བརྟགས་ལ་ང་ཡི་བཀའ།
བླང་བར་བྱ་ཡི་གུས་ཕྱིར་མིན།།
ཚིགས་བཅད་འདི་མདོ་ག་ན་ཡོད་དམ། སློབ་དཔོན་ཞི་བ་འཚོའི་ཚད་མའི་དེ་ཁོ་བསྡུས་པའི་དཀའ་འགྲེལ་དུ། སློབ་དཔོན་ངང་ཚུལ་གྱིས་དྲངས་པ་ཡོད་པ་དྲན། དེའི་ནང་གི། “གུས་ཕྱིར་མིན།” ཞེས་པར་དོན་ཆེན་པོ་ཡོད་པས། དེ་ཉིད་མེད་པར་བཟོ་ན། ཚིགས་བཅད་དེའི་གོ་བ་ལེན་སྟངས་ཉམས་པས་གཟབ་དགོས། ཚིགས་བཅད་འདི་རྩ་ཆེན་པོ་ཡིན་པས། རྗེ་དགེ་འདུན་གྲུབ་ཀྱིས་ཚདམ་རིགས་རྒྱན་དུའང་བཀོད་དོ།།
ཧི་མ་ལའི་འཕྲུལ་སྨྱུག་ལགས། ཁྱེད་ཀྱིས་ཁ་སྔོན་དྲང་སྲོང་ཕུར་བུས་རྒྱང་འཕེན་གྱི་ལྟ་གྲུབ་ལྷ་མ་ཡིན་གྱི་ཡུལ་དུ་གསར་གཏོད་བྱས་པར་བཤད་པ་དེ་ལ་ཁུངས་གང་ཡོད་དམ། གསལ་བཤད་ཅིག་གནང་རོགས།
མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བ་ལས།
རྣམ་པར་འཚེ་བས་གནོད་པ་མང་། །
བརྐུ་བ་ཡིས་ནི་ལོངས་སྤྱོད་ཕོངས་། །
བྱི་བོ་བྱེད་པས་དགྲ་དང་བཅས། །
བརྫུན་དུ་སྨྲ་བས་སྐུར་བ་སྟེ། །
ཕྲ་མ་ཡིས་ནི་བཤེས་དང་དབྱེ། །
རྩུབ་མོ་ཉིད་ཀྱིས་མི་སྙན་ཐོས། །
མི་འབྲེལ་བ་ཡིས་ཚིག་མི་བཙུན། །
བརྣབ་སེམས་ཡིད་ལ་རེ་བ་འཇོམས། །
གནོད་སེམས་འཇིགས་པ་སྦྱིན་པར་བྱེད། །
ལོག་པར་ལྟ་བས་ལྟ་ངན་ཉིད། །
རིན་ཆེན་ཕྲེང་བ་ལས།
ཆོས་མིན་པས་ནི་ལུགས་འདོད་གང་། །
དེ་ཡིས་འཇིག་རྟེན་མི་དགར་འགྱུར། །
འཐིག་རྟེན་མི་དགའ་ཉིད་ཀྱི་ཕྱིར། །
འདི་དང་གཞན་དུ་དགའ་མི་འགྱུར། །
དོན་མིན་རིག་པ་ངན་འགྲོའི་ལམ། །
གཞན་བསླུ་ལྷུར་ལེན་མི་བཟད་པ། །
ཤེས་རབ་འཆལ་བ་རྣམས་ཀྱིས་ནི། །
ཇི་ལྟར་དོན་འགྱུར་རིག་པར་བྱས། །
ཕ་རོལ་བསླུ་བ་ལྷུར་ལེན་པ། །
དོན་དུ་ཇི་ལྟར་ལུགས་ལྡན་ཡིན། །
དེས་ནི་ཚེ་རབས་སྟོང་ཕྲག་ནི། །
མང་པོར་བདག་ཉིད་བསླུས་པར་འགྱུར། །
རིན་ཆེན་ཕྲེང་བ་ལས།
ཆགས་དང་ཞེ་སྡང་གཏི་མུག་དང་། །
དེས་བསྐྱེད་ལས་ནི་མི་དགེ་བ། །
མ་ཆགས་ཞེ་སྡང་གཏི་མུག་མེད། །
དེ་བསྐྱེད་ལས་ནི་དགེ་བ་ཡིན། །
མི་དགེ་བ་ལས་སྡུག་བསྡལ་ཀུན། །
དེ་བཞིན་ངན་འགྲོ་ཐམས་ཅད་དོ། །
དགེ་ལས་བདེ་འགྲོ་ཐམས་ཅད་དང་། །
སྐྱེ་བ་ཀུན་དུ་བདེ་བ་དག །
ཡིད་དང་ལུས་དང་ངག་གིས་ནི། །
མི་དགེ་ཀུན་ལས་ལྡོག་བྱ་ཞིང་། །
དགེ་ལ་རྟག་ཏུ་འཇུག་བྱ་བ། །
འདི་ནི་ཆོས་རྣམས་གསུམ་དུ་བཤད། །
ཆོས་འདིས་དམྱལ་བ་ཡི་དྭགས་དང་། །
དུད་འགྲོ་དག་ལས་རྣམ་གྲོལ་ཞིང་། །
ལྷ་དང་མི་ཡི་ནང་དག་ཏུ། །
བདེ་དཔལ་རྒྱལ་སྲིད་རྒྱས་པ་འཐོབ། །
བསམ་གཏན་ཚད་མེད་གཟུགས་མེད་ནི། །
ཚངས་སོགས་བདེ་བ་མྱོང་བར་བྱེད། །
རྒན་ལ་ཐགས་པ་ལེགས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །ལེགས་པར་བརྟགས་ཏེ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཡེ་ཤེས་སྙིང་པོ་ཀུན་ལས་བཏུས་པ། ཤོག་གྲངས་༢༧བ༥། དཔལ་སྟོབས་པོ་ཆེའི་རྒྱུད་ཀྱི་རྒྱལ་པོ། ཤོག་༢༡༦ལུང་ཁུངས་རྒྱས་པ་རྒན་རྒྱལ་མཚན་རྣམ་གྲོལ་གྱིས་བྱང་ཆུབ་སེམས་འགྲེལ་Bodhicitta-Vivranaགྱི་གླེང་བརྗོད་དུ་གསལ།
མདོ་དང་བསྟན་བཅོས་དུ་མ་ལས། སེམས་ཀྱི་རང་བཞིན་འོད་གསལ་བ།།ཞེས་དང་། བརྒྱད་སྟོང་བ་ལས། སེམས་ལ་སེམས་མ་མཆིས་པ་སྟེ། སེམས་ཀྱི་རང་བཞིན་འོད་གསལ་བའོ། །ཞེས་གསུངས་པ་ལྟར་གྲུབ་མཐའ་སོ་སོ་ལ་སྦྱར་ནས་སེམས་ཀྱི་རང་བཞིན་འོད་གསལ་བའི་སྐོར་བཤད་ཚུལ་ཕྲ་རགས་དུ་མ་ཡོད་མོད། དབུ་མ་ཐལ་འགྱུར་བའི་ལུགས་དང་སྦྱར་བ་ནི་དངོས་པོའི་གནས་ཚུལ་དེ་ཁོ་ན་ལྟར་ཡིན་པས། དེའི་ནང་ནས་སེམས་གསལ་རིག་གི་སྐོར་དེང་དུས་གལ་གནད་ཆེ་བར་སྣང་བས། གསལ་ཞིང་རིག་པ་ཤེས་པའི་མཚན་ཉིད་དུ་ནང་པའི་གྲུབ་མཐའ་སྨྲ་བ་ཐམས་ཅད་མཐུན་ཡང་། གསལ་རིག་གི་དོན་འཇོག་ཚུལ་གྲུབ་མཐའ་འོག་མ་དང་སྦྱར་ན་དཔྱད་དཀའ་བས། ཐའ་གྱུར་བའི་ལུགས་ལྟར་འཆད་ན། གསལ་རིག་ཅེས་པའི་སྤྱིར་གསལ་བ་ལའང་གཟུགས་ཅན་དང་གཟུགས་ཅན་མིན་པ་གཉིས་སུ་ཡོད་པས། དང་པོ་ནི་ཉི་ཟླ་དང་གློག་དང་མར་མེའི་འོད་ལ་སོགས་པ་ཡིན་ལ། འདི་དག་ནི་གཟུགས་ཅན་གཞན་གྱི་ངོ་བོ་གསལ་བ་ཙམ་ལས་བྱེ་བྲག་དང་ཁྱད་པར་སོགས་འབྱེད་མི་ནུས་ཤིང་ངེས་ཤེས་འདྲེན་པའང་མི་ནུས། དུས་སྔ་ཕྱི་དྲན་པའང་མི་ནུས་ཤིང་། གཟུགས་ཅན་གཞན་གྱིས་གོ་འབྱེད་པ་དང་། གོམས་པས་འཕེལ་འགྲིབ་ཀྱང་མི་རུང་བ་དང་། གཟུགས་ཅན་དང་མ་འདྲེས་བའི་དོན་གང་ཡང་གསལ་མི་ནུས་པ་དང་། དེ་ཡང་ཡུལ་ད་ལྟ་གསལ་བ་ཙམ་ལས་འདས་མ་འོངས་ཀྱི་ཆོས་དང་ལྐོག་གྱུར་གྱི་དོན་གང་ཡང་གསལ་བར་མི་ནུས་སོ། །གཟུགས་ཅན་མིན་པའི་གསལ་བ་ལའང་རིག་པའི་གསལ་བ་དང་། ཆོས་ཉིད་ཀྱི་གསལ་བ་གཉིས་སུ་ཡོད་པས། དང་པོ་རིག་པའི་གསལ་བ་ནི། ཤེས་པ་རང་ཉིད་སྐྱེས་ཙམ་གྱིས་རང་གི་སྣང་བ་གསལ་བ་སྟེ་རང་གི་སྣང་བ་ལ་མངོན་སུམ་དུ་ཉིད་དུ་སྐྱེས་པས་ན་གསལ་བ་ཞེས་བྱ་ལ། ཡུལ་ལ་སྤུ་རིས་འབྱེད་ཅིང་ངེས་ཤེས་དངོས་སུ་འདྲེན་པས་ན་རིག་པ་ཞེས་ཀྱང་བྱ་སྟེ། དེ་ལྟ་བུའི་གསལ་བ་དང་རིག་པའི་ཚོགས་པ་ལ་ཤེས་པ་ཞེས་ཐ་སྙད་རྙེད་པ་ཡིན་ནོ། །དེའི་ཕྱིར་གསལ་བ་ཞེས་པ་ཤེས་པའི་རང་གི་ངོ་བོར་བསྟན་ནས། རིག་པ་ཞེས་པ་དེའི་བྱེད་ལས་བསྟན་ཅིང་རིགས་མི་མཐུན་སེལ་བྱེད་དུ་སྦྱར་ན། གསལ་ཞིང་རིག་པ་ཤེས་པའི་མཚན་ཉིད་དུ་འཐད་པ་ལེགས་པར་གྲུབ་པོ། ཤེས་པ་གང་ཡིན་རང་གི་སྣང་བ་ལ་མངོན་སུམ་གྱི་ཚད་མ་ཉིད་དུ་སྐྱེས་པ་དེ་གྲུབ་མཐའ་འོག་མ་ལ་བཤད་དུ་མི་རུང་བས། ཁོང་ཚོས་ཤེས་པའི་མཚན་ཉིད་ཀྱི་དོན་ཡང་འཇོག་དཀའ་ཞིང་རང་རིག་ཁས་མི་ལེན་ཀ་མེད་ཀྱང་བྱུང་བ་ཡིན་ནོ། །གསལ་ཚུལ་ཡང་གཟུགས་ཅན་གསལ་བ་ལས་ལྡོག་ཏེ་དེ་དང་དེའི་ནང་གསེས་ཀྱི་བྱེ་བྲག་སྤུ་རིས་འབྱེད་པ་དང་། གཟུགས་ཅན་གཞན་གྱིས་གོ་མི་འབྱེད་པས་ཐོགས་རེག་དང་བྲལ་བ་དང་། གཙོ་བོ་རིགས་མཐུན་སྔ་མ་གོམས་པ་ལས་ཕྱི་མ་སྐྱེས་པས་གོམས་པས་འཕེལ་འགྲིབ་ཆེ་བ་དང་། འདས་པ་དང་མ་འོངས་པ་དང་། གཟུགས་ཅན་མིན་པ་དང་ལྐོག་གྱུར་གྱི་དོན་རྣམས་ཀྱང་གསལ་ནུས་པས་ན་གཟུགས་ཅན་གྱི་གསལ་བ་དང་གཏན་མི་འདྲའོ། །
རི་རྒྱལ་ཏི་སེ་མཐོན་པོ་ནས།
དགེ་སློང་དག་གམ་ཞེས་སེང་གེའི་།
ཁ་འབབས་ཆུ་བོའི་རྒྱུན་བཟང་པོ།
ལ་དྭགས་ལ་འབེབས་བཀའ་དྲིན་ཆེ།།
བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གཞན་དུ་མིན། །ཞེས་པའི་ལུང་འདི་ཁ་ཤ་ལ་བཏགས་ནས་འགྲོ་འདུག་མཁན་དེ་ཚོས་ཐུགས་བསམ་དྲང་མོ་རེ་བཞེས་དང༌། གཟི་བརྗིད་ཁོག་སྟོང་ཞིག་མ་གཏོགས་དོན་དངོས་སུ་ཁོང་གིས་ང་ཚོར་བསམ་བློའི་རང་དབང་སྤྲད་འདུག་གམ། ཟེར། ལུང་འདི་འཕགས་པ་ཡུལ་འཁོར་སྐྱོང་གིས་ཞུས་པའི་མདོ་ན་བཞུགས། ལུང་ལས་གསུངས་པའི་ཕྱིར་ཞེས་པ་ཙམ་སྒྲུབ་བྱེད་དུ་མི་རུང་བས། གུས་པ་རྒྱུ་མཚན་དུ་མི་རུང་ལ། ཚད་མ་གསུམ་གྱིས་དངོས་པོའི་གནས་ཚུལ་དང་མཐུན་མིན་དཔྱད་པར་བྱ་བ་གསུངས་སྟེ། འདིས་བསམ་བློའི་རང་དབང་སྤྲད་མི་འདུག་གམ།