རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
བཞི་བ།
“ད་འདི་ལྟར་འདུག་པའི་ཚོད་མ་རེད། འུ་གཉིས་མྱུར་དུ་འགྲོ།” བཀྲ་ཤིས་རྒྱ་མཚོས་དེ་ལྟར་ཟེར་བཞིན་སྒོར་བུད། དེ་ནི་རྡོ་རྗེ་འཚོའི་ལག་ནས་དངུལ་བྱང་ལེན་ཐུབ་མིན་གྱི་ཆེས་མཐའ་མཇུག་གི་ཐབས་བཀོད་དེ་ཡིན་པས། མཚོ་སྐྱེས་རྡོ་རྗེ་ཡིས་ཀྱང“རྡོ་འཚོ།དངུལ་བྱང་ཁྱེར་ཤོག རེམ། རེམ”ཞེས་ཁོ་མོར་བྲེད་ཤ་བསླངས།
མི་སུ་ལ་མཚོན་ནའང་ལོ་འགར་བསགས་པའི་སྒོར་མོ་གཞན་གྱིས་ལེན་ངེས་རེད་ཅེས་ཐོས་ན། བྲེལ་འཚུབ་མི་ལངས་པ་ཞིག་ཡོད་དམ། རྡོ་རྗེ་འཚོ་ཡང་དེ་ལས་མ་འདས་པས། བྲེལ་འཚུབ་འཚུབ་ཀྱིས་དངུལ་བྱང་མཚོ་སྐྱེས་རྡོ་རྗེ་ཡི་ལག་ཏུ་བཞག་པས། ཁོ་གཉིས་ནི་ཀ་ར་ཐོབ་པའི་བྱིས་པ་གཉིས་དང་འདྲ་བར་ཁོང་དགོད་བྱེད་ཀྱིན་རླངས་འཁོར་ལ་བསྡད།
མཚོ་འགྲམ་གྱི་གཞུང་ལམ་སྟེང་གི་རླངས་འཁོར་ནི་གཅིག་རྗེས་གཅིག་གིས་མ་ཆོད་པར་རྒྱུག་བཞིན་འདུག ཁ་གཏད་དེ་ཡོང་བའི་རླངས་འཁོར་ནི་སྐར་མདའ་ལྷུང་བ་ལྟར་སྐད་ཅིག་ཉིད་དུ་ཡལ་འགྲོ་ཞིང་། ཕྱོགས་གཅིག་ཏུ་རྒྱུག་པའི་རླངས་འཁོར་ནི་རྟ་མང་འགྲན་རྒྱུག་བྱེད་པ་ལྟར་གཅིག་རྗེས་གཉིས་མཐུད་ཀྱིས་བཞུར། བཀྲ་ཤིས་རྒྱ་མཚོས་རླངས་འཁོར་གྱི་སྣུམ་སྒོའི་རྐང་གདན་ཡང་ཡང་མནན་པ་ན། ཁོའི་རླངས་འཁོར་པོད་མ་ནི་མདའ་བཏང་བ་དང་འདྲ་བར་གཡས་གཅུས་གཡོན་གཟུར་བྱས་པ་ཙམ་གྱིས་ཀྱང་རླངས་འཁོར་གྲངས་མེད་རྒྱབ་ཏུ་བསྐྱུར། དེ་དང་བསྟུན་ནས་བཀྲ་ཤིས་རྒྱ་མཚོས་གླུ་དབྱངས་ཀྱི་སྒྲ་སྒོ་ཆེ་ཆེར་ཕྱེས་པས། མིག་མདུན་གྱི་གཞུང་ལམ་ནི་གྱེན་དུ་ལངས་པ་དང་འདྲ་ལ། རླངས་འཁོར་ནི་གནམ་ན་འཕུར་བ་དང་མཚུངས་པས། མཚོ་སྐྱེས་རྡོ་རྗེ་ཡི་སྣང་བར་རང་ཉིད་ནི་འཕུར་སྐྱོད་བྱེད་པའི་སྒྱོགས་རྡོའི་ཁྲོད་དུ་ཚུད་པ་ལྟ་བུའི་འཇིགས་སྣང་ཤར་ཏེ་རྐང་ལག་ཡོངས་རང་དབང་མེད་པར་བསྐུམ་དགོས་བྱུང་།
སྔོན་ཆད། མི་གཞན་གྱིས་བཀྲ་ཤིས་རྒྱ་མཚོའི་རླངས་འཁོར་པོད་མ་ནི་བསྡད་ན་བདེ་ཞིང་བརྒྱུགས་ན་མགྱོགས་པར་མ་ཟད། ཁ་ཕྱོགས་གསལ་པོར་སྟོན་པའི་ས་ཁྲ་དང་སྒྲ་གཟུགས་སྣ་ཚོགས་འཆར་བའི་བརྙན་ཟློས། ད་དུང་བདག་པོ་ངོ་ཤེས་པའི་ཁྱད་ཆོས་ལྡན་པ་སོགས་བཤད་པའི་སྐབས་སུ། མཚོ་སྐྱེས་རྡོ་རྗེ་ལ་ལྟ་འདོད་ཀྱི་འདུན་པ་འགོག་མེད་ཅིག་སྐྱེས་མོད། ད་ཐེངས་ཁོ་ལ་བསམ་དབང་དང་ལྟ་དབང་། བཤད་དབང་ཅི་ཡང་མེད་པར་ཁུལ་ཐོག་ཏུ་ཐོན། དུས་ཚོད་གཅིག་གི་ཡུན་དེ་ནི་མཚོ་སྐྱེས་རྡོ་རྗེ་ལ་མཚོན་ན་དམྱལ་བའི་འཕྲང་ལམ་རིང་མོ་རྒྱུ་བ་དང་མཚུངས་པས། རླངས་འཁོར་ལས་མར་བབས་ཀྱང་རྐང་སྣེ་ས་ལ་ཐུག་མེད་པ་ལྟ་བུའི་ཚོར་སྣང་བྱུང་།
ལྷག་པར། ཆང་གི་གནོད་པ་དང་རླངས་འཁོར་གྱི་གནོད་པ་གཉིས་གཞི་གཅིག་ཏུ་འདྲེས་ཏེ་ཁོ་ལ་མནར་བྱུང་བས། ཁོས“རྡོ་འཚོས་ན་ནིང་དངུལ་བྱང་གི་གསང་གྲངས་བརྗེད་ཟེར་བ་དེ་ནི་ངས་ཁྱོད་ལ་བསྐྱིས་པའི་དངུལ་བྱང་སྟོང་བ་དེ་རེད། སྐབས་དེར་ཡང་ངས་ཁོ་མོར་གསང་གྲངས་བརྗེད་སོང་ཞེས་རྫུན་བཤད་པ་ཡིན། ད་ཐེངས་བསྐྱིས་པའི་སྒོར་མོ་འདི་འགོར་འགྱངས་མེད་པར་ཕྱིར་སྟེར་རྒྱུ་མ་བརྗེད”ཟེར་བཞིན་མྱུར་དུ་དངུལ་བྱང་ནས་སྒོར་ཁྲི་ཉི་ཤུ་བཀྲ་ཤིས་རྒྱ་མཚོའི་དངུལ་བྱང་དུ་བསྐུར་རྗེས། དངུལ་བྱང་དེ་དངུལ་བྱང་གསར་བ་ཞིག་ཏུ་བརྗེས།
བཀྲ་ཤིས་རྒྱ་མཚོས“བརྗེད་མི་སྲིད། བརྗེད་མི་སྲིད། ངོ་མས་བཀའ་དྲིན་ཆེ། དོ་དགོང་ངས་ཁྱོད་ལ་མགྲོན་བྱེད། ཁྱོད་ལ་ཅི་ཞིག་དགོས་ན། ཁྱོད་ཀྱིས་ཅི་ཞིག་ལས་འདོད་ན། འགྲོ་སྒོ་ཡོད་ཚད་ངས་གཏོང”ཞེས་བཤད།
“ད་ཁྱོད་ཀྱིས་རྒྱས་བཟའ་རྒྱས་འཐུང་བྱེད་པའི་དུས་མ་རེད། དེ་ལས་ང་རང་སེམས་ཆུང་སྒོས་ཕྱིར་ཡུལ་ལ་སྐྱེལ་རོགས། ང་རང་ཆང་གིས་གནོད་དེ་མི་བཟོད་པས། ད་ལྟ་ང་ལ་མཁོ་བ་ནི་དར་བ་དཀར་ཡོལ་གང་རེད།”
བཀྲ་ཤིས་རྒྱ་མཚོས“ཆོག་གི ཆོག་གི ཁྱོད་ཀྱི་ཁ་ལ་ཉན”ཟེར་བཞིན་སེམས་ཆུང་གིས་རླངས་འཁོར་ཕ་ཡུལ་གྱི་ཕྱོགས་སུ་བསྐོར།ཐེངས་དེར་རླངས་འཁོར་བརྒྱུགས་པ་དལ་ཞིང་བརྟན་ལ། ལྷིང་ཞིང་འཇགས་པར་མ་ཟད། གྲགས་པའི་གླུ་དབྱངས་ཀྱང་ཁོ་གཉིས་ཆེས་དགའ་བའི《མཚོ་སྔོན་པོ》ཡིན་པས། ཁོས་ཞེ་ལྷོད་ལ་བབས་ཏེ་བཀྲ་ཤིས་རྒྱ་མཚོའི་རླངས་འཁོར་གྱི་ཁྱད་ཆོས་ལ་བལྟས་ཆོག་མོད། ཁོ་རང་རླངས་འཁོར་དུ་བསྡད་མ་ཐག་གཉིད་དུ་ཡུར།
རྡོ་རྗེ་འཚོས་ཁོ་གཉིས་ཕྱིར་བསླེབས་པ་མཐོང་སྟེ“སྔོན་ཆད་ཕྱི་ལ་སོང་ན། གཡག་ཐུག་རི་ལ་ཤོར་བ་ལྟར་ཉིན་འགར་ཕྱིར་མི་ཡོང་མོད། དེ་རིང་ཁྱོད་གཉིས་ལ་ཅི་བྱུང་བ་ཡིན”ཞེས་བཤད།
“དངུལ་བྱང་སྟེང་གི་སྒོར་མོ་གཞན་གྱིས་བླངས་ཚར་བས། ཁོ་རང་སྨྱོས་འདུག་པ་རེད།” བཀྲ་ཤིས་རྒྱ་མཚོས་དེ་ལྟར་བཤད་རྗེས་རླངས་འཁོར་བསྐོར་ཏེ་ཕྱིར་ལམ་ལ་ཆས།
“ཨ་ཧ་བོ། མཚོ་སྐྱེས། ཁོས་བཤད་པ་ངོ་མ་ཡིན་ནམ། ཨ་ཧ་བོ། ཨ་ཧ་བོ།” རྡོ་རྗེ་འཚོ་ནི་རྐང་པ་མེ་ཐོག་སྤོས་པ་ཇི་བཞིན་ཡར་ལྡིང་མར་ལྡིང་བྱས།
“བླུན་རྒན་མ། ཁོས་ཀུ་རེ་བརྩེ་བ་རེད། དེ་རིང་ང་ཆང་གིས་གནོད་པས། དར་བ་སྐྱུར་མོ་དཀར་ཡོལ་གང་ཁྱེར་ཤོག” མཚོ་སྐྱེས་རྡོ་རྗེ་ཡིས་དེ་ལྟར་བཤད་ཞོར་དུ་གོག་མ་ནུར་གྱིས་ཚ་ཐབ་སྟེང་དུ་འགོས།
རྡོ་རྗེ་འཚོས“དེས་ན་བཟང་། སྒོར་མོ་དེ་དག་ནི་འུ་གཉིས་ཀྱིས་ལོ་བཅུ་ཕྲག་འགར་ཟས་ཞིམ་པོ་ཁམ་གང་མ་ཟོས། གོས་འཇམ་པོ་ཐེངས་གཅིག་མ་གྱོན་པར་བསོགས་པ་རེད། དེ་གཞན་གྱིས་བླངས་སོང་ན། ང་རང་ངོ་མས་སྨྱོ་སྲིད”ཟེར་བཞིན་དར་བ་དཀར་ཡོལ་གང་ཁྱེར་ཡོང་སྟེ་མཚོ་སྐྱེས་རྡོ་རྗེ་ལ་བླུད།
ཁོ་མོའི་སེམས་གཏམ་དམར་པོ་དེ་དང་དར་བ་སྐྱུར་མོ་དེ་གཉིས་ཀྱིས་མཚོ་སྐྱེས་རྡོ་རྗེ་ཡི་ཆང་ལ་གནོད་པའི་སྡུག་བསྔལ་སྐད་ཅིག་ཉིད་དུ་བཅོམ་མོད། སེམས་ཁྲལ་ལྕི་མོ་ཞིག་གིས་ཡང་བསྐྱར་ཁོ་རང་མནན་པས། མགོ་བོ་ལྗིད་ཏིག་སེར་སྔས་མགོར་ལྷུང་།
ལྗིད་ཏིག་ཏིག་གི་སེམས་ཁྲལ་དེ་ནི་བཀྲ་ཤིས་རྒྱ་མཚོར་བསྐྱིས་པའི་སྒོར་ཁྲི་ཉི་ཤུ་ཕྱིར་འཕྲོད་མིན་གྱི་གནད་དོན་དེ་རེད། ཁོའི་སེམས་སུ་བཀྲ་ཤིས་རྒྱ་མཚོས་སྒོར་ཁྲི་དགུ་བཅུ་ལྷག་བརྡིབས་སོང་ཟེར་བ་བདེན་ནམ། བདེན་ན། ཁོ་རང་གིས་སྒོར་སྐྱིན་ཡོད་ཚད་དངུལ་ཁང་ལ་སྟེར་ཐུབ་བམ། སྟེར་མ་ཐུབ་ན། རང་གི་སྒོར་མོ་དེ་དག་ཀྱང་ཟར་མ་རྡོ་ནང་དུ་བཏབ་པ་ཇི་བཞིན་མིན་ནམ། དངུལ་ཁང་ལ་སྔ་ལོའི་སྒོར་སྐྱིན་སྟེར་ཐུབ་སོང་ན། ཕྱི་ལོ་ཡང་ཕྱིར་བསྐྱིས་ཟེར་བ་བདེན་ནམ། དངུལ་ཁང་གིས་སྒོར་མོ་ཕྱིར་བསྐྱིས་པའི་དབང་དུ་བཏང་ཡང་། ཁོས་ཡང་བསྐྱར་རྩྭ་ས་ཉོས་ཏེ་བརྡིབས་སོང་ན། ཁོས་ཀྱང་རང་སྲོག་གཅོད་པ་ལས་ཐབས་གཞན་ཡོད་དམ་སོགས་ཀྱི་དྲི་བ་སྣ་ཚོགས་ནི་གཞུང་ལམ་སྟེང་གི་རླངས་འཁོར་ལྟར་ཁོའི་བློ་ངོར་འཚང་ཡོང་།
ཁོའི་སེམས་ཁྲལ་དེ་དུས་ཀྱི་འགྱུར་བ་དང་བསྟུན་ནས་ཇེ་ཆེ་ནས་ཇེ་ཆེར་གྱུར། རྒྱུ་མཚན་ནི་ཉིན་དེ་ནས་བཟུང་། བཀྲ་ཤིས་རྒྱ་མཚོ་ནི་མཇའ་ཚོན་ཡལ་བ་ཇི་བཞིན་གར་སོང་ཆ་མེད་དུ་གྱུར། ཁོས་གྲོགས་པོ་དང་ཆུང་མ། སྡེ་མི་ཡོངས་ཀྱི་ལག་ནས་ཀྱང་སྒོར་མོ་བསྐྱིས་འདུག་པས། ཁོ་ཚོས་དབྱར་རྩྭ་མང་བའི་ས་ཁུལ་གྱི་ཁོ་རང་ངོ་ཤེས་པ་ཡོད་ཚད་ལ་དྲིས་ཀྱང་རྩད་མ་ཆོད། ཁ་པར་བཏང་ཡང་ཨང་གྲངས་དེ་འདྲ་མེད་ཟེར་ལ། དངུལ་ཁང་ལ་དྲིས་ན། ཁོ་ཚོས་ཀྱང་འཚོལ་བཞིན་ཡོད་ཟེར།
དེའི་ཕྱིར། མཚོ་སྐྱེས་རྡོ་རྗེ་ལ་ཟས་ཟ་འདོད་ཀྱི་ཡི་ག་འགགས་ཤིང་གོས་གྱོན་འདོད་ཀྱི་འདུན་པའང་མེད་པར་རྒྱུན་དུ་རྒྱབ་རི་སྒང་ལ་བུད་དེ་གཞུང་ལམ་སྟེང་གི་རླངས་འཁོར་ཡར་བསྐྱལ་མར་བསྐྱལ་བྱས། སྐབས་རེར་ཁོས《མཚོ་སྔོན་པོ》ཞེས་པའི་གླུ་དབྱངས་སྐད་གདངས་མཐོན་པོས་ལེན་ཞིང་། སྐབས་རེར་ཁྱོད་དྲན་པའི་ལོ་རབས་བཤད་ན།། སྐད་སྙན་མོ་ཐོས་ན་དྲན་ཀི ། ངས་རླངས་འཁོར་རིག་ན་རྨོངས་ཀི ། ཁྱོད་མ་དྲན་ཉིན་མོ་གཅིག་མེད།། ངས་བཀྲ་ཤིས་ཁྱོད་ལ་བསྒུགས་བསྒུགས་ཟིག ། ངས་དྲིན་ཆེན་ཕ་མར་མ་བསྒུགས་ཟིག ། ངས་དྲིན་ཆེན་ཕ་མར་བསྒུག་རྒྱུ་ན།། ངས་ཕ་མའི་དྲིན་ལན་འཇལ་ནས་ཡོད།།ཅེས་རོགས་དྲན་པའི་སྐོར་དང་ཞེ་རྨོངས་པའི་སྐོར་གྱི་ལ་གཞས་དག་བཅོས་ཏེ་བཀྲ་ཤིས་རྒྱ་མཚོ་དྲན་པའི་སྐྱོ་གླུ་བླངས། ཁོའི་བྱ་སྤྱོད་དེ་མཐོང་བ་ཙམ་གྱིས་མཚོ་སྐྱེས་སྨྱོས་འདུག་སྙམ་པའི་དོགས་པ་ཞིག་སུ་ལའང་སྐྱེ་སྲིད།
དཔྱིད་ཟླ་གསུམ་པ་ཐོན་ཏེ་རྩྭ་རྩི་ཤིང་དང་གྲོ་ནས་སྲན་གསུམ་གྱི་མགོ་བོ་ས་ཁར་བུད་པ་དང་མཉམ་དུ། རོང་འབྲོག་མང་ཚོགས་ཀྱིས་དྲག་ཆས་སྤྲས་ཏེ་དབྱར་རྩྭ་དགུན་འབུའི་སྟེང་དུ་མཆོངས་མགོ་བརྩམས། སྔོན་ཆད་ཁོ་ཚོ་སྡེ་བའི་རྩྭ་ས་ཉོ་མཁན་དག་གིས་ཁོ་རང་བཙལ་ནས་ཐོན་བྱུང་། ཁོ་ཚོས“བཀྲ་ཤིས་རྒྱ་མཚོས་རྩྭ་སའི་རིན་གོང་གི་ཕྱེད་ཀ་ད་ལྟ་ཁྱོད་ལ་བྱིན་ཟེར། ཕྱེད་ཀ་དབྱར་རྩྭ་བརྐོས་རྗེས་ཁྱོད་ལ་སྟེར་དགོས། མི་བདེན་ན། འདི་ནི་གན་རྒྱའི་ཡི་གེ་རེད། བཀྲ་ཤིས་རྒྱ་མཚོ་ཁོ་ཟླ་གཅིག་གི་རྗེས་སུ་ཐོན་ཐུབ་ཟེར”ཟེར་བཞིན་སྒོར་མོ་ཁོ་ལ་སྤྲད། བསྡོམས་པས་སྒོར་ཁྲི་བཞི་བཅུ་ལྷག་འདུས་པས། ཁོ་རང་ལ་མཚོན་ན། མགོ་ནས་རྡོ་ཞྭ་ལྕི་མོ་ཞིག་ཕུད་པ་དང་འདྲ་བར་གྱུར།
མ་བསམ་ས་ནས། ཉིན་ཞག་གཅིག་ཀྱང་མ་འགོར་བར་སྡེ་མི་ཡོངས་ཀྱི་ལག་ཏུ་གན་རྒྱ་ཡི་གེ་རེ་དང་བསྐྱིས་ཡིག་རེ་བཟུང་སྟེ་ཁོ་ཚང་ལ་ཐོན། སྒོར་མོ་དེ་དག་བྱིན་རྗེས། ད་དུང་སྒོར་ཁྲི་བཅུ་ལྷག་ཆད་འདུག་པ་ཁོས་སྟེར་དགོས་ཚུལ་བཤད། ཁོའི་སེམས་སུ་དོན་དག་འདི་མི་གཞན་གྱིས་ཀྱང་གོ་སྲོལ་མེད་པས། ཆུང་མ་རྡོ་རྗེ་འཚོས་ཤེས་སོང་ན། གནམ་ས་གཉིས་ཀ་ཁ་ལོ་བསྐོར་བ་གདོན་མི་ཟ་སྙམ་སྟེ། གན་རྒྱའི་ནང་དོན་ལྟར་དབྱར་རྩྭ་བརྐོས་རྗེས་སྡེ་མི་ཚོར་སྟེར་བའི་ཁས་ལེན་དམ་བཅའ་བྱས།
དབྱར་རྩྭ་རྐོ་བའི་རོང་འབྲོག་མང་ཚོགས་ནི་ནོར་ལུག་རི་ལ་བཀྲམ་པ་ཇི་བཞིན་འབྲོག་ཁུལ་གྱི་སྟོད་སྨད་བར་གསུམ་ཀུན་ཏུ་ཁྱབ། སྔོན་ཆད་ཡིན་ན། ལོ་ལོན་འཆི་དབང་དང་བྱིས་པ་སྐྱེས་དབང་མེད་ཅེས་རོང་ཁུལ་གྱི་སྟོན་བསྡུ་བའི་རྣམ་པ་མཚོན་མོད། ད་ནི་འབྲོག་ཁུལ་གྱི་དབྱར་རྩྭ་རྐོ་བའི་རྣམ་པ་དེས་མཚོན་ཆོག་ཆོག་ཡིན།
མཚོ་སྐྱེས་རྡོ་རྗེ་ལ་མཚོན་ནའང་བཀྲ་ཤིས་རྒྱ་མཚོའི་ལས་འགན་དང་དུ་བླངས་ཏེ། ནངས་སྔ་མོ་ནས་དགོང་ཕྱི་དྲོའི་བར་ཁོའི་ཕ་ཡུལ་གྱི་དབྱར་རྩྭ་དགུན་འབུ་རྐོ་མཁན་ཚོའི་རྗེས་ན་ཡར་རྒྱུག་མར་རྒྱུག་བྱེད། བལྟས་ཚོད་ལ། ཁོ་དང་རྩྭ་ས་ཉོ་མཁན་གྱི་སྦྱིན་བདག་རྣམས་ནི་གླ་པ་ཚོའི་རྫི་བོ་ཞིག་དང་འདྲ་བར། མཚམས་རེར། རི་གསུམ་རྩེ་ན་འགྱིང་ཤིང་། མཚམས་རེར། ལུང་གསུམ་མདོ་ན་འདུར།
སྦྱིན་བདག་ཚོས་འཛུམ་མདངས་དང་དགོད་སྒྲ་ལྷང་ལྷང་གིས་ཁ་པར་གཏོང་ཚུལ་དང་། གླ་པ་ཚོས་སྣང་བ་སྐྱིད་པའི་གླུ་དང་རྡུང་ལེན་ངག་ལ་འགུགས་པར་བལྟས་ན། ཁོའི་ཕ་ཡུལ་གྱི་རི་སྒང་དུ་དབྱར་རྩྭའི་སྐྱེས་ཚད་བཟང་བ་རྟོགས་ཐུབ། དེ་ནི་མཚོ་སྐྱེས་རྡོ་རྗེ་ལ་མཚོན་ན། དོན་བཟང་ཞིག་ཡིན་ཏེ། ཁོའི་སྒོར་མོ་ཁྲི་ཉི་ཤུ་ཕྱིར་ལོན་ཐུབ་པས་རེད།
སྐད་ཅིག་ཉིད་ལ། ཁོའི་ཕ་ཡུལ་གྱི་རི་སྒང་ཡོད་ཚད་ནི་རྨ་འབྲུམ་གྱིས་ཟོས་པའི་རྒན་པོ་ཞིག་གི་ངོ་གདོང་དང་ཡོངས་སུ་མཚུངས་པར་གྱུར། ཁོའི་སེམས་སུ་སྔོན་ཆད་བོད་ཡུལ་གྱི་རི་ཆུ་ནགས་གསུམ་དུ་ཡུལ་ལྷ་གཞི་བདག་དང་ལྷ་ཀླུ་བཙན་གསུམ་གནས་པས། ས་རྐོ་རྡོ་སློག་བྱ་མི་ཆོག་ཟེར་མོད། ད་ལྟ་རི་མཐོན་པོ་ཨ་མྱེས་རྨ་ཆེན་ནས་ཆུ་དམའ་མོ་རྨ་ཆུ་སྔོན་མོའི་བར་དུ་དབྱར་རྩྭ་དགུན་འབུ་རྐོ་སློག་བྱེད་པ་འདི་ཅི་ཡིན་ནམ། ད་དུང་དབྱར་རྩྭ་དགུན་འབུ་ནི་སྲོག་ལྡན་གྱི་འབུ་ཞིག་ཡིན་ན། ལག་ཏུ་ཕྲེང་བ་བཟུང་སྟེ་ཁ་ནས་མ་ཎི་འདོན་བཞིན་བསློགས་པ་འདི་ཡང་ཅི་ཡིན་ནམ། འདི་ལྟར་ལོ་ངོ་མང་པོ་འདས་ན། ས་གཞི་ནི་ང་ཚོའི་འཚོ་རྟེན་མིན་པར་ས་འགུལ་དང་ཆུ་ལོག ནད་ཡམས་དང་ཆག་སྒོ་སོགས་ཀྱི་འབྱུང་གཞིར་འགྱུར་བ་གདོན་མི་ཟ་སྙམ་སྟེ། གླ་པ་རེ་རེ་ཡིས་ལྕགས་ཀྱི་གཟེར་བུ་རྣོན་པོ་ས་ནང་དུ་འཛེར་ཐེངས་རེར། ཁོ་ལ་སྨྲ་མི་ཤེས་པའི་ན་ཟུག་ཅིག་སྐྱེས།
དབྱར་རྩྭ་མང་ན་དགའ་བའི་སྤྲོ་བ་དང་དབྱར་རྩྭ་མེད་ན་སྡུག་པའི་སེམས་ཁྲལ་གཉིས་ནི་ཡང་ལྗིད་མེད་པའི་རྒྱ་རྡོ་གཉིས་དང་འདྲ་བས། ཁོའི་དྲང་བདེན་གྱི་བློ་ཡིས་འཇལ་མ་ཐུབ་པར་ཟླ་ངོ་གཅིག་དང་ཕྱེད་ཀ་འདས། སྦྱིན་བདག་ཚོས་དགའ་དགའ་སྤྲོ་སྤྲོ་དང་བཅས་ཁོ་ལ་སྒོར་མོ་ཁྲི་བཞི་བཅུ་ལྷག་བྱིན་རྗེས་ཕྱི་ལོ་ཡང་ཡོང་རྒྱུ་ཡིན་པའི་ཁ་ཆད་བཞག་སྟེ་རང་རང་གི་ཕ་ཡུལ་དུ་ཆས་ལ། ཆད་པའི་སྒོར་མོ་ལག་ཏུ་འཕྲོད་པའི་སྡེ་མི་ཚོ་ཡང་དགའ་དགའ་སྤྲོ་སྤྲོའི་ངང་ནས“ངེད་ཚང་གི་རྩྭ་ས་ཕྱི་ལོ་ཡང་ཁྱོད་ཀྱིས་བཙོང་རོགས་བྱ་དགོས”ཟེར་བཞིན་རང་རང་གི་ཁྱིམ་དུ་བཞུད།
སྒོར་ཁྲི་སུམ་ཅུ་ཙམ་ལྷག་ཡོད་པ་ཁོའི་ཆུང་མ་རྡོ་རྗེ་འཚོ་ཡིས་མཐོང་སྟེ། དགའ་བའི་འཛུམ་དང་བཅས་སྔོན་ཆད་འབོད་མ་མྱོང་བའི་གཅེས་མིང་མཚོ་བྷེ་དང་རྡོ་བྷེ་སོགས་ཀྱིས་ཁོ་རང་སྐྱེལ་བསུ་བྱས། ཡིན་ཡང་། སྒོར་མོ་བསྐྱིས་པའི་སེམས་ཁྲལ་དང་རྩྭ་ས་བརླགས་པའི་སྡུག་བསྔལ། ད་དུང་མ་རྩ་བརྡིབས་ཏེ་རང་སྲོག་གཅོད་པ་སོགས་སུ་ཡིས་རྟོགས།
༼མུ་འགོད།༽