རྨི་ལམ་ནང་གི་གཙང་པོ།

ཀླུ་སྨྱོན།

ཤ་ཁུ་དེ་དང་ཤ་རྡོག་དེའི་རྐྱེན་གྱིས།

མདང་དགོང་གཉིད་ཡུལ་བདེ་ཞིང་རྨི་ལམ་འཕེལ།

རབ་རིབ་དང་ཟང་ཟིང་མང་པོ་ཞིག་བརྒྱུད་རྗེས།

ད་གཟོད་རྨི་ལམ་དེ་གློག་བརྙན་བཞིན་མགོ་བཙུགས་སོང་།

སུ་ཞིག་གིས་ཇུས་འགོད་བྱས་པ་མི་ཤེས་པར།

ང་རང་བྱིས་གཉོར་བ་ཞིག་ཆགས་འདུག

བྱིས་པ་དེའི་ཁ་སྣ་དང་རྐང་ལག་སྙིང་རྗེ་བོ་དེས།

ངའི་ཁྲག་རྩ་ཡོད་ཚད་དམ་དུ་བསྡམས་ཤིང་།

བྱིས་པ་དེ་དགོད་དུས་སུ་ང་ཡང་དགོད་པ་དང་།

བྱིས་པ་དེ་ངུ་དུས་སུ་ང་ཡང་ངུ་བཞིན་འདུག

རྐྱེན་ཅི་ཞིག་གི་དབང་གིས།

ངས་བྱིས་པ་དེ་རུམ་ནས་ལམ་དུ་ཆས་སོང་།

ལམ་བར་དུ།

གླང་འདྲུད་ཤིང་རྟ་འཁོར་ལོ་མང་པོ་ཞིག་ཞིང་གྲོང་བརྒྱུད་ནས་ངའི་མདུན་དུ་བསླེབས་ཤིང་།

འཁོར་ལོ་རེ་རེའི་ནང་དུ་ཡང་གསོད་སར་འཁྲིད་པ་ལྟ་བུའི་བ་གླང་འགའ་རེ་བཅུག་འདུག་ཅིང་།

ངས་བ་གླང་དེ་དག་མཐོང་བའི་སྐད་ཅིག་མར།

ངའི་སེམས་ཁོང་ཧྲིལ་བོ་སྙིང་རྗེས་བརླན་སོང་།

ངའི་མིག་མཐའ་ཡོངས་རྫོགས་མཆི་མས་སྦངས་སོང་།

བྱིས་པ་དེ་སྙིང་ཇེ་རྗེ་ཡིན་པའི་ཞོགས་པ་ཞིག་ལ།

ངེད་ཅག་གཙང་བོ་ཆེན་པོ་ཞིག་གི་འཁྲིས་སུ་འབྱོར་ཞིང་།

གཙང་བོའི་ཕ་རོལ་ཏུ་བགྲོད་ཐུབ་པའི་གདེང་ཚོད་མེད་པའི་དུས་དེར།

བྱིས་པ་དེས་རི་མོ་ཞིག་བྲིས་བྱུང་།

དེ་ནི་སྙིང་རྗེ་བའི་བྱེའུ་ཞིག་གི་གཟུགས་རིས་རེད།

གང་ལྟར།

བྱེའུ་དེའི་ལུས་སྟེང་དུ་ཚོན་སྣ་གང་ཞིག་འབྱུག་མིན་ཐད་བསམ་བློ་གཏོང་བའི་སྐབས་དེར།

རི་བོ་རལ་ཞིང་ཆུ་བོ་འཁྲུགས་པའི་སྒྲ་སྐད་ཅིག་གིས།

ང་རང་ངའི་སྙིང་རྗེ་བའི་བྱིས་པ་དེ་དང་ཁ་ཕྲལ་བ་དང་།

ང་རང་ངའི་གོ་རིམ་ལྡན་པའི་རྨི་ལམ་འདི་ལས་དཀྲོགས་སོང་།

དེ་རིང་།

ངས་ཡང་སྐྱར་ཤ་ཁུ་ཞིག་དང་ཤ་རྡོག་ཅིག་གྲ་སྒྲིག་བྱས་ཏེ།

དོ་དགོང་།

ཡང་སྐྱར་ངའི་སྙིང་རྗེ་བའི་བྱིས་པ་དེ་ཁྲིད་ནས།

གཙང་བོ་གྱ་གྱུ་མ་དེ་བགྲོད་རྒྱུའི་སེམས་ཐག་བཅད་པ་ཡིན།