མཁོ་སྤྲོད་པ། ཁ་བ་སྐམ་པོ།
ཉེ་ཆར་མདོ་སྨད་རྭ་རྒྱ་བཀྲ་ཤིས་
རྒྱལ་འཇོག་ཤོ་རྒྱག་གི་བྱ་བ་ངན་པ་འགོག་ཐབས་ཀྱི་གྲོས་གཞི་འགའ།
གཅིག རྭ་རྒྱ་གྲོང་རྡལ་སྲིད་གཞུང་གི་རྒྱབ་སྐྱོར་དང་། རྨ་ཉིན་སྲིབ་ཀྱི་སྡེ་བ་སོ་སོའི་ཏང་གཙོ་དང་སྡེ་དཔོན། རྩ་འཛུགས་བྱས་པའི་ཚོགས་པ་སོ་སོ་བཅས་ནས་སྣེ་ཁྲིད་འོག་རྭ་རྒྱ་གྲོང་རྡལ་ས་གནས་དང་། རྨ་བྱང་ཡུལ་ཚོ། ཞོལ་མ་ཡུལ་ཚོ། རྟ་བོ་དང་སྡོམ་ཁོག་ཡུལ་ཚོ་བཅས་ཀྱི་ས་གནས་གཙོ་བའི་རང་རེའི་དགོན་པའི་ལྷ་འབངས་ཀྱི་ས་གནས་གང་སར་གནས་ཡོད་པའི་རྒྱལ་འཇོག་ཤོ་རྒྱག་གི་གཙོ་བའི་ཚབ་ཆེའི་བྱ་བ་ངན་པ་བཀག་འགོག་བྱེད་རྒྱུའི་བྱ་འགུལ་སྤེལ་རྒྱུའི་ཐད་ལ་རྭ་རྒྱ་དགོན་པའི་བླ་མ་རྣམ་པ་དང་། དབུ་ཆོས་སོགས་ལས་སྣེ་ཡོངས་གཙོ་བའི་གྲྭ་ཚང་ཡོངས་ནས་རྒྱབ་སྐྱོར་དང་ཤུགས་སྣོན་རོགས་རམ་མཉམ་ཞུགས་བཅས་བྱེད་རྒྱུ་ཡིན།
གཉིས། དེང་སྐབས་དཔལ་འབྱོར་ཅུང་ཙམ་ཡར་རྒྱས་སུ་སོང་བ་དང་བསྟུན། བསམ་བློའི་ཤེས་ཡོན་ཧ་ཅང་དམའ་བའི་རོང་འབྲོག་མང་ཚོགས་ཚོས་དཔལ་འབྱོར་བེད་སྤྱོད་བྱེད་སྟངས་ནོར་ཏེ། རྒྱལ་འཇོག་ཤོ་རྒྱག་གི་ཕྱོགས་ཁོ་ན་ལ་མགོ་འཁོར་ནས་རང་གཞན་གཉིས་ཕུང་གི་གནས་སུ་གྱུར་ཏེ། མི་རིགས་དང་ས་གནས། རུ་སྡེ་དང་། ཕ་མ་དང་ཕུ་ནུ། ཁྱིམ་ཚང་སོགས་ལ་གནོད་པ་ཚབ་ཆེན་བཟོ་བཞིན་ཡོད་པ་མ་ཟད། ཐ་ན་རང་གི་རྐང་ལག་གཅོད་པ་དང་། རང་སྲོག་གཅོད་པ། ཕ་གསོད་པ་སོགས་ཀྱི་གནས་ཚུལ་ཡ་ང་བ་ང་ཚོའི་ས་གནས་སུ་བྱུང་དང་འབྱུང་བཞིན་པ་དང་། ད་དུང་དུ་ནག་འཐེན་པ། རྒྱལ་འཇོག་ཤོ་རྒྱག་བྱེད་མཁན་ཚོ་ལ་སྒོར་མོ་གཡར་ནས་དངུལ་བུན་ལེན་པ་སོགས་མ་རབས་ཀྱི་བྱ་སྤྱོད་ངན་པ་ལོ་རེ་ནས་ཚབ་ཇེ་ཆེར་འགྲོ་བཞིན་པ་འདི་ལ་དམིགས་ནས་རང་རེའི་བླ་གྲྭ་ཡོངས་ཀྱིས་རེ་སྐུལ་དང་། བྱ་འགུལ་འདིར་མཉམ་ཞུགས་བྱས་པ་ཡིན། རང་རེའི་ལྷ་འབངས་དད་ལྡན་ཡོངས་ཀྱིས་འདི་ཕྱི་གཏན་བརླག་ཏུ་འགྲོ་བའི་བྱ་སྤྱོད་ངན་པའི་རིགས་མི་བྱེད་པར་ཡ་རབས་སྤྱོད་བཟང་གི་ལས་ལ་ཞུགས་ཏེ། རང་གཞན་གཉིས་ཕན་དང་། འདི་ཕྱི་གཉིས་སྐྱིད། མི་ཚེ་དོན་ལྡན་ཞིག་འོང་བའི་ཐབས་ལ་ཅི་ནུས་ཀྱང་འབད་འཚལ་ཞེས་འབོད་སྐུལ་ཞུ་རྒྱུ་ཡིན།
གསུམ། བོད་ཡུལ་སྤྱི་དང་ལྷག་པར་ང་ཚོའི་ས་གནས་འདིའི་དཔལ་འབྱོར་འཕེལ་རྒྱས་དང་། རིག་གནས་དར་རྒྱས། སྤྱི་ཚོགས་ཡར་ཐོན། བརྟན་འཇགས་འཆམ་མཐུན། མིའི་ཀུན་སྤྱོད་དང་བསམ་བློ་ཡར་རྒྱས་བཅས་འབྱུང་དགོས་ན། སློབ་སྦྱོང་ལ་དཀའ་སྤྱད་སྡུག་རུས་དང་། ལས་ཀར་ཧུར་ཐག་འབད་བརྩོན་གཙོ་བོར་བཟུང་སྟེ། རང་གི་བུ་ཕྲུག་གི་སློབ་སྦྱོང་ལ་ཤུགས་སྣོན་དང་། ཁྱིམ་ཚང་འཆམ་མཐུན། དཔལ་འབྱོར་འཕེལ་རྒྱས་སོགས་ལ་འབད་བརྩོན་བྱེད་དགོས་བ་དང་། རུ་སྐོར་དང་། རུ་སྡེ་ནས་མགོ་བརྩམས་ཏེ་བོད་མི་རིགས་གཙོ་བའི་སྤྱི་ཚོགས་འཆམ་མཐུན་ལ་རང་གིས་ནུས་ཚོད་ཀྱི་ཤུགས་སྣོན་དགོས།
བཞི། ཕ་མ་གཉིས་ཀ་རྒྱལ་འཇོག་ཤོ་རྩེད་ལ་གཡེང་ནས་ཕྲུ་གུ་ཁྱིས་ཟོས་པ་མ་ཚོར་བ་དང་། རླངས་འཁོར་གྱིས་བསད་པ། བོར་བརླག་ཏུ་སོང་བ། ཙག་གིས་བྱིད་པ། ལྟོག་ཤི་ཐེབ་པ་སོགས་གནས་ཚུལ་ཐབས་རྡུག་མང་པོ་བྱུང་དང་འབྱུང་བཞིན་ཡོད་ལ། སྒོའི་ཕྱུགས་ཟོག་ཚར་བ་དང་། ནང་གི་ཁྱིམ་གཞི་སྟོངས་པ་དང་། བཟའ་འཐོར་བྱུང་བ། བུ་ཕྲུག་དྭ་ཕྲུག་ཏུ་ལུས་པ་སོགས་ཀྱི་གནས་ཚུལ་གང་སར་ཁྱབ་བཞིན་ཡོད། འདི་ནི་མ་རབས་ཀྱི་བྱ་སྤྱོད་དེ་དག་གི་ནང་མགོ་འཁོར་ནས་བསྡད་པའི་མཇུག་འབྲས་རེད། ང་ཚོ་སློབ་སྦྱོང་གི་གོ་སྐབས་མ་ཐོབ་པའི་ཞིང་འབྲོག་མང་ཚོགས་ཚོའི་ཤེས་ཡོན་ཡོད་པ་དང་ཡ་རབས་སྤྱོད་བཟང་གི་བུ་རྒྱུད་སྐྱེད་སྲིང་བྱེད་རྒྱུ་དེ་གཙོ་བོ་ཡིན་ལ། དེ་ལྟ་བུའི་བུ་རྒྱུད་ཅིག་སྐྱེད་སྲིང་བྱས་ན་རང་ཉིད་ཀྱི་མི་ཚེ་འདིའི་རེ་བ་དང་བདེ་སྐྱིད་ཡིན་ལ། ཕ་མའི་གཟི་བརྗིད་དང་བུ་ཕྲུག་གི་བདེ་སྐྱིད་ཉག་གཅིག་ཡིན་པར་མ་ཟད། མི་རིགས་དང་རྒྱལ་ཁབ་ལ་བཞག་པའི་བླ་མེད་ཀྱི་བྱས་རྗེས་སུ་བགྲངས་ཀྱང་མི་ཆོག་པ་མེད།
ལྔ། མང་ཚོགས་ཚོའི་རེ་བ་བཅོལ་སའི་སྲིད་གཞུང་གི་ལས་བྱེད་པ་དག་གིས་རྒྱལ་འཇོག་ཤོ་རྒྱག་གི་རྩེད་མོར་གཡེང་དྲགས་ན། བྱ་བའི་སྣེ་ཁྲིད་དེ་མང་ཚོགས་ཕྱུག་པོ་དང་ས་གནས་དར་རྒྱས་སུ་གཏོང་མི་ཐུབ་ཅིང་། དམངས་ཀྱི་འདོད་བློ་སྐོང་མི་ཐུབ་པ་དང་འཆམ་མཐུན་སྤྱི་ཚོགས་འཛུགས་སྐྲུན་བྱེད་མི་ཐུབ་པར་མ་ཟད། མི་རིགས་རང་སྐྱོང་ས་ཁུལ་གྱི་དགོས་མཁོ་དེ་བས་ཀྱང་སྐོང་མི་ཐུབ། ཡིག་རྨོང་ཙམ་སེལ་མེད་པའི་ཕ་མ་སྟོང་ཕྲག་མང་པོའི་རང་ཉིད་ཀྱི་བུ་ཕྲུག་དང་རེ་བ་བཅོལ་ས། གསར་སྐྱེས་བུ་ཕྲུག་མང་པོའི་མདུན་ལམ་མ་ནོར་བ་སྟོན་པའི་དགེ་རྒན་དག་གིས་ཀྱང་། རྒྱལ་འཇོག་ཤོ་རྒྱག་གི་རྩེད་འཇོར་རོལ་པའི་ནང་ནས་སློབ་མ་རྣམས་ལ་མ་འོངས་པའི་མདུན་ལམ་བཟང་པོ་ཞིག་སྟོན་རྒྱུ་དང་། མི་རིགས་དང་རྒྱལ་ཁབ་ལ་ཕན་པའི་ཡ་རབས་སྤྱོད་བཟང་གི་མི་བུ་ཞིག་སྐྱེད་སྲིང་བྱེད་རྒྱུ་ཕར་ཟད། ད་དུང་རང་ཉིད་དང་མཚུངས་པའི་རྒྱལ་འཇོག་ཤོ་རྒྱག་ལ་དགའ་ཞིང་། མི་རིགས་དང་རྒྱལ་ཁབ་ལ་མི་ཕན་པ། ཐ་ན་ཁྱིམ་ཚང་བཟང་པོ་ཞིག་ཀྱང་སྐྱོང་མི་ཐུབ་པའི་མ་རབས་སྤྱོད་ངན་གྱི་སློབ་མ་ཞིག་སྐྱེད་སྲིང་བྱེད་སྲིད། དེ་བས་ང་ཚོའི་མི་རིགས་དགེ་རྒན་ཚོའི་ངེས་པར་དུ་སྤྱོད་ངན་བསྒྱུར་བཅོས་དང་བྱ་བར་གཟབ་ནན་བྱེད་རྒྱུ་ནི་བོད་མི་ཡོད་དོ་ཅོག་གི་སེམས་ཁུངས་ཀྱི་རེ་བ་ཉག་གཅིག་ཡིན་པར་འདོད།
དྲུག རྒྱལ་འཇོག་ཤོ་རྒྱག་ཁོ་ན་མགོ་འཁོར་པའི་གྲྭ་བ་ནི་སྤྱི་ཚོགས་འདིར་དགོས་མཁོ་གང་ཡང་མེད་ལ། ད་དུང་སྐྱ་སེར་མང་པོ་མ་རབས་ཐ་ཤལ་གྱི་ལོོག་ལམ་དུ་འཁྲིད་མཁན་གྱི་གཏེ་བོ་ཞིག་དང་། སངས་རྒྱས་ཀྱི་བསྟན་པ་དང་རབ་བྱུང་བའི་སྡེའི་ཞབས་ལ་ཐིག་གུ་ནག་པོ་འདོག་མཁན་ཡིན། རང་ཉིད་ཀྱིས་བླ་མའི་མདུན་ནས་ཁས་བླངས་པའི་དམ་བཅའ་དང་། རྒྱབ་ཏུ་གོན་པའི་རབ་བྱུང་བའི་ན་བཟའི་དགོས་པ་དང་རིན་ཐང་ལ་བསམ་བློ་གང་ཡང་མི་གཏོང་བར་སྒོར་མོ་འགའི་དོན་དུ་རྨི་ལམ་སྐྱིད་པོ་རྨི་བཞིན་པ་འདིས། ཚེ་འདི་དང་ཕྱི་མ་གང་ལ་ཡང་མི་ཕན་པ་ཤེས་བཞིན་དུ་མེ་ལྕེབ་མེའི་ནང་དུ་ལྕེབས་པ་བཞིན་བྱ་སྤྱོད་ངན་པ་དེ་དག་གི་ནང་དུ་ཞུགས་དོན་མི་འདུག ༸འཛམ་གླིང་མཁས་མཆོག་གིས་ང་ཚོར་གདམས་པ་ནི། “ང་ཚོ་དུས་རབས་ཉེར་གཅིག་པའི་ཆོས་པ་རྣམ་དག་ཅིག་བྱེད་དགོས་”ཞེས་གསུངས་པའི་དོན་མདོར་བསྡུས་ནས་བཤད་ན་དུས་རབས་ཉེར་གཅིག་པའི་གྲྭ་བ་རྣམས་ཆོས་ཀྱི་དོན་ཤེས་ནས་ཉམས་སུ་ལེན་པའི་ཡ་རབས་སྤྱོད་བཟང་གི་ཆོས་པ་ཞིག་ཡིན་དགོས་པའི་དོན་མིན་ནམ།
བདུན། རྭ་རྒྱ་གྲོང་རྡལ་སྲིད་གཞུང་དང་། རྨ་བྱང་ཡུལ་ཚོ། ཞོལ་མ་ཡུལ་ཚོ་བཅས་ཀྱི་སྲིད་གཞུང་གི་སྣེ་ཁྲིད་དང་གོང་རིམ་སྲིད་གཞུང་གི་རྒྱབ་སྐྱོར་འོག་རྒྱལ་འཇོག་ཤོ་རྒྱག་གི་བྱ་ངན་ལ་རྒྱུན་དུ་ཞུགས་པའི་མི་དེ་ཚོར་ཁ་ཏ་སློབ་གསོ་གཏོང་བ་དང་། ནག་ཉེས་ཐེར་འདོན་བྱེད་པ། བྱ་བ་ངན་པ་དེས་ཁྱིམ་ཚང་ལ་བཟོས་པའི་ཤུགས་རྐྱེན་ངན་པ་དང་། བུ་ཕྲུག་ལ་བཟོས་པའི་ཤུགས་རྐྱེན། རང་གི་ཕ་མ་དང་། ཉེ་འབྲེལ། གྲོགས་པོ། དགོན་སྡེ། རུ་སྡེ་སོགས་ལ་བཟོས་པའི་ཤུགས་རྐྱེན། ད་དུང་མི་རིགས་དང་ཁོར་ཡུག་ལ་བཟོས་པའི་ཤུགས་རྐྱེན་ངན་པ་སོགས་ངོ་སྤྲོད་བྱེད་དགོས།
གལ་ཏེ་ཁ་ཏ་དང་སློབ་གསོ་ཇི་ལྟར་བྱས་ཀྱང་མི་ཉན་ན། གྲྭ་བ་ཡིན་ན་ཚོགས་གྲལ་ནས་འཕུད་རྒྱུ་དང་། གྲོང་བ་ཡིན་ན་དགོན་པ་དང་རང་ཉིད་བར་གྱི་ཆོས་འབྲེལ་གཅོད་རྒྱུ་མ་ཟད། བྱ་ངན་ལ་རྒྱུན་དུ་ཞུགས་པའི་མི་དེ་དག་ལ་ལེགས་ཉེས་གང་བྱུང་ཡང་རུ་སྡེ་དང་། ཉེ་འབྲེལ། གྲྭ་བ་སོགས་མི་སུ་ཡང་ཉམས་ཞུགས་མི་བྱེད་རྒྱུ་བྱེད་དགོས་པ་དང་། ད་དུང་སྲིད་འཛིན་ལས་ཁུངས་ཀྱིས་ལགས་ཐབས་སྤྱད་དེ་དྲག་རྩུབ་ཀྱིས་བཀག་སྡོམ་དང་རྩ་རྫོགས་བྱ་དགོས་པ། མི་མང་འདུ་ས་དང་གསར་འགྱུར་བརྒྱུད་ལམ་ཁག་ནས་བཀག་སྡོམ་བྱ་དགོས་པའི་དྲིལ་བསྒྲགས་རྒྱ་ཆེན་པོ་བྱས་ཏེ། མི་ཚང་མར་ཤེས་སུ་འཇུག་པ། ཉེས་པ་བཟོ་མཁན་ལ་དཔོན་གནས་དང་ལས་གནས་ལས་ཕབ་པ་དང་། ལས་གནས་བསྒྱུར་བཅོས་གཏོང་བ། སྒོར་མོའི་ཆད་པ་གཅོད་པ་སོགས་ཞི་དྲག་གི་ཐབས་ལམ་མང་པོ་སྤྱད་དེ་བཀག་འགོག་བྱེད་དགོས། ད་དུང་དུ་ནག་འཐེན་མཁན་དང་། རྒྱལ་འཇོག་ཤོ་རྒྱག་མཁན་ལ་སྒོར་མོ་གཡར་ནས་དངུལ་བུན་ལེན་མཁན། རྒྱལ་འཇོག་ས་དང་ཤོ་ཁང་ཕྱེ་བ། རྒྱལ་འཇོག་ཤོ་རྒྱག་སོགས་མ་རབས་ཀྱི་བྱ་སྤྱོད་སྤེལ་མཁན་ཚོ་འགེབས་བསྲུང་བྱེད་མི་རྣམས་ལ་གཅིག་མཚུངས་ཀྱི་ཆད་པ་གཅོད་རྒྱུ་དང་བཀག་འགོག་བྱེད་དགོས།
བརྒྱད། གོང་རིམ་ཁྲིམས་འཛིན་ལྟ་རྟོག་ལས་ཁུངས་ཀྱིས་ས་གནས་དངོས་སུ་ཞིབ་བཤེར་བྱེད་པའི་ཐབས་ཤེས་བསྒྱུར་ཏེ། ཇ་ཁང་དང་ཆང་ཁང་སོགས་སུ་རྟོག་ཞིབ་འཕྲུལ་ཆས་བཞག་ནས་དངོས་དཔང་ར་སྤྲོད་བྱེད་པ་དང་རྒྱལ་ལྐུགས་མཁན་ལ་བྲོས་བྱོལ་གྱི་གོ་སྐབས་སྟེར་མི་རུང་། རྒྱལ་འཇོག་ཤོ་རྒྱག་བྱེད་སའི་ཁང་བ་དང་ས་གནས་རྩད་གཅོད་ནན་མོ་བྱས་ཏེ་ཁང་བདག་སོགས་ལ་བཀག་སྡོམ་དང་ཆད་པ་ནན་མོ་གཅོད་དགོས།
དགུ། རྒྱལ་འཇོག་ཤོ་རྒྱག་གི་བྱ་བ་ངན་པ་བཀག་འགོག་གི་བྱ་འགུལ་འདི་ལ། རྭ་རྒྱ་གྲོང་རྡལ་སྲིད་གཞུང་གི་རྒྱབ་སྐྱོར་དང་ཚོགས་པ་སོ་སོའི་སྣེ་ཁྲིད་བྱས་ནས་སྤེལ་བཞིན་ཡོད་ལ། རྨ་བྱང་ཡུལ་ཚོ་དང་། ཞོལ་མ་ཡུལ་ཚོ། རྟ་བོ་དང་སྡོམ་ཁོག་ཡུལ་ཚོ་བཅས་ཀྱི་སྲིད་གཞུང་དག་ནས་ཀྱང་འདི་ལ་མཐའ་གཅིག་ཏུ་རྒྱབ་སྐྱོར་དང་རོགས་རམ་མཉམ་ཞུགས་བཅས་བྱེད་རོགས་ཞེས་འབོད་སྐུལ་ཞུས་པ་ཡིན། དགོན་པའི་བླ་མ་རྣམ་པ་དང་། ལས་སྣེ། མཁན་ཟུར། དགེ་བཤེས། སློབ་གསོ་བ་སོགས་ཀྱིས་རྒྱབ་སྐྱོར་དང་མཉམ་ཞུགས་བྱ་དགོས་ལ། རྨ་ཉིན་སྲིབ་ཀྱི་སྡེ་བ་སོ་སོའི་ཏང་གཙོ་དང་། སྡེ་དཔོན། ཚོ་དཔོན། ལས་འཁྱུར་ངལ་གསོ་བྱས་ཡོད་པའི་ལས་བྱེད་རྒན་པ། ལྷག་བསམ་དཀར་པའི་མི་སྣ་རྒན་པ་སོགས་ཀྱིས་མཐའ་གཅིག་ཏུ་རོགས་རམ་དང་རྒྱབ་སྐྱོར་མཉམ་ཞུགས་བཅས་བྱེད་དགོས།
བཅུ། ཡིག་ཆ་འདི་ནི་ས་གནས་འདིར་རྒྱལ་འཇོག་ཤོ་རྒྱག་གི་བྱ་ངན་བཀག་འགོག་བྱེད་པའི་བ་འགུལ་སྤེལ་སྐབས་སུ་རྭ་རྒྱ་དགོན་སྤྱི་ནས་འགྲེམ་སྤེལ་བྱས་པ་ཡིན།
༢༠༡༣ལོའི་ཟླ་༣ཚེས༢༥ཉིན།
༄༅། །རང་རེའི་རྭ་རྒྱ་དགོན་དགའ་ལྡན་བཀྲ་ཤིས་འབྱུང་གནས་ཀྱི་དད་ལྡན་ལྷ་འབངས་རྣམས་ཀྱི་ནང་ནས་རྒྱལ་འཇོག་ཤོ་རྒྱག་གི་བྱ་བ་ངན་པ་མཚམས་འཇོག་བྱས་ཏེ་ཡ་རབས་སྤྱོད་བཟང་གི་ལམ་ལ་ཞུགས་པའི་མི་བུ་བཟང་པོ།
ཕྱོགས་བཅུའི་བླ་མ་རྒྱལ་བ་སྲས་དང་བཅས་པ་དགེ་འདུན་གྱི་སྡེ་བསྟན་སྲུང་ཡི་ཤེས་པའི་ཚོགས་དང་བཅས་པ་དཔང་དུ་བཞག་སྟེ་རྒྱལ་འཇོག་ཤོ་རྒྱག་གི་བྱ་བ་ངན་པ་དེ་རིང་ནས་དོ་བདག་གིས་མཚམས་འཇོག་བྱས་བ་ཡིན།
དོ་བདག་གྱིས་རྒྱལ་འཇོག་ཤོ་རྒྱག་གི་བྱ་བ་ངན་པ་དེ་རིང་ནས་བཟུང་མཚམས་འཇོག་བྱས་པས། ཁྱོད་ཀྱི་ཕ་མ་ཉེ་འབྲེལ་དང་བཅས་པའི་ཁྱིམ་མི་ཡོངས་ཀྱི་བྱ་བ་མཐའ་དག་ཅི་བསམ་འགྲུབ་པའི་ཆེད་དུ། རང་རེའི་དགོན་པའི་བླ་མ་རྒྱལ་བ་སྲས་དང་བཅས་པ་དགེ་འདུན་གྱི་སྡེ་བསྟན་སྲུང་ཡི་ཤེས་པའི་ཚོགས་དང་བཅས་པའི་མདུན་དུ་སྐྱབས་འཇུག་དང་འཕྲིན་བཅོལ་ཡང་ནས་ཡང་དུ་ཞུ་རྒྱུ་ཡིན། དོ་བདག་གྱི་སྙིང་སྟོབས་དང་ཆོད་སེམས་ཡ་རབས་བཅས་ཀྱི་བྱ་སྤྱོད་ལ་རྗེས་སུ་ཡི་རངས་དང་བསྔགས་བརྗོད་བྱས་པ་ཡིན་ལ། རང་ཉིད་ཀྱི་ཤ་གསེང་ན་བོད་པའི་མི་བུ་ངོ་མ་ཞིག་གི་ཟུངས་ཁྲག་རྒྱུ་བཞིན་པ་དེ་མ་བརྗེད་པ་དང་སྐྱེས་པ་ཕོ་རབས་ཤིག་གི་རང་ཚུགས་མ་ཤོར་བ་བྱས་ཏེ། དེང་ཕྱིན་ཆད་བྱ་བ་ངན་པ་དེའི་རིགས་ཀྱི་ནང་དུ་མི་ཞུགས་རོགས་ཞེས་རང་རེའི་དགོན་པའི་བླ་མ་རྣམ་པ་དང་མཁན་སློབ་མཁས་མང་འདུས་སྡེ་ཡོངས་ནས་ལག་ཟུང་ཐལ་མོ་སྙིང་ཁར་སྦྱར་ཏེ་ཡང་བསྐྱར་རེ་སྐུལ་བྱས་པ་ཡིན།
རྭ་རྒྱ་དགའ་ལྡན་བཀྲ་ཤིས་འབྱོང་གནས་སུ་སྤྱི་ལོ༢༠༡༣ལོའི་ཟླ༤ཚེས་༡༣ཉིན
འདི་ལག་ལེན་དུ་བསྟར་ན་ལེགས་པོ་ཡིན་དང་ཡིན། དགའ་བསུ་ཡོད།
འདི་ནི་རྣམ་གཡེང་གྱི་སྒོ་ཆེན་པོ་ཡིན་ན། བྱ་ངན་འདི་རིགས་འགོག་པའ་རླབས་ཆེན་གྱི་གྲོས་བསྡུར་ལ་བསྔགས་བརྗོད་དང་ནན་ཏན་གནང་རོགས། གྲོས་ཚིག་ཙམ་དུ་མ་སོང་བར་ལག་ལེན་གདོང་ལེན་ངེས་གལ་ཆེ་བཅས།།
གཞན་ཕན་གྱི་བསམ་བློ་མེད་པའི་གྲོང་ཆོག་དང་ཤོ་རྒྱན་ཕལ་ཆེར་འདྲ། ང་ལ་ཉམས་མྱོང་ཡོད།
ཆོས་ཁྲིམས་དང་ཡུལ་ཁྲིམས་རང་སྣང་བ་དེ་འདྲའི་རིགས་ལ་དགག་པ་མཐའ་གཅིག་དུ་ཡོད།
གཞན་ཕན་གྱི་བསམ་བློ་མེད་པའི་གྲོང་ཆོག་དང་ཤོ་རྒྱག་སོགས་འདྲ་ཚུལ་གསུངས་པ་ནི། དེ་ལྟར་ན་གཞན་ཕན་གྱི་བསམ་བློ་མེད་པའི་ཀླུ་སྨྱོན་གྱི་རྩོམ་དང་ཤོ་རྒྱགས་པ་གཉིས་མི་མཚུངས་སམ།
གཞན་ཕན་གྱི་བསམ་བློ་མེད་ནས་གྲོང་ཆོག་བྱེད་པར་གལ་ཆེ་ཤོས་ནི་སྦྱིན་པའི་བདག་པོ་འམ་ཕ་རོལ་པོའི་རྒྱུད་ལ་ཡིད་ཆེས་དང་དད་པ་སོགས་ཡོད་ན་འབྲས་བུ་ནམ་ཡང་བསླུ་མི་ཐུབ། ཐམས་ཅད་ལ་གཞན་ཕན་ཟེར་བ་ནི་དེང་སང་དར་བའི་སྐད་ཆ་ཞིག་རེད། རྒྱ་ནག་ལ་ངོ་རྒོལ་ཁྲོམས་བསྐོར་བྱེད་དུས་ཀྱང་་་་་བྱང་ཆུབ་སེམས་མཆོག་རིན་པོ་ཆེ་འདོན་པ་ལྟ་བུ་རེད། ཐེག་དམན་པས་གཞན་དོན་གྱི་སྐད་ཆ་དེ་འདྲ་མེད། དེ་ཚོའང་སངས་རྒྱས་ཀྱིས་མཛད་པའི་འཕྲིན་ལས་ཀྱི་ཆ་ཤས་དང་སངས་རྒྱས་ཀྱི་བསྟན་པར་ངོས་འཛིན་བྱེད་དགོས། ཐེག་དམན་གྱི་ཆོས་རྣམས་ཤོ་རྒྱན་དང་མཚུངས་སམ།
མི་ཚང་མ་གྲ་པ་མིན་པས་འགོག་ཐབས་བྱེད་མི་དགོས་ལ་བྱེད་ཀྱང་ཐུབ་ཀྱི་མ་རེད་