ནམ་མཁའ།
སེར་སྣའི་འཆིང་ཐག་གྲོལ་ཀྱང་ཆགས་མེད་གཏོང་བའི་སེམས་ཀྱིས་བཅིངས།།
འཇིག་རྟེན་ཞེན་ཆགས་སྤངས་ཀྱང་བརྩེ་བའི་ཐུགས་ཀྱིས་ཀུན་ཆགས་ཏེ།།
ཟང་ཟིང་འདུ་འཛི་བཀག་ཀྱང་ཆོས་ཀྱི་སྦྱིན་པའི་ཚོགས་རྒྱས་བའི།།
སྦྱིན་པའི་མཆོག་གྱུར་ཆོས་སྦྱིན་རྫོགས་པ་དེ་ལ་གུས་ཕྱག་འཚལ།།
གཉའ་ཤིང་གང་ལས་བལྟ་བར་མི་ནུས་ཐུགས་རྗེ་སྤྱན་གྱིས་འགྲོ་ཀུན་གཟིགས།།
ལོངས་སྤྱོད་ནོར་གྱིས་དབུལ་ཡང་གཞུང་ལུགས་ཐོས་བའི་རབ་ཏུ་ཕྱུག།
འཇིག་རྟེན་ཞེན་པའི་འཆིང་ཐག་གྲོལ་ཀྱང་སྒོ་གསུམ་ཚུལ་ཁྲིམས་བསྡམས།།
ཚུལ་ཁྲིམས་མིག་འབྲས་བཞིན་དུ་སྲུང་བའི་བཙུན་པ་དེ་ལ་འདུད།།
སྙིང་རྗེ་ཆབ་ཀྱིས་བརླན་ཡང་ཞེ་སྡང་བུད་ཤིང་བསྲེགས་པ་ཡི།།
དུག་གསུམ་གཡུལ་འགྱེད་དཔའ་ཡང་ཚིག་རྩུབ་སྨྲ་ལ་སྡར་མར་གྱུར།།
ལུས་ཀྱི་དཀའ་བ་རི་རྒྱལ་འགུལ་ཡང་དམ་བཅའ་མི་གཡོ་བའི།།
ལུས་སེམས་དཀའ་སྤྱད་བཟོད་པའི་སྐྱེས་མཆོག་དེ་ལ་གུས་ཕྱག་འཚལ།།
བག་མེད་གཉིད་ཀྱི་མདུད་པ་གྲོལ་ཀྱང་ཏིང་འཛིན་སེམས་ཀྱིས་ཤིན་ཏུ་བཅིངས།།
སྒྱུད་ལུག་ངན་ཞེན་རྩྭ་ཕུང་བསྲེགས་ཀྱང་བརྩོན་པའི་ཆུ་བོས་རྒྱུན་ཏུ་བརླན།།
ལེ་ལོ་གཡེང་བའི་རོལ་མོ་བཀག་ཀྱང་ཆོས་རྔ་ཆེན་པོའི་སྒྲ་ཆེན་གསན།།
སྐུ་ཚེ་གཅིག་ལ་བརྩོན་འགྲུས་ཕ་རོལ་ཕྱིན་པ་དེ་ལ་གུས་ཕྱག་འཚལ།།
འབྲོང་སྨྱོན་ལྟ་བུའི་རྒོད་སེམས་བཟུང་ཡང་སྒོམ་པའི་ལམ་གྱི་གྲོལ་བ་ཐོབ།།
བྱིང་བའི་སེམས་ཀྱི་མུན་པ་སེལ་ཀྱང་ཤེས་རབ་སྒྲོམ་མེ་རབ་ཏུ་སྦར།།
ནག་ཚོགས་ཉོན་མོངས་གཡུལ་འགྱེད་བྱས་ཀྱང་རྩེ་གཅིག་ཏིང་འཛིན་ཞི་བར་གནས།།
ཐོས་དོན་སྒྲུབ་ལ་བརྩོན་པའི་ཏིང་འཛིན་རྒྱལ་བོ་དེ་ལ་གུས་ཕྱག་འཚལ།།
མ་རིག་མུན་པ་བཅོམ་ཀྱང་རྟེན་འབྲེལ་ཟབ་མོའི་སྒྲོན་མེ་བཏགས་པ་ཡིས།།
བདེན་འཛིན་ནགས་ཚལ་བསྲེགས་ཀྱང་བྱམས་པའི་སེམས་ཀྱི་ཆུ་བོས་འགྲོ་ཀུན་བསྐྱངས།།
གཅེས་འཛིན་དགྲ་བོ་རལ་གྲིས་བསད་ཀྱང་མ་འདྲིས་སེམས་ཅན་ཀུན་གྱི་གཉེན།།
ལྟ་སྒོམ་སྤྱོད་གསུམ་ཤེས་རབ་འབར་བའི་གངས་རིའི་གཙུགས་རྒྱན་དེ་ལ་འདུད།།
ཏིང་འཛིན་སེམས་པ་གཡོ་བ་མེད་ཀྱང་སྙིང་རྗེ་རླབས་ཀྱིས་རབ་ཏུ་གཡོ།།
གཞན་དོན་བསྒྲུབ་ལ་འཇིགས་པ་མེད་ཀྱང་ཉེས་བྱེད་ཕྲ་མོ་སྐྲག་པ་ཡི།།
ཉོན་མོངས་ལས་ཀྱི་དབང་པོ་བཀག་ཀྱང་སེམས་ཀྱི་དྲན་ཤེས་སྒོ་ཕྱེ་བའི།།
གངས་རིའི་ལྗོངས་ཀྱི་ཙོང་ཁ་སྐྱེས་མཆོག་དེ་ལ་སྙིང་ནས་གུས་ཕྱག་འཚལ།།
སྲོག་གཅོད་ཕྲ་མོ་ཙམ་ཡང་སྤངས་ཀྱང་བདག་འཛིན་སྲོག་ལ་རལ་གྲིས་བསྣུན།།
མ་བྱིན་ལེན་གྱི་རྩ་ལྟུང་བཅོམ་ཀྱང་འཇམ་དཔལ་དབྱངས་ཀྱི་ཤེས་རབ་ཁྱེར།།
མི་ཚངས་སྤྱོད་ཀྱི་ས་བོན་སྤངས་ཀྱང་ཤེར་ཕྱིན་ཡུམ་ཆེན་བག་མར་བསུས།།
རྨི་ལམ་ལ་ཡང་རྫུན་སྨྲ་སྤངས་ཀྱང་འཇམ་པའི་དབྱངས་ལ་བཀའ་འདྲི་ཞུས།།
མྱོས་ཆང་ཐིག་པ་ཙམ་ཡང་མི་མཆོད་དམ་ཆོས་བདུད་རྩི་ཡང་ཡང་འཐུང་བ་ཡིས།།
བག་མེད་གླུ་གར་རིང་ནས་སྤངས་ཀྱང་འཇམ་དབྱངས་ལ་སོགས་བསྟོད་པའི་གླུ་སྐད་ལ།།
བསྟད་ན་དགའ་བ་སྤངས་བའི་བྱམས་པ་སོགས་ཀྱི་ཞལ་རས་ལས་ཀྱང་འཛུམ་མདངས་ཤོར།།
ནོར་འཛིན་སྒེག་མོའི་སྟེང་གི་སྙན་ངག་མཆོག་གྱུར་ཁྱེད་ལས་གཞན་པ་སུ་ལ་གུས།།
ཚིག་གི་མེ་ཏོག་བཞད་པའི་སྒྱུ་རྩལ་མེད་ན་ཡང་།།
དད་པའི་སེམས་ཀྱི་ལྷ་རྫས་མེ་ཏོག་ཞིག།
ཟླ་འོད་ཕོག་པའི་ཆུ་སྐྱེས་གཞོན་ནུ་བཞིན།།
སོར་མོ་སྙིང་གར་སྦྱར་ཏེ་ཕུལ་བ་ལ།།
སྙན་ངག་མཁན་པོའི་མཛུབ་མོས་འཕྱ་ཡང་ཆོག།
གཞུང་ལུགས་མཁས་པའི་འགལ་འདུ་སྒྲུབ་ཀྱང་རུང་།།
ཕྲག་དོག་ཅན་གྱིས་སྣ་གཉེར་གང་བྱས་ཀྱང་།།
བླུན་པོའི་སོར་མོའི་རྩེ་ནས་ཤོར་བ་ལགས།།
གསལ་བཤད་ཞིག་ལ།དབུ་ཞྭ་ཞིག་ཡོད་པ་དེ་རྗེ་མནབས་པའི་དབུ་ཞྭ་ཡིན་ཚུལ་བཤད་རྒྱུན་འདུག
གངས་རིའི་ལྗོངས་སུ་དབུ་མའི་ལྟ་གྲུབ་ལེགས་པར་ཕྱེ་བའི་ཤིང་རྟ་བ་རྗེ་ཙོང་ཁ་བ་ཆེན་མོ་དགོངས་པ་ཆོས་དབྱིངས་སུ་ཐིམ་སྟེ། ལོ་ངོ༦༠༠འཁོར་བའི་རྗེས་དྲན་དུ་ཕུལ།
༨ /༡༢/༢༠༡༩ལ་ཡོ་རུབ་ནས་བྲིས།
དྲུག་བརྒྱའི་སྔ་རོལ་ཕེབས་པའི་མཚན། །
བླ་མ་ཙོང་ཁ་པ་ཞེས་གྲགས། །
སྦྱིན་ལས་ལྷག་འགྱུར་ཚུལ་ཁྲིམས་བསྲུངས། །
ཚུལ་ཁྲིམས་དག་ཤིང་བཟོད་ལ་བརྩོནད།
བཟོད་སྒོམ་མཐར་ཐོན་བརྩོན་མ་དོར། །
བརྩོན་འགྲུས་གཡེང་མེད་བསམ་གཏམ་བསྒོམས། །
བསྒྲོམས་པས་འབྲས་བུར་ཤེས་རྒྱས་ནས། །
དགེ་ལྡན་སྲོལ་གཏོད་ཁྱེད་ལ་འདུད། །