༄༅།།རྒྱལ་རོང་བོད་རིགས་ཀྱི་གྱང་བྲིས་རི་མོ་མཚར་པོ།
རྩོམ་པ་པོ། ་་་་་་་་་་་
མདོ་སྨད་རྒྱུད་ཀྱི་ཆུ་ཆེན་དང་བཙན་ལྷ་དང་རྨིན་ཅང་གཙང་པོའི་རྒྱུད་དུ་ཕེབས་མྱོང་བའི་མི་རྣམས་ལ་མཐོ་སྒང་གི་ས་ཆ་འདིར་འབྱོར་འཕྲལ་རང་ཉིད་ངོ་མཚར་དཔོག་དཀའ་བའི་འཇིག་རྟེན་ཁྱད་པར་ཅན་ཞིག་ཏུ་སླེབས་པའི་སྣང་བ་དབང་མེད་དུ་སྐྱེ་སྲིད་དེ། དལ་འགྲོའི་ཆུ་རྒྱུན་ནི་དཀར་གཙང་མཇལ་དར་རི་ཡི་ཕྲེང་བའི་གསེབ་ཏུ་དཔྱངས་པ་ལྟར་དུ་མཆིས་པ་དང༌། ཆུ་ཤེལ་དཔལ་ལས་གྲུབ་པའི་གངས་རི་བརྗིད་ཆགས་ངོ་མཚར་ཆེ་བ། ཚོན་མདངས་སྣ་ལྔའི་དར་ལྕོག་རླུང་བུའི་ཁྲོད་དུ་ལྷབ་ལྷུབ་ཏུ་གཡོ་བ། གྲོང་སྡེ་དང་རི་ཤོའི་འཕྲང་དུ་འགྱིང་ངེར་བཞེངས་པའི་མཁར་ཁང་དང་དེ་ཡི་གྱང་ངོས་སུ་གསལ་བའི་རི་མོ་བཅས་པ་འདྲེན་བྱེད་དབང་པོའི་ལམ་དུ་ཤར་དུས་ཁྱེད་ཀྱི་ཐུགས་ལ་འཆར་སྣང་སྣ་ཚོགས་འཁོར་ངེས་རེད།
རི་མོ་ནི་བོད་ཀྱི་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པ་དང༌། རྒྱལ་རོང་གི་མཁར་ཁང་གྲོང་ཚོའི་གྱང་ངོས་ཀྱི་རི་མོ་ལ་རང་གི་ཁྱད་ཆོས་ཐུན་མོང་མ་ཡིན་པ་ལྡན་པ་ཡིན།
རྒྱལ་རོང་བ་རི་བོའི་གསེང་དུ་གནས་བཅའ་བ་དང༌། དགུན་གྲང་ངར་དང་དབྱར་ཚ་གདུག གཅན་གཟན་གདུག་པ་ཅན་གྱི་གནོད་པ་བཅས་འགོག་ཐུབ་ཕྱིར་མི་རབས་ནས་མི་རབས་རྡོ་ཡིས་བརྩིགས་པའི་མཁར་ཁང་བཙན་པོའི་ནང་འཚོ་བ་སྐྱེལ་གྱི་ཡོད། མཁར་ཁང་ནི་རྒྱུ་རྡོ་དང་ཤིང་ལས་གྲུབ་པ་དང༌། སྐས་དབྱིབས་ཐོག་ཁེབས་སྙོམས་པ་ཡིན་ཞིང༌། མཐོ་བར་ཐོག་བརྩེགས་བཅུ་གྲངས་དང་དམའ་བར་ཡང་ཐོག་བརྩེགས་ལྔ་དྲུག་ཡོད། མཁར་ཁང་གི་ཐོག་རྩེར་དར་ཤིང་བཙུགས་ཡོད་ལ་བསངས་བུམ་བཞེངས་ཡོད་པ་དང༌། སྒོ་ལ་སྒོ་ཡོལ་དང་མདའ་གཡབ་ལ་བྱ་གཡབ། སྒེའུ་ཁུང་ལ་ཁྲ་ཡོལ་བརྒྱན་ཞིང༌། སྒོ་ཕིབས་དང་ཁྲ་མ། ཐོག་ཁའི་ཟུར་བཞི་བཅས་ལ་རྡོ་དཀར་གོང་བཞག་འདུག་ལ། མཁར་ཁང་གི་གྱང་ངོས་བཞི་པོར་དཀར་རག་བྱུགས་ཐོག་སྒེའུ་ཁུང་གི་མཐའ་བཞིར་དཀར་རྩི་བཏང་ཞིང་གྱང་ངོས་སུ་རི་མོ་མཛེས་པོ་བྲིས་འདུག གྱང་གི་རི་མོ་དེ་རིགས་གང་བྱུང་རང་འདོད་དུ་བཀོད་པ་མ་ཡིན་པར་དམིགས་བསལ་གྱི་དོན་སྙིང་དང་ནུས་པ་ལྡན་པ་དང༌། དེ་ལ་རྒྱལ་རོང་བའི་ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་དུ་གྲུབ་པའི་རིན་ཐང་གི་ལྟ་བ་དང་མཛེས་དཔྱོད་ཀྱི་ལྟ་བ་མངའ་ཞིང༌། ཁྱིམ་གྱི་བདག་པོའི་འདོད་འདུན་དང་དོན་དུ་གཉེར་བྱ་མཚོན་ལ། རྒྱལ་རོང་བོད་རིགས་ཀྱི་རིག་གནས་ཀྱི་ཁྱད་ཆོས་ཀྱང་མངོན་པར་གསལ་གྱི་འདུག
འབྲི་རིགས་སྣ་ལྔའི་ལོ་ལེགས་དང་དཀར་ཆུ་བཟང་བའི་སྨོན་བཟང་འདེབས་པ། མཁར་ཁང་གི་གྱང་དུ་བཀོད་པའི་རི་མོར་ཆོས་ལུགས་ཀྱི་ཉམས་འགྱུར་ཟབ་པ་སྟེ། དཔེར་ན་དཔལ་བེའུ་དང་རྒྱལ་མཚན་སོགས་པའི་བོད་བརྒྱུད་ནང་བསྟན་གྱི་བཀྲ་ཤིས་རྟགས་བརྒྱད་ནི་བོད་མི་རིགས་ཀུན་གྱིས་བཀུར་བའི་བཀྲ་ཤིས་བདེ་ལེགས་དང་བསོད་ནམས་ཕུན་སུམ་ཚོགས་པའི་མཚན་རྟགས་ཡིན་པ་དང༌། གསང་སྔགས་ཀྱི་རྡོ་རྗེ་ནི་མཐུ་ནུས་ཁྱད་པར་ལྡན་པའི་མཆོད་ཆས་ཤིག་ཡིན་ཞིང༌། མི་འགྱུར་རྟག་བརྟན་དང་རྣོ་ཞིང་ངར་བ། ཐམས་ཅད་འཇོམས་ནུས་པའི་དོན་ལྡན་པས་ལྷ་སྲིན་གདོན་བགེགས་ཐམས་ཅད་རྡོ་རྗེ་མཐོང་བ་ཙམ་གྱིས་བླ་ཆད་སྟབས། ཁང་བདག་གིས་རྡོ་རྗེའི་རི་མོ་བཀོད་ནས་རང་གི་ཁང་ཁྱིམ་དེ་རྡོ་རྗེ་ལྟར་བཙན་ཞིང་བརྟན་པ་དང༌། གནོད་འཚེ་བར་བགེགས་ཐམས་ཅད་འགོག་ནུས་པའི་རེ་འདུན་མཚོན་པ་ཡིན། རི་མོ་“图”ནི་བོད་བརྒྱུད་ནང་བསྟན་གྱི་ཆེས་འཐུས་ཚབ་རང་བཞིན་ལྡན་པའི་རྟགས་ཤིག་ཡིན་པ་དང༌། དེ་ཡིས་ཉི་མ་དང་མེ་འབར་མཚོན་ཞིང༌། ངག་རྒྱུན་དུ་རྒྱལ་བ་ཤཱཀྱ་མུ་ནེའི་མཚན་དཔེ་བཟང་པོའི་ཡ་གྱལ་ཡིན་པར་གྲགས། བོན་ལའང་རྟགས་འདི་འདྲ་བ་ཡོད་པ་ནི་ཁ་ཕྱོགས་ལོག་པ་ཡིན་པ་སྟེ་“图”ཡིས་རྟག་བརྟན་དང་རྫོགས་མཐའ་མེད་པ་མཚོན་པ་དང༌། དམངས་ཁྲོད་དུ་བཀྲ་ཤིས་དར་རྒྱས་ཕུན་སུམ་ཚོགས་པོ་མཚོན་པ་ཡིན། མཁར་ཁང་གང་ཞིག་གི་གྱང་ངོས་སུ་རི་མོ་འདི་བཀོད་ཡོད་ན་ཁྱིམ་དུད་འདི་བོན་པོ་ཡིན་པ་གླེང་མེད་རེད། ལོ་རྒྱུས་ཐོག་རྒྱལ་རོང་རྒྱུད་དུ་སྔར་བོན་དར་ཆེ་བར་གྲགས།
མཁར་ཁང་གི་གྱང་ངོས་སུ་བཀོད་པའི་རི་མོ་དེ་དག་རྒྱུད་མཚོན་རི་མོ་དང་འབྲེལ་བ་ཡོད་དེ། གྱང་གི་མཐའ་བཞི་དང་སྒོ་སྒེའུ་ཁུང་གི་མཐའ་བཞིར་བྱུགས་པའི་དཀར་རིས་ལ་ཞིབ་པར་བལྟས་ན་དབྱིབས་འགྱུར་བའི་གཡག་མགོ་ཤིན་ཏུ་འདྲ། རི་མོ་རེ་འགའ་ཁང་པ་བརྩིགས་དུས་ནས་གྱང་ངོས་སུ་ཕྲ་ཚོམ་ལྟ་བུར་བཏབ་པའང་ཡོད། རྒྱལ་རོང་བོད་རིགས་ཀྱི་མེས་པོ་ནི་འབྲི་གཡག་ཚོ་པའི་རྒྱུད་པ་ཡིན་པ་དང༌། ཁོང་ཚོ་ཁ་མདོག་དཀར་པོར་དད་ཞེན་ཆེ་བས། གཡག་དཀར་རྟ་དཀར་དང༌། རྡོ་དཀར་གོང༌། དུང་དཀར་གཡས་འཁྱིལ། མཆོད་རྟེན་དཀར་པོ་སོགས་ཚང་མ་བཀྲ་ཤིས་རྫས་བཟང་དུ་བརྩིས་ནས་དད་གུས་བྱེད་ཀྱི་ཡོད། རྒྱལ་རོང་བས་གྱང་ངོས་སུ་བཀོད་པའི་རི་མོས་གཡང་བཀུག་ཐུབ་པ་དང༌། གདོན་བགེགས་བསྐྲོད་ནུས་ཤིང༌། བསོད་ནམས་འཕེལ་ལ་སེམས་ཅན་ལ་སྐྱབས་དང་མགོན་བྱེད་ཐུབ་པར་འདོད། མཚར་མདངས་བཀྲ་བའི་རི་མོ་དེ་དག་གིས་ཁོང་ཚོའི་འཚོ་བ་ལ་མཛེས་རྒྱན་སྤྲས་པས་མཁར་ཁང་དེ་དག་མཚར་དུ་དངར་བའི་སྒྱུ་རྩལ་ཁང་ལྟ་བུ་ཆགས་འདུག
མཁར་ཁང་གྱང་ངོས་ཀྱི་རི་མོའི་ནང་དོན་ཕུན་སུམ་ཤིན་ཏུ་ཚོགས་པ་ཡིས་རྒྱལ་རོང་བོད་རིགས་རིག་གནས་ཀྱི་ཉམས་བཟང་ལེགས་པར་མངོན་ནུས། དེ་ཉིད་བོད་ཀྱི་རིག་གནས་ཀྱི་ཆ་ཤས་ཤིག་ཡིན་པའི་ཐོག་ནས་སྙིང་བཅུད་བསྡུ་ལེན་དང་ཡོངས་སུ་རྫོགས་པར་འགྱུར་བཞིན་མཆིས། བོད་རིགས་ཀྱིས་ནང་སེམས་པའི་གོ་རྟོགས་ལ་མཐོང་ཆེན་པོ་བྱེད་ལ། ཐོས་བསམ་སྒོམ་སྒྲུབ་ལ་བརྟེན་ནས་འཁོར་བའི་སྡུག་བསྔལ་ལས་གྲོལ་ཏེ་བདེ་ཞིང་སྤྲོ་བའི་ཞི་གནས་ཀྱི་སར་སླེབས་ཐུབ་པར་བརྩོན་གྱིན་ཡོད། ད་ཆ་དུས་རབས་ཀྱི་འགྱུར་བ་དང་ཕྱི་ཕྱོགས་དང་འབྲེལ་གཏུག་སྤེལ་རེས་ཉིན་བཞིན་མང་དུ་འགྲོ་བ་དང་བསྟུན་ནས་ཁོང་ཚོའི་འཚོ་བར་ཡང་འགྱུར་བ་འགྲོ་བཞིན་མཆིས། ཁོང་ཚོའི་དད་མོས་དང༌། གོམས་སྲོལ། བྲོ་གར་སྒྱུ་རྩལ། ཟས་གོས་སྡོད་གསུམ་ལ་སོགས་པའི་རིག་གནས་ཀྱི་ཆ་ཤས་ཚང་མ་ཡང་མི་རིགས་གཞན་དང་ས་ཁུལ་གཞན་གྱི་རིག་གནས་དང་མཉམ་དུ་འདྲེས་བཞིན་ཡོད་ལ། དེ་དག་གི་ཤུགས་རྐྱེན་ཐེབས་ཏེ་འགྱུར་བའང་རིམ་བཞིན་འབྱུང་བཞིན་ཡོད་པས་མཁར་ཁང་གྱང་ངོས་ཀྱི་རི་མོར་ཡང་ནང་དོན་གསར་པ་ཁ་སྣོན་བྱས་ཡོད། དཔེར་ན་སྐར་ལྔ་དང༌། རྒྱ་ཡིག་“福”དང་“富”སོགས་པའང་བཀྲ་ཤིས་རི་མོར་བརྩིས་ནས་གྱང་ངོས་སུ་བཀོད་ཡོད་པ་ལས་ཁོང་ཚོ་བདེ་སྐྱིད་ཕུན་སུམ་ཚོགས་ལ། རྒྱུ་ནོར་ལོངས་སྤྱོད་རྒྱས་པའི་འཚོ་བར་རོལ་འདོད་པ་མངོན་པ་དང༌། ཁང་བདག་སེམས་རྒྱུད་བཟང་ལ་ཞི་བདེ་སྤྲོ་སྐྱིད་ལ་དགའ་བའི་བློ་ཁ་ཡང་མཚོན་གྱི་འདུག
ལོ་ལྟར་སྟོན་མཇུག་བསྒྲིལ་ནས་དགུན་ཁ་ཤར་ལ་ཁད་པ་དེར་མཁར་ཁང་ལ་དཀར་རག་གསོལ་བའི་དུས་ཚིགས་ཡིན་པ་དང༌། སྐབས་དེར་དུད་ཁྱིམ་ཚང་མས་དགེ་འདུན་པ་གདན་འདྲེན་ཞུས་ནས་ས་དཔྱད་པྲ་ཕབ་བྱེད་པ་དང༌། དགེ་འདུན་པས་ཀྱང་ཚུལ་ལ་གཞིགས་ནས་འབྲི་དགོས་པའི་རི་མོ་གསལ་འགྲེལ་གནང་གི་ཡོད། ཁང་བདག་གིས་ལྷ་བསངས་མཐོན་པོའི་མཆོད་སྤྲིན་བཤམས་ནས་སྨོན་བཟང་འདེབས་པ་དང༌། དར་ལྕོག་བཙུགས་རྗེས་གྱང་ངོས་སུ་བཀྲ་ཤིས་རི་མོ་འགོད་ཀྱི་ཡོད། སྐབས་དེར་རི་གྲོང་ཚང་མ་གོས་དཀར་གསར་རྐྱང་བཀླུབས་ནས་བཀྲ་ཤིས་དཔལ་བཟང་གི་རེ་བས་ཁེངས་ཀྱི་ཡོད།