ལ་གཞས་ཀྱི་རྩལ།

ཁྲོ་གཏུམ་གྱིས་ཡིག་ཕབ་བྱས།

 
སྟོད་ཕྱོགས་འབྲོག་གི་ཕྱུགས་ར་གོང་མ་ནས།།
གཡང་རྫི་བུ་གི་གཡང་དཀར་འཚོ་གོ་དུས།།
གཡང་མོ་ལུག་གི་སྡུག་བསྔལ་བཤད་ཀྱིས་ན།།
རི་གསུམ་རྩེ་ན་རྩི་རྩྭ་ཟ་གོ་དུས།།
རི་སྤྱང་སྔོན་མོ་མགྱོག་མགྱོག་ཉུ་ལི་ལི།།
རྒྱུ་བདག་རྒད་པོས་རྒྱ་ལ་བཙོང་གོ་དུས།།
རྒྱ་ནག་ཤན་པ་དེས་ཤག་ནག་ཤིག་ཤིག
ཤོར་མེད་ཞག་པའི་ཨ་ལོང་འདེབས་གོ་་དུས།།
ཉམས་ཆུང་སྲོག་གི་སྲོག་རྩ་འདའ་ར་ར།།
ཚེ་དཀར་མ་བུ་ཁ་ཁར་གཏོང་གོ་དུས།།
ཚེ་ཕྲུག་ལུ་གུ་དེ་ཤུད་ན་འབའ་ལྷིང་ལྷིང་།།
གཡང་དཀར་དཀྱིལ་གྱི་ལུ་གུ་གཉོམ་པོ་ཁྱོས།།
རི་རྩྭ་ཟོས་ནས་རང་མགོ་མ་ཐོན་དུས།།
བྱམས་ལྡན་ཨ་མའི་ནུ་ཞོ་མི་དབང་གི།
ད་ནས་བཟུང་དེ་མ་བུ་མི་ཐུག་ག།
གཡང་དཀར་མ་བུ་བྲལ་པའི་སྡུག་བསྔལ་འདི།།
དབང་ཆེན་མགོ་ནག་མྱི་གི་མ་ཤེས་དུས།།
དབང་ཆུང་འུ་ཚོའི་དབང་ལ་མི་ཡོང་ག།།

སྨད་ཕྱོགས་གཡང་གི་སྡེ་རི་ཞོལ་མ་ནས།།
ལོ་ཉུང་གཞོན་ནུས་རྩེད་མགོ་རྩོམ་གོ་དུས།།
འདང་ཆེན་འུ་གཉིས་ཀ་སྡུག་སྲོལ་བཤད་ཀྱིས་ན།།
སྨག་ག་རྒྱབ་ནས་ཁྱོད་གྲོང་ལ་འཁོར་གོ་དུས།།
མདོ་རིག་རྟ་ཡི་མཐོག་རྔོགས་སི་ལི་སི་ལི།།
ཐང་ལ་བབས་ནས་རོགས་ལོར་ཐུག་གོ་དུས།།
ཐག་རིང་རོགས་ཀྱི་རྔན་པ་ཤུ་རུ་རུ།།
རོགས་རྟགས་གདུ་བུ་ལག་ན་བརྗེ་གོ་དུས།།
དགའ་སྐྱོ་ཟུང་གི་མཆི་མ་ཐ་ར་ར།།
རང་དབང་མེད་པར་གཞོག་ལ་བཀར་གོ་དུས།།
སུ་ར་ཡིན་རུང་སེམས་ཁུངས་འཁྱགས་སྟོང་སྟོང་།།
ཞིང་བཟང་ཞི་མོའི་སེམས་མཐུན་རོགས་ལོ་ཁྱོས།།
རང་སེམས་ལྷོད་ནས་རང་ཚུགས་མ་ཟིན་དུས།།
འདང་ཆེན་གྲོང་ནས་རེ་མ་མི་ཐུག་གི།
ནམ་ཐུག་རོགས་གི་དབང་ལ་མི་ཡོང་ག།
འདང་ཆེན་ཁ་ཁར་བཏང་བའི་སྡུག་བསྔལ་འདི།།
དབང་ཆེན་གླེང་མོ་མྱི་ཁའི་མ་ཤེས་ན།།
དབང་ཆུང་འུ་གཉིས་ཀྱི་དབང་ལ་མི་ཡོང་ག།

སྒྲ་ཡི་འབྲེལ་ཐག་འདིར་ཡོད། http://kg.qq.com/share.html?s=1AWrz2N2TZv2