རྡི་ལིའི་མཐོང་ཐོས་དྲན་གསུམ།

རེབ་ཐོག་མདའ།

སྐྱ་རེངས་བུ་མོའི་གདོང་ལ་བྱིལ་བྱིལ་བྱེད་བཞིན།།
ཁེར་རྐྱང་ཚོར་བར་འགྲོགས་པའི་འགྲུལ་བཞུད་རིང་མོ།།
གནམ་ས་རྡུལ་གྱིས་བཀབ་པའི་ས་དེར་སླེབས་ཡོད།།
མ་བོས་དེ་རིང་མགྲོན་པོའི་ཚུལ་གྱིས་སླེབས་ཡོད།།

རྡི་ལིའི་ནམ་མཁའ་ཡངས་པོ་རྡུལ་གྱིས་ཁེངས་འདུག།
མ་ཅང་ཀྲེ་ལ་གཏི་མུག་གྲོང་ལ་ཆས་འདུག།
ང་དང་སྲང་ན་ལྷག་པའི་ཁྱི་རྐྱང་ལྡོམ་པོ།།
ཆ་མེད་གྲོང་གི་མགྲོན་པོ་ཐོག་མ་རེད་འདུག།

ཇོ་ནང་ཚང་ལ་སྡོད་སའི་གནས་ཤིག་གཡར་ཡིན།།
ཨ་མ་ཚང་ནས་ཞིམ་པའི་བྲོ་ཞིག་ཟོས་ཡིན།།
མི་རྐྱང་སེམས་པ་ཁྲོམ་གྱི་ཚོང་ལ་འཁོར་ནས།།
དལ་ལྷོད་གོམ་ཁ་ངེས་མེད་ཕྱོགས་ལ་སྒྱུར་དུས།།

གཏམ་ངན་རྒྱང་ནས་འབྱོར་བ་རྣ་ལ་ལྷུང་ཐལ།།
སེམས་པའི་ཟབ་ས་དེ་ལ་གཟེར་ཞིག་བརྒྱབ་སོང་།།
གཞིས་ཀྱི་མི་བུ་དེ་ཚོ་སེམས་ལ་འཁོར་ན།།
སྐྱོ་གདུང་སེམས་ནས་མ་ཁོག་མིག་ནས་ལྷུང་ཐལ།།

ཨ་མའི་བུ་དེ་ཁེར་འགྱོ་གཉིས་འགྱོ་རེད་འདུག།
ཨ་ཕའི་ཚིག་དེ་མི་རིགས་ལ་རྒྱ་རེད་འདུག།
ང་དང་ཁ་བ་བོད་པའི་བདེ་སྡུག་མཁྱེན་པས།།
རེ་བ་ཕྱི་ལ་རྒྱག་ས་མེད་འདི་སྐྱོ་བ།།

ཨ་མའི་བུ་ཞིག་གངས་རིའི་གྲོང་ནས་འབར་ཀྱང་།།
མ་ཅང་ཀྲེ་ལའི་ཁྲོམ་གྱི་མྱི་ཚོགས་འདི་ཚོ།།
སེམས་པ་སྐྱིད་སྐྱིད་འདྲ་བའི་སྣང་བའི་ཁྲོད་ན།།
སྒེར་གྱི་དོན་ལ་འདུར་བའི་ཚུད་འདི་སྐྱོ་བ།།

སྐྲ་ལོ་དཀར་བོ་ཅན་གྱི་རྒན་མོ་ཞིག་དང་།།
ལག་ལ་ཕྲེང་བ་ཐོགས་པའི་རྒན་པོ་གཅིག་གིས།།
མེ་ལྕེ་ལྟེམས་ལྟེམས་འབར་བའི་མཆོད་ཁྲིའི་འགྲམ་ན།།
མྱ་ངན་མགོ་བོ་སྨད་བཞིན་ཡིག་དྲུག་སྐྱོར་གི།

ཅ་ལག་ལྕི་མོ་ཐོགས་པའི་ཨ་ནེ་དེ་ཚོ།།
གང་ཞིག་གནས་ལ་བྲེལ་བའི་དབྱིངས་ལ་འཐིམ་འདུག།
སྦྱིན་བདག་མཐའ་ན་བསྐོར་བའི་དགེ་བཤེས་དེ་ཡང་།།
ཚོང་ཁང་ཉུལ་བཞིན་གདོང་ལ་འཛུམ་གྱིས་ཁེངས་འདུག།།

ཚོང་ཁང་ཟ་ཁང་དེ་ཚོ་རྒྱུན་ལྡན་རེད་འདུག།
ཕོ་གསར་མོ་གསར་གླེང་གཞི་ནུབ་ཕྱོགས་རེད་འདུག།
གངས་རིའི་སྨད་ཀྱི་ཕུ་ནུ་མིང་སྲིང་དྲན་བཞིན།།
མ་ཎི་ངག་ན་ཡོད་མཁན་ཉུང་ཉུང་རེད་འདུག།

གཞོན་ནུའི་རྒྱང་སྒྲོག་དེ་ལ་མཚམས་ཤིག་མི་འདུག།
མི་ཚོགས་རྣ་བ་གཏད་དེ་ཉན་མཁན་མི་འདུག།
མི་འདུག་མ་ཅང་ཀྲེ་ལའི་ཁྲོམ་ལ་ཉུལ་དུས།།
གངས་རིའི་ལས་དབང་གླེང་བ་གོ་རྒྱུ་མི་འདུག།

ཕྱི་མཛེས་ནང་སྟོང་ཅན་གྱི་ཕོ་གསར་མང་གི།
ཉིན་མཚན་སྲང་ལ་འཁྱམ་པའི་བུ་མོ་མང་གི།།
མང་པོ་མཉམ་ཏུ་འདུས་པའི་ངང་ཚུལ་ཡག་ཀྱང་།།
ཀ་ཁ་སུམ་ཅུར་དུངས་བ་ཟབ་མཁན་མི་འདུག།

རྡ་སའི་རི་ན་བཞུགས་པའི་བླ་མ་དྲན་གི།།
རང་ལུས་མེ་རུ་སྤར་བའི་ཕུ་ནུ་དྲན་གི།།
དྲན་གདུང་མྱ་ངན་ལྕི་མོ་རུམ་ལ་འཁུར་བཞིན།།
ཁ་བའི་མདུན་ལམ་ཅུང་ཙམ་གླེང་ན་འདོད་ཀི།།

༢༠༡༢ ཟླ ༡༡ ཚེས ༢༡ ལ་མ་ཅང་ཀྲེ་ལ་ནས་ཉིན་མཚན་གཅིག་གི་མཐོང་ཐོས་མྱོང་གསུམ།