རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
དང་པོ།
དབྱར་ཟླ་དྲུག་པའི་ཚེས་ཆེན་བཅོ་ལྔའི་ཟླ་བ་ནི་དུང་ལྟར་དཀར་ཞིང་ཉ་ཡོངས་སུ་གང་བས། མི་རྣམས་ཀྱིས་དུང་ཟླ་དཀར་པོ་དང་ཉ་གང་ཟླ་བ་ཞེས་ཆེས་ལེགས་པའི་ཚད་གཞི་རུ་བཤད། ཡིན་ཡང་། དོ་དགོང་གི་ཨ་སྔོན་དབྱིངས་ཀྱི་ཟླ་བ་ནི་སྤྲིན་ནག་ཕོན་པོ་སྤྱང་ཁུ་ལྟ་བུ་ཞིག་གི་མཆེ་བ་གཙིགས་པའི་བར་དུ་ཚུད་འདུག་ལ། མདོག་དང་དབྱིབས་གང་ལ་བལྟས་ཀྱང་སྐྱོ་སྣང་གིས་ཁེངས་པའི་རྒན་པོ་ཞིག་གི་ངོ་གདོང་དང་ཡོངས་སུ་མཚུངས།
མག་མོག་གི་ཟླ་འོད་དང་འདར་སིག་སིག་བྱེད་པའི་སྐར་ཚོགས་ཀྱི་འོག་ཏུ། མཚོ་སྔོན་ཁྲི་ཤོར་རྒྱལ་མོའི་ཆིལ་ཆིལ་དུ་སྒྲོག་པའི་རླབས་སྒྲ་དང་རླངས་འཁོར་ཆེ་ཆུང་གི་ལྷང་ལྷང་དུ་སྒྲོག་པའི་དུང་བརྡ། ཆུ་བྱ་སྣ་ཚོགས་ཀྱི་སྙན་པའི་གྲེ་འགྱུར་བཅས་ནི་བསེར་བུ་རླུང་དང་བསྡོངས་ཏེ་ཕྱོགས་བཞིར་མཆེད་ཀྱིན་ཡོད་ལ། སྔོ་ལིང་ལིང་གི་རླབས་ཕྲེང་རེ་རེ་ནི་གཅིག་རྗེས་གཅིག་གིས་མ་ཆོད་པ་ཇི་བཞིན་མཚོ་འགྲམ་དུ་སྙེག་བཞིན་ཡོད།
མཚོ་འགྲམ་དང་ཐག་མི་རིང་བའི་དེའུ་འབུར་ཞིག་གི་སྟེང་དུ་ནག་རོག་རོག་གི་མི་ཞིག་བསྡད་འདུག་པ་ནི་མཚོ་སྐྱེས་རྡོ་རྗེ་རེད། ཁོའི་ངོ་གདོང་ནི་ཟླ་བའི་གཟུགས་བརྙན་ལྟར་སྤྲིན་གྱི་འགྱུར་བ་དང་བསྟུན་ནས་སྐྱོ་སྣང་དང་འཇིགས་སྣང་། ཞེ་སྡང་དང་ཐེ་ཚོམ་བཅས་ཀྱི་རྣམ་འགྱུར་ཞིག་སྐྱོ་ལྷང་ལྷང་གིས་མངོན་ཡོང་། ཁོའི་མིང་ལ་མཚོ་སྐྱེས་ཞེས་འབོད་དོན་ནི་ཨ་ལགས་རྟ་མགྲིན་ཚང་གིས་གསུངས་ན། སློབ་དཔོན་པདྨ་འབྱུང་གནས་ནི་མཚོ་ནང་གི་མེ་ཏོག་པདྨ་ལས་སྐྱེས་པ་ཡིན་པས། དེ་ལྟར་བཏགས་པ་ཡིན་ཟེར་མོད། ཁོ་རང་གིས་བཤད་ན། མཚོ་སྐྱེས་ཞེས་པ་ནི་མཚོ་སྔོན་པོའི་འགྲམ་ནས་སྐྱེས་པའི་དོན་དང་རྡོ་རྗེ་ནི་སྲ་ཞིང་མཁྲེགས་པ་དང་འགྱུར་བ་མེད་པའི་དོན་ཡིན་ཞེས་ཀུན་ལ་སྒྲོག་བཞིན་ཡོད། གང་ལྟར་ཁོ་ནི་མཚོ་སྔོན་པོའི་འགྲམ་ངོགས་ཀྱི་འབྲོག་ཁྱིམ་དཀྱུས་མ་ཞིག་ནས་སྐྱེས་པ་ཤ་སྟག་རེད།
མཚོ་སྔོན་པོའི་མིང་འདི་མི་སུ་ཞིག་གིས་ཐོས་མ་ཐག སྔོ་སང་སང་གི་ནམ་མཁའ་ཐང་ལ་ལྷུང་འདྲའི་མཚོ་མོ་དང་ཁྲ་ལམ་ལམ་གྱི་མེ་ཏོག་རླབས་ལྟར་གཡོ་བའི་མཚོ་ངོགས། སྔོ་ལྗང་ལྗང་གི་གོས་སྔོན་གདན་དུ་བཏིངས་འདྲའི་རྩྭ་ཐང་སོགས་སྐད་ཅིག་ཉིད་དུ་སེམས་ངོར་འཆར་ཡོང་། ཁོར་མཚོན་ན། མཛེས་སྡུག་གི་ཞིང་ཁམས་དེའི་རི་ལུང་མཚོ་གསུམ་ལ་ཤིན་ཏུ་དགའ་ཞིང་། བག་ཡངས་སུ་རྒྱུ་བའི་རྟ་ནོར་ལུག་གསུམ་དང་མཚོ་ནང་དུ་ལྷོད་ཀྱིས་འཁྱུག་པའི་ཉ་མོའི་ཚོགས་ལ་ཤིན་ཏུ་དུངས།
ལྷག་པར། ཁོ་རང་སློབ་ཆུང་འགྲིམ་པའི་སྐབས་སུ། མཁས་དབང་དོན་གྲུབ་རྒྱལ་གྱིས་ཚིག་བརྩམས་ཤིང་མ་གཅོད་པ་ཐར་གྱིས་དབྱངས་སྦྱར་བའི《མཚོ་སྔོན་པོ》ཞེས་པའི་གླུ་དབྱངས་དེ་གླུ་བ་རྡོ་རྗེ་ཚེ་བརྟན་གྱིས་སྙན་མོ་ངག་ལ་བཀུག་སྟེ་མདོ་དབུས་ཁམས་གསུམ་དུ་བསྒྲགས་པ་ནས། ཁོས《མཚོ་སྔོན་པོ》ཡི་གདངས་དབྱངས་ཀྱི་འགྱུར་ཁུག་དང་བསྟུན་ཏེ་ཉ་གསེར་མིག་དང་ལུག་གཡང་དཀར་བཅས་ཀྱི་འགྱུར་ལྡོག་ལ་དོ་སྣང་བྱེད་མགོ་བརྩམས།
ལོ་འགའི་ཡར་སྔོན་དུ། འབྲོག་ཁུལ་གྱི་རི་སྒང་ཀུན་ལ་ལུས་ཁམས་གསོ་ཞིང་ནད་བརྒྱ་འཇོམས་པའི་དབྱར་རྩྭ་དགུན་འབུ་སྐྱེས་པ་ནས། ཁོའི་ཕ་ཡུལ་གྱི་རྟ་ནོར་ལུག་གསུམ་འཚོ་སྐྱོང་བྱེད་པའི་འཚོ་བའི་གོམས་གཤིས་དེར་བརྡབ་གསིག་ཆེན་པོ་ཐེབས། དབྱར་རྩྭ་དགུན་འབུ་ནི་རྫ་སྒང་མཐོན་པོ་དང་རི་མཐོ་ས་ནས་སྐྱེས་པ་མང་ཞིང་། ས་དམའ་ས་དང་བདེ་ས་ནས་སྐྱེས་པ་ཉུང་བས། འབྲོག་ཁྱིམ་སོ་སོའི་ཡོང་སྒོ་ཡང་གནམ་ས་བླ་འོག་བརྗེ་བ་ལྟར་གྱུར།
མཚོ་སྐྱེས་རྡོ་རྗེ་ཚང་ལ་མཚོན་ནའང་། ཁོ་ཚང་གི་བདེ་ཞིང་སྙོམས་པའི་རྩྭ་ས་ནི་སྔོན་ཆད་རྟ་ནོར་ལུག་གསུམ་གྱི་ཤ་ཤེད་རྒྱས་པའི་གནས་མཆོག་ཁྱད་པར་བ་ཞིག་ཡིན་མོད། ད་ལྟ་དབྱར་རྩྭ་དགུན་འབུ་ཡི་ཤ་ཤེད་རྒྱས་པ་ཕར་ཞོག དབྱར་རྩྭ་དགུན་འབུ་སྐྱེས་པ་ཤིན་ཏུ་ཉུང་བས། ཁོའི་སེམས་པ་ནི་མཚོ་རླབས་འཕྱུར་བ་ཇི་བཞིན་འཇགས་ཐབས་བྲལ། ལོ་རེ་རེའི་དབྱར་ཟླ་དྲུག་པའི་དུས་སུ། དབྱར་རྩྭ་དགུན་འབུའི་ཡོང་སྒོ་སྤྱི་སྡོམ་བྱས་ཏེ་ཚར་ཡོད་པས། ལྷིང་འཇགས་ཀྱི་མཚན་མོ་རེ་རེར་ཁོ་རང་རྒྱབ་རི་སྒང་ལ་བུད་དེ་ནམ་མཁའི་ཟླ་བར་རྒྱང་ལྟ་བྱེད་བཞིན་ཁམས་གསེང་མི་བྱེད་ག་མེད་དུ་གྱུར།
དབྱར་རྩྭ་དགུན་འབུ་ཡིས་རོང་འབྲོག་མང་ཚོགས་ལ་ཀུ་རེ་བརྩེ་བ་དང་འདྲ་བར་ལོ་རེར་སྐྱེས་པ་མང་ཞིང་ལོ་རེར་སྐྱེས་པ་ཉུང་། རིན་གོང་ཡང་མཚོ་སྔོན་པོའི་རྦ་རླབས་དང་ནམ་མཁའི་ཟླ་བའི་འཕེལ་འགྲིབ་ལྟར། མཚམས་རེར། དབྱར་རྩྭ་སྦོམ་པོ་ཞིག་ལ་སྒོར་དྲུག་བཅུ་དང་ཕྲ་མོ་ཞིག་ལའང་སྒོར་སུམ་ཅུ་སྟེར། མཚམས་རེར། དབྱར་རྩྭ་སྦོམ་པོ་ཞིག་ལ་སྒོར་སུམ་ཅུ་དང་ཕྲ་མོ་ཞིག་ལ་སྒོར་གསུམ་མ་གཏོགས་མི་སྟེར་བས། མ་རྩ་བརྡིབས་པའི་སྦྱིན་བདག་ལ་ལས་རང་ལུས་བྲག་ལ་བརྡབས་པ་དང་རང་སྲོག་ཆུ་ལ་ལྕེབས་པའི་དོན་དག་ཀྱང་བྱུང་དང་འབྱུང་བཞིན་འདུག
ད་ལོ་ཡང་འབྲོག་ཁུལ་ཡོངས་ནས་དབྱར་རྩྭ་དགུན་འབུ་སྐྱེས་པ་ཉུང་ལ། རིན་གོང་ཡང་ལྡབ་འགྱུར་གྱིས་མར་འགྲིབ་སྟེ། རོང་འབྲོག་མང་ཚོགས་ཀྱི་དབྱར་རྩྭ་དགུན་འབུ་རྐོ་སློག་དང་ཉོ་ཚོང་བྱེད་པའི་ཚ་ཚ་འུར་འུར་གྱི་ལས་སྒོ་དེ་ལྷོད་ཡེངས་སེར་བཏང་། མཚོ་སྐྱེས་རྡོ་རྗེར་མཚོན་ནའང་དེ་ལས་མ་འདས་པས། སྔ་མོ་ནས་ཁོ་ཚང་གི་རྒྱབ་རི་སྒང་ལ་བུད་དེ་མཁའ་དབུགས་དྭངས་མོ་རྔུབ་བཞིན་དལ་ཅག་ཅག་གིས་ནམ་མཁའི་ཟླ་བར་ཅེར་འདུག
ཁོའི་སྣང་བར་མཚམས་རེར་ཁོ་ནི་ནམ་མཁའི་ཟླ་བ་ཡིན་པ་དང་མཐའ་སྐོར་གྱི་རི་ལུང་ནི་ནམ་མཁའི་སྤྲིན་ཕུང་དུ་འགྱུར་ལ། མཚམས་རེར། ཁོ་ནི་མཚོ་སྔོན་པོའི་ནང་གི་ཟླ་བ་ཡིན་པ་དང་མཚོ་ནང་གི་ཉ་གསེར་མིག་ནི་ནམ་མཁའི་སྐར་ཚོགས་ཡིན་པའི་འཁྲུལ་སྣང་སྐྱེས། ཡང་མཚམས་རེར། ཁོ་ནི་ཁོའི་གྲོགས་པོ་བཀྲ་ཤིས་རྒྱ་མཚོ་ཡིན་ལ། ཁོ་ཚང་གི་རྩྭ་ས་དང་རྟ་ནོར་ལུག་གསུམ་ཡོད་ཚད་ནི་བཀྲ་ཤིས་རྒྱ་མཚོ་ཚང་གི་རྩྭ་ས་དང་རླངས་འཁོར་ཡིན་ན་སྙམ་པའི་འདོད་བློ་ཡང་སྐྱེས།བཀྲ་ཤིས་རྒྱ་མཚོ་ནི་ཁོའི་མ་གཅིག་སྤུན་ལས་ལྷག་པའི་གྲོགས་པོ་བཟང་པོ་ཡིན། མཚན་མོ་རེ་རེ་ནི་ཁོ་གཉིས་ལ་དབང་བའི་ལྷིང་འཇགས་ཀྱི་དུས་སྐབས་ཤིག་ཡིན་པས། ཞག་གང་པོར་ཆང་རག་འཐུང་བཞིན་ནམ་མཁའི་ཟླ་བར་ཅེར་ཏེ། འཁྲུལ་སྣང་དང་འདོད་བློ་སྣ་ཚོགས་གླེང་སྟེ་བསྡད་མྱོང་།
གློ་བུར་དུ། “ཨེ་མ། ཁྱེད་ནི་མི་རིགས་ཀྱི་ལ་རྒྱ་དང་མ་འོངས་པའི་རེ་བ་རེད”ཅེས་གསལ་ཞིང་དག་པའི་རོལ་དབྱངས་ཤིག་གིས་ལྷིང་འཇགས་ཀྱི་མཚན་མོ་ཡོངས་སུ་དཀྲོགས་ཏེ་ཟླ་བར་ཅེར་འདུག་པའི་མཚོ་སྐྱེས་རྡོ་རྗེ་ཧང་སངས་པར་བྱས། ཁོས་འཚབ་འཚུབ་ཀྱིས་ལྭ་བའི་ཁུག་མ་ལས་ལག་འཁྱེར་ཁ་པར་བླངས་ཏེ་ཁ་ཕྱེས་པ་ན། བཀྲ་ཤིས་རྒྱ་མཚོས་དལ་ལྷོད་ལྷོད་ཀྱིས“ཨ་རོགས། ང་བཀྲ་ཤིས་ཡིན། དོ་དགོང་ཡང་ཁྱོད་ཀྱིས་ཟླ་བའི་ལྷ་མོར་སེམས་གཏམ་བཤད་ཀྱིན་ཡོད་དམ”ཞེས་དྲིས་བྱུང་།
བཀྲ་ཤིས་རྒྱ་མཚོ་ཡི་ཀུ་རེ་འདྲེས་མའི་སྐད་གདངས་ལ་བལྟས་ན། ཁོའི་དགའ་སྤྲོ་ནི་ཉ་གང་ཟླ་བ་བཞིན་རྒྱས་ཡོད་པ་རྟོགས་ཐུབ། ཡིན་ཡང་། མཚོ་སྐྱེས་རྡོ་རྗེ་ལ་མཚོན་ན། ཟུར་ཟ་འདྲེས་མའི་ཚིག་མདའ་རྣོན་པོ་ཞིག་ཡིན་པས། “དོན་དག་ཅི་ཞིག་ཡོད”ཅེས་འཐད་མི་འཐད་ཀྱི་སྒོ་ནས་དྲིས།
“དོན་དག་མེད་ན། ཁྱོད་ལ་ཁ་པར་གཏོང་མི་ཉན་པ་ཨེ་རེད། ཨ་ལ། ཀུ་རེ་ཡིན། ཁྱོད་ཀྱིས་སྒུགས་དང་། ང་ཡང་མྱུར་དུ་ཐོན་ཡོང་།” བཀྲ་ཤིས་རྒྱ་མཚོས་དེ་ལྟར་བཤད་མཚམས་བཞག
དབྱར་རྩྭ་དགུན་འབུ་ཡིས་ཁོ་གཉིས་ཀྱི་དབུལ་ཕྱུག་གི་ཁྱད་པར་ཕྱེས་པ་ནས། གཅིག་གི་བཤད་ཚུལ་དང་གཅིག་གི་ཉན་ཚུལ་ཞེས་པའི་དཔེ་ལྟར་ཁོ་གཉིས་ཀྱི་ཁ་བརྡ་ནི་སེམས་གཏམ་ཡིན་ནའང་ཚིག་རྩོད་མ་འདྲེས་པ་གཅིག་ཀྱང་མེད། ཡིན་ཡང་། མཚོ་སྐྱེས་རྡོ་རྗེ་ཡི་སེམས་ཁམས་མི་སྐྱིད་པའི་དུས་སུ། རང་དབང་མེད་པར་ཁོའི་གྲོགས་པོ་བཀྲ་ཤིས་རྒྱ་མཚོ་དྲན་ཡོང་།
བཀྲ་ཤིས་རྒྱ་མཚོ་ནི་ཁོ་ལས་ལྡོག་སྟེ། དབྱར་རྩྭ་དགུན་འབུའི་དྲིན་གྱིས་ཕྱུག་པོ་ཆེན་པོ་ཆགས་ཡོད་པས། ངོ་ཤེས་པའི་རོང་འབྲོག་མང་ཚོགས་ཀུན་གྱིས་ཁོར་སྦྱིན་བདག་བཀྲ་ཤིས་ཞེས་འབོད། སྤྱིར་སྦྱིན་བདག་ཅེས་པའི་མིང་འདི་ནི་རྒྱུ་ནོར་སོགས་སྦྱིན་པ་གཏོང་མཁན་ལ་འབོད་པ་ཡིན་མོད། ད་ལྟའི་དུས་འདིར་རྒྱུ་འབྱོར་པ་ཅན་ལ་འབོད་པའི་མིང་བརྡ་ཞིག་ཏུ་གྱུར་འདུག
བཀྲ་ཤིས་རྒྱ་མཚོའི་གཤིས་སྤྱོད་ཀྱང་ཁོ་དང་གཏན་ནས་མི་འདྲ་བར་ཆུང་དུས་ནས་རྒྱུ་མེད་ཀྱང་རྒྱས་པོ་བྱ་རྒྱུར་ཤིན་ཏུ་དགའ། ཁོ་གཉིས་སློབ་གྲྭ་འགྲིམས་པའི་དུས་སུ། ཁྱིམ་ཚང་གི་རྒྱུ་འབྱོར་པའི་ཕྱོགས་ནས་ཁོ་རང་བཟང་མོད། འཚོ་བའི་ཆ་རྐྱེན་གྱི་ཕྱོགས་ནས་བཀྲ་ཤིས་རྒྱ་མཚོ་ནི་གནམ་དང་ཁོ་ནི་ས་ལྟ་བུའི་ཁྱད་པར་ཡོད། རྒྱུ་མཚན་ནི་བཀྲ་ཤིས་རྒྱ་མཚོས་ཁྱིམ་ནས་བསླངས་པའི་སྒོར་མོ་ཡོད་ཚད་ཀྱིས་གྱོན་ཆས་ཉོ་བར་མ་ཟད། ཁོ་ལ་གོས་ལྭ་གསར་པ་ཞིག་ཡོད་ན། དེ་ནི་བཀྲ་ཤིས་རྒྱ་མཚོ་ཡི་ཤོམ་ལྭ་རུ་འགྱུར་སྲིད་ལ། ཡག་པོ་ཡིན་ན་ཁོ་ལ་ཡང་མི་དབང་། དེའི་ཕྱིར། ད་ལྟ་ཡང་བཀྲ་ཤིས་རྒྱ་མཚོས་རྒྱས་བཟའ་རྒྱས་འཐུང་བྱེད་པ་ནི་སྡེ་མི་གཞན་ལས་འགོངས་པ་གདོན་མི་ཟ།
བཀྲ་ཤིས་རྒྱ་མཚོས་རླངས་འཁོར་ཉོས་པའི་ཁ་གྲངས་དང་ཆུང་མ་བླངས་པའི་གྲངས་ཀ་ནི་ཡར་ངོའི་ཟླ་བཞིན་འཕར། སྤྱིར་ཡིན་ན། འབྲོག་ཁྱིམ་དེ་རྟ་ནོར་ལུག་གསུམ་གྱིས་བསྐོར་དགོས་མོད། ཁོ་ཚང་གི་ཁང་པ་ནི་རླངས་འཁོར་ཆེ་ཆུང་མང་པོས་བསྐོར་ཡོད་པས། མཐོང་བ་ཙམ་གྱིས་ཁོ་ཚང་ནི་རླངས་འཁོར་འཚོ་སྐྱོང་བྱེད་པའི་འབྲོག་ཁྱིམ་ཞིག་དང་མཚུངས། ད་ལྟ་ཁོས་བསྐོར་བའི་རླངས་འཁོར་ནི་སྒོར་ཁྲི་སུམ་ཅུ་ལྷག་གི་པོད་མ(宝马)ཟེར་བ་ཞིག་ཡིན། མིང་འདི་ནི་དབྱིན་སྐད་BMWདེ་རྒྱ་སྐད་ལ་ཐད་བསྒྱུར་བྱས་པ་རེད། རྒྱ་སྐད་དེ་བོད་སྐད་ལ་བསྒྱུར་ན། རྟ་མཆོག་རིན་པོ་ཆེ་ཞེས་བཏགས་ཆོག་ཆོག་ཡིན། རྒྱུ་མཚན་ནི་རླངས་འཁོར་དེ་ནི་བུང་བུའི་གྲས་ཀྱི་རྟ་མཆོག་ཅང་ཤེས་ཇི་བཞིན་བརྒྱུགས་ན་མགྱོགས་ཤིང་བསྡད་ན་བདེ་བར་མ་ཟད། དབྱིབས་དང་ཁ་དོག་སོགས་ཀྱང་རླངས་འཁོར་གཞན་ལས་ཁྱད་དུ་འཕགས།
ཆུང་མ་ཡང་ཁོ་ལ་ས་ཆ་རེ་ན་གཅིག་རེ་ཡོད། ཡུལ་ཕ་མས་བླངས་པའི་ཁྱིམ་གྱི་ཆུང་མ་མ་གཏོགས། གཞན་དག་ནི་ལྟ་བས་ཆོག་མི་ཤེས་པའི་མཛེས་མ་ཏག་ཏག་ཡིན། ད་ལྟ་ཁོ་རང་གི་འདང་ཆེན་དུ་གྱུར་ཡོད་པ་ནི་ཡག་མོ་སྒོ་དང་གཟུགས་སྐྱེས་ལུས་གཉིས་ཀ་འཛོམས་པ་ཞིག་སྟེ། ཡག་བཏོད་ཕྱོགས་དང་གོས་གྱོན་ཕྱོགས་ལས་མོ་ནི་ལོ་བཅུ་དྲུག་ཡས་མས་ཀྱི་གཞོན་ནུ་མ་ཞིག་རེད། མི་ཆ་མེད་ཚང་མས་ཁོ་གཉིས་མཐོང་མ་ཐག“ཁྱོད་ཕ་བུ་གཉིས་གང་དུ་འགྲོ་བ་ཡིན་ནམ”ཞེས་འདྲི་སྲིད། ད་ལྟ་ཁོ་རང་གང་ལ་འགྲོ་ན་རླངས་འཁོར་པོད་མ་བསྐོར་ཏེ་སྙིང་སྡུག་གཞོན་ནུ་མ་དེ་རྗེས་སུ་ཁྲིད་ཡོད།
ཁོའི་བཅའ་སྲོལ་ལས་སྲོལ་འདི་དག་ནི་མཚོ་སྐྱེས་རྡོ་རྗེ་ཡི་སྙིང་གི་ཚེར་མ་ལྟར་གྱུར། ལྷག་པར། ཁོས་ཁྱིམ་གྱི་ཆུང་མ་དང་བུ་ཕྲུག་དག་ལ་ཁ་ཡ་མི་བྱེད་པར་རྩྭ་ས་ཁོ་ན་བདག་ཏུ་བཟུང་བར་མ་ཟད། སྡེ་བའི་རྩྭ་ས་ཡོད་ཚད་ཀྱང་ཁོས་ཁ་པར་གྱི་ལམ་ནས་ས་བདག་དང་ཉོ་བདག་མཚམས་སྦྱོར་བྱས་ཏེ་འཚོང་བཞིན་ཡོད་པས། ངལ་བ་སྤུ་ཙམ་ཡང་མེད་པར་བར་ཁེ་མཐོན་པོ་ལེན་ཐུབ། ཐེངས་ཤིག་ལ། ཁོ་བཟི་སྟེ“ངས་སྡེ་བའི་རྩྭ་ས་འཚོང་རོགས་བྱས་ན། ཉུང་བརྩིས་བྱས་ཀྱང་ཁྱིམ་ཚང་རེ་ནས་སྒོར་ཁྲི་གཉིས་རེ་ལོན་ཐུབ”ཅེས་བཤད་པས། མཚོ་སྐྱེས་རྡོ་རྗེ་ཡིས་ཚམ་ཚོམ་མེད་པར་ཁོའི་མགོ་བོར་ཆང་གི་དམ་བུས་མཇལ་ཁ་བཞག་སྟེ། ཁོ་གཉིས་ཀྱི་བརྩེ་འདང་གི་རི་མོའི་སྟེང་དུ་ཁྲག་གི་རྨ་ཁ་བཟོས་མྱོང་།
“སྙིང་ཉེ་མ། ཉིན་འགའི་རྗེས་སུ་ཁྱོད་ལ་བལྟ་རུ་ཡོང་ཆོག ད་ལྟ་ང་རང་ལྷ་ས་ན་ཡོད།”དེ་ནི་བཀྲ་ཤིས་རྒྱ་མཚོ་ཡིས་གཞོན་ནུ་མ་ཞིག་ལ། རྫུན་གཏམ་གྱི་འཁོར་ལོ་བསྐོར་བཞིན་པ་མཚོ་སྐྱེས་རྡོ་རྗེ་ཡིས་གསལ་བོར་རྟོགས་ཏེ་ཁ་ཡའང་མ་བྱས།
བཀྲ་ཤིས་རྒྱ་མཚོས“ཉིན་འགར་མ་ཐུག་ན། ཁ་པར་བཏང་སྟེ་སྡོད་དུ་མི་འཇུག ངོ་མས་སུན་ནི་ཞིག་རེད”ཟེར་བཞིན་ལག་གི་ཁ་བའི་མེ་ཏོག་རྟགས་ཅན་གྱི་སྦི་རག་ཤོག་སྒམ་བཞི་སར་བཞག་སྟེ “ཨ་ལས་ངན་པོ། ཁ་མ་གྲག་པར་དེ་ལྟར་སྒོང་ནས་བསྡད་ན། ཁྱོད་ཀྱི་ཚུགས་ཀ་ནི་འུག་རྒན་མ་ཞིག་དང་ཨ་ན་མ་ན་རེད། ཧ་ཧ་ཧ”ཞེས་ཧབ་ཆ་བརྒྱབ།
༼མུ་འགོད།༽