ལོ་གསར་གྱི་དྲན་ཐོ་སྨིན་དྲུག་སྐེ་འཁྱོག

སྐར་ཆེན།

ཕ་ཡུལ་དང་བྲལ་ནས་ལོ་ངོ་བཅུ་ཏག་ཏག་འགྲོ་གིན་འདུག ཕ་མ་མིག་གིས་མ་མཐོང་བར་ལོ་ངོ་བཅུ་འགྲོ་སོང་། ཡུལ་མི་ཚོའི་སྐྱོ་བའི་མདོག་དང་ཤོར་བའི་གདོང་མ་མཐོང་བར་ལོ་བཅུ་འགྲོ་སོང་། ཡང་ལོ་གསར་བ་ཞིག་སླེབས་ལ་ཉེ། ངས་ཀྱང་ལོ་གསར་བའི་ཕྱོགས་ལ་བསམ་བློ་བཏང་། ང་ལོ་གསར་ལ་གྲ་སྒྲིག་མེད། ངས་ལོ་གསར་ལ་གྲ་སྒྲིག་བྱེད་ཀྱང་མི་དགོས། རྒྱུ་མཚན། ད་ལྟ་བར་གྱི་ངའི་ལོ་གསར་ཚང་མ་སློབ་གྲའི་ནང་ནས་བཏང་འདུག ཁྱིམ་ཚང་ཡང་སློབ་གྲ་རེད། ལོ་གསར་གཏོང་ས་ཡང་སློབ་གྲ་རེད། ལོ་གསར་ལ་རོལ་ས་ཡང་སློབ་གྲ་རེད། དོ་དགོང་། ལོ་གསར་ཕྱོགས་ལ་བསམ་བློ་གཏོང་གིན་གཏོང་གིན། ངའི་སེམས་ལ་འདས་དོན་འགའ་དྲན། འདས་དོན་འདི་ང་གཅིག་པོའི་འདས་དོན་ཞིག་མིན། ང་དང་ན་མཉམ་གྲོགས་པོ་ཕལ་ཆེར་བར་གཅིག་མཚུངས་སུ་ཡོད་པའི་འདས་དོན་ཞིག་ཡིན། དེ་ནི་ཕྱི་ལོ་༡༩༩ལོའི་དགུན་གནང་གི་སྐབས་སུ་རེད། ང་གུང་གསེང་ལ་འགྲོ་ས་མེད་པར་སློབ་གྲར་བསྡད། ང་ཚོའི་ཉལ་ཁང་ལ་ཁྱོན་སློབ་ཕྲུག་ཉུ་ཤུ་རྩ་གཉིས་ཡོད། སློབ་ཕྲུག་བཅུ་གཉིས་གུང་གསེང་ལ་འགྲོ་སོང་། ཤུལ་དུ་ང་ཚོ་མི་བཅུ་ལྷག ལོ་གསར་སླེབས་ལ་ཉེ། ང་ཚོས་ཀྱང་ལོ་གསར་ཕྱོགས་ལ་བསམ་བློ་གཏོང་གིན་ཡོད། ཉལ་ཁང་གི་རང་སྦྱོང་གྲོལ་བའི་རྗེས་སུ། ཉལ་ཁང་གི་རྒན་བདག་དེས་ལོ་གསར་སྐོརལ་གྲོས་གཞི་བཏོན་སོང་། གྲོས་གཞི་གཙོ་བོ་མི་གཅིག་གི་རྩ་ནས་་སྒོར་ག་ཚོད་བསྡུ་དགོས་མིན་དེ་རེད། ལོ་གསར་སྐོར་ལ་གྲོས་བསྡུར་སྣ་ཚོགས་བྱས་བའི་མཐའ་མར་ཉལ་གྲོགས་གཅིག་གི་རྩ་ནས་རྒྱ་སྒོར་༢༥༠རེ་བསྡུ་རྒྱུ་བྱས་སོང་།

ངའི་ལག་ན་སྒོར་གཅིག་ཀྱང་སྟོན་རྒྱུ་མེད་མོད། ངས་མོས་མཐུན་བྱས། མཚན་མོ་དེར་ངས་བསམ་བློ་བཏང་། སྒོར་མོ་དེ་གང་ནས་འཁྱེར་ཡོང་དགོས་སམ། གྲོགས་པོ་ལ་གཡར་ན། མ་རེད། གྲོགས་པོ་ལ་དངུལ་སྒོར་ཡོད་ཀྱི་མ་རེད། གུང་གསེང་ལ་སློབ་གྲར་སྡོད་མཁན་ཕལ་ཆེ་བ་རྒྱ་གར་ན་ཕ་མ་དང་སྤུན་མཆེད་མེད་མཁན་ཚོ་རེད། ང་ཡང་དེའི་གྲས་ཀྱི་གཅིག་རེད། ལོ་གསར་གྱི་སེམས་ཁྲལ་དེས་ང་གཉིད་ཡག་པོ་ཞིག་ཀྱང་ཁུག་མ་ཐུབ། འདི་ལྟར། སེམས་ཁྲལ་གྱི་སྒང་ནས་བདུན་གཅིག་ཕྱིན། ཉལ་གྲོགས་ཕལ་ཆེ་བས་དངུལ་སྒོར་ཐབས་ཤེས་འཐེན་སོང་། ངས་ད་དུང་ཡང་་ཐབས་ཤེས་འཐེན་མ་ཐུབ། ཉིན་ཞིག་ཉལ་ཁང་དུ་སེམས་ཁྲལ་དང་མཉམ་དུ་དེབ་ཞིག་ྐློག་ནས་སྡོད་པའི་སྐབས་སུ། ང་ལ་ཕྱི་ལོགས་ནས་སྐད་གཏོང་མཁན་ཞིག་སླེབས་སོང་། སྟབས་ཡག་པ་ཞིག་ལ་། དེ་ནི་ངའི་ཡུལ་གྲོགས་ཤིག་རེད། ཡུལ་གྲོགས་ཁོང་ད་ལྟ་རྒྱ་གར་དུ་ཡོད། ཁོ་རང་གི་ཆུང་མ་དང་མཉམ་དུ་སློབ་གྲར་ང་ལྟ་བར་སླེབས་འདུག ཁོང་འགྲོ་ཁར་ང་ལ་སྒོར་ཉིས་བརྒྱ་སྤྲད་སོང་། ངའི་སེམས་ལ་དགའ་སྤྲོ་ཚད་མེད་པ་ཞིག་སྐྱེས། ངའི་སེམས་ཁྲལ་དེ་ཡང་གང་འཚམ་བརླགས།

ད་ལྷག་མ་སྒོར་ལྔ་བཅུ་དེ་གང་ནས་ཐབས་ཤེས་འཐེན་དགོས་སམ། ངས་བསྐྱར་དུ་བསམ་བློ་བཏང་། རེད་། ངའི་སེམས་ལ་བློ་ཞིག་ཤར། ང་ཚོའི་སློབ་གྲར། གུང་གསེང་གི་སྐབས་སུ། ཉེ་འཁོར་གྱི་རྒྱ་གར་ཡུལ་མི་ཚོའི་སར་གོན་པ་རྙིང་པ་བཙོང་དུ་འགྲོ་མཁན་གྱི་སློབ་ཕྲུག་འགའ་ཡོད། སློབ་ཕྲུག་དེ་ཚོ་རྒྱ་གར་སྐད་ལ་ཡང་ཡག་པོ་ཡོད། ཁོང་ཚོའི་རྒྱ་གར་སྐད་དེ་ཡང་རྒྱ་གར་ཡུལ་མི་ཚོའི་སར་གོན་པ་བཙོང་དུ་སོང་ནས་ཡར་རྒྱས་ལ་ཕྱིན་པ་རེད། ངས་ཁོང་ཚོའི་གཅིག་བཙལ། ཕ་ཡུལ་ནས་འཁྱེར་ཡོང་བའི་འོག་འཇུག་མཐུག་པོ་དེ་བཙོང་རྒྱུ་བྱས། ངས་སྒོར་ལྔ་བཅུ་དགོས་ལབ། ཁོང་གིས། སྒོར་ལྔ་བཅུ་ཡོང་གི་མ་རེད་། རྒྱ་གར་ཡུལ་མི་ཚོས་གོང་ཆེན་པོ་སྤྲོད་གི་མ་རེད་། ད་དུང་གཅིག་འཁྱེར་ཤོག་ཟེར། ངས་སྟོད་ཐུང་གསར་བ་ཞིག་བླངས་ནས་སྤྲད། གྲོགས་པོས། དོ་དགོང་ཁ་ལག་ཟས་ཚར་རྗེས། དངུལ་ལེན་དུ་ཤོག་ཟེར། ངས་ཀྱང་དེ་ལྟར་ཁས་བླངས། ལོ་གསར་སླེབས་ལ་ཉེ། བདུན་ཕྲག་གཅིག་མ་གཏོགས་མེད། ཉལ་ཁང་གི་རྒན་བདག་དེས་བསྐྱར་དུ་ཚོགས་འདུ་ཆུང་ཆུང་ཞིག་འཚོགས། རྒན་བདག་གིས། ཚང་མས་སྒོར་མོ་སྤྲད་ཚར་སོང་། ཐུགས་རྗེ་ཆེ། ད་ང་ཚོས་ལོ་གསར་གྱི་ལས་ཀ་དེ་ཚོ་བགོ་བཤའ་རྒྱག་གི་ཡིན་ཟེར། མཁས་གྲུབ་རྒན་བདག་དང་མཉམ་དུ་ཤ་དང་ཚལ་མ་དེ་ཚོ་ཉོ་རུ་འགྲོ་རྒྱུ་བྱས། མཁས་གྲུབ་དང་རྒན་བདག་གཉིས་ཀ་འཛིན་གྲ་ཡང་རྒན་ཤོས་ཡིན།

བསྟན་འཛིན་གྱིས་ཚལ་སླང་དང་སྣོད་ཆས་དེ་ཚོ་ཐབས་ཤེས་འཐེན་རྒྱུ་བྱས། བསྟན་འཛིན་སློབ་གྲའི་ཐབ་ཚང་གི་མ་བྱན་དེ་ཚོ་ལ་འབྲེལ་བ་ཡག་པོ་ཡོད། རྨ་ཆེན་གྱིས་ཐབ་གཡོར་ས་ཞིག་བཙལ་རྒྱུ་བྱས།་ རྨ་ཆེན་ང་ཚོའི་སློབ་གྲའི་ཉེ་འདམ་གྱི་དགོན་པའི་གྲ་བ་ཚོ་དང་འབྲེལ་བ་ཡག་པོ་ཡོད། (རྨ་ཆེན་ཁོང་འཛིན་རིམ་བདུན་པ་ཐོན་རྗེས་བོད་ལ་ཕྱིན་སོང་། རྗེས་སུ་གོ་ཐོས་བྱས་ན། ཁོང་བོད་དུ་གྲོངས་འདུག་ཟེར།) ནོར་བུ་དང་ཕུན་ཚོགས་གཉིས་ཀྱིས་ཐབ་ཚང་བཟོ་རྒྱུ་བྱས། ཁོང་གཉིས་ཀྱི་ལས་ཀ་དེ་གལ་ཆེ་ཤོས་ཡིན། སློབ་གྲའི་སྒྲིག་སྲོལ་ལྟར་ན། སོ་སོའི་ཉལ་ཁང་དུ་ལོ་གསར་སྐབས་སུ་ཞལ་ལག་བཟོ་ཆོག་གི་མེད། དེར་བརྟེན། སློབ་ཕྲུག་ཚོས་གསང་བའི་སྒོ་ནས་བཟོ་གི་ཡོད། དེར་བརྟེན། ཕྱི་ལོགས་ནས་བལྟས་ན། ནང་དུ་ཐབ་ཚང་ཡོད་པ་ཧ་མི་གོ་བ་ཞིག་བཟོ་དགོས་ཀྱི་ཡོད། རྒྱ་མཚོ་དང་འཇམ་དཔལ་གཉིས་ཀྱིས་སློབ་གྲའི་གཞུང་ནས་སྤྲད་པའི་སྡེར་ཀ་དེ་ཚོ་བསྒྲིག་རྒྱུ་དང་ཉལ་ཁང་ནང་ལ་མཛེས་བཟོ་བྱེད་རྒྱུ་བྱས། ང་དང་ཚེ་དཔག་གཉིས་ཀྱིས་སྣོད་ཆས་བཀྲུ་བའི་འགན་དེ་བླངས། ཕུན་ཚོགས་ད་དུང་མ་བྱན་བྱེད་རྒྱུ་བྱས། ལོ་གསར་གྱི་གནད་དོན་དེ་ཐག་ཆོད། ངའི་སེམས་ཀྱང་བདེ་བདེ་འདྲ་ཆགས། ལོ་གསར་སླེབས། ང་ཚོས་ཁུ་སིམ་མེར་ཉལ་ཁང་དུ་ཟ་མ་བཟོས། ཟས་སྣ་ཚོགས་ལ་རོལ། འབྲས་ཆང་འཐུང་། གཏམ་ལ་རོལ། དགའ་དགའ་སྐྱིད་སྐྱིད་ཀྱི་ངང་ནས་ལོ་གསར་རྫོགས།

ལོ་གཅིག་དེ་ལྟར་ཕྱིན། ཡང་བསྐྱར་ལོ་གསར་བ་ཞིག་སླེབས། ང་ཚོས་སྔར་ལྟར་བྱས། ཡང་བསྐྱར་ལོ་གསར་སླེབས། ང་ཚོས་སྒོར་མོ་མང་ཙམ་བསྡུས། ལོ་གསར་ཅུང་ཙམ་གྲ་རྒྱས་བོ་ཞིག་བཏང་། ད་ནི། ཕྱིའི་སྤྱི་ཚོགས་ལ་ཡང་འགྱུར་བ་ཕྱིན། སློབ་ཕྲུག་ཚོའི་དཔལ་འབྱོར་གནས་སྟངས་ལ་ཡང་འགྱུར་བ་ཕྱིན། སློབ་གྲའི་ཆ་རྐྱེན་ཡང་ཇེ་ཡག་ལ་ཕྱིན། སློབ་གྲའི་ངོས་ནས། ལོ་གསར་མ་སླེབས་སྔོན་ལ། སློབ་ཕྲུག་རྐང་ན་ལྷམ་གསར་བ་མེད་མཁན་ཚོར་ལྷམ་གསར་བ་ཉོས་ནས་སྤྲད། སྟོད་ཐུང་གསར་བ་མེད་མཁན་ཚོར་སྟོད་ཐུང་གསར་བ་ཉོས་ནས་སྤྲད། ངའི་གྲོགས་པོ་ཚོའི་སྤྲོད་ན། དགུན་ཁར་སློབ་གྲའི་གོ་ལྷམ་ནག་པོ་དེ་གྱོན། དབྱར་ཁར་སློབ་གྲའི་བསིལ་ལྷམ་དེ་གྱོན་ནས་འདུག་མཁན་ཡང་གང་འཚམ་ཡོད། ང་ཡང་འཛིན་རིམ་འཕར། འཛིན་རིམ་བདུན་པར་སླེབས། བདུན་པ་ཚར་ནས་བརྒྱད་པར་སླེབས། འོན་ཀྱང་། ངའི་ལོ་གསར་གཏོང་ས་སློབ་གྲ་ཡིན། ང་ཉལ་ཁང་གི་རྒན་བདག་ཆགས། ལོ་གསར་གྱི་འགན་ཚང་མ་ངའི་སྒང་ལ་སླེབས། ངས་ཀྱང་ཉལ་ཁང་གི་རྒན་བདག་རྙིང་པ་ཚོའི་བྱེད་སྟངས་ལད་མོ་བྱས། སྔར་དང་ཅུང་མ་འདྲ་བ་ཞིག་ལ། ང་ཚོའི་ལོ་གསར་གཏོང་སྟངས་ཅུང་ཙམ་གྲ་རྒྱས་སུ་ཕྱིན། ང་ཚོ་ཕྱི་ལོགས་ཀྱི་རྒྱ་གར་གྲོང་གསེབ་ཁག་ལ་ཕྱིན་ནས་བརྙན་འཕྲིན་གཡར། གོང་ཆུང་ཆུང་བྱས་ཏེ་གཡར། ལོ་གསར་སྐབས་སུ་། ཉལ་ཁང་ནང་དུ་གློག་བརྙན་ལ་ཡང་བལྟ་རྒྱུ་བྱུང་། དེའི་ཡན་གྱི་སྐྱིད་ཅིག་གང་ན་ཡོད། ང་འཛིན་རིམ་བཅུ་བར་སླེབས། བཅུ་གཅིག་ལ་སླེབས། ང་ལ་ཡང་ཕྱི་ལོགས་ན་གྲོགས་པོ་ཡོད། གྲོགས་པོ་ཚོས་ལོ་གསར་སྐབས་སུ་ཁོང་ཚོའི་རྩར་ཤོག་ཟེར། འོན་ཀྱང་། ང་མ་ཕྱིན། ང་སློབ་གྲ་སྐྱིད། སློབ་གྲའི་ནང་གི་ལོ་གསར་དེ་སྐྱིད།

ངའི་མདུན་ལམ་རྒྱ་ཆེ་རུ་་ཕྱིན། ངའི་གོ་སྐབས་ཡག་ཏུ་ཕྱིན། ངའི་ཕུགས་བསམ་ལ་འགྱུར་བ་ཕྱིན། ང་ཡོ་རོབ་ལ་སླེབས། ཡང་བསྐྱར། ང་སྡོད་ས་སློབ་གྲ་ཆགས། འོན་ཀྱང་། མི་འདྲ་ས་གཅིག་ནི། སློབ་གྲ་རུ་བོད་རིགས་སློབ་ཕྲུག་གཉིས་མ་གཏོགས་མེད། བོད་ཀྱི་ལོ་གསར་ངའི་སློབ་གྲའི་གུང་གསེང་ལ་འབྲེལ་བ་མེད། སློབ་གྲའི་དགུན་གནང་དེ་ཡེ་ཤུའི་ལོ་གསར་དང་བསྟུན་ནས་གཏོང་གི་ཡོད། དེར་བརྟེན། བོད་ཀྱི་ལོ་གསར་སྐབས་སུ་ང་ཚོའི་འཛིན་གྲ་ཚོགས་ཀྱི་ཡོད། འོན་ཀྱང་། བོད་ཀྱི་ལོ་གསར་དེ་ངས་གློད་མི་ཐུབ། ངའི་གྲོགས་པོས་ཀྱང་གློད་མི་ཐུབ། ཡང་བོད་ཀྱི་ལོ་གསར་སླེབས། རྒྱ་ནག་གི་ལོ་གསར་ཡང་སླེབས། བོད་ཀྱི་ལོ་གསར་དང་རྒྱ་ནག་གི་ལོ་གསར་གཉིས་ཉིན་གཅིག་ལ་འཁེལ། ངའི་གྲོགས་པོ་དང་ངེད་གཉིས་ཀྱིས་་གྲོས་བསྡུར་བྱས། ལོ་གསར་ཇི་ལྟར་གཏོང་དགོས་མིན་སྐོར་ལ་གྲོས་བསྡུར་བྱས། བོད་ཀྱི་ལོ་གསར་གཏོང་རྒྱུ་ནི། གྲོགས་པོ་དང་ངེད་གཉིས་ལ་གདོང་ལེན་གསར་བ་ཞིག་ཆགས། དེ་ཡང་ཆབ་སྲིད་ཀྱི་གདོང་ལེན་གསར་བ་ཞིག་ཆགས། རྒྱ་རིགས་གྲོགས་པོ་ཚོས་ལོ་གསར་དེ་རྒྱ་ནག་གི་ལོ་གསར་རེད་ལབ་ནས་སློབ་གྲོགས་གཞན་པ་ཚོར་འགྲེལ་བཤད་བརྒྱབ། ང་དང་ངའི་གྲོགས་པོས་་ལོ་གསར་དེ་བོད་ཀྱི་ལོ་གསར་ཡིན་ལབ་ནས་སློབ་གྲོགས་གཞན་པ་ཚོར་འགྲེལ་བཤད་བརྒྱབ། བར་མ་བར་ནས། རྒྱལ་ཁབ་གཞན་པ་ནས་ཕེབས་པའི་སློབ་གྲོགས་ཚོ་འཐོམས། བོད་རྒྱ་ནག་གི་རེད་དམ། རྒྱ་ནག་བོད་ཀྱི་རེད་དམ། ལོ་གསར་གཅིག་པ་ཡིན་དོན་ཅི་རེད། སློབ་གྲོགས་ཁ་ཤས་ཀྱིས་ང་ལ་སྐད་ཆ་དྲིས། ངས་། རྒྱ་ནག་དང་བོད་ཀྱི་ལོ་གསར་རྟག་པར་གཅིག་པ་མ་རེད། མཚམས་མཚམས་ལ་དུས་མཉམ་ལ་་འཁེལ་གྱི་ཡོད། ལོ་གསར་དུས་མཉམ་ལ་འཁེལ་བ་དེ་བོད་རྒྱ་ནག་གི་ཆ་ཤས་རེད་ཟེར་བའི་སྐད་ཆ་དེར་ཁུངས་སྐྱེལ་རྩ་ནས་འགྲོ་གི་མ་རེད་ཟེར་བཞིན་ལན་བརྒྱབ། བོད་ཀྱི་ལོ་གསར་དེ་རྒྱ་ནག་གི་ལོ་གསར་དང་དུས་མཉམ་འཁེལ་བ་དེས་ངའི་སེམས་ལ་སྡུག་བསྔལ་འཕར་མ་ཞིག་སྤྲད། ངའི་སེམས་ལ་ཐབས་ཤེས་ཤིག་དྲན། ང་དང་ངེད་ཀྱི་གྲོགས་པོས། བལ་ཡུལ་དང་རྒྱ་གར་ནས་ཕེབས་པའི་གྲོགས་པོ་ཚོ་སྐད་བཏང་སྟེ་བོད་ཀྱི་ལོ་གསར་ལ་ཁ་ཟས་བཟོས། ཁ་ཟས་མང་པོ་བཟོས། གྲོགས་པོ་ཚོར་ཁ་ཟས་བགོ་བཤའ་བརྒྱབ། འཛིན་གྲར་སོང་ནས་དགེ་རྒན་དང་འཛིན་གྲོགས་ཚོར་ཁ་ཟས་སྤྲད། བོད་ཀྱི་ལོ་གསར་རེད་ལབ་ནས་ཁ་ཟས་སྤྲད། བོད་ཀྱི་ལོ་གསར་ལ་ཁ་ཟས་བཟོ་གི་རེད་ལབ་ནས་ཁ་ཟས་སྤྲད། བོད་ཀྱི་ལོ་གསར་དེ་རྒྱ་ནག་གི་ལོ་གསར་དང་མ་འདྲ་བ་ཞིག་ཡིན་པའི་རྣམ་པ་བསྟན། ངའི་སེམས་ལ་སྤོབས་པ་ཆུང་ཆུང་ཞིག་སླེབས། ལོ་གསར་གྱི་སྐབས་དང་བསྟུན་ནས། བོད་བོད་དང་རྒྱ་རྒྱ་ཡིན་པ་སྟོན་ཐུབ་སོང་བསམ་པའི་སྤོབས་པ་ཞིག་སླེབས། ངེད་ཀྱི་གྲོགས་པོར་ཡང་དེ་མཚུངས་ཡིན།

ཡང་ལོ་གཅིག་རྫོགས། ལོ་རྗེས་མ་དེ་སླེབས། ང་ཨ་རིར་སླེབས། ཡང་བསྐྱར་ང་སྡོད་ས་སློབ་གྲ་ཆགས། ཨ་རིར་སླེབས་ནས་ཟླ་ངོ་ལྔ་ཙམ་ཕྱིན། ད་ལོའི་གུང་གསེང་གི་སྐབས་དང་བསྟུན་ནས། ཨ་རིའི་ནང་གི་མངའ་སྡེ་ཁ་ཤས་ལ་ཉུལ། བོད་རིགས་ངོ་ཤེས་མང་པོ་ཆགས། བོད་རིགས་ཚོ་དང་གྲོགས་པོ་ཆགས། ཡང་ལོ་གསར་ལ་སླེབས། ངོ་ཤེས་ཚོས་ལོ་གསར་ལ་ཁོང་ཚོའི་རྩར་ཤོག་ཟེར། ལོ་གསར་ཁོང་ཚོའི་མཉམ་དུ་གཏོང་ཟེར། ངས་བསྐྱར་དུ་བསམ་བློ་བཏང་། ལོ་གསར་དེ་གཟའ་ཉི་མར་འཁེལ་འདུག གཟའ་ཉི་མའི་ཉིན་ང་ལ་ལས་ཀ་ཡོད་དམ། ངས་དྲན་སོང་། གཟའ་ཉི་མའི་ཉིན་། ངས་ཡིག་ཚད་ལ་གྲ་སྒྲིག་བྱེད་དགོས། གཟའ་ཟླ་བར་ང་ལ་ཡིག་ཚད་ཡོད། ཡིག་ཚད་གཉིས་ཡོད། བོད་གཞུང་གིས་ད་ལོར་ལོ་གསར་མ་གཏོང་ཟེར། གཞུང་འབྲེལ་མ་ཡིན་པའི་ཚོགས་པ་ཁ་ཤས་ཀྱིས་ལོ་གསར་གཏོང་དགོས་རེད་ཟེར། ལོ་གསར་གཏོང་མཁན་དང་མི་གཏོང་མཁན་གཉིས་ཀ་འདུག ལོ་གསར་གཏོང་འདོད་ཡོད་མཁན་དང་གཏོང་འདོད་མེད་མཁན་གཉིས་ཀ་འདུག ངས་བསྐྱར་དུ་བསམ་བློ་བཏང་། ང། ལོ་གསར་མི་གཏོང་མཁན་གྱི་གྲས་སུ་བསྡད། ལོ་གསར་གྱི་ཚབ་ལ་ཕྱིར་དྲན་གྱི་རྩོམ་འདི་བྲིས། ངའི་ལོ་གསར་ཡང་འདི་ཡིན། ངའི་ལོ་གསར་གྱི་དྲན་ཐོ་ཡང་འདི་ཡིན། དྲན་ཐོ་འདི་ངའི་ལོ་གསར་ཡིན།

(དྲན་ཐོ་ཆུང་ཆུང་འདི་། བོད་ཕྱི་ནང་གི་ངེད་ཀྱི་གྲོགས་པོ་ཚོར་ལོ་གསར་ལེགས་སྐྱེས་སུ་ཕུལ་བ་ཡིན། )