ལག་ཁྱེར་སྐད་འཕྲིན་གྱི་སྐྱོན་ཡོན་སྐོར་གྱི་ཀ་བཤད།

གཞུང་པ་ཚེ་དབང་བསོད་ནམས་།

 
ཀ་ཡེ་གསོན་དང་ལག་ཁྱེར་སྐད་འཕྲིན་ཟེར་བའི་ཇོ་ལགས་སྒམ་ཆུང་ལགས།།
ཁ་ལ་ཟ་ལོང་འཐུང་ལོང་མེད་པར་ཇོ་ལགས་སྐད་འཕྲིན་ཁྱོད་ལ་འཐམས།།
ག་ས་ག་ནས་བརྡ་འཕྲིན་འབྱོར་ནས་གཡོག་བསྐུལ་ལས་སྦྲེལ་ཁྱོད་ཀྱིས་བཟོས།།
ངོ་ཐུག་མེད་ཀྱང་གཏམ་གླེང་བྱེད་སའི་གླེང་སྟེགས་ནུས་ལྡན་སྐད་འཕྲིན་ཁྱོད།།
ཅ་དངོས་ཆུང་ཆུང་གོ་ཆོད་ཆེ་བས་ནོར་བུ་དགོས་འདོད་ཀུན་འབྱུང་འདྲ།།
ཆ་རྒྱུས་མེད་པའི་ཐག་རིང་མི་དང་འབྲེལ་ལམ་གསར་པ་ཁྱོད་ཀྱིས་བཟོས།།
ཇ་ཁང་ཆང་ཁང་གང་དུ་ཕྱིན་ཀྱང་ཧ་ལོ་ཧ་ལོའི་སྒྲ་སྐད་མང་།།
ཉམས་མྱོང་མེད་པའི་རྒན་པོ་རྒན་མོས་ཁ་འདོན་བཞག་ནས་ཧ་ལོ་ཟེར།།
རྟ་ནོར་བ་ཕྱུགས་ལས་ཀྱང་ལྷག་པའི་རིན་པ་གསེར་དངུལ་ཁྱོད་ལ་ཕུལ།།
ཐ་ན་ཚུར་ཡོང་སྒོར་གཅིག་མེད་པར་དོན་མེད་འགྲོ་སོང་ཁྱོད་ལ་བཏང་།།
དེང་རབས་ཚན་རྩལ་རིག་པ་རྣོ་ནས་འཛམ་གླིང་སྤྱི་ཚོགས་སྨྱོན་པ་བཟོས།།
ན་གཞོན་སློབ་སྦྱོང་གོ་སྐབས་འཕྲོག་ནས་ཇོ་ལགས་སྐད་འཕྲིན་རྗེས་སུ་འབྲངས།།
དཔོན་ཆེན་བླ་ཆེན་མི་ཆེན་མཆོག་དམན་ཀུན་ལ་དགོས་པ་སྐད་འཕྲིན་ཁྱོད།།
ཕ་མ་བུ་ཕྲུག་ནང་མི་མི་རེའི་ལག་ཏུ་འཛིན་པའི་སྐད་འཕྲིན་ཁྱོད།།
བ་ཕྱུགས་རྫི་བོ་རི་བོའི་རྩེ་ནས་བ་ཕྱུགས་འཚོ་ནས་ཁྱོད་དང་འགྲོགས།།
མ་ཎི་ཁ་འདོན་དགེ་སྒྲུབ་བཞག་ནས་སྐད་འཕྲིན་ཁྱོད་ལ་ཡང་ཡང་ཕུར།།
བཙན་བྱོལ་བོད་མིའི་སྤྱི་ཚོགས་ཁྲོད་དུའང་མི་མང་སྐད་འཕྲིན་ཁྱོད་ཀྱིས་བསླུས།།
ཚོང་དང་ཛ་དྲག་བྱུང་བའི་དུས་སུ་བརྡ་སྟོན་བརླགས་ནས་ཁྱོད་ཀྱིས་གློད།།
ཝ་སྤྱང་འདྲ་བའི་བེད་སྤྱོད་ལོག་པས་སྐད་འཕྲིན་ཁྱོད་རང་ལམ་ལོག་འཁྲིད།།
གཞན་སྐྱོན་གླེང་ནས་རང་མིང་བསྒྲགས་སའི་བརྒྱུད་ལམ་གསར་པའི་ཤེས་ཁྱོང་།
གཟབ་གཟབ་མ་བྱས་བེད་སྤྱོད་མང་ན་དོན་མེད་འགྲོ་སོང་བུན་འོག་ཚུད།།
འ་ར་འུར་རེའི་བདེན་མེད་དཀྲོགས་གཏམ་སྤེལ་སའི་བརྒྱུད་ལམ་ཌ་རུ་མ།།
ཡོང་འབབ་མེད་པའི་ཉམ་ཐག་ལས་མེད་ཉིན་མཚན་མེད་པར་སྐད་འཕྲིན་ཕུར་།
རང་དབང་སྨྲ་བརྗོད་ཚད་ལས་བརྒལ་ནས་བསམ་ཚད་གླེང་སའི་གཞང་ཁང་འདྲ།།
ལ་ལུང་ས་མཐའི་གླིང་ཕྲན་གཞན་ལ་སྐར་ཆ་གཅིག་རིང་བརྡ་ལན་འཕྲོད།།
ཤེས་ཡོན་མཐོ་དམན་དབུལ་ཕྱུག་ཕོ་མོ་ཁྱད་མེད་ཀུན་ལ་འགྲོ་དོན་བསྐྱངས།།
ས་མཚམས་རྒྱལ་མཚམས་ལམ་ཡིག་མི་དགོས་མྱུར་མགྱོགས་ཆེ་བའི་གྲུ་བ་འདྲ།།
ཧ་ལོ་ཧ་ལོའི་དུས་རབས་ཤར་ནས་འཛམ་གླིང་ཧྲིལ་པོ་ཆུང་ཆུང་ཆགས།།
ཨ་གསར་མ་མང་གློག་ནུས་ཆེ་བས་ཀླད་རྩ་སྐྱོན་ཤོར་ལོ་རྒྱུས་མང་།།