ལོག་རྟོག་རུ་སྡེ་ལ་སྤྲིངས་པ་ཕུ་བོའི་སྙིང་གཏམ།

རྩེཿ  མུན་སེལ།

 
མཐའ་དབུས་སྣོད་བཅུད་ཀུན་གཞན་གྱི་དབང་ལ་ཚུད་ཅིང་།།
བྲོས་བྱོལ་ཕུ་ནུ་ཚོ་ཁ་འཐོར་ཡང་འཐོར་ཆགས་རུང་།།
ལོ་རྒྱུས་རིན་ཐང་གིས་གོ་ལའི་འཁོར་འགྲོས་ངལ་བ།།
རྒྱལ་བསྟན་དམ་ཆོས་འདི་དབུས་ན་བརྗིད་པའི་དྲིན་རེད།།

རང་རེའི་དར་མའི་ཁྲོད་ཐོས་ཆུང་བླུན་པོ་འགའ་ཞིག།
མི་རིགས་རྗེས་ལུས་ཀྱི་རྐྱེན་དེ་འདི་ཡིས་བཟོས་ཟེར།།
མཐུན་སྦྲེལ་རྩ་བ་ལ་ཆག་སྒོ་འདི་ཡིས་བསླངས་སྐད།།
ཐོག་མཐའ་བར་གསུམ་གྱི་གདོན་རྫས་འདི་རང་ཡིན་ལོ།།

སྐྱེ་ས་མཐོ་སྒང་གི་ལྷ་ལྡན་ཞིང་དུ་སྐྱེས་ཤིང་།།
འཚར་བ་དྲུག་མ་ཡི་དབྱངས་རྟའི་ཀློང་ནས་འཚར་ཀྱང་།།
ཡ་རབས་མི་ཆོས་ཀྱི་བྱིན་རླབས་རྫས་ཙམ་མ་འགོས།།
མ་བརྟགས་ཧོལ་རྒྱུག་གི་བྱ་བར་སྨྱོ་ནད་ཐེབས་འདྲ།།

རྒྱལ་སྤྱིའི་ཁོར་ཡུག་གི་གལ་ཆེའི་གནས་ཚུལ་ཕར་ཞོག།
རང་གི་མི་ཚེ་ཡི་འདུན་མ་ཙམ་ཡང་མི་འཁྱོང་།།
རེ་དོགས་སྐྱེན་མོ་དེ་བསེ་རག་ཡི་དྭགས་ཅང་མིན།།
རུ་ང་གདུག་རྩུབ་འདི་ལྷ་སྲིན་སྡེ་བརྒྱད་དཔེ་མིན།།

མིའུ་ཐུང་ཐུང་གི་སེ་གོལ་གཏོག་ལུགས་འདི་ཡིས།།
རི་རབ་ལྷུན་པོ་དེ་སྐྱོམ་ནས་ཉིལ་ཚོད་མི་འདུག།
ལྕོང་མོ་ཆུང་ཆུང་གི་གཞུག་སྒྲོ་འགུལ་སྟངས་དེ་ཡིས།།
མཐའ་ཡས་རྒྱ་མཚོ་ལ་རླབས་ཙམ་ཁོད་རན་མ་རེད།།

མཐོ་སྒང་གཅེས་ཕྲུག་ཁྱོད་ཨ་མའི་བུ་ཞིག་ཡིན་ན།།
མགོ་བོ་ནང་ཆོས་ཀྱི་བྲག་རི་ལྗིད་པོས་མནན་མེད།།
རྐང་ལག་ལྷ་སྒྲུང་གི་རྣོ་ལྕགས་དམ་པོས་བཅིངས་མེད།།
རླབས་ཆེན་མི་བུ་ཞིག་འོང་ན་འབྱུང་ཚད་ཤར་ཟིན།།

ལོག་རྟོག་རུ་སྡེ་ཚོ་ད་རང་འཛོམས་པ་མ་རེད།།
འུར་འུར་ཚང་ཚང་གིས་ལོ་རབས་ཕྲག་འགའ་འདས་ཐལ།།
འཕྲུལ་ཆས་རྫིགས་པོ་ཞིག་བཟོས་ཏེ་འཕུར་རྒྱུ་ཕར་ཟད།།
འབར་ཞུན་རྐང་གཅིག་གི་བྱས་རྗེས་མེད་པ་ཅིས་ལན།།

བོད་མི་ས་ཡ་དང་བྱེ་བའི་ཡར་ཐོན་འོས་འགན།།
བླ་རྫོད་ཁྱོད་ཚོ་ཡི་ལག་ལ་ཧྲིལ་ལེར་བབས་ཚེ།།
ཉིན་ཞག་ཕྲུགས་གཅིག་གི་བདེ་བ་ཐུན་ཙམ་ཆེད་དུ།།
ཐམས་ཅད་ནུས་མེད་དུ་གཏང་རྒྱུ་ཡིན་པ་ཁོ་ཐག།

ཤར་ནུབ་ཚན་སྨྲ་ཚོའི་རྐང་པའི་རྗེས་ཙམ་མ་ཟིན།།
གངས་ལྗོངས་ནང་བསྟན་པའི་ཁྱུ་ནས་ཤུགས་ཀྱི་བུད་ཚར།།
མི་མིན་ལྷ་མིན་གྱི་རིགས་འདི་མང་དུ་འཕེལ་བ།།
བོད་མིའི་སྤྱི་མཐུན་གྱི་བསོད་ནམས་དམན་པའི་རྟགས་ཤིག།

དམ་པའི་ཞལ་ཁྱིམ་དང་མི་མང་ཉན་བྱེད་བར་ན།།
གཟུགས་མེད་དྲྭ་འབུ་རུ་བརྫུས་ནས་སྒྲོ་སྐུར་ཆལ་ཆལ།།
མཐུན་སྦྲེལ་ལག་རྡེང་གིས་འགྲོག་པ་ཕུ་ནུའི་དབར་ལ།།
རེ་བ་ངལ་ཟད་དུ་གཏོང་བའི་དབྱེན་སྦྱོར་ཆེམས་ཆེམས།།

ཁྱོད་ཚོས་བྱས་ཟིན་དང་བྱེད་པའི་ཚུལ་གྱི་རིམ་པར།།
མཐའ་དབུས་ཟུར་བཞི་ནས་ཚད་དེ་བརྟགས་ཤིང་དཔྱོད་ཀྱིན།།
བཟོད་མེད་ལ་རྒྱ་རང་མིན་པ་གསལ་པོར་ཤེས་ཐལ།།
ཕུགས་ན་སུ་ཞིག་གི་ཚང་ཞིག་ཡོད་པ་མཐོང་བྱུང་།།

ཁྱིམ་གྱི་ཡོད་ཚད་པོ་བཅོམ་ཆག་སྐྱ་ཉིལ་བཏང་སྟེ།།
ཤོག་དམར་བསྡམས་མ་འགའ་ཐོབ་ལ་མཚར་རྒྱུ་ཅི་ཡོད།།
ཕན་ངེས་འཇོན་ངེས་ཀྱི་ལམ་ལ་དམོད་དུང་འབོད་ཀྱིན།།
མཐོན་པོའི་བདེ་ས་ཞིག་སྙེག་ལ་ཡི་རང་མི་སྐྱེ།།

ཨ་ཙི་སྐྱུག་རྫོགས་ཚོ་མཐའ་མའི་གཏམ་ལ་ཉོན་དང་།།
ཡུན་ཐུང་མི་ཚེ་འདིའི་རང་བདེ་ཕྲན་བུའི་ཆེད་དུ།།
བདེན་པ་དྲང་བཞག་གི་སྒྲུབ་ལུགས་མང་ཙམ་མཆིས་པས།།
འུ་ཐུག་ཐབས་ཟད་ཀྱི་བྱ་བ་དེ་འདྲ་མི་དགོས།།

ཐང་སྨུག་སྦྲ་རྙིང་འདི་རིན་ཆེན་གཏེར་གྱི་མཛོད་ཡིན།།
མེས་པོའི་ཤུལ་བཞག་ཀུན་སྐྱིད་དང་སྐྱིད་ཀྱི་བརྟེན་རེད།།
བྱི་དོར་རྒྱུད་འཛིན་གྱི་ལས་ལ་འཇུག་འདོད་མེད་རུང་།།
ཁ་ལག་རྐང་གསུམ་པོ་གང་སར་སྨྱོ་གཡུག་མ་བྱེད།།

མི་རིགས་གཞན་པ་ཚོས་མཐོང་ན་ཧབ་ཆ་བརྒྱབ་འོང་།།
གདེང་འཇོགས་མི་སྣ་འགས་གོ་ཚེ་ཞེན་པ་ལོག་འགྲོ།
ཤ་ཁྲག་རུས་གསུམ་གྱི་རྒྱུད་པའི་འདང་ཞིག་ཡོད་ན།།
ཕུ་བོའི་སྙིང་གཏམ་དེ་མ་བརྗེད་སེམས་ལ་ཞོག་ཨང་།།

ཞེས་པའང་རྩེཿམུན་སེལ་དུ་འབོད་པས། ཕྱི་ཟླ༡༠ ཚེས་༡༣ ཉིན་ལྕགས་པོ་རིའི་བོད་སྨན་མཐོ་རིམ་སློབ་གླིང་གི་རང་ཤག་ཏུ་གོ་སླ་བའི་གྲོང་ཚིག་ཁོ་ན་ཅི་ཐོན་གྱི་ལམ་ནས་ཤར་མར་བྲིས་སོ།།