འབྲོང་རྒན།
བཙན་གཡེམ་དང་། རྐུན་འཕྲོག དམར་གསོད་བཅས་ནི་སྤྱི་ཚོགས་གང་དུའང་འབྱུང་བཞིན་ཡོད་ཀྱང་། རྡ་རམ་ས་ལར་འབྱུང་བཞིན་པའི་དོན་རྐྱེན་དག་ལ་བཏང་སྙོམས་གྱི་ཐག་གཅོད་ཅིག་ད་རག་བར་འབྱུང་གིན་མེད་པ་འདིས། རྡ་རམ་ས་ལ་ས་གནས་ཀྱིས་ཁྲིམས་ལུགས་ཀྱི་དབང་ཤུགས་ལག་བསྟར་བྱེད་ཐུབ་ཀྱི་མེད་པ་དང་། མི་དམངས་ལ་རང་ཉིད་བདེ་འཇགས་སྲུང་སྐྱོང་བྱེད་པའི་བསམ་བློའི་བག་ཆགས་དེ་ཙམ་མེད་པའི་རྐྱེན་གྱིས་ཡིན་པར་འདོད།
མ་འོངས་པར་རྡ་རམ་ས་ལའི་བདེ་འཇགས་སྲུང་སྐྱོབ་བྱེད་པ་ལ་གཞུང་དམངས་གཉིས་ཀྱིས་མཉམ་རུབ་ཐོག་འཁུར་ལེན་དགོས་པར་འདུག་ལ། བོད་པ་རང་ལ་ཉེན་རྟོག་སྐོར་སྲུང་བ་ཡོད་ན་ས་གནས་འདིའི་བདེ་འཇགས་ལ་ཐུགས་ཕན་གསོ་ཐུབ་པར་འདོད།
ཉེ་བའི་ལོ་འགའི་གུང་ནས་རྡ་རམ་ས་ལར་བཙན་གཡེམ་དང་། དམར་གསོད་ཐེངས་ཁ་ཤས་བྱུང་ཡོད་མོད། ཉེས་དོན་རེ་རེ་ལ་ཐག་གཅོད་གཙང་མ་ཞིག་བྱས་མྱོང་མེད།
སྤྱི་ལོ་༡༩༩༧ ལོར་མཚན་ཉིད་རྒན་ལགས་དང་དགེ་ཕྲུག་གཉིས་བཀྲོངས། ལག་དམར་འཛིན་བཟུང་དང་ཐག་གཅོད་བྱེད་ཐུབ་་མེད།
སྤྱི་ལོ་་༢༠༠༦ ལོར་དབྱིན་ཇུ་བ་མེ་ཁེལ་བཀྲོངས། ལག་དམར་འཛིན་བཟུང་དང་ཐག་གཅོད་བྱེད་ཐུབ་མེད།
ད་ལོ་གཅིག་པུར་བུད་མེད་གཉིས་ལ་བཙན་གཡེམ་བྱས་ཡོད། ཉེས་ཅན་འཛིན་བཟུང་དང་ཐག་གཅོད་བྱེད་ཐུབ་མེད།
བདུན་ཕྲག་སྔོན་མའི་དགོང་མོའི་ཆུ་ཚོད་བཅུ་གཅིག་ཐོག ལོ་ཉེར་དགུ་ཅན་གྱི་ཕོ་གསར་ཞིག་རྡ་སའི་མེག་གྷན་གྱི་ཁྲོམ་གཞུང་ནས་གྲི་བཙུགས་ཏེ་དམར་གསོད་བྱས་ཡོད། ལག་དམར་གསུམ་འཛིན་བཟུང་བྱས་ཡོད་ཀྱང་མཐའ་མའི་ཐག་གཅོད་ཇི་ལྟར་བྱེད་རྒྱུ་ད་དུང་ཡང་ཚོད་དཔག་བྱེད་པར་དཀའ།
འདས་ཟིན་པའི་ས་གནས་འདིའི་ཁྲིམས་ཁང་གི་ཐག་གཅོད་བྱེད་སྟངས་ལ་ལྟོས་ན་ད་རབ་བྱུང་བའི་གནད་དོན་འདིའང་ཁྲིམས་ཐོག་ནས་ཐག་གཅོད་ནན་མོ་ཞིག་བྱེད་ཐུབ་རྒྱུ་བཤད་དཀའ།
ཁྲིམས་ལུགས་ཀྱི་དབང་ཤུགས་སྤྱོད་པ་ལ་མིག་ཐོག་ལག་ཟིན་གྱི་བདེན་དཔང་ནི་ཁྲིམས་ཀྱི་ཀ་བ་དེ་ཡིན། གསར་འགྱུར་ལས་བཤད་ན། བདུན་ཕྲག་སྔོན་མའི་དོན་རྐྱེན་འདི་ལ་བུ་མོ་ཞིག་དང་། མེག་གྷན་སྲང་ལམ་གྱི་བརྙན་འཕྲིན། ལག་དམར་གྱི་གྲི་རྙེད་པ་བཅས་ཀྱི་བདེན་དཔང་ཁག་གསུམ་ཙམ་ཡོད་པར་བརྗོད་ཡོད་ཅིང་། རྡ་སའི་ཉེན་རྟོག་པས་དོན་རྐྱེན་འདི་ལ་ད་དུང་ཞིབ་དཔྱོད་བྱེད་བཞིན་ཡོད་ཅེས་པ་ལས་ཁྲིམས་ཀྱི་སྣེ་འཛིན་ཆོག་པའི་གསུང་འཕྲིན་གང་ཡང་བཤད་ཡོད་པ་མཐོང་མ་སོང་། གལ་སྲིད་སྲང་ལམ་ཐོག་བཙུགས་ཡོད་པའི་བརྙན་འཕྲིན་འདིས་བྱུང་རིམ་མཐའ་དག་བརྙན་དཔར་བླངས་ཡོད་པ་ཡིན་ན། ལག་དམར་ཁྲིམས་ལ་སྦྱོར་བར་དཀའ་ངལ་དེ་ཙམ་ཕྲད་མི་སྲིད་སྙམ།
གོང་གི་གནས་སྟངས་འདི་དག་ལས་རྡ་སའི་ས་གནས་བདེ་འཇགས་དེ། རྒྱ་གར་གྱི་ཉེད་རྟོག་པ་ཁ་ཤས་ལ་བཅོལ་རྒྱུ་ལས་བོད་པའི་སྤྱི་ཚོགས་རང་ཉིད་ནས་ཧ་ལམ་འགན་གང་ཡང་ལེན་གྱི་མེད་པ་འདྲ། སྤྱིར་རྡ་སར་བོད་བཙན་བྱོལ་གཞུང་ཐེ་བའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་མང་དུ་ཡོད་མོད། རང་ཉིད་ཀྱི་སྤྱི་ཚོགས་བདེ་འཇགས་སྲུང་སྐྱོང་བྱེད་པའི་ཚོགས་པ་གཅིག་ཀྱང་མཐོང་མ་མྱོང་།
བོད་པའི་སྤྱི་སྒེར་གྱི་ཚོགས་པ་ཚང་མ་བོད་པའི་སྐྱིད་སྡུག་གི་ཆེད་དུ་བཙུགས་པ་ཞིག་ཡིན་པ་ཐེ་ཚོམ་མེད་མོད། རང་གི་སྤྱི་ཚོགས་ལ་དགོས་གལ་བྱུང་བའི་སྐབས་སུ་ཕན་ཐོགས་པའི་ཚོགས་པ་ཞིག་ལ་མཛུབ་མོ་འཛུགས་ས་ཧ་ལམ་མེད་པར་སྣང་།
ཁྲོམ་སྐོར་དང་གདུང་སེམས་མཉམ་སྐྱེད་བྱེད་པ་ནི་མི་དམངས་ཀྱི་རེ་ཞིག་གི་བྱ་འགུལ་བསླངས་བ་ཙམ་ལས། རྒྱུན་ལྡན་གྱི་བདེ་འཇགས་སྲུང་སྐྱོང་བྱེད་པའི་བྱ་འགུལ་ཞིག་སྤེལ་མ་ཐུབ་ན་ཡིན་ན། ཁྲོམ་སྐོར་སྐད་འབོད་ཙམ་གྱིས་བོད་པའི་སྤྱི་ཚོགས་བདེ་འཇགས་ལ་མངོན་གསལ་གྱི་ཐུགས་ཕན་སོས་མི་ཡོང་བ་ཁོ་ཐག་རེད།
ཉེས་དོན་འདི་དག་མ་ཡོང་བའི་སྔོན་འགོག་དང་། ས་གནས་འདིའི་ཁྲིམས་ཀྱི་དབང་ཤུགས་མཉམ་སྤྱོད་ཐུབ་པའི་ཆེད་དུ་བོད་པ་རང་ཉིད་ནས་བོད་པའི་སྤྱི་ཚོགས་བདེ་འཇགས་ལ་དོན་དང་ལྡན་པའི་འགན་ཞིག་ལེན་རྒྱུ་ནི་ཁ་ཚ་དགོས་གཏུག་ཏུ་གྱུར་ཡོད་པ་དང་། བོད་པ་འདུས་སྡོད་བྱེད་སའི་སྤྱི་ཚོགས་ཤིག་ལ་རང་ཉིད་རང་གིས་སྲུང་སྐྱོབ་བྱེད་རྒྱུ་ནི་སྤྱི་ཚོགས་ཤིག་ལ་ཚང་དགོས་པའི་ཆེས་གལ་ཆེ་བའི་ཆ་རྐྱེན་ཞིག་ཡིན།
རྒྱ་གར་གྱི་བདེ་འཇགས་ཀྱི་ཁྲིམས་ལུགས་ལ་མཚོན་ན་ས་གནས་སོ་སོར་སྡོད་པའི་བོད་པ་ཚོ་ལ་རང་སྲུང་རང་གིས་བྱས་ཆོག་པའི་ཐོབ་ཐང་ཡོད། རྒྱ་གར་གཞུང་གི་ཡིན་ཆ་འདི་ལ་ལྟོས་ན The Private Security Agencies Act, 2005
ས་གནས་དེར་སྡོད་པའི་བོད་པ་ཚོས་རང་ཉིད་སྲུང་སྐྱོང་བྱེད་པའི་མི་དམངས་ཀྱི་ཉེན་རྟོག་པ་བསྐོ་འཛུགས་བྱེད་ཆོག་པའི་ཐོབ་ཐང་གསལ་པོར་ཡོད་པ་དང་། དེ་བཞིན་ཏུ་ས་གནས་རྒྱ་གར་གྱི་འཛིན་སྐྱོང་ལས་ཁུངས་དང་མཉམ་རུབ་ཐོག། ས་གནས་དེར་སྡོད་པའི་བོད་པ་ཚོས་དང་བླངས་ཐོག་སྲང་ལམ་སྐོར་གཡེང་དང་། འགྲུམ་འགྲིལ་ཕྱོགས་སྟོན། ཁང་ཁུངས་སྲུང་སྐྱོབ་བཅས་བྱེད་ཆོག་པའི་ཐོབ་དབང་ཡོད། དེ་དང་མཉམ་དུ་ས་གནས་སོ་སོ་ནས་སྲང་ལམ་དང་ཁང་པར་གསང་བའི་བརྙན་ལེན་དཔར་ཆས་རྒྱ་བསྐྱེད་བྱས་ཤིང་། དེ་ལ་བོད་པའི་བདེ་སྡུག་ཚོགས་པ་རང་ཉིད་ཀྱིས་སྟངས་འཛིན་བྱེད་ཐུབ་པ་བྱུང་ན། དེ་ནི་ཁྲིམས་ལུགས་ཀྱི་ཁེ་དབང་སྤྱོད་རྒྱུའི་རིན་ཐང་དང་བོད་པའི་སྤྱི་ཚོགས་བདེ་འཇགས་འགན་སྲུང་ཐུབ་པའི་ནུས་པ་ཆེན་པོ་ཐོན་ཐུབ།
གལ་སྲིད་ང་ཚོའི་ས་གནས་མི་དམངས་ནས་དེ་འདྲའི་འགན་ཞིག་བླངས་ཡོད་པ་ཡིན་ན། སྔོན་ཆད་བྱུང་བའི་དོན་རྐྱེན་དང་། ད་རེབ་ཀྱི་དོན་རྐྱེན་འདི་ལྟ་བུ་ལ་ཕན་མི་ཉུང་བ་ཞིག་ཐོགས་ངེས་ལ། མ་འོངས་ཉེས་དོན་སྔོན་འགོག་གི་ཐད་ལ་དེ་བས་ནུས་བ་ཆེན་པོ་ཐོན་ཐུབ། འདི་ནི་ས་གནས་འདིའི་གཞུང་དམངས་གཉིས་ནས་འགན་ཁུར་འོས་པ་ཞིག་དང་། ཆོག་པ་ཞིག ཐུབ་པ་ཞིག་ཡིན་པར་འདོད། །
བསམ་ཚུལ་ཡག་པོ་འདོན་འདུག་ཀྱང་གཅིག་བསྡུད་རིང་ལུགས་ཀྱིས་བདག་པོ་རྒྱག་ཀི་མ་རེད་གདའ། དགོས་སར་ཆད་ནས་མི་དགོས་སར་མང་པོ་ལྷག་ཡོད་པ་མཐོང་ཆོས་རེད།
ཕྱི་རྒྱལ་ཚོང་ཁང་ཆེན་པོ་གཅིག་རང་ལ་ཡང་། བདེ་སྲུང་རྐུ་འཕྲོག་ལྟ་མཁན་ཟུར་འཛུགས་ཆོག་པ་ལྟར། བོད་མི་རང་ལ་བོད་མི་རིགས་འགའ་ཉེ་སྲུང་བཙུག་ཐུབ་ན། བོ་མི་དང་རྒྱ་གར་མི་རིགས་གཉིས་ཀ་ཕན་པ་ལས་ནོད་པ་འོངས་མི་སྲིད་རེད་དོ།།