རྒྱུན་ལས་ཚོས་དུར་ཁྲོད་དུ་སྐྱེལ་ཚར་བའི་ཡིག་ཆ་ཨང་ ༣༩ པ་ཨེ།

གཡུང་དྲུང་ཚེ་བརྟན།

ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་གང་རུང་འཕོ་འགྱུར་བྱ་རྒྱུའི་སྐོར་དང་། སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོག་ཞིབ་ཐོག་སྤྱི་འཐུས་ལྷན་ཚོགས་སུ་སྙན་ཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སློང་དང་། གྲོས་བསྡུར་བྱེད་མི་ཆོག” འདི་ནི་བཅའ་ཁྲིམས་དོན་ཚན་ ༥༤ པར་གསལ་བའི་ཚིག་རེད། འདིས་ཚད་བཏབས་ན། ཡིག་ཆ་ཨང་ ༣༩ པ་དེ་བཅའ་ཁྲིམས་དང་འགལ་བ་བསྟན་ཡོད།

༡ ཁྲིམས་ལུགས་དང༌། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་ཡང་བཅའ་ཁྲིམས་འདིའི་དོན་ཚན་གང་རུང་དང་འགལ་ཚེ་འགལ་བའི་ཆ་དེ་རྩ་འཛིན་མེད་པ་བྱ་རྒྱུ། ༢ གོང་གསལ་རྣམས་ཀྱི་དོན་གནད་བཅའ་ཁྲིམས་འདིའི་དོན་ཚན་ཁག་དང་འགལ་མིན་རྩོད་གླེང་བྱུང་ཚེ་ཆེས་མཐོའི་ཁྲིམས་ཞིབ་ཁང་ནས་ཐག་གཅོད་བྱ་རྒྱུ།” འདི་ནི་བཅའ་ཁྲིམས་སུ་གསལ་བའི་བཅའ་ཁྲིམས་ཀྱི་ཚད་འཛིན་ས་དེ་

རེད། འདིས་ཚད་བཏབས་ན། ཡིག་ཆ་ཨང་ ༣༩ པ་དེ་རྩ་འཛིན་མེད་པ་ཆགས་ཡོད།

“ད་ནས་བཟུང་སྟེ་སྤྱི་འཐུས་རྒྱུན་ལས་ནས་ཀྱང་བོད་མི་མང་སྤྱི་འཐུས་ལྷན་ཚོགས་ཀྱིས་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་བཞིན་གཏན་འབེབབས་གནང་བའི་གྲོས་ཆོད་ཡིག་ཆ་ཨང་ ༣༩ པའི་དགོངས་དོན་མཇུག་སྐྱོང་བྱ་ཐབས་གང་ཡང་མི་འདུག” འདི་ནི་ཟླ་ ༥ ཚེས་ ༢༥ ཉིན་སྐབས་བཅུ་དྲུག་པའི་སྤྱི་འཐུས་རྒྱུན་ལས་ཀྱིས་སྤེལ་བའི་གསལ་བསྒྲགས་ཀྱི་ཚིག་རེད། འདིའི་དོན་ནི། ཉིན་དེ་ནས་སྤྱི་འཐུས་རྒྱུན་ལས་ཀྱི་ངོས་ནས་གྲོས་ཆོད་ཡིག་ཆ་ཨང་ ༣༩ པ་དེ་བདག་མེད་དུ་གཡུགས་ཚར་བ་རེད།

འོ་ན་ད་ལྟ་ག་རེ་བྱས་ནས་ཕྱོགས་ཁག་གཉིས་སུ་གྱེས་པ་རེད་དམ། དེ་ནི་གཞན་གང་ཡང་མ་རེད། བཙན་བྱོལ་བོད་མིའི་སྒྲིག་འཛུགས་འདི་གཏོར་ཐབས་ཁོ་ནར་འབད་པའི་ངན་བྱུས་ལམ་དུ་ལྷོང་ཐབས་ལ་བརྩོན་གྱི་ཡོད་པ་དེ་རེད། ཡིན་ནའང་། དེ་ལ་བཅའ་ཁྲིམས་སྲུང་སྐྱོབ་ཟེར་བའི་ཕྱི་ཤུན་སྙིང་རྗེ་བོ་ཞིག་གཡོགས་ནས་གཏོར་གི་ཡོད། མ་གཞི་བྱས་ན། གྲོས་ཆོད་ཡིག་ཆ་ཨང་ ༣༩ པ་དེ་བཅའ་ཁྲིམས་དང་འགལ་བའི་ཆ་ནས་ནུས་མེད་ཆགས་ཚར་བ་དང་། སྤྱི་འཐུས་རྒྱུན་ལས་ཀྱི་ངོས་ནས་བདག་མེད་དུ་གཡུགས་པའི་གསལ་བསྒྲགས་སྤེལ་ཚར་བ། གྲོས་ཆོད་དེ་འཇོག་མཁན་སྐབས་བཅུ་དྲུག་པའི་སྤྱི་འཐུས་གྲངས་ཉེར་གཅིག་གིས་སྤོབས་པ་ཆེན་པོས་ནོར་འཁྲུལ་ངོས་ལེན་དང་དགོངས་སེལ་དང་བཅས་ཏེ་ཁྲིམས་ཞིབ་པ་རྣམས་ལས་གནས་སུ་ཕེབས་གནང་ཡོང་བའི་རེ་སྐུལ་ཞུས་པ་བཅས་ཀྱི་ཆ་ནས་གྲོིས་ཆོད་ཡིག་ཆ་ཨང་ ༣༩ པ་དེ་ད་ཆ་གླེང་རིན་མེད་པ་ཆགས་ཚར་བ་རེད། དེས་ན། ཕྱི་ལོ་ ༢༠༢༡ ཟླ་ ༣ ཚེས་ ༢༥ ཉིན་བཞག་པའི་གྲོས་ཆོད་དེ་ ༢༠༢༡ ཟླ་ ༥ ཚེས་ ༢༤ ཉིན་སྐབས་བཅུ་དྲུག་པའི་སྤྱི་འཐུས་རྒྱུན་ལས་ཀྱིས་དུར་ཁྲོད་དུ་བསྐྱེལ་ཚར་ཡོད།

གནས་སྟངས་འདི་འདྲ་རེད། ད་ཆ་ང་ཚོས་ཁྲིམས་མཐུན་དང་ཁྲིམས་འགལ་ཟེར་ནས་ཇི་ལྟར་གླེང་ཡང་། དེ་ནི་གྲོས་ཆོད་ཡིག་ཆ་ཨང་ ༣༩ པ་མ་བཞག་སྔོན་གྱི་བཅའ་ཁྲིམས་ཀྱི་འབྲུ་དོན་ལ་རྩ་འཛིན་བྱེད་དགོས། དེར་བརྟེན། དུར་ཁྲོད་དུ་སྐྱེལ་ཚར་བའི་ཡིག་ཆ་ཨང་ ༣༩ པ་དང་། དེའི་རྗེས་ལ་རིམ་བསྟུད་དུ་ཁྲིམས་འགལ་གྱི་གོམ་པ་སྤོས་པ་དཔེར་ན། སྲིད་སྐྱོང་དང་ཚོགས་གཞོིན་གྱིས་འདེམས་སྒྲུག་ཚོགས་ཆུང་བསྐོས་པ་དང་། རྒྱུས་ལས་ཀྱིས་ཁྲིམས་དོན་ཆ་རྐྱེན་ལ་ལྟོིས་མེད་ཀྱིས་གྲོས་ཚོགས་འཕར་མ་ཚོགས་རྒྱུ་བྱས་པ། རྒྱུན་ལས་ནས་ཚོགས་གཞོན་སྲིད་སྐྱོང་གསར་པའི་དམ་འབུལ་མཛད་སྒོར་ཞུགས་མ་བཅུག་པ། བཀའ་དྲུང་དང་བཅས་པར་སྡིགས་ར་སྐུལ་ནས་སྐུ་པར་གྱི་མདུན་ནས་དམ་འབུལ་མཛད་རིམ་བཟོ་བཅུག་པ་སོགས་ཚང་མ་ཁྲིམས་འགལ་ཆགས་ཡོད། རྒྱ་ཆེའི་མང་ཚོགས་ཀྱི་ངོས་འཛིན་ལ་ཁྲིམས་འགལ་གྱིས་དམ་འབུལ་བྱས་པ་དེ་དག་ད་དུང་ཡང་འདམས་ཐོན་སྤྱི་འཐུས་སུ་ངོས་འཛིན་གྱི་ཡོད། རྒྱ་ཆེའི་མང་ཚོགས་ཀྱིས་ཁོང་ཚོས་ཁྲིམས་མཐུན་གྱི་དམ་བཅའ་ཕུལ་ནས་སྤྱི་འཐུས་ཆགས་པར་རེ་སྒུག་བྱེད་ཀྱིན་ཡོད།
སྐུ་པར་གྱི་མདུན་ནས་དམ་འབུལ་བྱས་པ་ཡིན་ཟེར་ནས་ག་ཚད་ལབ་ཀྱང་། མང་ཚོགས་ཀྱི་རེ་འདུན་དང་མཐུན་གྱི་ཡོད་ཟེར་ནས་ག་ཚད་བསྒྲགས་ཀྱང་། དམ་ཆོས་འདུལ་བ་དང་མཐུན་རབས་ལབ་ནས་ག་ཚད་འགྲེལ་ཀྱང་། དེ་ཚང་མ་བཅའ་ཁྲིམས་དང་འགལ་བའི་བྱ་སྤྱོད་རེད། སྒྲིག་འཛུགས་གཏོར་བཞིག་གི་བྱ་སྤྱོད་རེད། བཅའ་ཁྲིམས་དང་འགལ་བའི་ཆ་ནས་དཀར་པོ་ཆགས་ཐབས་རྩ་བ་ནས་མེད་པ་རེད། བཅའ་ཁྲིམས་རིན་པོ་ཆེར་དངོས་ཤུགས་ཟུར་ངོས་གང་ནས་བལྟས་ཀྱང་འགལ་བ་ཆགས་ཀྱི་ཡོད་བཞིན་དུ། ད་དུང་བཅའ་ཁྲིམས་སྲུང་སྐྱོབ་བྱེད་ཀྱི་ཡོད་ཟེར་མཁན་འདམས་ཐོན་སྤྱི་འཐུས་སྐོར་ཞིག་གིས་བཅའ་ཁྲིམས་ཁ་ལ་འཁྱེར་ནས་སྒྲིག་འཛུགས་གཏོར་བཤིག་གི་བྱ་སྤྱོད་སྤེལ་གཞིན་པར་ངོ་རྒོལ་ཡོད། མང་ཚོགས་ནང་འཁྲུག་ཆ་ཐེབས་ཆེད་དུ་རྫུན་དང་ཧམ་པ་ཉི་ཚེ་བ་སྤེལ་བཞིན་པར་ངོ་རྒོལ་ཡོད།