རྫ་ཚེ་རིང་བཀྲ་ཤིས།
གཅིག གཏམ་གྱིས་གླེང་བསླངས་པ།
ཁ་སང་ཕྱི་དྲོ་ངས་དྲ་ཐོག་ཏུ། ང་མི་ཚེ་འདིར་སྔ་ཙམ་ནས་རྫོང་སར་མཁྱེན་བརྩེ་རིན་པོ་ཆེ་དང་མཁན་ཆེན་ཚུལ་ཁྲིམས་བློ་གྲོས་གཉིས་ལ་གཞན་དང་མི་འདྲ་བའི་ཆ་གལ་ཆེན་ཞིག་ཡོད་པ་དེ་ངོས་ཟིན་མཁན་ཞིག་ཏུ་སྐྱེས་པ་ནི། དཔྲལ་པར་མིག་གཉིས་དོད་པ་དང་། ཁོག་པར་སེམས་ཤིག་ཡོད་པ་དེས་ལས་ཀ་ཞིག་བྱས་སོང་སྙམ་དུ་དགའ་བཞིན་ཡོད། ང་ལ་སྔ་མོ་ཞིག་ནས་ཁོང་རྣམ་པ་གཉིས་ཀྱི་སྐུ་ལུས་ཀྱི་ཐོག་ནས་འཛད་མཐའ་མེད་པའི་མ་འོངས་པ་ཞིག་མངོན་བཞིན་པ་ལྟ་བུའི་སྣང་བ་བྱུང་། ཞེས་པའི་གཏམ་ཐུང་ཞིག་དྲ་ལམ་དུ་སྤེལ་བ་ཡིན།
ལར་ཁོང་གཉིས་ལྟ་བུ་ཞིག་ལ་ངས་འདིར་གཉིད་སད་པ་ལྟར་གསར་དུ་གདེང་འཇོག་ཞུ་དགོས་པ་ཞིག་མ་རེད་ལ། གསར་དུ་ངོ་སྤྲོད་དགོས་པའི་གནས་བབས་ཤིག་ཀྱང་མེད། ཡིན་ན་ཡང་། མཚམས་མཚམས་སོ་སོའི་སེམས་ཀྱི་འཆར་སྣང་དང་ཚོར་བ་ངོ་མ་དེ་ཕྱིར་སྟོན་རྒྱུ་ནི་ང་ལ་མཚོན་ན་སྒེར་གྱི་རང་དབང་དང་མངོན་འདོད་ཀྱི་རྣམ་འགྱུར་སྤྱིར་བཏང་བ་ཞིག་ཏུ་ངོས་འཛིན་བྱེད་ཀྱིན་ཡོད། ཡིན་ན་ཡང་། སྤྱི་ཚོགས་དྲ་ལམ་གྱི་གཏམ་བརྗོད་གང་འདྲ་ཞིག་ལའང་བསམ་ཚུལ་དང་དྲི་བ་འདྲ་མིན་ཡོང་ཆོག་པ་ནི་རྒྱུན་ལྡན་ཞིག་ཡིན་པ་ལྟར། ང་ལའང་དྲ་གྲོགས་ཤིག་གིས་འདིའི་ཐད་དྲི་བ་ཞིག་བཏོན་བྱུང་།
གཉིས། ༽ དྲི་བ་དངོས་འགོད་པ།
དྲི་བ་དེའི་ནང་དོན་ནི། རྫོང་སར་རིན་པོ་ཆེའི་བཀའ་སློབ་དང་རྩོམ་དེབ་སོགས་ནི་ཧ་ཅང་ཡག་པོ་དང་། ཤུགས་རྐྱེན་ཡང་ཆེན་པོ་འདུག ། ཡིན་ན་ཡང་། ཁོང་གི་ནམ་རྒྱུན་སྤྱོད་པ་གནང་སྟངས་དེ་ཡ་མ་ཟུང་ལྟ་བུ་ཞིག་འདུག །དེ་གང་འདྲ་ཡིན་ནམ། ཁོང་གིས་དེ་འདྲ་ཞིག་གནང་དགོས་པའི་རྒྱུ་མཚན་ཅི་ཡིན་ནམ། ཞེས་པ་དེ་རེད།
ངའི་ཚོར་སྣང་ལ། དྲ་གྲོགས་ཁོང་གིས་དངོས་གནས་དྲང་གནས་ཀྱིས་དོན་དངོས་ཤིག་ཁ་གསལ་ཆགས་འདོད་པ་དང་། སེམས་ནང་གི་དྲི་བ་ཞིག་ལ་ལན་ངོ་མ་ཞིག་འཚོལ་བཞིན་ཡོད་པའི་ཚོར་སྣང་ཞིག་བྱིན་བྱུང་། དེ་མུར་ང་ལ་ལན་གྱི་ཡི་གེ་ཞིག་འབྲི་འདོད་བྱུང་བ་ལྟར་དྲིས་ལན་འདི་ཡིག་ཐོག་ཏུ་བཀོད་པ་ཡིན། དྲིས་ལན་འདི་ཁོང་གཅིག་པུ་ཙམ་མིན་པར་གང་ཟག་མང་པོ་ཞིག་ལ་ཕུལ་བའི་དཔྱད་གཞི་ཞིག་ཏུ་ངོས་འཛིན་གནང་ནའང་ཆོག །
གསུམ། ༽ དྲིས་ལན་གྱི་མགོ་རྩོམ་པ།
བརྩེ་བའི་དྲ་གྲོགས་ལགས།
སྤྱིར་མི་སོ་སོར་རང་རང་གི་ལྟ་ཚུལ་རེ་རེ་ཡོད་ཆོག་ལ། ཡོད་ཀྱང་ཡོད་པ་རེད། ངའི་ལྟ་ཚུལ་གྱི་ལན་འདིས་ཀྱང་ཁྱེད་ཀྱི་ཐུགས་ཁ་ཁེངས་པ་ཞིག་ཡོང་མིན་མི་ཤེས། ཚད་ངེས་ཅན་གྱི་ཐོག་ནས་ངས་ཁོང་ལ་ལྟ་སྟངས་འཛིན་ཚུལ་དེར་ཞེན་ཁོག་ཀྱང་འདྲེས་ཡོད་ཆོག །སྒེར་གྱི་བསམ་བློའི་མ་རྙོབ་སའི་ཞན་ཆ་ཡོད་སྲིད་པ་ནི་དེ་བས་ཀྱང་ཨ་ཅང་ཅང་རེད།
གང་ལྟར་ཁྱེད་ཀྱིས་དྲི་བ་གནང་བ་དེར་ངས་རང་གི་ལྟ་ཚུལ་ཙམ་ཞིག་དྲང་མོར་ཞུ་རྒྱུ་ཡིན།
བཞི། ཆ་ལུགས་ནི་ཆོས་པའི་གནམ་ཐིག་མིན།
སྤྱིར་བཏང་ཆ་ལུགས་ཟེར་བ་དེའང་མཐའ་གཅིག་ཏུ་ངེས་གཏན་གྱི་ཆོས་ཤིག་ཡིན་ས་མ་རེད། ཆོས་ཕྱོགས་ནས་ཀྱང་སྐྱེས་བུ་དམ་པ་ཞིག་གི་ནང་གི་ཉམས་རྟོགས་ཀྱི་ཚད་འཛིན་སའི་དངོས་གཞི་དེ་མ་རེད། མ་གཞི་མཚམས་མཚམས་ན་བཟའ་བཞེས་སྟངས་འཇིག་རྟེན་པ་དང་བ་འདྲེན་དགོས་པ་དང་། འཇིག་རྟེན་མ་དད་གྱུར་པ་གང་། །མཐོང་དང་དྲིས་ཏེ་སྤང་བར་བྱ། ། ཞེས་གསུངས་པ་ནི་ཅིས་ཀྱང་བདེན་པ་རེད།
ཡིན་ན་ཡང་། བྱང་ཆུབ་སེམས་དཔའི་སྤྱོད་པ་ཟེར་བ་དེའི་མཐར་ཐུག་གི་གཞི་འཛིན་ས་ནི་རྩིས་ཀྱི་རིགས་ལམ་ཞིག་དཔེར་བཞག་ནས་ཞུས་ན། བསྡུར་ཚད་ཅིག་གི་ཐོག་ནས་གཞི་གྲངས་ཀྱིས་ཐག་གཅོད་དགོས་པ་ཞིག་རེད། དེ་ནི་རང་དོན་དང་གཞན་དོན། བསྟན་དོན་དང་འགྲོ་དོན། འཕྲལ་དང་ཕུགས་བཅས་ལ་ཁེབས་གང་ཆེ་གཟིགས་ནས་དགེ་སྐྱོན་ཐག་གཅོད་དགོས་པ་ཞིག་རེད་ཅེས་པའི་དོན་ཡིན། དེ་ཡང་མཐར་གཏུགས་ན། གང་ཟག་སོ་སོས་གནད་རྟོགས་པའི་དགོས་ནས་རང་ཐག་རང་གཅོད་བྱ་རྒྱུ་ལས་འོས་ཆེར་མེད་པ་རེད།
རབ་བྱུང་གི་ཆས་གོས་གཅིག་པུར་མཚོན་ན་ཡང་། བོད་རྣམས་ཀྱི་གྲྭ་ཆས་མཛེས་པའི་མཐར་ཐུག་པ་དེ་ཤྲི་ལང་ཀ་པ་རྣམས་ཀྱིས་ཆོ་མིན་རིགས་མིན་ཞིག་ཏུ་མཐོང་སྲིད་ལ། གནས་བརྟན་སྡེ་པ་རྣམས་ཀྱིས་དགེ་འདུན་པས་དཔུང་གཡས་ཕུད་ནས་སྐུ་ལུས་ཀྱི་ཆ་ཤས་མང་པོས་ཤ་རྗེན་མངོན་བཞིན་ཕེབས་པ་དེ་རུའུ་ལུགས་ཀྱི་རིག་གཞུང་གི་ཞེན་པ་འཐུག་པོ་ཡོད་པའི་རྒྱ་དང་ཁོ་རེ་ཡའི་སྤྱི་ཚོགས་སུ་དེ་ནི་འོས་འཚམས་མིན་པ་ཞིག་ཏུ་སྣང་སྲིད།
ད་དུང་། རྒྱའི་དགེ་འདུན་པའི་ན་བཟའ་དང་བོད་དང་སོག་པོ་ཡི་གྲྭ་ཆས་འདི་དག་ཀྱང་སངས་རྒྱས་ཀྱི་བཀའ་ལས་བྱུང་བའི་ཆོས་གོས་རྣམ་གསུམ་གྱི་ཚད་དང་མཚན་གྱིས་ཁྱབ་མེད་པ་ལྟར་ཡོད་སྲིད། ཐེ་ལན་པའི་གྲྭ་པས་ཐ་མག་འཐེན་པ་ནས། བོད་ཀྱི་གྲྭ་པས་གཡག་ཤ་ཟ་བ་སོགས་ཀྱང་ཆོས་གྲོགས་གཞན་གྱི་མིག་སྔར་ཁ་ན་མ་ཐོ་བའི་མཐར་ཐུག་ཅིག་ཡིན་སྲིད། ཡིན་ན་ཡང་། རང་རང་གི་སྤྱི་ཚོགས་སུ་རེ་ཞིག་འགྲིག་ནས་བསྡད་ཡོད་པ་དེར་རྩོད་པ་ཆེར་མི་དགོས།
དེ་ཡང་རྗེ་མི་ལས། རྒྱལ་བ་མི་ཡི་དབང་པོ་དེས། །ཆོས་རྣམས་ཆོས་བརྒྱད་འཇོམས་ཕྱིར་གསུངས། །ཞེས་པ་དེ་ཧ་ཅང་གལ་ཆེ་བའི་སྡོམ་ཚིག་ཅིག་རེད་སྙམ་གྱི་ཡོད་ལ། བཀའ་གདམས་གོང་མའི་གསུང་ལས་བྱུང་བའི་ཆོས་དང་ཆོས་མ་ཡིན་པའི་གནམ་ཐིག་དེའང་འདི་ལྟར་བཏབ་ཡོད།
ལྔ། ངས་ཁོང་གི་ཆ་ལུགས་ལ་སྣང་མེད་བཏང་བའི་རྒྱུ་མཚན།
འཕྲོས་བཤད་བཞག་ནས་དཀྱུས་ལ་འཇུག་ན། གུས་པས་ཐོག་མར་༧སྐྱབས་རྗེ་རྫོང་སར་མཁྱེན་བརྩེ་རིན་པོ་ཆེའི་ཞལ་དངོས་སུ་མཇལ་བ་ནས། ཁོང་གི་སློབ་མ་ཞིག་ཏུ་གྱུར་པ་དང་། ཐད་ཀར་བཀའ་མོལ་ཞུ་བ་སོགས་ཀྱི་གོ་སྐབས་བྱུང་ནས་ཞིབ་ཙམ་རྒྱུས་ལོན་ཞུས་པའི་བར་ད་བར་མི་ལོ་བཅོ་ལྔ་ལྷག་ཅིག་འགྲོ་གིན་འདུག །
ཚོན་མདོག་སྣ་ལྔ་ཡོད་པའི་ཁོང་གི་སློབ་མ་དང་རྗེས་འབྲངས་པ་དག་གི་བསམ་སྤྱོད་ལའང་ཆ་རྒྱུས་གང་ལེགས་ཡོད། ཁོང་དང་ཁོང་གི་གསུང་ལ་བརྟེན་ནས་ཤར་ནུབ་ཀྱི་འགྲོ་བ་མང་པོ་ཞིག་ནང་པའི་ཆོས་ལ་བློ་ཁ་ཕྱོགས་པ་དང་། མི་ཚེ་ལ་འགྱུར་བ་ཕྱིན་པ་སོགས་ཀྱི་དཔེ་མཚོན་གསོན་པོ་མང་པོ་ཞིག་ངོ་ཤེས་རྒྱུའི་གོ་སྐབས་ཀྱང་བྱུང་ཡོད། ཁོང་དག་གི་ནང་ནས་མང་པོ་ཞིག་དང་སྐད་ཆ་ཡང་ཞིབ་ཏུ་བཤད་མྱོང་། སྲོལ་རྒྱུན་ནས་དེང་རབས། མགོ་སེར་ནས་མགོ་ནག །རབ་བྱུང་ནས་ཁྱིམ་པ། རྟོག་གེ་ནས་སྒོམ་ཆེན། རྙིང་ཞེན་ནས་རྟོགས་སད་པའི་བར་གྱི་མི་མང་པོ་ཞིག་ལ་མཚོན་ན། རིན་པོ་ཆེ་ཁོང་གི་གསུང་དང་མཛད་པས་བཞག་པའི་ཤུགས་རྐྱེན་གྱི་བརྒྱ་ཆ་ཧ་ཅང་མཐོན་པོ་ཞིག་ནི་དྲང་ཕྱོགས་དང་ཡང་དག་པ། ལྡོག་ཏུ་མེད་པའི་དད་གུས་སྐྱེ་ས། ཡིད་འཕྲོག་ཅིང་དགའ་མོས་བྱེད་ཡུལ་སོགས་ཀྱི་ཚད་དུ་སྨིན་བཞིན་འདུག །
འདི་ཚང་མ་ལ་ནང་གི་རྒྱུ་རྐྱེན་ཞིག་ཡོད་ངེས་ཤིང་། ནུས་པ་དེ་དག་ནི་ལད་མོ་དང་འཁྲབ་སྟོན་ཁོ་ནས་ཁུངས་འཁྱོལ་བ་ཞིག་གཏན་ནས་མ་རེད། འདིའང་ངས་རྫོང་སར་མཁྱེན་བརྩེ་རིན་པོ་ཆེའི་ཕྱི་ཚུལ་གྱི་སྤྱོད་པ་དང་ཆ་ལུགས་ལ་སྣང་མེད་བཏང་བའི་རྒྱུ་མཚན་ཞིག་ཡིན།
རང་སྣང་དབང་དུ་འདུས་ན་གཞན་སྣང་ཟིལ་གྱིས་གནོན་ནུས་པ་དང་། ཅི་བྱས་ལམ་དུ་ལྷོངས་པ་སོགས་ཉམས་ལེན་གྱི་མངོན་རྟགས་ཡིན་པའི་འགྲེལ་བཤད་དེ་ཚོ་ཧ་ཅང་རིང་པོ་དེ་ཚོ་བསྣན་ན་ཉོག་འགྲོ་བས་འདིར་རེ་རེ་ནས་ཞུ་མི་དགོས། འོན་ཀྱང་། ང་ལ་ངའི་གོ་བ་ལེན་སྟངས་ཤིག་ཡོད་པ་དེ་འདིར་ལམ་ཙམ་ཞུས་པ་ཡིན།
གང་ལྟར་འདི་ནས་ངས་ཁྱེད་ཀྱི་དྲི་བ་དེར་དངོས་སུ་ལན་སྟབས་བདེ་ཞིག་འབུལ་ཐབས་ཞུ་རྒྱུ་ཡིན།
དེ་ཡང་ང་རང་སྒེར་གྱི་བསམ་ཚུལ་ལྟར་བྱས་ན། རིན་པོ་ཆེས་ནམ་རྒྱུན་ཆ་ལུགས་ཡ་མ་ཟུང་མཛད་པ་དེར་རགས་རིམ་ཙམ་དུ་བྱས་ན་རྒྱུ་མཚན་བཞི་ཙམ་འདུག
དྲུག གཞོན་སྐྱེས་དང་ཆོས་ལུགས་ཀྱི་སྣང་བརྙན།
རྒྱ་མཚན་དང་པོ་ནི། རིན་པོ་ཆེ་ཁོང་གིས་ཆོས་པ་སྤྱི་འགྲོས་དང་ཅུང་ཟད་མ་འདྲ་བའི་སྤྱོད་པ་ཞིག་བསྐྱངས་ནས་སྲོལ་རྒྱུན་གྱི་རྒྱ་ལས་གྲོལ་བའི་རྣམ་པ་ཞིག་བསྟན་ནས། གཞོན་སྐྱེས་དང་དེང་སང་གི་མི་མང་པོ་ཞིག་གིས་ཆོས་ལུགས་དང་ཆོས་ཀྱི་ཉམས་ལེན་དེ་སྲོལ་རྒྱུན་དང་གཞི་གཅིག་ཏུ་འཛིན་པའི་བསམ་བློ་དེར་འགྱུར་བ་ཞིག་གཏོང་འདོད་ཀྱི་དགོངས་པ་ཞིག་ཏན་ཏན་འདུག
ལར་དེང་སང་གཞོན་སྐྱེས་མང་པོ་ཞིག་ཆོས་ལུགས་སྤྱི་དང་། ཁྱད་པར་ནང་པ་ལས་རིང་དུ་གྱེས་བཞིན་པའི་རྒྱུ་རྐྱེན་གཙོ་བོ་ཞིག་ནི་ཁོང་ཚོའི་སྣང་ངོར་ཆོས་ལུགས་ནི་སྲོལ་རྒྱུན་གྱི་ཕྱི་ཐུམ་འོག་ནས་དང་ལེན་དགོས་པའི་གོམས་གཤིས་ཤིག་གི་སྣང་བརྙན་བསྐྲུན་ཡོད་པས་ཡིན། སྣང་ཚུལ་འདི་ལྷོ་ཤར་ཨེ་ཤ་ཡའི་ནང་པའི་སྤྱི་ཚོགས་དག་ཏུ་དེ་བས་ཀྱང་མངོན་གསལ་དོད་པོ་ཡོད།
བདུན། ཕལ་པའི་བསམ་བློ་དང་འཚོ་བའི་ཉེ་སར་གཅར་བ།
རྒྱུ་མཚན་གཉིས་པ་ནི། རིན་པོ་ཆེས་དེ་ལྟར་ཁྲི་ལས་བབས་ནས་ཕལ་བའི་སྤྱོད་པ་དང་མཐུན་པར་མཛད་ན། ཁོང་ཉིད་དགེ་རྒན་ཞིག་གི་ངོས་ནས་སམ། སེམས་ཁམས་ཀྱི་སྨན་པ་ཞིག་ཡིན་པའི་ངོས་ནས་སམ། ཆོས་ལུགས་ཀྱི་རྒྱུན་འཛིན་པ་ཞིག་ཡིན་པའི་ངོས་ནས། ཁོང་གིས་ལས་ཀ་བྱ་ཡུལ་དང་སྐད་ཆ་བཤད་སའི་ཡུལ་དེའི་བསམ་བློ་དང་འཚོ་བའི་མཐིལ་རྟོགས་རྒྱུར་ཕན་ཐོགས་ཆེན་པོ་ཡོད་པའི་ཡིད་ཆེས་གནང་བཞིན་འདུག གཟིགས་ཚུལ་དེ་ནི་ཧ་ཅང་ཡང་དག་པ་རེད་སྙམ་གྱི་ཡོད་ལ། ཁོང་གི་གནང་སྟངས་དེ་ལམ་ལྷོང་བྱུང་བ་ཞིག་ཏུ་ངས་མཇལ་གྱི་ཡོད།
དེ་ཡང་ཁོང་གིས་ཕྱག་དེབ་རེ་རེ་བཞིན་དང་། བཀའ་མོལ་རེ་རེ་བཞིན་མི་རྣམས་ཀྱི་སེམས་ལ་ཟུག་པོ་དེ་ཙམ་ཡོང་བ་དེ་ནི་ཁོང་གིས་གཏིང་ཟབ་པོས་ཕ་རོལ་པོའི་སེམས་ཁམས་དང་འཚོ་བའི་དཀའ་ངལ། དེ་དག་གི་རྒྱབ་ལྗོངས་སུ་གྱུར་པའི་དུས་རབས་ཀྱི་ཆོས་ཉིད་བཅས་ལ་བསམ་གཞིག་གཏིང་ཟབ་གནང་ཐུབ་ཡོད་པའི་ཆ་ནས་རེད།
བརྒྱད་པ། སྤྱོད་ལམ་གྱི་སྒྱུ་རྩལ་དང་དེའི་བླ་སྲོག །
ཁོང་གིས་ཉེ་ཆར་གྱི་རྩོམ་ཡིག་ཅིག་ཏུ། ཁོང་ལོ་ངོ་བཅུ་ཕྲག་གཅིག་གཉིས་ཀྱི་སྔོན་ནས་ཐའེ་ཝན་གྱི་གྲོགས་པོ་ཏའོ་ལུགས་པའི་སྐྱེས་པ་ཞིག་དང་གྲོགས་པོར་གྱུར་པ་དང་། ཁོང་གཉིས་མཉམ་དུ་འཇར་པན་ལ་སྤྲོ་འཆམ་བྱས་པའི་སྐོར་བྲིས་འདུག ། རྩོམ་ཡིག་དེར་དང་པོ་ཀློག་མགོ་འཛུགས་སྐབས་བླ་མ་ཞིག་དང་ཆོས་པ་ཞིག་གི་ལོ་རྒྱུས་གྱི་རྣམ་པ་མེད་པར་མ་ཟད། སྤྱོད་པ་སློག་མཁན་ཞིག་གི་རྣམ་པ་ལྟར་ཡོད། གློག་བརྙན་ལྟ་བུའི་གཏམ་རྒྱུད་དེའི་མཇུག་ལ་བསླེབས་སྐབས་གཞན་དང་མི་འདྲ་བའི་ཐབས་རྩལ་ཞིག་བརྒྱུད་ནས་ཁྱོད་རང་འཇར་པན་གྱི་ནང་པ་དང་། ཁྲོ་བོ་མི་གཡོ་བ་སོགས་དང་འབྲེལ་བའི་ནང་ཆོས་ཀྱི་བསམ་གཞིག་ཁྱད་པར་བ་ཞིག་གི་ཀློང་དུ་འཁྲིད་པར་བྱེད།
ཐད་ཀར་ཆོས་ཀྱི་སྐད་ཆ་བཤད་ན་མགོ་འཕྲེད་དུ་གཡུག་མཁན་དག་ཀྱང་ངང་རྒྱུད་རིང་པོས་རྣ་བ་གཏོད་ཐུབ་པ་དང་། སེམས་ལ་འཕྲོད་པའི་འཆད་ཐབས་ཤིག་བེད་སྤྱོད་བཏང་འདུག་ལ། ཞར་དང་ཞོར་ལ་དྲིས་ལན་ཧ་ཅང་མང་པོ་ཞིག་མཁོ་སྤྲོད་བྱས་ཡོད། ཁོང་གི་རང་རྣམ་《ཁམ་པ་སྐྱེས་》ཀྱང་དེ་འདྲ་པོ་ཞིག་རེད། དེ་ནི་རིན་པོ་ཆེའི་བཀའ་མོལ་དང་མཛད་སྤྱོད་ཀྱི་ཁྱད་ཆོས་དང་ནུས་པ་ཞིག་རེད། དེ་ནི་ཁོང་གིས་མཛད་པ་དེ་འདྲ་ཞིག་གནང་བའི་དགོས་པའང་རེད།
ཁོང་གི་ཆ་ལུགས་འདྲ་མིན་གནང་བཞིན་པ་དེ་ནི་དེང་སང་ཐ་སྙད་ཅིག་སྤྱད་ནས་ཞུས་ན་སྤྱོད་ལམ་གྱི་སྒྱུ་རྩལ་ཞིག་རེད་ལ། སྒྱུ་རྩལ་དེའི་བླ་སྲོག་གི་སྣེ་ནི་ཡང་དག་པའི་ཤེས་རབ་དང་སྙིང་རྗེ་གཉིས་སུ་སྦྲེལ་ཡོད།
དགུ་པ། ཕྱི་གསལ་ནང་གསལ་དང་ཁ་གསལ་གཏིང་གསལ།
རྒྱུ་མཚན་གསུམ་པ་ནི། མི་ཚོས་བླ་མ་དང་ཆོས་པ་སོགས་ལ་དམིགས་བསལ་གྱིས་ཀུན་སྤྱོད་ཀྱི་ཆ་རྐྱེན་ཁ་ཁ་ཞིག་འདོན་གྱི་ཡོད། དེའི་དབང་གིས་སློབ་མའམ། བླ་མའི་གཉེར་པ་སོགས་ཀྱིས་བླ་མ་དག་གསེར་སྐུ་ནང་བཞིན་ཚུགས་འཛིན་དགོས་པ་ཞིག་ཏུ་བཅོས། སོ་སོས་ཀྱང་རང་ཉིད་སྡོམ་དྲར་ཚུད་པའི་སྡོམ་འབུ་བཞིན་མི་འདོད་བཞིན་དུ་དྲ་བ་དེའི་གཟེབ་ཏུ་ཕར་དེད།
དེས་མང་པོ་ཞིག་ལ་ཕྱི་ནང་མི་མཚུངས་པའི་དཀའ་ངལ་ཆེན་པོ་ཞིག་འཕྲད་དུ་བཅུག །སྟབས་མ་ལེགས་ས་ནས་ནམ་ཞིག་ན་སེམས་ཁམས་ཀྱི་ན་ཚ་སོགས་སུ་གྱུར་ནས་འོས་པའི་ལས་རྣམས་བཙན་གྱིས་བཀག་པ་ལས་བྱུང་བའི་མི་འོས་པའི་བྱ་སྤྱོད་མང་པོ་སྟེ། ཡོངས་གྲགས་ཀྱི་གསང་བ་ཞེས་པ་དེ་བྱུང་། རིམ་གྱིས་དེ་དག་ཡོད་ཚད་བཅོས་མའི་སྒམ་ཚུགས་འཛིན་མཁན་གྱི་སྤྲུལ་སྐུ་ཆུང་ཆུང་ཚོ་དང་། དེ་མ་ཡིན་པའི་ཆོས་པ་གཞན། ཕྱི་ཚུལ་གྱི་ལྟར་སྣང་གི་རྣམ་པའི་མཛེས་པ་ཁོ་ནར་ཞེན་ནས་དད་པ་བྱེད་མཁན་གྱི་སློབ་མ་ཡོན་བདག་དང་བཅས་པར་རིམ་གྱིས་དཀའ་ངལ་འཕར་མ་མང་པོ་ཞིག་འཕྲད་གཞིར་གྱུར་དང་འགྱུར་བཞིན་པ་སོགས་ལ་ཁོང་གི་ངོས་ནས་གཟིགས་ཚུལ་གཏིང་ཚུགས་པ་ཞིག་འདུག །ཁོང་གིས་སྤྲུལ་སྐུའི་ལམ་ལུགས་ལ་ལེགས་བཅོས་བྱ་ཚུལ་གྱི་ཐད་ལ་དེབ་ཞིག་ཀྱང་བརྩམས་གནང་ཡོད།
ལར་སྔར་གྱི་ལམ་ལུགས་སྲོལ་དེ་དག་ཀྱང་དེ་ཚེ་དེ་དུས་དང་། ཐ་ན་ད་ལྟའང་གཏན་ནས་ཕན་ཐོགས་མེད་པ་ཞིག་ག་ལ་ཡིན་ཏེ། སྐབས་མང་པོ་ཞིག་ཏུ། དེ་ནི་དགོས་མེད་ཀྱི་ཚུལ་འཆོས་ཤིག་ཡིན་པ་དང་། དེས་སོ་སོའང་ཁ་ཞེ་མི་མཚུངས་པ་དང་རྫུན་མ་ཞིག་ཏུ་བཟོ་བཞིན་ཡོད་པ་དང་། ཞེན་འཛིན་དེས་སྐབས་མང་པོ་ཞིག་ཏུ་རང་ཉིད་ཀྱང་ཆོས་ལམ་ལས་རིང་དུ་བྱེད་བཞིན་པའི་གཟིགས་ཚུལ་ཞིག་ཡོད་པ་འདྲ། །
བཅུ་པ། མཛེས་སྡུག་ལྡན་པའི་སྐྱག་རྫུན།
དེའི་ཆེད་དུ་ཁོང་གིས་ཁོང་ཉིད་སྙན་གྲགས་ཅན་གྱི་རྫོང་སར་འཇམ་དབྱངས་མཁྱེན་བརྩེའི་སྤྲུལ་སྐུ་ཡིན་པ་དང་། བླ་ཆེན་གྱི་མཚན་གནས་ཡོད་པ། བཤད་སྒྲུབ་ལས་གསུམ་གྱི་བསྟན་པའི་གནས་གཞི་ཆེན་པོ་ཞིག་གིས་བདག་པོ་ཡིན་བཞིན་དུ། མི་ཚོས་སྐྱོན་བརྗོད་དང་དགག་པ་བྱེད་པ་གཟིགས་བཞིན་དུ། རྐང་བཙུགས་ནས་པར་དེ་འདྲ་བརྒྱབ་ནས་དྲ་ལམ་ན་འགྲེམ་གནང་གིན་འདུག །སྐབས་རེར་ཁོང་གིས་བུད་མེད་ཀྱི་ཆས་སུ་ཞུགས་ནས་ཕྱི་རྒྱལ་གྱི་གྲོང་ཁྱེར་དེ་འདྲ་ནས་ཕེབས་ཞོར་སློབ་མ་ཚོར། ཉེ་མ་རིང་ནས་ངའི་ཕྱི་བཞིན་ཤོག་ཅིག་ཅེས་བཀའ་གནང་གིན་ཡོད་འདུག །
དེང་སང་ཕལ་མོ་ཆེས། ང་སྤྱི་ཚོགས་དྲ་ལམ་ལ་ཡོང་གི་མེད་ཅེས་གཞན་གྱི་སྐྱོན་བརྗོད་སོགས་མ་མཐོང་བ་ལྟར་བྱེད་པ་དང་། འགའ་ཞིག་གིས་ཡག་ས་བཟང་ས་ཁོ་ན་དྲ་ལམ་ལ་འགྲེམ་སྤེལ་བྱེད་པས་རྒྱ་སྐད་དུ་འདི་ལ་མཛེས་སྡུག་ལྡན་པའི་སྐྱག་རྫུན་（美丽的谎言）ཞེས་ཟེར། རིན་པོ་ཆེ་ནི་དེ་འདྲ་ཞིག་མ་རེད། ཁོང་གིས་ཡོད་ཚད་དེ་ལས་ལྡོག་སྟེ་གནང་གི་རེད། ཁོང་གི་སྤྱི་ཚོགས་དྲ་རྒྱ་ནི་དངོས་ཡོད་ཀྱི་དེ་རིང་གི་སྤྱི་ཚོགས་དང་སང་ཉིན་གྱི་འཚོ་བར་ལྟ་བའི་སྒེའུ་ཁུང་ལྟ་བུ་ཞིག་ཏུ་གཟིགས་ཀྱི་འདུག་ལ། རང་ཉིད་གང་ཡིན་པ་དེ་ཁ་གསལ་བཟོ་སའི་སྡིངས་ཆ་ཞིག་ཏུའང་དགོངས་ཡོད།
མདོར་ན། སྤྱི་ཚོགས་རྒྱུད་ལམ་ནི་རང་གཞན་གཉིས་ཀ་གསལ་བའི་མེ་ལོང་ངོས་གཉིས་པ་ཞིག་རེད། ཁོང་གི་ཆ་ལུགས་འདྲ་མིན་གནང་བཞིན་པའི་སྐུ་པར་འགའ་རེ་ནི་གློག་བརྙན་འཁྲབ་སྐབས་ཀྱི་འཁྲབ་ཚན་དུ་ཞུགས་པའི་པར་དེ་འདྲའང་རེད་མོད། ཁོང་གིས་ནི་དེ་ལྟར་ཡིན་པའི་གསལ་བཤད་གནང་རྒྱུ་ལས་ལྡོག་སྟེ། རྐང་བཙུགས་ནས་དྲ་ལམ་དུ་འགྲེམ་བཞིན་ཡོད།
བཅུ་གཅིག་པ། ཕྱི་གསལ་ནང་གསལ་ལ་དགའ་བའི་དུས་རབས།
ཁོང་གིས་ཐེངས་གཅིག ༼ ངོ་དེབ་ཐོག་མར་དར་སྐབས། ངའི་ངོ་དེབ་རེད་ཟེར་བའི་ངོ་དེབ་ཅིག་མི་ཚོས་ང་ལ་བསྟན་བྱུང་། ངས་བལྟས་དུས་པར་འདྲ་ཆགས་པོ་མང་པོ་ནང་དུ་བཞག་ཡོད་པའི་ངའི་མིང་ཐོག་ནས་བཟོས་པའི་ངོ་དེབ་ཅིག་རེད། ཡིན་ན་ཡང་། སྐབས་དེར་ང་ལ་ངོ་དེབ་མེད། དེ་ནས་ངས་ཁོང་ཚོར། ཁྱེད་ཚོས་གོ་ནོར་མ་ཐེབས། ང་ནི་འདི་འདྲའི་ཚུལ་མཐུན་དང་བབ་ཆགས་པོ་དེ་འདྲ་ཞིག་གཏན་ནས་མིན་ཞེས་ལབ་པ་ཡིན། དེ་རྗེས་ངས་ང་རང་རང་གིས་ངོ་དེབ་ཅིག་སྒོ་ཕྱེས་ནས་ནམ་རྒྱུན་གྱི་འཚོ་བ་དངོས་ཀྱི་ཁྲོད་ཀྱི་རང་ཉིད་གང་ཡིན་པ་དེ་དྲ་ཐོག་ཏུ་བཞག་ནས་མི་ཚོས་གོ་བ་ལེན་སྟངས་མ་ནོར་བ་ཞིག་ཡོང་ཐབས་བྱས་པ་ཡིན། ༽ ཞེས་གསུངས་མྱོང་།
ལར་ནས་རིན་པོ་ཆེས་རང་ཉིད་གང་ཡིན་པ་དེ་ཕྱི་གསལ་ནང་གསལ་བཟོ་རྒྱུ་དེ་ཆོས་པ་ཞིག་ལ་ཧ་ཅང་གལ་ཆེན་ཡིན་པར་གཟིགས་ཀྱི་འདུག །དེ་ནི་དེང་སང་གི་མིའི་སེམས་ཁམས་ཀྱི་ངོས་ནས་བཤད་ན་ཡང་། མིའི་སེམས་ཁམས་དང་ཐག་ཉེ་ཤོས་སུ་གཅར་སྟངས་ཤིག་ཡིན་པར་གཟིགས་ཡོད། མ་གཞི་ཡིན་ཡང་ཡིན་ས་རེད། དེང་སང་གི་མི་ཚང་མ་ཕྱི་གསལ་ནང་གསལ་ལ་དགའ་མོས་ཤུགས་ཆེར་བྱེད་པའི་དུས་རབས་ཤིག་རེད།
བཅུ་གཉིས་པ། ཉམས་ལེན་གྱི་གྲུབ་ཆ་གལ་ཆེན།
རྒྱུ་མཚན་བཞི་པ་ནི།
ངས་བསམ་ན་གནང་སྟངས་དེ་ནི་རིན་པོ་ཆེས་སྒེར་གྱི་ཉམས་ལེན་གྱི་གྲུབ་ཆ་གལ་ཆེན་ཞིག་ཏུ་གཟིགས་ཀྱིན་མེད་དམ་སྙམ། རིན་པོ་ཆེས་གནང་སྟངས་དེས་མི་ཚོས་ཁོང་ལ་འདྲ་མིན་ཞུས་ཀྱང་ཁོང་ཧ་ཅང་ཐུགས་མཉེས་པོ་གནང་ནས་བཞུགས་བཞིན་འདུག །ལར་དེ་ནི་ངས་རང་ཉིད་ཀྱི་ནང་ཆོས་ཀྱི་ཤེས་རྟོགས་ཕྲན་བུ་དེའི་ངོས་ནས་འགྲེལ་བརྗོད་ཅིག་བྱས་ནའང་། ལམ་འཁྱེར་གྱི་ཉམས་ལེན་ཧ་ཅང་གལ་ཆེན་ཞིག་ཡིན་ས་རེད་སྙམ་པའི་ཚོར་སྣང་རྒྱུད་མར་ཡོད། རོ་སྙོམས་དང་། ཐོག་རྫིས་དང་། གཉན་ས་གཅོད་པ་དང་། ལམ་དུ་ལྷོངས་པ་སོགས་ཀྱང་ངེས་པར་དུ་མི་མེད་ལུང་སྟོང་ཞིག་ལ་སོང་ནས་ཀུ་འདེབས་དགོས་པ་ཞིག་མ་རེད། ལར་དེ་ནི་གོ་ཁ་ནས་དཔའ་གཏམ་བཤད་པ་དང་འདྲ་པོ་རེད། དེང་སང་དྲ་ཚོམས་ཤིག་ཏུ་ཞུགས་ནའང་། མི་མང་བརྒྱ་ཕྲག་མང་པོའི་སྔུན་ནས་ཅི་ཡིན་འདི་ཡིན་མེད་པར་དམའ་འབེབས་དང་འཚང་འབྲུ་ཡིད་ཚིམ་པ་དེ་འདྲ་བྱེད་མཁན་ཧ་ཅང་མང་། དེ་དག་ལ་གདོང་གཏོད་ཀྱིན་རང་གི་དྲན་ཤེས་དང་བཟོད་པའི་གོ་ཆ་མ་ཤོར་བ་ཞིག་བྱུང་ན་དེ་ནི་ཧ་ཅང་ལམ་ལྷོང་ཆེན་པོ་ཞིག་ཏུ་རྩི་ཆོག་པ་ཞིག་རེད་འདུག །
ལར། འགའ་ཞིག་བདག་ལ་མི་སྙན་སྣ་ཚོགས་པ། །སྟོང་གསུམ ཁྱབ་པར་སྒྲོག་པར་བྱེད་ན་ཡང་། །ནད་ཀྱིས་བཏབ་པའི་བུ་ལ་མ་བཞིན་དུ། །ལྷག་པར་བརྩེ་བ་རྒྱལ་སྲས་ལག་ལེན་ཡིན། །ཞེས་པ་འདི་ཞལ་དུ་ལེན་མཁན་གྱི་ཐེག་ཆེན་པ་ཞིག་གི་ངོས་ནས་འདི་དག་གང་ཡང་མིན་དགོས་པ་འདྲ་མོད། དོན་དངོས་ཐོག་ང་ཚོ་ནི། བཟོད་སྲན་ཤིན་ཏུ་ཆུང་བ་དང་། བཟེ་རེ་ཤིན་ཏུ་ཆེ་བའི་གནས་བབ་ལས་ཐར་མེད། རིན་པོ་ཆེས་ཆ་ལུགས་དང་གནང་སྟངས་མང་པོ་ཞིག་གིས་དཀའ་ངལ་འདི་ལ་གདོང་ཐུག་གི་འཐབ་འཛིང་གནང་བཞིན་ཡོད་པ་འདྲ།
དེ་བས་དེང་སང་གི་དུས་འདིར་དྲ་ལམ་ནི་ང་ཚོའི་འཚུབ་ལྷོང་ཆེ་ཤོས་ཀྱི་གཉན་ས་རེད། གཉན་ས་འདི་མ་ཆོད་ནས་གྲགས་སྐར་མང་པོ། དྲ་དཔོན་མང་པོ་རང་ཤི་རྒྱག་དགོས་པ་ཞིག་ཆགས་ཀྱི་ཡོད། མི་མང་པོ་ཞིག་ལ་རྣམ་པ་མི་འདྲ་བའི་དཀའ་ངལ་མུ་མེད་པ་ཞིག་སྤྲོད་ཀྱི་ཡོད།
ངས་བསམ་ན། རིན་པོ་ཆེས་གནང་སྟངས་འདི་དག་ནི་ཆེན་པོར་སྙེམས་པའི་རེ་དོགས་ཀྱི་འཛིན་འཁྲིས་ལ་ཐད་ཀར་དམག་འཐབ་གནང་བའི་རུ་ཤན་གྱི་སྤྱོད་པ་ཞིག་རེད།
རིན་པོ་ཆེས་འཁྲབ་ཁྲིད་གནང་བའི་གློག་བརྙན་《ཕོར་བ་》སོགས་དང་། 《ཧི་མ་ཧི་མ་》སོགས་ལ་གཟིགས་ནའང་ཁོང་གི་བསམ་བློ་དང་ལྟ་ཚུལ་གྱི་ངོས་མང་པོ་ཞིག་ཆུ་ལ་ཆུ་བཞག་གི་ཚུལ་དུ་ཡོད།
བཅུ་གསུམ་པ། ང་ལའང་བློ་ཁོག་འདང་ངེས་ཤིག་མེད་གསུང་།
ལོ་བཅུའི་སྔོན་ཞིག་ལ་གུས་པ་ཐའེ་ཝན་ནས་རིན་པོ་ཆེས་《འཕགས་པ་བགྲེས་མོ་ཞུས་པའི་མདོ》འི་འཆད་ཁྲིད་གནང་བར་བཅར་བ་ཡིན། དེའི་སྐབས་སུ་རིན་པོ་ཆེས།
ང་ཚོ་ནི་རྫུ་བག་ལས་ཐར་ཐུབ་ཀྱི་མེད་པ་དང་། ང་ལའང་དེའི་ཐད་ད་དུང་བློ་ཁོག་འདང་ངེས་ཤིག་མེད། ཅེས་གསུངས་པའི་བཀའ་མོལ་ཞིག་གིས་ང་ལ་ཚོར་སྣང་ཆེན་པོ་སྤྲོད་མྱོང་། ལོ་ལྔའི་ཡར་སྔོན་གྱི་ཁོང་གི་གློག་བརྙན་ཧི་མ་ཧི་མ་ཞེས་པ་དེར་ཡང་། འཁྲབ་སྟོན་པ་ཚང་མས་གདོང་འབག་གྱོན་ཏེ་ང་ཚོ་གདོང་འབག་གྱོན་ནས་འཚོ་བ་སྐྱེལ་མཁན་ཡིན་པའི་དོན་དངོས་དེ་གང་ལེགས་མཚོན་ཐབས་གནང་ཡོད་ལ། ཁོང་ལ་མཚོན་ན་ཟོག་རྫུ་དང་། ཚུལ་འཆོས་ཀྱི་གདོང་འབག་ནི་ངེས་པར་དུ་འདོར་དགོས་པ་ཞིག་ཡིན་པ་དང་། གདོང་འབག་འདི་ནི་སྤྱི་ཚོགས་དང་ཆོས་པ་གཉིས་ཆར་གྱི་ངོས་ནས་རུལ་སུངས་ཀྱི་རྒྱུ་རྐྱེན་ཞིག་ཡིན་པར་དགོངས་ཀྱི་འདུག །ལར་ཆེ་ས་ནས་བཤད་ན་ཉོན་མོངས་པ་དང་། ཤེས་བྱའི་སྒྲིབ་པ་དང་། བག་ཆགས་ཀྱི་རིགས་སུ་སྨོས་པ་ཡོད་ཚད་གདོང་འབག་ཅིག་ཡིན་ས་རེད།
བཅུ་བཞི་པ། འོན་ཀྱང་། ཡག་ཤོས་ཟེར་བ་ཞིག་མེད།
ཁོང་གི་གནང་སྟངས་དང་དགོངས་གཞི་ནི་དེ་འདྲ་རང་ཡིན་མོད། ཡང་མི་ཚང་མས་ཁོང་ནང་བཞིན་ཡོང་ཐུབ་པ་ཞིག་ག་ལ་ཡིན། མ་གཞི་ཡོང་དགོས་པ་ཞིག་ཀྱང་མིན་ཏེ། གང་ཟག་སོ་སོ་ལ་འོས་ཤིང་འཚམས་པའི་ཐབས་ལམ་རེ་ཡོད་ཆོག་པས། ངེས་པར་དུ་ཁོང་གི་གནང་སྟངས་ཁོ་ན་དུས་རབས་འདིའི་མི་ཚང་མར་རན་ཤོས་ཡིན་པའི་བསམ་ཚུལ་ནི་ངས་ཀྱང་འཛིན་གྱི་མེད། ལྟ་སྤྱོད་གང་ཡིན་ཡང་ཡུལ་དུས་གནས་སྐབས་ཚང་མར་གཅིག་རང་ལྟོས་མེད་ཀྱི་ཡག་ཤོས་དང་འཚམས་ཤོས་ཟེར་བ་དེ་འདྲ་ཞིག་ཡོང་ཐབས་མེད་པ་ནི་སྨོས་མ་དགོས་པ་ཞིག་རེད། འོན་ཀྱང་། ང་སྒེར་ལ་མཚོན་ན། རིན་པོ་ཆེའི་གནང་སྟངས་དེ་དག་ལ་དྲང་ཕྱོགས་ཀྱི་གོ་བ་ཡག་པོ་ཞིག་རྙེད་ཀྱི་འདུག་ལ། ལྟ་ཚུལ་འདི་དག་ནི་གུས་པས་ཁོང་ལ་དད་གུས་དང་ཡིད་ཆེས་ཞུ་ཐུབ་པའི་རྒྱུ་མཚན་གཙོ་བོ་ཞིག་ཀྱང་ཡིན།
བཅོ་ལྔ་བ། གུ་ཡངས་ནང་གི་གུ་དོག །
ཁོང་སྒེར་གྱི་ཀུན་སྤྱོད་ཀྱི་ཆ་ནས་ཁོང་ནི་ཧ་ཅང་དེང་རབས་ཅན་དང་། ཡང་ན་གུ་ཡངས་ཤིག་ཏུ་སྣང་ན་ཡང་། བརྒྱུད་པའི་ཆོས་ལུགས་དང་གསང་སྔགས་ཀྱི་ཕྱག་ལེན་སོགས་ཀྱི་ཐད་ཁོང་ནི་ཧ་ཅང་གུ་དོག་གི་རིགས་ཤིག་རེད། ང་ཚོས་རང་གི་ཀུན་སྤྱོད་ཀྱི་གསང་སྒྲོགས་ལ་འཛེམས་ཟོན་ཆེན་པོ་བྱེད་པ་ལས། གསང་སྔགས་ཀྱི་གསང་སྒྲོགས་ལ་ཅི་མི་སྙམ་པ་ནི་ཡོངས་ཁྱབ་ཏུ་གྱུར་ཡོད་མོད། རྫོང་སར་མཁྱེན་བརྩེས་ནི་རང་གི་གསང་བ་སྒྲོགས་པ་ལས་གསང་སྔགས་ཀྱི་གསང་བ་འདིར་གཞན་ལས་ལྟོས་བཅས་ཀྱིས་གུ་དོག་གནང་གིན་ཡོད། ཁོང་གིས་ཉེ་ཆར་གྱི་དྲིས་ལན་ཞིག་ཏུའང་། དྲ་ལམ་ནས་དབང་བསྐུར་བ་དང་། བརྙན་པར་བསྐྱར་ཟློས་ཀྱིས་དབང་ཐོབ་པར་ཁས་འཆེ་བ་སོགས་ལ་དོགས་འདྲི་གནང་ཡོད་ལ། སྔགས་བླ་མེད་ཀྱི་ཁྱད་པར་གྱི་དམ་རྫས་དང་། ལྷ་ཞལ་སྦྱོར་སོགས་དྲ་ལམ་དུ་འཇོག་རྒྱུར་དོགས་ཟོན་དགོས་པའི་དྲན་སྐུལ་ཡོངས་ཁྱབ་ཏུ་གནང་ཡོད། མཁྱེན་བརྩེ་ཐེབས་རྩ་དང་། བརྒྱད་ཁྲི་བཞི་སྟོང་གི་གཞུང་ཕྱོགས་ཀྱི་དྲ་ཚིགས་དག་གིས་ཀྱང་འདི་རིགས་ལ་གཟབ་ནན་ཆེན་པོ་བྱེད། ཁོང་གི་བརྒྱད་ཁྲི་བཞི་སྟོང་གིས་བཀའ་འགྱུར་གྱི་དབྱིན་བསྒྱུར་གྱི་ལས་གཞིར་ཡང་གསང་སྔགས་ཀྱི་རྒྱུད་གཅིག་ཀྱང་ཚུད་མེད། ཁོང་གིས་ནམ་རྒྱུན་ཡོངས་ཁྱབ་ཀྱི་བཀའ་ཆོས་མང་པོ་ཞིག་མདོ་སྡེ་རང་གཙོར་འདོན་གནང་གིན་ཡོད།
ཁོང་གི་ཆེ་བར་བགྲང་མི་འོས་ན་ཡང་མ་བགྲང་ཐབས་མེད་ཅིག་ནི། ཁོང་ནི་སངས་རྒྱས་ལ་ཧ་ཅང་ཤ་ཞེན་ཆེན་པོ་ཡོད་པ་ཞིག་ཡིན་ལ། སངས་རྒྱས་པའི་གྲངས་འབོར་ལའང་སེམས་ཁུར་གནང་མཁན་ཞིག་རེད་འདུག །འདི་ཚང་མ་མང་པོ་ཞིག་གིས་དོ་སྣང་བྱུང་མེད་མོད། རིན་པོ་ཆེའི་ཕྱག་ལེན་འདི་དག་གི་རྒྱབ་ལོགས་སུ་ཡོད་པའི་ཁོང་གི་དགོངས་པ་བཞེས་སྟངས་དེར་ངས་ནི་སྔར་ནས་དོ་སྣང་བྱུང་ཡོད།
བཅུ་དྲུག །རྒྱལ་མཚམས་མེད་པའི་གཟིགས་རྒྱང་།
མདོར་ན། ཁོང་གི་གཟིགས་རྒྱང་དང་ཕྱག་ལས། ཁོང་གིས་བསྟན་པ་སྤྱི་ལ་གནང་བའི་ཐུགས་ཁུར། དེ་བཞིན་ཁོང་ལ་ཡིད་ཆེས་ཞུ་ཁན་གྱི་ཚོགས་སྡེ་བཅས་ཀྱི་ཁྱབ་ཁོངས་ལ་རྒྱལ་མཚམས་ཟེར་བ་ཞིག་ཡེ་མེད་པ་རེད། དེ་ནི་ཁོང་གི་ཐུགས་རྗེ་དང་ཤེས་རབ་དེ་སྲོལ་རྒྱུན་གྱི་ཚིག་གཅིག་སྤྱད་ནས་ཞུས་ན་རྒྱ་ཆད་ཕྱོགས་ལྷུང་དང་བྲལ་བ་ཞེས་པ་དེའི་ཕྱོགས་ལ་ཉེ་བཞིན་ཡོད་པ་འདྲ།
ལར་ཁོང་གཅིག་པུ་མ་རེད། ཁོང་གི་སྐུ་ཕྲེང་གོང་མ་འཇམ་དབྱངས་མཁྱེན་བརྩེ་དབང་པོ་དང་། མཁྱེན་བརྩེ་ཆོས་ཀྱི་བློ་གྲོས་གཉིས་ཆར་ཡང་། དེ་ཚེ་དེ་དུས་ཀྱི་སྤྱིར་བཏང་གི་མིའི་བསམ་བློ་དང་གོམས་གཤིས་ཀྱི་ཁྱབ་ཁོངས་ནས་ཐོད་ཀྱི་བརྒལ་བའི་དགོངས་པ་བཞེས་ཐུབ་མཁན་ཞིག་དང་། ཕྱག་ལས་གནང་ཐུབ་མཁན་ཞིག་བྱུང་འདུག །མ་ཟད་ཤུགས་རྐྱེན་དང་ནུས་པའང་གཞན་གྱིས་ཚབ་བྱེད་ཐབས་བྲལ་བ་ཞིག་བྱུང་ཡོད། དེ་ལ་བསམས་ནས་གུས་པས་སྔར་ཞིག་ལ་བྲིས་པའི་རྩོམ་ཡིག །《འཇིགས་ཞུམ་མེད་པའི་མི་》ཞེས་པར་ཡང་།
སྐྱེས་རབས་ཕྲེང་བ་གཅིག་དང་གཉིས་དང་གསུམ།།
ཚང་མས་ནམ་མཁའི་སྒོང་རྒྱ་བརྟོལ་བ་སྟེ།།
དུས་ཀྱི་འཁྲབ་ར་གཅིག་དང་མ་གཅིག་ལས།།
དོན་ལ་གསུམ་ཀ་མས་ཁལ་ཇག་སོན་ལགས།།
ཚེར་མའི་རལ་གྲི་གཟེངས་པའི་རི་སུལ་ན།།
འཇིགས་ཞུམ་མེད་པའི་མི་ཞིག་མཆིས་སོ་སྐད།།
ཤིན་ཏུ་དཔའ་བ་ཉིད་ཀྱི་གླུ་ལེན་པ།།
ཁྱེད་ནི་ཐུབ་པའི་དཔའ་ཐུལ་གཞན་ཞིག་ལགས།།ཞེས་བྲིས་མྱོང་།
གང་ལྟར་འདི་དག་ཚང་མ་ང་སྒེར་གྱི་ལྟ་ཚུལ་ཙམ་ཞིག་རེད། འགྲིགས་ཡོད་མེད་ནི་མི་ཤེས། ཐུགས་རྗེ་ཆེ། ཕྱི་ལོ་ ༢༠༢༢ ཟླ་ ༡༠ ཚེས་༡༠ཉིན། རྫ་ཚེ་རིང་བཀྲ་ཤིས་ཀྱིས་རི་བོ་སྔོན་པོར་འཕྲལ་བྲིས་པ་ལས། ཚེས་༡༡ ཉིན་མེ་འཁོར་ནང་ནས་འགྲོ་ཞོར་མཇུག་ཡོངས་སུ་གྲུབ་པར་བགྱིས་པའོ།།རྫོགས་སོ།།
ཁོང་ནི་ཆོས་ལུགས་དང་སྒྱུ་རྩལ་གྱི་ས་མཚམས་སུ་འགྲེངས་པའི་རྣམ་དཔྱོད་ཀྱི་རྡོ་རིང་ཞིག་གོ