ཚེ་རིང་གྲགས་པས་ཕུལ།
དབང་ཆའི་རྩེད་མོ་རྩེས་པ་ཡིན་ནམ་འགྲོ་སྟངས་ཤིག་ཡིན། ཉེ་ཆར་དོན་གཅོད་ཁག་གཅིག་གསར་བསྐོ་བྱས་པའི་གནས་ཚུལ་བོད་ཀྱི་དུས་བབ་ཐོག་སྤེལ་འདུག་ལ། དེའི་ཁྲོད་ནས་དོ་སྣང་བྱེད་ཤོས་དེ་ནི་ཨ་རིའི་དོན་གཅོད་གསར་པ་དབུ་དཀར་ཚང་སྐལ་བཟང་རྡོ་རྗེ་ཞེས་པ་ཞིག་༼སྲིད་སྐྱོང་གི་གྲོགས་པོ་བློས་ཐུབ་ཅིག་ཡིན་སྐད་༽ཨ་རིའི་དོན་གཅོད་དུ་སླེབས་པ་དེ་རེད། སྐབས་འདིར་དྲི་བ་སྣ་ཚོགས་འབྱུང་བའི་གཅིག་ནི་དབུ་དཀར་ཚང་མི་སུ་འདྲ་ཡིན་པ་དང་ཇི་ལྟར་དོན་གཅོད་ཀྱི་གོ་གནས་ལ་གློ་བུར་དུ་སླེབས་པ་རེད་ཅེས་པ་འདི་རེད། འོན་ཀྱང་དེ་ལས་ཀྱང་རྫབ་ཆེ་བའི་དྲི་བ་ཞིག་ནི་ད་ལྟའི་དོན་གཅོད་བློ་བཟང་སྙན་གྲགས་ཀྱི་ལས་ཀ་གང་རེད་ཅེས་འདྲི་བཞིན་འདུག སྐབས་འདི་འདྲ་ཞིག་ལ་རྒྱལ་སྤྱིའི་བོད་དོན་ལས་འགུལ་ཁང་(ICT)འགན་འཛིན་གློ་བུར་དུ་དགོངས་པ་ཞུས་པ་༼དགོངས་པ་ཞུ་བཅུག་པ་རེད་ཟེར་༽དང་། དེའི་ཚབ་ལ་བློ་བཟང་སྙན་གྲགས་སླེབས་རྒྱུ་རེད་ཅེས་དཀྲོག་གཏམ་ཞིག་འཕེལ་བཞིན་པ་དེ་རེད། འོན་ཀྱང་བློ་བཟང་སྙན་གྲགས་དེ་ནིའུ་ཡོག་ཏུ་ཡོད་པའི་བོད་ཀྱི་ཐེབས་རྩའི་འགན་འཛིན་ལ་བསྐོ་གཞག་བྱས་པ་རེད་ཅེས་པའི་གནས་ཚུལ་ཐོན་པ་རེད། ད་ལྟའི་འགན་འཛིན་རིན་ཆེན་ཐར་ལོ་དེ་བོད་དོན་ལས་འགུལ་ཁང་གི་འགན་འཛིན་ལ་འགྲོ་རྒྱུ་ཡིན་ནམ། ཡང་ན་ས་མིག་དེ་ལ་བོད་མི་གསར་པ་ཞིག་སླེབས་རྒྱུ་རེད།
འོས་འདེམས་བྱས་པའི་དབུ་འཁྲིད་ཅིག་ལ་རྒྱལ་ཁ་ཐོབ་པ་དང་བསྟུན་ནས་གཞུང་གི་གལ་ཆེའི་མི་སྣ་བརྗེ་ལེན་བྱེད་པ་ནི་ཡོངས་གྲགས་ཀྱི་ལག་ལེན་ཞིག་ཡིན་སྟབས། སྲིད་སྐྱོང་བློ་བཟང་སེང་གེས་ཀྱང་རང་གི་འདོད་བབ་ལ་གཞི་རྩ་བཞག་ནས་མི་སྣ་བསྐོ་གཞག་བྱེད་ལོས་ཆོག འོན་ཀྱང་གལ་ཆེའི་མི་སྣ་བསྐོ་འཇོག་བྱེད་པ་ལ་མི་མང་གིས་ཤེས་རྟོགས་ཐུབ་པའི་ལམ་ཁ་ཞིག་མ་བརྒྱུད་པར་གསང་བ་ལྐོག་གྱུར་གྱི་འབྲེལ་ཐག་ཅིག་བརྒྱུད་ནས་མི་མང་ལ་ཁྱབ་བསྒྲགས་ཙམ་ཞིག་ལས་གཞན་བྱུས་གཏོགས་མེད་པ་འདི་ཚོ་གང་འདྲ་ཡིན་ནམ་བསམས་ཀྱི་འདུག དོན་གཅོད་བསྐོ་གཞག་སོགས་ལ་སྤྱི་འཐུས་དང་སྤྱི་འཐུས་རྒྱུན་ལས་ནས་གྲོས་བསྡུར་དང་བཀའ་འཁྲོལ་ཐོབ་དགོས་པ་ཞིག་ཡིན་ནམ། དེ་ལྟར་བྱུང་ཡོད་དམ།
བཀྲས་མཐོང་བསྟན་འཛིན་རྣམ་རྒྱལ་ཨེ་ཤ་ཡའི་དབུ་འཁྲིད་ཆགས་ནས་ཅང་མ་འགོར་བར་གལ་ཆེའི་ལས་གནས་མང་པོ་ཞིག་ལ་འགྱུར་བ་ཐེབས་པ་དེས་ནི་བཙན་བྱོལ་བོད་མིའི་སྒྲིག་འཛུགས་ཁྲོད་དུ་སྐུ་དྲག་གསར་པའི་རྩེད་མོ་རྩེས་བཞིན་འདུག་ལ། སྐུ་དྲག་གི་རྩེད་མོ་འདི་ལ་ནི་སྔོག་བཤེར་བྱེད་དགོས་ས་མང་ཙམ་ཡོད་པ་མ་ཟད། ཐ་ན་གླ་ཕོགས་གཅིག་པུའི་ཐོག་ནས་བལྟས་ན་ཡང་ལས་ཀ་འདི་དག་ནི་ “རྨི་ལམ་གྱི་ལས་ཀ་dream job” ཞིག་གསང་བའི་དར་ཐག་བརྒྱུད་ནས་རྩིས་སྤྲོད་རྩིས་ལེན་བྱེད་བཞིན་པར་སྣང་ངོ་།།
བསམ་ཚུལ་བརྗོད་པར་དགའ་བསུ་ལས་མེད་ཀྱང་། དེང་སང་བོད་པའི་སྤྱི་ཚོགས་ཁྲོད་དུ་ནད་ཡམས་ཞིག་ཡོད་པ་དེ་ནི་མི་ཞིག་གིས་ལྷག་བསམ་རྣམ་པར་དག་པས་དམིགས་བསལ་གྱི་ལས་ཀའི་འགོ་ཞིག་བརྩམས་ནས་ལས་ཀ་ལས་གྲབ་བྱེད་པའི་སྐབས་སུ། ཟུར་ཞིག་ནས་བལྟ་ལོངས་དཔྱད་ལོངས་གང་ཡང་མེད་པར་བསམ་བཞིན་དུ་མ་རུངས་ཁོག་བཅངས་ཀྱིས་ལམ་སང་མི་དེ་ཡི་སེམས་ཤུགས་བཅགས་ནས་མར་དྲུད་ཅི་ཐུབ་བྱེད་པ་ནི་ལོ་བརྒྱ་ཕྲག་མང་པོར་ཡོད་པའི་གདོང་དམར་བོད་པའི་ནད་ངན་ཞིག་ཡིན། དཔེར་ན་འདས་ཟིན་པའི་དགེ་འདུན་ཆོས་འཕེལ་དང་། ད་ལྟ་ཡོད་པའི་བསྟན་སྲིད་ཀྱི་ཁུར་ལེན་ནས་སྤྱི་ཚོགས་ཀྱི་སྡིང་ཆའི་སྒང་ནས་འགྲོ་བཞིན་པ་འདི་རྣམས་སོ།
མ་ཧཱ་སིདྡྷི་བདེན། གོམ་གསུམ་སྤོ་ལོང་མ་བྱུང་གོང་། ཉྭ་རྒྱུད་སྔོན་མོ་གྲི་ཡིས་བཅད། ཚིག་གསུམ་བཤད་ལོང་མ་བྱུང་གོང་། སྨྲ་བྱེད་ལྕེ་དེ་རྩེ་ནས་བཅད། ཞེས་པའི་དཔེ་ལྟར་ལས་མགོ་མ་བཙུགས་གོང་ནས་སྐྱོན་བརྗོད་བྱེད་པ་ནི་ཆོ་མེད་་པ་རང་རེད།
བསམ་འཆར།
རུལ་སུངས་མ་བྱུང་གོང་ནས། སྐྱོན་འདོན་ཡོ་སྲོང་ངེས་པར་དུ་བྱེད་དགོས།
སྐལ་རྡོར་ལགས་དོན་གཅོད་བསྐོ་གཞག་གནང་བཏང་ནི་སྤྱི་ཚོགས་ནང་དོགས་པའི་གླིང་གཞི་རེད་འདུག
བཙན་བྱོལ་སྤྱི་ཚོགས་ནང་འགྱུར་བ་ཞིག་འགྲོ་གི་ཡོད་པའི་རྣམ་པ་འདུག་ཡིན་ནའང་འགྱུར་བ་དེ་ལེགས་ཉེས་གང་འདྲ་ཞིག་ཏུ་འགྲོ་ཡི་ཡོད་མེད་ཚོད་དཔགས་བྱེད་དཀའ། འོན་ཀྱང་བར་ལམ་ཨེ་རླུང་ཁང་གི་འགོ་འཛིན་ལས་གནས་ནས་ཕྱིར་ཕུད་པ་དང། ཉེ་ཆར་གསར་འགྱུར་ནང་བོད་དོན་ལས་འགུལ་ཁང་གི་འགོ་གཙོ་ཕྱི་རྟག་ཏུ་དགོངས་པ་ཞུས་ཁུལ་ཙམ་ལས་ནང་དོན་ཕྱིར་ཕུད་པའི་གླེང་ཕྱོགས་དང།་
ཡང་བོད་ཀྱི་ཐེབས་རྩ་ཁང་གི་འགོ་གཙོ་ཡང་གནས་སྤོ་སྟེ་ཚབ་ཏུ་ཨ་རིའི་ནང་གི་དོན་གཅོད་བློ་སྙན་ལགས་བསྐོ་གཞག་བྱེད་ཀྱི་ཡོད་པའི་གཏམ་བསྒྲགས་བཞིན་འདུག འགྱུར་བ་དེ་ཚོ་ལེགས་པོ་ཞིག་ཡིན་པ་བརྗོད་དཀའ་ཡང་ལས་གནས་གཅིག་ཐོག་བསྡད་ཡུན་རིང་ན་ཡང་དགེ་མཚན་མཐོང་གི་མི་འདུག ཁག་ཅིག་འཇོན་ཐང་གང་ཡང་བཏོན་རྒྱུ་མེད་ཀྱང་ས་དམིགས་བཟུང་ན་ཡར་རྒྱས་ག་ལ་འགྲོ་ཐུབ། ད་དུང་ཡང་རང་འགུལ་གྱི་དགོངས་པ་ཞུས་པའམ་དགོངས་པ་གཏོང་དགོས་པ་ཞིག་མཐོང་ཆོས་སུ་གྱུར་བ་ནི་རྒྱ་རི་བློ་གྲོས་རྒྱལ་མཚན་ལགས་རེད། ལྟ་ལོ་རྒས་ལུས་ཀྱི་མི་ཁུམ་པ་དང་ལས་གནས་ལ་སྡོད་ཡུན་རིང་དྲག་ཏེ་འཇོན་ཐང་དང་ནུས་པ་ཡོད་པའི་མི་རབས་གསར་པར་རྩིས་སྤྲོད་བྱེད་རན་ཐག་དགོས་ཐག་རེད་འདུག