ལེགས་སྐྱེས་འདུ་ཤེས།

ཚེ་རིང་།
—— ལེགས་སྐྱེས་ཤིག་གི་འབྱོར་ལན་དུ་བྲིས།

རང་གིས་མཆོག་གྱུར་གྱི་གྲོགས་པོ་དེ་ལ་ལག་སྐྱེས་རྩ་ཆེན་ཞིག་སྟེར་འདོད་ན། དེ་ནི་ཁྱོད་ཀྱིས་རྒྱུ་ནོར་གྱི་ཕྱོགས་ནས་བསམ་བློ་མ་གཏོང་། རྒྱུ་ནོར་ནི་ཁྱེད་ཀྱིས་གཞན་ལ་སྟེར་ཆོག་པ་དང་གཞན་གྱིས་ནམ་ཡིན་ཡང་ཉེར་ཆོག་པའི་ལེགས་སྐྱེས་དངོས་མ་དེ་མ་རེད། ཆུང་དུས་ནས་བཟུང་ལྷན་སྐྱེས་སུ་རང་ལ་དབང་ཞིང་། རང་ཉིས་ཀྱིས་མཛའ་བརྩེ་ཟབ་པའི་མི་དེ་ལ་སྟེར་ཆོག་པ་དང་། དུས་ཅི་འདྲ་ཞིག་གི་འོག་ནས་ཀྱང་གཞན་གྱིས་ཉེར་ཆོག་པའི་ལག་སྐྱེས་དངོས་མ་ནི། ཟོལ་མེད་དྭངས་གཙང་གི་ཁྱེད་ཀྱི་སེམས་པ་ཁོ་ན་ཡིན། རང་དང་ལྷན་སྐྱེས་སུ་གྲུབ་པའི་སེམས་པ་ནི་འཇིག་རྟེན་འདིའིི་སྟེང་ནས་ཁྱེད་ཀྱིས་གཞན་ལ་སྟེར་ཆོག་པའི་ལེགས་སྐྱེས་གཅིག་བུ་དེ་ཡིན་ལ། ཆེས་རིན་ཐང་ཆེ་བའི་ལེགས་སྐྱེས་ཀྱང་དེ་ཡིན།
ཡིན་ཡང་སེམས་ཀྱི་ལེགས་སྐྱེས་ནི་རྒྱུ་ནོར་ལྟར་སྟེར་ཆོག་ཆོག་ཅིག་དང་། གཞན་གྱིས་ཀྱང་ལེན་ཆོག་ཆོག་ཅིག་མིན། སྐྱིད་སྡུག་གི་དུས་ཚོད་མང་བོ་ཞིག་གི་འབྲེལ་འདྲིས་བརྒྱུད་རིམ་ཁྲོད། ཕན་ཚུན་སེམས་ཁུར་དང་ཡིད་ཆེས། དུངས་ཀ་དང་བརྩེ་བྱམས་སོགས་ངང་གིས་སླེབས་དུས། ཁྱེད་ཀྱིས་རང་ཉིད་ཀྱི་ཆེས་རྩ་ཆེ་བའི་ལེགས་སྐྱེས་དེ་སྟེར་མི་དགོས་པར་ངང་གིས་ཤོར་འགྲོ་ལ། གཞན་གྱིས་ཀྱང་ཆེད་དུ་བརྩོན་མི་དགོས་པར་ངང་གིས་ཐོབ་འགྲོ།

དེའི་ཕྱིར། སེམས་པའི་ལེགས་སྐྱེས་ནི་འཇིག་རྟེན་འདིའི་སྟེང་གི་ལེགས་སྐྱེས་མཆོག་ཏུ་གྱུར་བ་དེ་ཡིན་ལ། ལེགས་སྐྱེས་དེ་སྟེར་མཁན་དང་སྟེར་སའི་མི་དེ་དག་ནི་འཇིག་རྟེན་འདིའི་སྟེང་དུ་ཕྱོགས་གང་ནས་ཀྱང་བར་ཐག་མེད་མི་དེ་དག་ཡིན་ལ། དེ་རྣམས་ནི་ཆེས་བདེ་སྐྱིད་ལྡན་པ་དང་ཆེས་སྤྲོ་སྣང་ཁོལ་བ་གཅིག་བུ་དེ་ཡིན་འོས།
འདི་ནི་མི་ཞིག་གིས་གཞན་ལ་སྟེར་ནུས་ཤིང་སྟེར་དགོས་པའི་ལག་སྐྱེས་དང་། ལག་སྐྱེས་དེ་གཞན་ལ་སྟེར་ཚུལ་གྱི་བརྒྱུད་རིམ་རགས་པ་ཙམ་ཡིན།