རྒྱལ་དབང་ཀརྨ་པའི་རྟོགས་བརྗོད་ཞིང་མཆོག་ལེགས་ལམ།

འདབ་པ་ཚེ་དབང་མགོན་པོ།

 
བསྐལ་པ་གྲངས་མེད་ཕ་རོལ་སྔོན་ནས་ས་བཅུའི་སྤོ་ལ་མངོན་གཤེགས་ཀྱང་།།
སྙིང་རྗེའི་དབང་གིས་འགྲོ་ལ་བརྩེ་བས་སླར་ཡང་སྲིད་འདིར་བྱོན་ཚུལ་དེ།།
འདས་པའི་རྒྱལ་བ་ཇི་སྙེད་མཆིས་པ་དེ་སྙེད་དག་དང་ཁྱད་མེད་ལ།།
མཚན་དཔེ་སྐུ་ཡི་ཆུ་སྐྱེས་ཚོམ་བུ་མདོ་ཁམས་ལྷ་ཐོག་ཡུལ་ན་བཞད།།

གང་ཁྱོད་བལྟམས་པའི་ཞིང་མཆོག་དེ་ལ་བཀྲ་ཤིས་རྟགས་མཚན་ཕྱོགས་ཀུན་ཁྱབ།།

ཡུལ་གྱི་གདུལ་བྱར་དམ་པའི་ངང་ཚུལ་བཅོས་མིན་གཤིས་ཀར་རྗེན་པར་གསལ།།
སྔོན་བསགས་བག་ཆགས་ཉམ་ཆུང་འགྲོ་ལ་མ་ཡིས་བུ་ལ་བརྩེ་བ་ལྟར།།
ལོ་ངོ་བདུན་ཙམ་དཀྱུས་མའི་ཚུལ་གྱིས་བསྟན་དང་འགྲོ་བའི་དོན་མཛད་དོ།།

གློ་བུར་ལས་དེ་རྒྱལ་མཆོག་གོང་མའི་བསླུ་མེད་ཚད་མའི་ཞལ་ཆེམས་དང་།།
ཀྭན་ཏིང་གོ་ཤྲི་ཡབ་སྲས་རྣམ་གཉིས་འཁྲུལ་བྲལ་གཟིགས་པའི་ཡེ་ཤེས་ངོར།།
བོད་ཀྱི་སྤྲུལ་སྐུ་ཐོག་མར་གྲགས་པའི་འཇིག་རྟེན་དབང་ཕྱུག་ངོས་འཛིན་གཞུག །
ཆོས་བརྒྱུད་རིས་མེད་བླ་ཆེན་རྣམས་ཀྱིས་དཔྱད་གསུམ་དག་པའི་རྒྱབ་སྐྱོར་སྟེང་།།

དུས་མཁྱེན་གདན་ས་འོག་མིན་མཚུར་མདོར་ན་རིམ་གསེར་ཁྲིར་མངའ་གསོལ་སྐབས།།
རྒྱ་བོད་གསེར་ཐམ་སྐུ་ཡི་གཡས་གཡོན་ཨུཏྤལ་རྣ་རྒྱན་ལེགས་ཕྱུངས་ཏེ།།
ཚོགས་སྡེ་ཁག་གི་ལས་སྣེས་གཙོས་པའི་དད་ལྡན་མི་དམངས་ཁྲི་ཕྲག་གིས།།
དད་པའི་སྤུ་ལོང་རླུང་གིས་གཡོ་བཞིན་རྟེན་འབྲེལ་མཛད་སྒོ་ལེགས་གྲུབ་རྗེས།།

བསླབ་པ་ལམ་གྱི་ངང་ཚུལ་བཟུང་སྟེ་རིགས་ཀྱི་གཙོ་བདག་བཤེས་གཉེན་མདུན།།
འདོན་དང་རྟ་དབྱངས་འབུད་རྡུང་དཀྲོལ་གསུམ་མཐོང་བ་རྒྱུད་པའི་ཕྱག་ལེན་དང་།།
སྒྲ་སྒྱུར་མར་པའི་ཡབ་སྲས་བརྒྱུད་པའི་ཕྱག་ཆེན་ཆོས་དྲུག་ལ་སོགས་པར།།
ལུང་རིག་དག་པའི་སྦྱངས་པ་དེ་ནི་རི་རྒྱལ་རྩེ་མོར་རབ་བཀོད་ཅིང་།།

གདོང་དམར་བོད་པས་སྐྱབས་དང་རེ་ས་རྨི་ལམ་ཚུན་ཆད་ཁྱེད་ལ་བཅོལ།།
རྒྱ་ནག་གཞུང་གིས་ཆབ་སྲིད་ལས་གནས་ཁྱོད་ལ་འབུལ་རྒྱུའི་སྟ་གོན་བགྱིས།།
དེ་དང་དེ་འདྲའི་མཛད་ཚུལ་ངང་ལ་རེ་ཞིག་ཕྲིན་ལས་བསྐྱངས་པའི་མཐར།།
ཀ་རབས་གོང་མའི་དོན་བརྒྱུད་འཛིན་པའི་དུས་བཟང་ཐུགས་ངོར་ཤར་བའི་རྐྱེན།།

རྒྱལ་མཆོག་གོང་མ་ཞིང་གཤེགས་ཞབས་ཀྱི་གདན་ས་ཆེན་པོ་དེ་ཉིད་དང་།།
དོན་བརྒྱུད་མི་ཉམས་ལེགས་པར་འཛིན་པའི་བཀའ་བརྒྱུད་གྲུབ་ཆེན་སྲས་པོ་ཁག །
དབང་ལུང་མན་ངག་རབ་ཏུ་ཕྱུགས་པའི་དམ་ཚིག་གཙང་མའི་བླ་སྤྲུལ་སོགས།།
ཡིད་ལ་བརྣགས་པའི་འདོར་མེད་དོན་དེ་མྱུར་བར་འགྲུབ་ཆེད་མཛད་ཚུལ་ལ།།

ཤར་ཕྱོགས་ཡུལ་ན་ཤིན་ཏུ་གྲགས་པའི་ཧི་མ་ལ་ཡི་རི་བོའི་ཕྲག །
ཚ་གྲང་བཀྲེས་སྐོམ་དང་དུ་བླངས་ཏེ་ཞབས་སོར་ཉིན་གྲངས་འཁོད་པའི་རྗེས།།
བལ་ཡུལ་རྒྱལ་ཁམས་སྐད་ཅིག་བརྒལ་ཞིང་བཞུགས་སྒར་རྡ་རམ་ས་ཉིད་ལ།།
བགེགས་སོགས་བར་ཆད་རྩད་ནས་མེད་པའི་སྐུ་ཁམས་བདེ་འབྱོར་ལེགས་གྲུབ་བོ།།

ཕོ་བྲང་ནང་མར་སྐྱབས་མགོན་མཆོག་དང་རིས་མེད་ཆོས་བརྒྱུད་བླ་ཆེན་དང་།།
གསེར་ཞལ་དགྱེས་འཛོམས་བསྐལ་བཟང་བྱུང་བས་གུས་འདུད་དར་ཁ་ཕན་ཚུན་འབུལ།།
ཕྱག་ཟུང་འཇུས་པའི་པར་རིས་ཁག་རྣམས་གསར་འགྱུར་བརྒྱུད་ལམ་ཡོངས་སུ་ཁེངས།།
འཛམ་གླིང་ས་ཕྱོགས་གང་ཞིག་ཡིན་ཡང་ཉིད་ཀྱི་གནས་ཚུལ་ཡིག་བཞིན་བགྲངས།།

དབང་ཆེན་དཔོན་དང་ཤེས་ཡོན་ཅན་རྣམས་གང་ཁྱེད་མཇལ་ཕྱིར་གཤོར་མཁན་མང་།།
གཟུར་གནས་སྐྱེ་བོ་གྲངས་ཀྱིས་མི་ལོངས་ཁྱོད་ལ་རེ་ལྟོས་བྱེད་མཁན་མང་།།
གང་ལྟར་མགོན་ཁྱོད་འཕགས་ཡུལ་ཞབས་སོར་བཀྲ་ཤིས་བདེ་འབྱོར་འཁོད་པ་དེས།།
འཛམ་གླིང་ཧྲིལ་པོ་ཡུད་ཙམ་ཉིད་ལ་གཡོ་འགུལ་གཉིས་པ་བྱས་ཙ་ན།།

གུ་དོགས་ཅན་ལ་སྙིང་ཁར་ཟུག་གཟེར་བསྟུད་མར་སྐྱེ་བའི་འགོ་ཙམ་ཞིང་།།
གཟུར་གནས་སྐྱེ་བོར་རེ་བའི་འཕར་མ་སླར་ཡང་ཐེངས་གཅིག་སླེབ་འགོ་བརྩམས།།
ཚ་གྲང་རེག་བྱས་གཅིག་གིས་གཅིག་བཅོམ་ཆོས་ཉིད་དོན་ལ་གནས་ཙ་ན།།
ཡུན་རིང་སྙིང་ལ་ལེགས་པར་བརྣགས་པའི་ཐུགས་དགོངས་རྣམས་ཀྱང་རྒྱང་དུ་བྲལ།།

གངས་རིའི་ས་ནས་འཕགས་ཡུལ་ཉིད་ལ་སྐྱབས་བཅོལ་འོང་མཁན་ཆེས་མང་ཡང་།།
བཞུགས་སྒར་ས་ནས་སྟོད་རྒྱུད་གྲྭ་ཚང་ཡང་བཅོལ་ཕེབས་མཁན་ཁྱེད་ཉིད་ཙམ།།
དེ་དང་དེ་འདྲའི་གནས་སྟངས་ཉིད་ལ་རེ་བའི་དོན་རྣམས་ཡིབ་བཞིན་པར།།
ཅི་ཡང་ཡིད་ལ་སེམས་པར་མི་བྱེད་བཟོད་པའི་ཕ་རོལ་ཕྱིན་རྫོགས་པ།།

དེ་བས་ཀྭན་ཏིང་ཏཱ་ཡི་སི་ཏུ་པདྨ་དོན་ཡོད་གྲུབ་པ་དང་།།
གོ་ཤྲི་རྒྱལ་ཚབ་མི་འགྱུར་གོ་ཆ་རྣམ་གཉིས་གཙོས་པའི་ཡབ་སྲས་མདུན།།
གོང་མའི་དོན་བརྒྱུད་ཆད་ལྷག་མེད་པའི་གདམས་ངག་ཇི་སྙེད་མཆིས་པ་རྣམས།།
བུམ་པ་གང་བྱོའི་དཔེ་ཡི་ཚུལ་དུ་ལེགས་པར་གསན་ནས་ཡོངས་གྲུབ་ཅིང་།།

མདོ་བསྔགས་དོན་ལ་རྩེ་མོར་སོན་པའི་མཁན་ཆེན་མཁན་ཆུང་རྣམ་པའི་དྲུང་།།
གཞུང་ཆེན་ཁག་ལ་གསན་བསམ་འཕར་མ་སླར་ཡང་ལེན་གཅིག་མཛད་པ་དང་།།
ཆོས་བརྒྱུད་རིས་མེད་མཁས་པའི་དྲངས་ནས་བགྲོ་གླེང་ལྷུག་པོར་བགྱིས་པའི་ཕྱིར།།
ལྟ་བའི་གནད་ལ་སྒྲོ་འདོགས་ཆོད་དེ་གྲུབ་པའི་རྒྱལ་ཁམས་མཐོན་པོར་གཤེགས།།

དེང་རབས་མི་ཡི་བློ་དང་མཐུན་པའི་སྐད་རིགས་མི་གཅིག་དུ་མ་དང་།།
རང་བྱུང་ཁམས་ལ་ཞིག་ཏུ་འཇུག་པའི་སྐྱེས་དངོས་ཚན་རིག་ལ་སོགས་པར།།
དུས་ཚོད་གང་ཁོམ་འབད་པ་ཆེན་པོས་སྦྱངས་པ་མཐར་ཕྱིན་མཛད་ཙ་ན།།
མཁས་པའི་གྲལ་ནང་ལྷན་ཅིག་བཞུགས་དུས་ཀུན་གྱི་བསྔགས་པའི་ཡུལ་དུ་གྱུར།།

རྒྱལ་མཆོག་གོང་མའི་གདན་ས་ཉིད་ལ་ཕེབས་རྒྱུའི་ཆོག་མཆན་མི་སྤྲོད་ཅིང་།།
མདོ་བསྔགས་གཞུང་ལ་སློབ་གཉེར་བགྱིད་སའི་བཤད་གྲྭ་འཛུགས་ཡུལ་མི་གནང་བ།།
རང་ཉིད་བཞུགས་སའི་གཟིམ་ཁང་འགྲིག་ཙམ་རྒྱག་སའི་ས་ཡང་མི་བསྟེར་བ།།
མདོར་ན་ཕར་འགྲོ་ཚུར་འོང་བདེ་བའི་རང་དབང་ཙམ་ཡང་མེད་ན་ཡང།།

ཡོད་མཁན་དག་ལས་རྣམ་པར་རྒྱལ་ནས་བཀའ་བརྒྱུད་སང་གྷའི་སྨོན་ལམ་དང་།།
གཞུང་ཆེན་ཁག་ལ་བརྡར་ཤ་གཅོད་སའི་བཀའ་བརྒྱུད་དགུན་ཆོས་ཆེན་མོ་གཉིས།།
རང་བྱུང་ཁམས་ལ་གཅེས་སྤྲས་བྱེད་སའི་ཁོར་ཡུག་སྲུང་སྐྱོབ་ཚོགས་པ་སོགས།།
སྤྱི་ཚོགས་ཁྲོད་དུ་གཟེངས་སུ་ཐོན་པའི་ཁྱེད་ཀྱི་མཛད་བཟང་འབད་མེད་འཆར།།

ཆོས་ལུགས་ཕན་ཚུན་མཐུན་སྒྲིལ་ལག་གདང་གཅིག་ཏུ་སྦྲེལ་བའི་དར་ཆེན་འཕྱར།།
རྒན་རབས་རྣམས་ལ་ཐུགས་ཀློང་ཟབ་མོས་དྲན་འཕྲུལ་དབེན་པའི་གུས་ཤིང་འདུད།།
ཉག་ཐག་འགྲོ་ལ་ནོར་སོགས་བསྟབས་ནས་སྦྱིན་པའི་ཕ་རོལ་ཡོངས་སུ་རྫོགས།།
ཤེས་རིག་སྤོངས་པའི་མཁས་པ་རྣམས་དང་ཐུགས་ཡིད་འོ་ཆུ་གཅིག་ཏུ་འདྲེས།།

ཉེ་ཆར་དུས་ཀྱི་སྐྱ་རེངས་གསར་པའི་སྐད་ཅིག་བསྙོན་མེད་འཆར་བའི་སྐབས།།
ཨ་རི་ཡོ་རོབ་རྒྱལ་ཁམས་གཉིས་ནང་ཆིབས་བསྒྱུར་བཀའ་དྲིན་ལེགས་བསྩལ་ནས།།
བྱམས་བརྩེས་བརྒྱན་པའི་ཁོར་ཡུག་གནད་དེ་བརྗོད་གཞིར་བཟུང་བའི་བཀའ་སློབ་ཁག །
ནུབ་ཕྱོགས་སྐྱེ་བོའི་སེམས་ཁམས་ངོས་ལ་ལྕེ་ཡི་བདུད་རྩིར་འགྱུར་ཙ་ན།།

མགོན་པོ་གང་ལ་བསྔགས་པའི་གཟེངས་རྟགས་རིན་ཐང་ཅན་རྣམས་ལེན་མང་འབུལ།།
དེའི་ཕྱིར་ཁྱེད་ཀྱིས་མཛད་བཟང་ཁག་གིས་ཤར་ནུབ་སྐྱེ་བོའི་སྒོ་གསུམ་འཕྲོགས།།
ངེས་པའི་དོན་ལ་རྒྱལ་སྲས་ཡིན་ཡང་དྲང་པོའི་དོན་དུ་མི་གཟུགས་ཤིག །
དེས་ན་ཕྱི་ནང་གནོན་ཤུགས་ཆེ་ཡང་གྲགས་པའི་མཚན་སྙན་འབར་སོང་ལགས།།

ཞེས་པའི་རྩོམ་ཐུང་འདི་ནི་རྒྱལ་དབང་ཀརྨ་པའི་སྐུའི་འཁྲུངས་སྐར་ལ། རྟེན་འབྲེལ་གྱི་མེ་ཏོག་ཚོམ་བུའི་དོད་དུ་དད་པའི་ངང་ལ་སྒོ་ཀུན་ནས་གཏོར་བར་དམིགས་ཏེ། རྡ་སའི་ཁུལ་མེན་ལར་གྷེན་ཇིའི་རང་ཁྱིམ་དུ་བྲིས་པར་དགེའོ། །