འཆི་མེད།
—གཅན་མེ་སྟག་ལ།
ང་ལ་སློབ་གྲོགས་དང་དགེ་གྲོགས་རྩོམ་གྲོགས་སོགས་གྲོགས་པོ་ཡིན་ལ་མིན་པ་མང་པོ་ཡོད། དགའ་སྡུག་གང་གི་དུས་སུའང་རླུང་བཞིན་གཡུགས་ཏེ་ཡོང་ནས་རླུང་བཞིན་གཡུགས་ཏེ་ག་ཤེད་ཅིག་ཏུ་བུད་འགྲོ། དེ་ཚོའི་ཁྲོད་དུ་སོ་སོའི་དགོས་མཁོའི་དབང་གིས་ང་ལ་འཛུམ་མདངས་སྟོན་མཁན་མང་ཙམ་ཡིན་ལ། ང་དང་གྱེས་རྗེས་མེད་པ་ལ་ཡོད་པ་དང་ཡོད་པ་ལ་རྭ། རྭ་ཡང་འདོམ་པ་བཅོ་བརྒྱད་དུ་སྨྲ་མཁན་ཉུང་ཉུང་མིན། ང་རང་སྡུག་ལ་ཐུག་དུས་སྡུག་གཏམ་གཉོམ་པོ་གཉོམ་པོ་ཞིག་སེམས་ཀྱི་སྙི་ས་སྙི་ས་ནས་རང་གི་གྲོགས་ཡིན་སྙམ་གྱི་ལག་ཏུ་གཏད་ན། བསེར་བུའི་རྒྱུ་ལམ་ཡིན་པའི་ལག་མཐིལ་དེ་ནས་ལ་དང་ལུང་བ་མེད་པར། ས་སྤུར་གནམ་སྤུར་བྱེད་པའང་མི་སྐྱོན་ཏེ། མི་རང་རང་གི་དགའ་ཕྱོགས་རེད་ལ་གྲོགས་པོ།
ཡིན་ཡང་ཁྱེད་ནི་དེ་དག་དང་ཡེ་ནས་མི་མཚུངས་ཏེ། འུ་གཉིས་ཕན་ཚུན་ངོ་ཤེས་པའི་ལོ་ངོ་སུམ་ཅུ་ལྷག་གི་རིང་ངས་ཁྱེད་ཀྱི་བཅོས་འཛུམ་མཐོང་མ་མྱོང་ལ་ཁྱེད་ཀྱིས་ང་ལ་སྐད་ཆ་བཅོས་མ་ཚིག་གཅིག་ཀྱང་བཤད་མ་མྱོང་། དེ་ནི་ཁྱེད་རང་མི་རྫུན་མ་འཁྲབ་པར་མི་མཁས་པས་རེད།
ངས་ལུས་ངག་ཡིད་གསུམ་གཏད་སའི་མི་དེས་ང་ལ་ཞེ་ཁྲེལ་དང་རྒྱབ་འགལ་གྱིས་ངེད་མ་བུ་དམར་ཧྲེང་ཧྲེང་སྲང་ལ་དེད་པའི་སྐབས་དེར། ཁྱེད་ཀྱིས་རེ་རྐང་གླིང་དང་ས་དཀྱིལ་ཚེ་བཀྲ་གཉིས་གྲོགས་སུ་ཁྲིད་ནས་ངའི་སར་བསླེབས། སྤྱིར་ན་སྨྲ་བ་མང་པོ་མེད་པའི་ཁྱེད་ལ་ཉིན་དེར་ལྷག་ཏུ་སྐད་ཆ་ཚིག་གཅིག་མེད་པར་ཐ་མག་འཕྲོ་རིམ་འཕྲོར་བརྔུབ་ཅི་ཐུབ་བྱས་པའི་རྗེས་སུ་དངན་པ་རིང་བོ་ཞིག་དང་མཉམ་དུ། སྐྱོན་ཡོད་ནི་མ་རེད། ངས་བསམས་ན་ཁྱོད་ལ་འཚམ་པ་ནི་ཁྱོད་ལ་ལྷག་པའི་འཚོ་བ་འདི་རེད། ཁྱོད་ཀྱིས་རང་ལ་དབང་བའི་འཚོ་བ་ཞིག་རོལ་ན་འགྲིག་ཟེར་བཞིན་གློ་བུར་ཡར་ལངས་ཏེ་གཡས་ལག་གིས་ངའི་ཕྲག་པར་ལྗིད་ཙམ་བརྡབས་རྗེས་ཚིག་གཅིག་མེད་པར་ཕྱིར་འཁོར་ཙམ་ཡང་མི་བྱེད་པར་ཤར་སེ་སོང་། ཁྱེད་རང་དེ་ལྟར་སོང་ནའང་ཁྱེད་ཀྱིས་ང་ལ་ཅི་བཤད་འདོད་ཡོད་པ་ངས་ཤེས་ཐུབ་ཅིང་། ངས་ཁྱེད་ལ་ཅི་བཤད་འདོད་པ་གང་ཡང་ཁྱེད་ཀྱིས་རྟོགས་ཡོད་པར་ངས་ཡིད་ཆེས་བྱས་ཡོད།
ངའི་སྙིང་གི་རིལ་བུ་ལག་ནས་ཤོར་བའི་དགུན་གཞུང་གི་མཚན་མོ་ཞིག་ལ་ཁྱེད་ཀྱིས་ཡང་བསྐྱར་རེ་རྐང་གླིང་དང་ས་དཀྱིལ་ཚེ་བཀྲ་གཉིས་ཁྲིད་དེ་ངའི་སར་བསླེབས་བྱུང་ལ། ཁྱེད་ཀྱི་ལྭ་བ་ལས་ངས་ཁྱེད་རང་མགོ་ལོག་ནས་ཡོང་བ་ཤེས་ཐུབ། སྐབས་དེར་ཁྱེད་ཀྱིས་ཡང་དང་ཡང་དུ་ཆང་འཐུངས། རྐང་གླིང་ཚེ་བཀྲ་གཉིས་ཀྱིས་ཡང་དང་ཡང་དུ་ཇ་འཐུངས། ང་ཚོར་ཁ་བརྡ་ཚིག་གཅིག་མེད་པར་ཡུན་རིང་འགོར། ཁྱེད་ཚོ་སོང་ཤུལ་དུ་ང་རང་གཅིག་པུ་མུན་པའི་ནང་དུ་ཡིད་ཚིམས་པ་ཞིག་ངུས།
དེ་ནས་ལོ་བརྒྱད་ཙམ་འགོར་རྗེས་ཉིན་ཞིག་གི་ཕྱི་དྲོར་གློ་བུར་ཁྱེད་ཀྱི་ཁ་པར་འབྱོར་བ་དང་ཚིག་ལ་མགོ་རྔ་མེད་པར་ཁྱོད་ཀྱིས་ཅི་ཞིག་ལ་སྙན་ངག་འདི་འདྲ་ཞིག་བྲིས་པ་ཡིན་ཟེར་བཞིན་ལོ་ངོ་སྟོང་གི་རེ་སྒུག་ལས་ཚིག་འགའ་བཏོན་ཅིང་། ཁ་པར་གྱི་སྣེ་གཅིག་ནས་ཁྱེད་ཀྱི་མགྲིན་པ་བརྣངས། ཁ་པར་གྱི་སྣེ་གཅིག་ནས་ང་རང་མཆི་མ་ཐོར། རྗེས་ལ་ཁྱེད་ཀྱིས་ད་ནས་སྙན་ངག་བྲིས་མི་ཆོག་་་ ་་་ངས་ཁྱེད་ལ་ཚིག་རྗེས་མ་བཤད་ལོང་མ་སྤྲད་པར་ཁ་པར་གཏན།
ཁྱེད་རང་རེབ་གོང་དུ་ཡོང་ཐེངས་རེར་ང་ལ་ཁ་པར་རེ་གཏང་རྒྱུ་བརྗེད་མྱོང་མེད་ནའང་ལོ་དེ་ནས་འུ་གཉིས་དངོས་སུ་ཐེངས་གཅིག་ཀྱང་ཐུག་མ་ཐུབ།
དུས་ཚོད་ཡོད་ཚད་དོན་སྙིང་ཡོད་མེད་ཀྱི་བྲེལ་ཟིང་བར་ནས་བཞུར། མི་ཚེ་ཧྲིལ་བོ་དེ་ལྟར་བཞུར།
ཡིན་ནའང་ཁྱེད་རང་རེབ་གོང་དུ་ཡོང་ཐེངས་རེ་རེར་ང་རང་ཡིད་ལ་རེ་རེ་འཁོར་ཡོད་པ་ངས་ཤེས་ཡོད།
རེད་དེ། ན་ནིང་ད་ཚོད་ཅིག་ལ་ཁྱེད་ཀྱིས་ང་ལ་ཁ་པར་བཏང་སྟེ་རང་ཉིད་བདེ་ཐང་མིན་རབས་ཟུར་ཙམ་གླེང་། ངས་ཁྱེད་ལ་ཆང་ཞེས་ཚིག་མགོ་གླེང་མ་ཐག་ཁྱེད་ཀྱིས་ཁ་པར་གཏན་སོང་། རྗེས་ལ་ངའི་སྐད་འཕྲིན་ཡང་བསུབ་འདུག
ཉིན་ཤས་རྗེས་སུ་ཁྱེད་ཀྱིས་ང་ལ་ཡང་བསྐྱར་ཁ་པར་བཏང་བྱུང་། ངས་ངར་ངར་གྱིས་ཁྱེད་ཀྱིས་ངའི་སྐད་འཕྲིན་བསུབ་དོན་ཅི་ཡིན། ད་ནས་བཟུང་ང་ལ་ཁ་པར་གཏང་མི་དགོས་ཞེས་འཛིང་ཁུལ་གྱི་མགོ་བརྩམས་པ་ན་ཁྱེད་ཀྱིས། ཧ་ཧ། ངའི་སྐད་འཕྲིན་བསུབ་དོན་ཅི་ཡིན་མ་ཟེར། ངའི་སྐད་འཕྲིན་ཐེངས་དུ་ལ་བསུབ་ཅེས་ཤོད་དང་ཞེས་དགོད་ཀྱིན་འདུག་ལ་ང་ཡང་བགད། འཛུམ་འཁོར་བའི་མིག་ཟུང་ཡིད་ལ་དྲན།
ད་ལོའི་དཔྱིད་ཀའི་ཉིན་ཞིག་ཁྱེད་ཀྱིས་ང་ལ་ཁ་པར་བཏང་ནས་དོན་དག་ཅིག་བཅོལ། ལས་ཀ་དེའི་ངོས་ནས་ངས་ཁྱེད་ལ་རོགས་དན་མ་ཐུབ་པས་རྫུན་ཞིག་བཤད། ཁྱེད་ཀྱིས་ཀྱང་ངའི་རྫུན་རྐུབ་མི་བརྟོལ་བའི་ཆེད་དུ་ངའི་རྫུན་དང་འཚམ་པའི་རྫུན་ཞིག་བཤད།
དོན་གྱིས་ལས་བཅོལ་དེ་ངས་མི་འགྲུབ་པ་ཁྱེད་ལའང་གསལ་བོ་ཡིན། དེ་བས་དངོས་སུ་འཕྲད་དུས་ཤིག་ལ་དོན་དག་དེའི་མགོ་རྔ་ཐམས་ཅད་བཤད་བསམས་ཡོད།
ཁ་པར་བརྒྱུད་ན་ཆོག་ཀྱང་ཁ་པར་ལས་སྐད་ཆ་མང་པོ་བཤད་པ་དང་མཉན་པའི་སྡུག་བསྲན་འུ་གཉིས་ཀྱི་སུ་ལའང་མེད།
དེ་ནས་ཉིན་འགའི་རྗེས་སུ་ཁྱེད་ཀྱིས་ཁ་པར་བཏང་ནས། ཨ་རོགས་མྱི་ལྡང་མ། འུ་ཚོ་མྱི་རྐྱང་ཚོས་ཅིག་དཀའ་ཨང་། ཁྱོད་ཀྱིས་ཉིན་བཞིན་ཅི་ཞིག་བྱེད་ཀྱིན་ཡོད་ཟེར། ངས་ལན་དུ། དཀའ་རྒྱུ་ཅི་ཡོད། མི་རྐྱང་ཚོར་གཞན་ལ་མེད་པའི་དཀའ་ཁག་མང་བ་ཤེས་བཞིན་དུ་མི་རྐྱང་གི་འཚོ་བ་བདམས་པ་མ་ཡིན་ནམ། སྙིང་སྟོབས་རིགས་ཤིག་དང་མི་ཚེ་ཧྲིལ་བོར་སྔ་འདང་ཕྱི་འདང་མེད་པར་ལམ་བུ་འདིར་ཞུགས་རྐྱང་ག་ལ་ཡིན། མི་རྐྱང་གི་འཚོ་བ་འདི་ཡིན་ཡིན་ཞིག་གིས་ག་ལ་འོང་།ལམ་བུ་འདི་བདམས་པ་ནས་བློས་མི་ཐོངས་པ་མང་པོ་ཞིག་བློས་གཏང་དགོས་ལ། མི་འདོད་པ་མང་པོ་ཞིག་དང་དུ་མི་ལེན་རང་ལེན་ཡིན་པ་ཁྱེད་ཀྱིས་མི་ཤེས་ག་ལ་སྲིད་སོགས་རང་ལ་བདེན་ཁ་སྟེར་ཞོར་ལབ་ཡིད་ལ་དྲན་དྲན་ཁ་ནས་ཡོང་ཡོང་ཞིག་བརྒྱབ་པ་ན། ཁྱེད་ཀྱིས་ཀྱང་ངའི་བདེན་ཕྱོགས་བསྐྱོར་ནས་དགའ་ཁ་བྱིན་ནས། རེད་རེད་བདེན་པ་རེད་ཟེར། དེ་ནས་ངས་ཁྱེད་ལ་འུ་ཚོའི་ལོ་ཚོད་འདིར་རེ་དོགས་སོགས་དོར་ཏེ་རང་ལ་གུ་ཡངས་རེ་བྱིན་ན་འགྲིག ལྷོད་ལྷོད་ངང་སྡོད་རྒྱུ་དེ་གཙོ་བོ་རེད། ནུས་ན་དཔེ་ཀློག་རེ་མ་ནུས་ན་ཉི་མར་ལྡེ། ཇ་རེ་འཐུངས། འཕྲད་འདོད་པའི་མི་དང་འཕྲད། བཤད་འདོད་པའི་སྐད་ཆ་རེ་བཤད། དེ་ལྟར་ཉི་མ་བཏང་ན་འགྲིག་ག་ཟེར་བ་ན། ཁྱེད་ཀྱིས་ངའི་སྐད་ཆར་རེད་རེད་ཡ་ཡ་ཟེར་ཡང་། ཁྱེད་ལ་ངའི་ཚིག་རེ་རེའི་ལྡོག་ཕྱོགས་ན་གནས་ལུགས་རེ་བརྗོད་རྒྱུ་ཡོད་པ་ངས་ཀྱང་ལོས་ཤེས་གྲོགས་པོ། དེ་ནི་ཁ་བརྡའི་གཞུང་ལ་འུ་ཚོ་རྒྱུན་དུ་མགྲིན་པ་བརྣངས་མྱོང་བས་ཡིན།
རང་གི་ལུས་པོར་བདག་བྱོས། འུ་གཉིས་ཀྱི་ཁ་བརྡ་བཤད་མཚམས་དེ་ནས་ལུས།
བུ་ཆུང་ལག་ནས་ཤོར་བའི་ཨ་མ་རྒན་མོས་མཚན་རིང་རེ་རེ་ཇི་ལྟར་སྐྱེལ་གྱིན་ཡོད་དམ། སྤྱི་ཚོགས་ཟེར་བའི་འཐོར་རླུང་དྲག་པོ་འདིའི་ནང་ངེས་པར་ཕ་རྒན་རྒྱབ་རྩ་ནས་ལངས་དགོས་པའི་དོན་དག་རེ་རེར་འཕྲད་ན་བུ་མོས་ཇི་ལྟར་གདོང་གཏད་དགོས་སམ་སོགས་ང་ལ་མ་བབས་པའི་དོན་དག་མང་པོ་མང་པོ་ཞིག་ཡིད་ལ་འཁོར་འོང་།
དྲ་ལམ་ཁག་ན་ཁྱེད་ཁོ་ན་གླེང་གིན་འདུག ངས་ནི་དངོས་གནས་ཅི་ལབ་དགོས་པའང་མི་ཤེས། ཡིན་ནའང་མི་ཚེ་ནི་མ་གཞི་ནས་ཕངས་སེམས་ཁོ་ནས་མཇུག་བསྡུ་དགོས་པ་ནི་སྤྱི་མཐུན་ཞིག་ཡིན་པ་འདྲ་སྟེ། ཁྱེད་ཀྱིས་ངོ་ཤེས་མི་ཤེས་ཀྱི་གྲོགས་པོ་མང་པོས་ཁྱེད་རང་འདི་ལྟར་བཞུད་པ་ཕངས་སེམས་ཆེ་ཟེར། དེ་བས་ངས་ཀྱང་རིན་ཐང་ཡོད་མེད་ཀྱི་གཏམ་རྒྱུད་ཙམ་ཡི་གེར་ཕབ་སྟེ་ཧ་ཅང་གཟབ་ནན་གྱིས་ཁྱེད་རང་དྲན་པར་ལན་ཅིག་བསྐྱིལ་ཡོད་གྲོགས་པོ།
༢༠༢༢ལོའི་ཟླ༩བའི་ཚེས༢༢ཉིན་འཆི་མེད་ཀྱིས་རེབ་གོང་ནས།
—བོད་ཀྱི་གྱེར་འདོན་སྤྱི་སྟེགས་ཆེན་མོ།